ਐਸ ਏ ਐਸ ਨਗਰ (ਮੋਹਾਲੀ), 21 ਜੂਨ 18  : ਰਾਣਾ ਹੈਂਡੀਕਰਾਫਟਸ ਇੰਟਰਨੈਸ਼ਨਲ (ਰਜਿ) ਦੇ ਸਾਹਿਤਕ ਵਿੰਗ ਵਲੋਂ ਸਥਾਨਕ ਫੇਸ-4 ਦੇ ਬਾਲ ਭਵਨ ਵਿਖੇ ਇਕ ਜਾਨਦਾਰ ਤੇ ਸ਼ਾਨਦਾਰ ਸਮਾਰੋਹ ਦੌਰਾਨ ਨਾਮਵਰ ਸ਼ਾਇਰ ਕਸ਼ਮੀਰ ਘੇਸਲ ਦੀ ਤੀਸਰੀ ਪੁਸਤਕ 'ਯਾਦਾਂ ਦੇ ਘੁੱਟ' ਲੋਕ-ਅਰਪਣ ਕਰਨ ਦੇ ਨਾਲ-ਨਾਲ ਕਵੀ -ਦਰਬਾਰ ਦਾ ਆਯੋਜਨ ਕੀਤਾ ਗਿਆ । ਇਸ ਸਮਾਰੋਹ ਵਿਚ ਸ੍ਰੀਮਤੀ ਗੁਰਸ਼ਰਨ ਕੌਰ, ਡਾਇਰੈਕਟਰ ਭਾਸ਼ਾ ਵਿਭਾਗ ਨੇ ਬਤੌਰ ਮੁੱਖ ਮਹਿਮਾਨ ਸ਼ਿਰਕਤ ਕੀਤੀ ਜਦ ਕਿ ਡਾ. ਹਰਨੇਕ ਸਿੰਘ ਸਹਾਇਕ ਡਾਇਰੈਕਟਰ ਭਾਸ਼ਾ ਵਿਭਾਗ ਅਤੇ ਡਾ. ਸੁਰਜੀਤ ਸਿੰਘ ਖੁਰਮਾ ਜਿਲਾ ਭਾਸ਼ਾ ਅਫਸਰ ਬਠਿੰਡਾ (ਰਿਟਾਇਰਡ) ਨੇ ਵਿਸ਼ੇਸ਼ ਮਹਿਮਾਨ ਵਜੋਂ  ਹਾਜ਼ਰੀ ਭਰੀ। ਸਮਾਗਮ ਦੀ ਪ੍ਰਧਾਨਗੀ ਉੱਘੇ ਸ਼ਾਇਰ ਵਰਿਆਮ ਬਟਾਲਵੀ ਵਲੋਂ ਕੀਤੀ ਗਈ। ਇਨਾਂ ਤੋਂ ਇਲਾਵਾ ਪ੍ਰਧਾਨਗੀ ਮੰਡਲ ਵਿੱਚ ਸ਼ਾਇਰ ਕਸ਼ਮੀਰ ਘੇਸਲ, ਉਹਨਾਂ ਦੀ ਜੀਵਨ-ਸਾਥਣ ਸ੍ਰੀਮਤੀ ਊਸ਼ਾ ਰਾਣੀ ਅਤੇ ਮੰਚ ਦੇ ਚੇਅਰਮੈਨ ਬਲਵੰਤ ਸਿੰਘ ਮੁਸਾਫਿਰ ਵੀ ਸੁਸ਼ੋਭਿਤ ਸਨ।

ਸ਼੍ਰੋਮਣੀ ਪੰਜਾਬੀ ਲਿਖਾਰੀ ਸਭਾ ਪੰਜਾਬ (ਰਜਿ.) ਵਲੋਂ 'ਬਾਲ ਮਨਾਂ ਦਾ ਰਾਹ-ਦਸੇਰਾ' ਅਵਾਰਡ ਨਾਲ ਸਨਮਾਨਿਤ ਸ਼ਾਇਰ ਕਸ਼ਮੀਰ ਘੇਸਲ ਦੀ ਲੋਕ-ਅਰਪਣ ਹੋਈ ਪੁਸਤਕ 'ਯਾਦਾਂ ਦੇ ਘੁੱਟ' 'ਤੇ ਭਾਵਪੂਰਤ ਪਰਚਾ ਡਾ ਪੰਨਾ ਲਾਲ ਮੁਸਤਫਾਬਾਦੀ ਵਲੋਂ ਪੜਿਆ ਗਿਆ ਅਤੇ ਚਰਚਾ  ਰਾਜ ਕੁਮਾਰ ਸਾਹੋਵਾਲੀਆ ਵਲੋਂ ਕੀਤੀ ਗਈ ।  ਲੋਕ ਅਰਪਣ ਹੋਈ ਪੁਸਤਕ ਵਿਚੋਂ ਹੀ 'ਜਿੰਦੜੀ ਦੋ ਪਲ ਦੀ' ਗੀਤ  ਮਲਕੀਤ ਕਲਸੀ ਵਲੋਂ ਅਤੇ ਇਕ ਗੀਤ ਨਵਜੋਤ ਚੌਹਾਨ ਵਲੋਂ ਪੇਸ਼ ਕੀਤਾ ਗਿਆ। ਉਪਰੰਤ ਸ਼ਾਇਰ ਘੇਸਲ ਆਪਣੀ ਲੋਕ ਅਰਪਣ ਹੋਈ ਪੁਸਤਕ ਵਿਚੋਂ ਕੁਝ ਰਚਨਾਵਾਂ ਨਾਲ ਸਰੋਤਿਆਂ ਦੇ ਰੂ -ਬ- ਰੂ ਹੋਇਆ । ਸਮੁੱਚੇ ਪ੍ਰਧਾਨਗੀ ਮੰਡਲ ਵਲੋਂ ਸ਼ਾਇਰ ਦੀ ਪੁਖਤਾ ਸ਼ਾਇਰੀ ਅਤੇ ਉਸਾਰੂ ਸੋਚ ਦੀ ਸਰਾਹਨਾ ਕਰਦਿਆਂ, ਲੋਕ ਅਰਪਣ ਹੋਈ ਪੁਸਤਕ ਨੂੰ ਸਮਾਜਿਕ ਵਿਸ਼ਿਆਂ ਨਾਲ ਲਬਰੇਜ਼ ਪੁਸਤਕ ਦੱਸਿਆ ਗਿਆ।  

ਇਸ ਸਮਾਰੋਹ ਦੇ ਦੂਸਰੇ ਦੌਰ ਦੀ ਸੁਰੂਆਤ ਕਰਦਿਆਂ ਸ਼ਾਇਰ ਸੁਖਵਿੰਦਰ ਨੂਰਪੁਰੀ ਨੇ ਇੱਕ ਧਾਰਮਿਕ ਗੀਤ ਪੇਸ਼ ਕੀਤਾ । ਫਿਰ ਸ਼ਾਇਰ ਮਹਿੰਗਾ ਸਿੰਘ ਕਲਸੀ, ਆਰ ਡੀ ਮੁਸਾਫਿਰ, ਅਹੀਰ ਹੁਸ਼ਿਆਰਪੁਰੀ, ਮਹਿੰਦਰ ਸਿੰਘ, ਕਿਸ਼ਨ ਕਿਸ਼ਨਪੁਰੀ ਨੇ  ਵਧੀਆ ਹਾਜ਼ਰੀ ਲਗਵਾਈ । ਇਸ ਉਪਰੰਤ ਜਿੱਥੇ ਵੱਖ-ਵੱਖ ਸਟੇਜਾਂ ਤੋਂ ਨਾਮਨਾ ਖੱਟ ਚੁੱਕੇ ਲੋਕ-ਗਾਇਕ ਕੁਲਬੀਰ ਸੈਣੀ, ਭੁਪਿੰਦਰ ਮਟੌਰੀਆ, ਗੁਰਵਿੰਦਰ ਗੁਰੀ, ਦਰਸ਼ਨ ਤਿਊਣਾ, ਅਤੇ ਸਤਪਾਲ ਲਖੋਤਰਾ ਨੇ ਆਪੋ ਆਪਣੀ ਲਾ-ਜੁਵਾਬ ਗਾਇਕੀ ਨਾਲ ਸਰੋਤਿਆਂ ਨੂੰ ਕੀਲਿਆ ਉਥੇ ਰਣਜੋਧ ਰਾਣਾ, ਸਰਬਣ ਸਾਬਰ, ਬਲਵਿੰਦਰ ਅੱਤਰੀ, ਬਲਦੇਵ ਪ੍ਰਦੇਸੀ, ਅਮਰੀਕ ਬੱਲੋਪੁਰੀ, ਬਲਵੰਤ ਸਿੰਘ ਮੁਸਾਫਿਰ, ਵਰਿਆਮ ਬਟਾਲਵੀ, ਦਲਬੀਰ ਸਰੋਆ, ਸੁਮਿੱਤਰ ਸਿੰਘ, ਬਹਾਦਰ ਸਿੰਘ ਗੋਸਲ, ਸਾਗਰ ਸਿੰਘ ਭੂਰੀਆ, ਰਾਣਾ ਬੂਲਪੁਰੀ, ਹਰਬੰਸ ਪ੍ਰੀਤ, ਕਸ਼ਮੀਰ ਕੌਰ ਸੰਧੂ, ਬਿਮਲਾ ਗੁਗਲਾਨੀ ਅਤੇ ਗੁਰਸ਼ਰਨ ਕਾਕਾ ਆਦਿ ਵਲੋਂ ਵੀ ਆਪੋਂ-ਆਪਣੀ ਕਾਵਿਕ ਹਾਜਰੀ ਬਾਖੂਬੀ ਲੁਆਉਂਦਿਆਂ ਸਰੋਤਿਆਂ ਦਾ ਭਰਪੂਰ ਮਨੋਰੰਜਨ ਕੀਤਾ। ਸ਼ਾਮ ਦੇਰ ਤੱਕ ਚੱਲੇ ਇਸ ਭਾਵਪੂਰਤ ਪ੍ਰੋਗਰਾਮ ਦਾ ਮੰਚ ਸੰਚਾਲਨ ਸਟੇਜਾਂ ਦੇ ਧਨੀ ਰਾਜ ਕੁਮਾਰ ਸਾਹੋਵਾਲੀਆ ਵਲੋਂ ਲਾ-ਜੁਵਾਬ  ਢੰਗ ਨਾਲ ਕੀਤਾ ਗਿਆ।

ਅੰਤ ਵਿਚ ਮੰਚ ਵਲੋਂ ਡਾਇਰੈਕਟਰ ਭਾਸ਼ਾ ਵਿਭਾਗ, ਸਹਾਇਕ ਡਾਇਰੈਕਟਰ ਭਾਸ਼ਾ ਵਿਭਾਗ, ਜਿਲਾ ਭਾਸ਼ਾ ਅਫਸਰ ਅਤੇ ਕਸ਼ਮੀਰ ਘੇਸਲ ਨੂੰ ਯਾਦਗਾਰੀ ਚਿੰਨ ਭੇਂਟ ਕੀਤੇ ਗਏ ਜਦ ਕਿ ਕਸ਼ਮੀਰ ਘੇਸਲ ਦੀ ਸ਼ਰੀਕੇ-ਹਯਾਤ ਵਲੋਂ ਮੁਖ ਮਹਿਮਾਨ ਅਤੇ ਵਿਸ਼ੇਸ਼ ਮਹਿਮਾਨਾਂ ਨੂੰ ਪੰਜਾਬੀ ਮਾਂ ਬੋਲੀ ਦੀ ਸੇਵਾ ਅੱਗੇ ਨਾਲੋਂ ਵੀ ਵੱਧ ਚੜ ਕੇ ਕਰਨ ਲਈ ਪੈੱਨ ਭੇਂਟ ਕੀਤੇ ਗਏ।

ਪ੍ਰੋਗਰਾਮ ਵਿੱਚ ਹੋਰਾਂ ਤੋਂ ਇਲਾਵਾ ਮਨਜੀਤ ਸਿੰਘ, ਮੰਟੂ ਕੁਮਾਰ, ਲਾਹੌਰੀ ਰਾਮ,ਬੀ ਆਰ ਰੰਗਾੜਾ, ਤੇਜਾ ਸਿੰਘ, ਵਿਨੋਦ ਕੁਮਾਰ, ਗੁਰਪ੍ਰੀਤ ਸਿੰਘ, ਸਤਵੰਤ ਸਿੰਘ, ਕਾਕਾ ਧਰੁਵ, ਕਿਸ਼ਨ ਬਲਦੇਵ, ਐਮ ਐਸ ਮੁਨੀ ਆਦਿ ਵਲੋਂ ਵੀ ਨਿੱਠ ਕੇ ਹਾਜਰੀ ਭਰੀ ਗਈ। ਇਸ ਤਰਾਂ ਆਪਣੀਆਂ ਨਿਵੇਕਲੀਆਂ ਪੈੜਾਂ ਛੱਡਦਾ ਹੋਇਆ  ਇਹ ਪ੍ਰੋਗਰਾਮ ਸੰਪੰਨ ਹੋਇਆ; ਜਿਸ ਦੀ ਸਾਹਿਤਕ ਅਦਾਰਿਆਂ ਵਿਚ ਖੂਬ ਚਰਚਾ ਹੈ।