ਚੰਡੀਗੜ੍ਹ, 8 ਮਾਰਚ : ਅੰਤਰਰਾਸ਼ਟਰੀ ਮਹਿਲਾ ਦਿਵਸ 'ਤੇ ਪੰਜਾਬ ਕਲਾ ਭਵਨ ਵਿਖੇ ਵਿਸ਼ਾਲ ਪ੍ਰੋਗਰਾਮ ਹੋਇਆ, ਜਿਸ ਵਿੱਚ ਮਹਿਲਾਵਾਂ ਦੇ ਯੋਗਦਾਨ ਅਤੇ ਉਹਨਾਂ ਦੇ ਹੱਕਾਂ ਬਾਰੇ ਚਰਚਾ ਕੀਤੀ ਗਈ [ਮੁੱਖ ਮਹਿਮਾਨ, ਯੂਟੀ.ਚੰਡੀਗੜ੍ਹ ਦੇ ਪ੍ਰਬੰਧਕੀ ਸਲਾਹਕਾਰ ਸ਼੍ਰੀ ਵਿਜੈ ਦੇਵ ਅਤੇ ਪੰਜਾਬ ਕਲਾ ਪਰੀਸ਼ਦ ਦੀ ਚੇਅਰਪਰਸਨ ਬੀਬੀ ਹਰਜਿੰਦਰ ਕੌਰ ਨੇ ਡਾ ਗੁਰਮਿੰਦਰ ਸਿੱਧੂ ਦੀ ਧੀਆਂ ਨੂੰ ਕੁੱਖਾਂ ਵਿਚਲੀ ਹੱਤਿਆ ਤੋਂ ਬਚਾਉਣ , ਜਨਮ ਬਾਅਦ ਜ਼ਿੰਦਗੀ ਦੇ ਸਾਰੇ ਹੱਕ ਦਿਵਾਉਣ ਅਤੇ ਔਰਤਾਂ ਨੂੰ ਸ਼ਕਤੀਵਾਨ ਕਰਨ ਵਾਲੀਆਂ ਲਿਖਤਾਂ ਦੀ ਕਿਤਾਬ ' ਧੀਆਂ ਨਾਲ ਜੱਗ ਵਸੇਂਦਾ ' ਲੋਕ-ਅਰਪਣ ਕੀਤੀ। ਇਸ ਮੌਕੇ ਆਪਣੀ ਜਾਨ ਦੀ ਬਾਜ਼ੀ ਲਗਾ ਕੇ ਔਰਤਾਂ ਦਾ ਨਾਮ ਉੱਚਾ ਕਰਨ ਵਾਲੀ ਨੀਰਜਾ ਭਨੋਟ ਦੀ ਤਸਵੀਰ (ਪੋਰਟਰੇਟ) ਤੋਂ ਪਰਦਾ ਹਟਾਉਣ ਦੀ ਰਸਮ ਵੀ ਅਦਾ ਕੀਤੀ ਗਈ ਅਤੇ ਉਸਦੇ ਵੱਡੇ ਭਰਾ ਵਲੋਂ ਨੀਰਜਾ ਦੀ ਜ਼ਿੰਦਗੀ ਬਾਰੇ ਚਾਨਣਾ ਪਾਇਆ ਗਿਆ ।

ਉਪਰੰਤ ਡਾ: ਗੁਰਮਿੰਦਰ ਸਿੱਧੂ, ਸਾਧਨਾ ਸੰਗਰ, ਸੰਗੀਤਾ ਗੁਪਤਾ, ਲਵਲੀਨ ਭੱਠਲ ਅਤੇ ਮਹਿਲਾਵਾਂ ਦੇ ਹੱਕਾਂ ਲਈ ਜੂਝਣ ਵਾਲੀਆਂ ਹੋਰ ਸ਼ਖਸ਼ੀਅਤਾਂ ਦਾ ਸਨਮਾਨ ਕੀਤਾ ਗਿਆ। ਇਸ ਸਮੇਂ ਡਾ: ਬਲਦੇਵ ਸਿੰਘ ਖਹਿਰਾ, ਭੂਪਿੰਦਰ ਬੇਕਸ, ਬਲਕਾਰ ਸਿੱਧੂ,  ਸੁਸ਼ੀਲ ਦੁਸਾਂਝ, ਕਮਲ ਦੁਸ਼ਾਂਝ, ਗੁਲਜ਼ਾਰ ਸਿੰਘ ਸੰਧੂ, ਡਾ: ਸੁਰਜੀਤ ਕੌਰ ਸੰਧੂ, ਗੁਰਚਰਨ ਬੋਪਾਰਾਇ, ਸਵਰਨ ਵਿਮਕੋ, ਜਸਬੀਰ ਭੁੱਲਰ ਅਤੇ ਕੈਨੇਡਾ ਤੋਂ ਆਏ ਸ: ਜਰਨੈਲ ਸਿੰਘ ਬਸੋਤਾ ਸਮੇਤ ਹੋਰ ਬਹੁਤ ਸਾਰੇ ਲੇਖਕ ਅਤੇ ਬੁਧੀਜੀਵੀ ਹਾਜ਼ਿਰ ਸਨ।

09/03/16