ਥੀਏਟਰ ਖੇਤਰ ਵਿਚ, 'ਬਾਨੀ ਸ਼ਰਮਾ ' ਦੇ ਨਾਂਉਂ ਤੇ ਨਾਮ ਕਮਾ ਚੁੱਕੀ, ਪੰਜਾਬ ਦੇ ਸ਼ਹਿਰ ਜੀਰਾ (ਫਿਰੋਜਪੁਰ) ਵਿਖੇ ਡੇਰੇ ਲਾਈ ਬੈਠੀ ਚੁਲਬਲੀ ਮੁਟਿਆਰ ਨੇ ਅਦਾਕਾਰੀ ਵਿਚ ਐਸੇ ਮਾਅਰਕੇ ਮਾਰ ਦਿਖਾਏ, ਜਿਨਾਂ ਸਦਕਾ ਆਮ ਨੂੰ ਪਤਾ ਹੀ ਨਹੀ ਕਿ ਉਸ ਦਾ ਅਸਲ ਨਾਮ 'ਓਮਾ ਭਾਰਤੀ' ਵੀ ਹੈ।

ਪਿਤਾ ਸ੍ਰੀ ਸੁਭਾਸ਼ ਚੰਦਰ ਦੇ ਗ੍ਰਹਿ ਵਿਖੇ ਮਾਤਾ ਸਸ਼ੀ ਬਾਲਾ ਜੀ ਦੀ ਪਾਕਿ ਕੁੱਖੋਂ ਜਨਮੀ ਓਮਾ ਭਾਰਤੀ ਨੂੰ ਬਚਪਨ ਤੋਂ ਸਕੂਲ ਪੜਦਿਆਂ ਹੀ ਨੱਚਣ-ਟੱਪਣ ਅਤੇ ਸਕਿੱਟਾਂ ਆਦਿ ਵਿਚ ਭਾਗ ਲੈਣ ਦੀ ਚੇਟਕ ਲੱਗ ਗਈ ਸੀ। ਪੜਾਈ ਦੀ ਸਮਾਪਤੀ ਉਪਰੰਤ ਉਸ ਨੇ 2002 ਵਿਚ ਥੀਏਟਰ-ਜਗਤ ਵਿਚ ਬਕਾਇਦਾ ਪੈਰ ਧਰਿਆ। ਓਮਾ ਭਾਰਤੀ ਨੇ ਦੱਸਿਆ ਕਿ ਉਸ ਨੇ ਥੀਏਟਰ ਦੇ ਮਹਾਂ-ਰਥੀ ਮੇਘ ਰਾਜ ਰੱਲਾ ਦੀ ਟੀਮ, 'ਲੋਕ ਕਲਾ ਮੰਚ ਜੀਰਾ' ਦੁਆਰਾ ਥੀਏਟਰ ਵਿਚ ਐਂਟਰੀ ਕੀਤੀ ਅਤੇ ਉਨਾਂ ਨਾਲ ਅੱਜ ਤੱਕ ਕੰਮ ਕਰਨ ਦਾ ਮੌਕਾ ਮਿਲਿਆ, ਜਿਨਾਂ ਵਲੋਂ ਇਸ ਖੇਤਰ ਵਿਚ ਉਸ ਨੂੰ 'ਬਾਨੀ ਸ਼ਰਮਾ' ਦਾ ਨਾਮ ਮਿਲਿਆ। ਵਧਦੇ ਸਫਲ ਕਦਮੀ ਬਾਨੀ ਸ਼ਰਮਾ ਨੇ ਆਪਣੀ ਕਲਾ ਅਤੇ ਮਿਹਨਤ ਸਦਕਾ ਟੈਲੀ ਫਿਲਮਾਂ ਦੀ ਦਹਿਲੀਜ 'ਤੇ ਦਸਤਕ ਦਿੰਦਿਆਂ ਗੁਰਨਾਮ ਸਿੱਧੂ ਦੀ ਕਮੇਡੀ ਟੈਲੀ ਫਿਲਮ, 'ਸੱਪ ਕੱਢਾਂਗੇ', ਡਾਇਰੈਕਟਰ ਦਿਲਾਵਰ ਸਿੱਧੂ ਦੀ ਟੈਲੀ ਫਿਲਮ, 'ਗੁੱਡ ਮੈਨ ਇੰਨ ਪੰਗਾ' ਅਤੇ ਹੈਪੀ ਦੀ, 'ਜੀਤ ਪੈਂਚਰਾਂ ਵਾਲਾ' ਦੀ 'ਆਖਰੀ ਰਾਤ' ਆਦਿ ਕਈ ਟੈਲੀ-ਫਿਲਮਾਂ ਵਿਚ ਆਪਣੀ ਅਦਾਕਾਰੀ ਦੇ ਜੌਹਰ ਦਿਖਾਏ। ਇਸ ਤੋ ਇਲਾਵਾ ਮਿੰਟੂ ਜੱਟ (ਭਾਨਾ ਭਗੌੜਾ) ਨਾਲ, 'ਪਰਾਲੀ ਨੂੰ ਅੱਗ', 'ਠੇਕੇ ਬੰਦ', 'ਸਾਈਕਲ' ਅਤੇ 'ਜ਼ਿੰਮੇਵਾਰੀ' ਆਦਿ ਦਰਜਨ ਦੇ ਕਰੀਬ ਸਕਿੱਟਾਂ ਦੇ ਨਾਲ-ਨਾਲ ਅਨਗਿਣਤ ਸਟੇਜੀ ਸ਼ੋਅ ਵੀ ਕੀਤੇ। ਇੱਥੇ ਹੀ ਬਸ ਨਹੀ, ਕਾਫੀ ਗੀਤਾਂ ਵਿਚ ਵੀ ਅਦਾਕਾਰੀ ਕੀਤੀ ਹੈ, ਉਸ ਨੇ। ਬਾਨੀ ਸ਼ਰਮਾ ਨੇ ਦੱਸਿਆ ਕਿ ਹੁਣ ਵੱਡੇ ਪਰਦੇ ਦੀ ਇਕ ਫਿਲਮ ਵਿਚ ਉਸ ਦੀ ਸ਼ੂਟਿੰਗ ਚੱਲ ਰਹੀ ਹੈ, ਜਿਹੜੀ ਕਿ ਅੰਤਮ ਪੜਾਅ ਵਿਚ ਹੈ ਅਤੇ ਜਲਦੀ ਹੀ ਰੀਲੀਜ ਹੋ ਰਹੀ ਹੈ।

ਇਸ ਮੁਕਾਮ ਤੱਕ ਪਹੁੰਚਣ ਦੀਆਂ ਪ੍ਰਾਪਤੀਆਂ ਦਾ ਸਿਹਰਾ, ਪਰਿਵਾਰ ਵਿਚ, ਬਾਨੀ ਸ਼ਰਮਾ ਜਿੱਥੇ ਆਪਣੇ ਜੀਵਨ-ਸਾਥੀ ਜਸਵੀਰ ਸਨੋਤਰਾ ਨੂੰ ਦਿੰਦੀ ਹੈ, ਉਥੇ ਥੀਏਟਰ ਖੇਤਰ ਦੀਆਂ ਸ਼ਖਸ਼ੀਅਤਾਂ ਮੇਘ ਰਾਜ ਰੱਲਾ, ਦਿਲਾਵਰ ਸਿੱਧੂ, ਮਿੰਟੂ ਜੱਟ (ਭਾਨਾ ਭਗੌੜਾ) ਦਾ ਵੀ ਬੜੇ ਅਦਬ ਨਾਲ ਜ਼ਿਕਰ ਕਰਦਿਆਂ ਉਨਾਂ ਵਲੋਂ ਮਿਲੇ ਸਹਿਯੋਗ ਦਾ ਧੰਨਵਾਦ ਕਰਦੀ ਹੈ। ਇਸਤੋਂ ਇਲਾਵਾ ਉਹ ਧੰਨਵਾਦ ਕਰਦੀ ਹੈ, ਦੇਸ਼-ਵਿਦੇਸ਼ ਵਿਚ ਬੈਠੇ ਰੱਬ ਵਰਗੇ ਉਨਾਂ ਹਜਾਰਾਂ-ਲੱਖਾਂ ਕਲਾ-ਪ੍ਰੇਮੀਆਂ ਦਾ, ਜਿਹੜੇ ਉਸ ਦੀ ਕਲਾ ਨੂੰ ਸਲਾਹੁੰਦੇ, ਹੱਲਾ-ਸ਼ੇਰੀ ਦਿੰਦੇ ਅਤੇ ਮਣਾਂ-ਮੂੰਹੀ ਪਿਆਰ ਬਖਸ਼ਦੇ, ਜੋਸ਼-ਖ਼ਰੋਸ਼ ਭਰੀ ਰੱਖਦੇ ਹਨ, ਉਸਦੇ ਕਦਮੀਂ।

'ਬੈੱਸਟ ਅਦਾਕਾਰਾ' ਦਾ ਐਵਾਰਡ ਅਤੇ ਹੋਰ ਅੱਡ-ਅੱਡ ਅਨੇਕਾਂ ਮਾਣ ਸਨਮਾਨ ਖੱਟ ਚੁੱਕੀ, ਥੀਏਟਰ ਨੂੰ ਹੀ ਆਪਣਾ ਰੱਬ ਮੰਨ ਕੇ ਪੂਜਣ ਵਾਲੀ ਪੰਜਾਬਣ ਮੁਟਿਆਰ ਬਾਨੀ ਸ਼ਰਮਾ ਲਈ ਉਹ ਦਿਨ ਦੂਰ ਨਹੀਂ ਜਦੋਂ ਕਲਾ-ਪ੍ਰੇਮੀਆਂ ਦੇ ਬੁੱਲਾਂ ਉਤੇ ਉਸ ਦਾ ਨਾਮ ਹੋਰ ਵੀ ਗੂਹੜਾ ਹੋ ਕੇ ਦਿਲਾਂ ਦੀ ਧੜਕਣ ਬਣ ਜਾਵੇਗਾ, ਇਹ ਨਾਮ। ਰੱਬ ਕਰੇ ਉਹ ਸੱਜਰੀ ਸਵੇਰ ਜਲਦੀ ਆਵੇ ! ਓਸ ਪਰਵਰਦਗਾਰ ਦੇ ਦਰ ਤੇ ਅਰਦਾਸ-ਜੋਦੜੀ ਹੈ, ਮੇਰੀ ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ (9876428641)
ਸੰਪਰਕ : ਬਾਨੀ ਸ਼ਰਮਾ, ਜ਼ੀਰਾ (ਫਿਰੋਜਪੁਰ) (97810-40080, 98031-20080)

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com