ਜੋ ਇਨਸਾਨ ਆਪਣੇ-ਆਪ ਵਿੱਚ ਹਿੰਮਤ ਦੀ ਭਾਵਨਾ ਰੱਖਦਾ ਹੋਵੇ, ਉਹ ਦੂਜਿਆਂ ਦੁਆਰਾ ਬਣਾਏ ਗਏ ਰਸਤਿਆਂ ਨੂੰ ਛੱਡ ਕੇ ਆਪਣੀ ਅਜਿਹੀ ਪਗਡੰਡੀ ਬਣਾ ਕੇ ਤੁਰਦੇ ਹਨ,ਕਿ ਉਹ ਆਮ ਲੋਕਾਂ ਨੂੰ ਵੀ ਆਪਣੇ ਪਿੱਛੇ ਚੱਲਣ ਲਈ ਮਜਬੂਰ ਕਰ ਲੈਂਦੇ ਨੇ। ਇਹ ਇੱਕ ਅਟੱਲ ਸੱਚਾਈ ਹੈ ਕਿ ਸਮਾਂ ਕਦੇ ਵੀ ਕਿਸੇ ਦੇ ਪਿੱਛੇ ਨਹੀਂ ਚੱਲਿਆ, ਸਗੋਂ ਉਹ ਤਾਂ ਆਪਣੀ ਮਸਤ ਚਾਲੇ ਚੱਲਦਾ ਹੀ ਰਹਿੰਦਾ। ਬਾਕੀ ਬਹੁਤ ਹੀ ਘੱਟ ਲੋਕ ਹੁੰਦੇ ਹਨ, ਜੋ ਸਮੇਂ ਦੀ ਕਦਰ ਕਰਦੇ ਹਨ ਤੇ ਉਹਦੇ ਨਾਲ ਆਪਣਾ ਕਦਮ-ਦਰ-ਕਦਮ ਮਿਲਾਕੇ ਚੱਲਦੇ ਨੇ ਅਤੇ ਜਿਹੜੇ ਅਜਿਹਾ ਕਰਦੇ ਨੇ, ਜਨਾਬ ਉਹੀ ਲੋਕ ਆਪਣੀਆਂ ਮਿਥੀਆਂ ਹੋਈਆ ਮੰਜ਼ਿਲਾਂ ਤੇ ਇੱਕ-ਨਾ-ਇੱਕ ਦਿਨ ਜ਼ਰੂਰ ਪਹੁੰਚਦੇ ਨੇ। ਅੱਜ ਸੰਗੀਤ ਦਾ ਹਰ ਕੋਈ ਦੀਵਾਨਾ ਹੈ ਤੇ ਹਰ ਕੋਈ ਏਸ ਸੰਗੀਤਕ ਖੇਤਰ ਵਿੱਚ ਮੱਲਾਂ ਮਾਰਨੀਆਂ ਚਾਹੁੰਦਾ ਹੈ, ਜਿੰਨ੍ਹਾਂ ‘ਚੋ ਬਹੁਤੇ ਤਾਂ ਸੰਗੀਤਕ ਸੂਝ ਪੱਖੋਂ ਬਿਲਕੁੱਲ ਹੀ ਕੋਰੇ ਹੁੰਦੇ ਹਨ, ਜੋ ਆਪਣੇ ਅਮੀਰ ਮਾਪਿਆਂ ਦੀ ਧਨ-ਦੌਲਤ ਨੂੰ ਆਪਣੀ ਫੋਕੀ ਸੋਹਰਤ ਲਈ, ਰਾਤੋਂ-ਰਾਤ ਸਟਾਰ ਬਨਣ ਦੇ ਚਾਹਵਾਨ ਇਸ ਖੇਤਰ ਵਿੱਚ ਆਉਦੇ ਹਨ, ਉਹਨਾਂ ਲਈ ਤਾਂ “ਨਵਾਂ ਨੌ ਦਿਨ ਤੇ ਪੁਰਾਣਾ ਸੌ ਦਿਨ” ਵਾਲੀ ਕੁਹਾਵਤ ਵਾਲੀ ਗੱਲ ਹੁੰਦੀ ਐ, ਜਿੰਨ੍ਹੀਂ ਦੇਰ ਚੈਨਲਾਂ ਤੇ ਐਡ ਉਹਨਾਂ ਦੇਰ ਉਹਨਾਂ ਦੀ ਬੱਲੇ-ਬੱਲੇ…। ਖ਼ੈਰ…ਇਸ ਦੇ ਉਲਟ ਜੋ ਲੋਕ ਇਸ ਸੰਗੀਤਕ ਖੇਤਰ ਵਿੱਚ ਆਪਣੇ ਉਸਤਾਦਾਂ ਦੀ ਮਾਰ ਸਹਿ-ਸਹਿ ਕੇ, ਜ਼ਿੰਦਗੀ ਦੀਆਂ ਅਨੇਕਾਂ ਤੰਗੀਆਂ -ਤੁਰਸ਼ੀਆਂ ‘ਚੋਂ ਗੁਜ਼ਰ ਕੇ, ਆਪਣੀ ਅਣਥੱਕ ਮਿਹਨਤ, ਦ੍ਰਿੜ-ਇਰਾਦੇ ਅਤੇ ਆਪਣੀ ਸ਼ੁਰੀਲੀ ਅਵਾਜ਼ ਦੇ ਨਾਲ ਇਸ ਖੇਤਰ ਵਿੱਚ ਆਉਦੇ ਨੇ, ਉਹਨਾਂ ਦੇ ਕਦਮ ਦੇਰ-ਸਵੇਰ ਆਪਣੀ ਮਿਥੀ ਹੋਈ ਮੰਜ਼ਿਲ ਵੱਲ ਵੱਧਦੇ ਹੀ ਰਹਿੰਦੇ ਨੇ। ਬਾਕੀ ਜਿਸ ਮਨ ਵਿੱਚ ਕੁਝ ਅਲੱਗ ਕਰਨ ਦੀ ਤਮੰਨਾ ਹੋਵੇ, ਜਨਾਬ! ਉਹਦੇ ਲਈ ਉੱਪਰ ਵਾਲਾ ਕੋਈ-ਨਾ-ਕੋਈ ਢੋਹ ਲਾ ਈ ਦਿੰਦਾ, ਅਜਿਹਾ ਹੀ ਹੈ, ਜੋ ਆਪਣਾ ਨਵਾਂ ਟਰੈਕ “ਫੁੱਲਾਂ ਵਾਲੀ ਕਾਰ” ਲੈ ਕੇ ਹਾਜ਼ਿਰ ਐ – ਗਿੱਲ ਕਮਲ

ਮੋਗਾ ਜਿਲ੍ਹਾਂ ਦੇ ਪਿੰਡ ਭਿੰਡਰ ਖੁਰਦ ਦੇ ਜੱਦੀ ਜੰਮਪਲ ਪਿਤਾ ਸ਼. ਮੇਜਰ ਸਿੰਘ ਅਤੇ ਮਾਤਾ ਸ੍ਰੀਮਤੀ ਸੁਖਦੇਵ ਕੌਰ ਦੇ ਘਰ 5 ਮਾਰਚ 1979 ਨੂੰ ਜਨਮੇਂ, ਮਾਪਿਆਂ ਦੇ ਲਾਡਲੇ ਗਿੱਲ ਕਮਲ ਨੂੰ 6ਵੀਂ ਕਲਾਸ ਚ’ ਪੜਦਿਆ ਹੀ ਗਾਇਕੀ ਦੀ ਚੇਟਕ ਲੱਗੀ, ਜਦੋਂ ਮੈਡਮ ਪ੍ਰੀਆ ਸਟੋਨੀ ਦੀ ਪ੍ਰੇਰਨਾ ਸਦਕਾ ਸਕੂਲੀ ਵਾਰ-ਸਭਾ ਵਿੱਚ ਗਾਉਣ ਦਾ ਮੌਕਾ ਮਿਲਿਆ। ਉਸ ਤੋਂ ਬਾਅਦ ਤਾਂ ਫੇਰ ਸਕੂਲੀ ਪੜ੍ਹਾਈ ਦੌਰਾਨ ਹੋਣ ਵਾਲੀਆ ਸੰਗੀਤਕ ਗਤੀ-ਵਿਧੀਆ ਵਿੱਚ ਵੱਧ-ਚੜ੍ਹਕੇ ਹਿੱਸਾ ਲੈਣਾ ਅਤੇ ਮੱਲਾਂ ਮਾਰਨੀਆ। ਆਖ਼ਿਰ ਸੰਗੀਤ ਪ੍ਰਤੀ ਆਪਣੀ ਰੁਚੀ ਨੂੰ ਬਰਕਰਾਰ ਰੱਖਣ ਲਈ ਉਹ ਆਪਣੇ ਉਸਤਾਦ ਛਿੰਦਾ ਅਨਪੜ੍ਹ ਜੀ ਦੇ ਜਾ ਚਰਨੀ ਲੱਗਾ, ਜਿੰਨ੍ਹਾਂ ਤੋਂ ਗਿੱਲ ਕਮਲ ਨੇ ਬਕਾਇਦਾ ਗਾਇਕੀ ਦੀਆ ਬਾਰੀਕੀਆ ਨੂੰ ਸਿੱਖਿਆ। ਫੇਰ ਉਸ ਨੇ ਆਪਣੀ ਪਹਿਲੀ ਐਲਬੰਮ “ਗੱਭਰੂ ਦਾ ਦਿਲ” ਸਰੋਤਿਆ ਦੇ ਸਨਮੁੱਖ ਕੀਤੀ, ਜਿਸ ਨਾਲ ਉਸ ਨੇ ਆਪਣੇ ਗਾਇਕੀ ਖੇਤਰ ਦਾ ਆਗਾਜ਼ ਕੀਤਾ। ਫੇਰ ਦੂਜੀ ਐਲਬੰਮ “ਕਰ ਲੈ ਪਿਆਰ” ਲੈ ਕੇ ਉਹ ਆਪਣੇ ਸਰੋਤਿਆ ਦੇ ਰੂ-ਬ-ਰੂ ਹੋਇਆ। ਸੰਗੀਤਕਾਰ ਨਿੰਮਾ ਵਿਰਕ ਦੇ ਸੰਗੀਤ ਨਾਲ ਸਿੰਗਾਰੀ, ਇਸ ਐਲਬੰਮ ਦੇ ਗੀਤਾਂ ਨੂੰ ਸੇਮਾ ਇੰਦਗੜ੍ਹ, ਜਸਬੀਰ ਭੱਟੀ ਭਿੰਡਰ, ਛਿੰਦਾ ਅਨਪੜ੍ਹ ਲੰਗੇਆਣੀਆ ਅਤੇ ਰਾਜ ਫਤਹਿਗੜ੍ਹ ਕੋਰੋਟਾਣਾ ਨੇ ਕਲਮ-ਬੱਧ ਕੀਤਾ ਸੀ, ਜਿਸ ਨਾਲ ਉਹਨੇ ਪੰਜਾਬੀ ਗਾਇਕੀ ਦੇ ਵਿਹੜੇ ਵਿੱਚ ਆਪਣੀ ਇੱਕ ਵਿਲੱਖਣ ਪਹਿਚਾਣ ਬਣਾਈ, ਜਿਹਨੂੰ ਉਹਦੇ ਚਾਹੁੰਣ ਵਾਲਿਆ ਨੇ ਮਨਾਂ-ਮੂੰਹੀਂ ਪਿਆਰ/ ਸਤਿਕਾਰ ਦਿੱਤਾ। ਫੇਰ ਜਦ ਗਾਇਕ ਗਿੱਲ ਕਮਲ ਨੇ ਆਪਣੀ ਐਲਬੰਮ “ਸਾਰੀ ਸਾਰੀ ਰਾਤ” ਨਾਲ ਆਪਣੀ ਹਾਜ਼ਰੀ ਲੁਵਾਈ ਤਾਂ ਉਹਦੇ ਚਹੇਤਿਆਂ ਨੇ ਉਹਦਾ ਭਰਵਾਂ ਹੁੰਗਾਰਾ ਦਿੱਤਾ, ਜਿਸ ਨਾਲ ਗਿੱਲ ਕਮਲ ਦਾ ਨਾਂ ਨਾਮਵਰ ਕਲਾਕਾਰਾਂ ਦੀ ਕਤਾਰ ਚ’ ਆਉਣ ਲੱਗਾ।

ਪੰਜਾਬ ਦਾ ਸ਼ੁਰੀਲਾ ਤੇ ਹੋਣਹਾਰ ਗਾਇਕ ਗਿੱਲ ਕਮਲ ਹੁਣ ਪ੍ਰੋਡਿਊਸਰ ਸੁਰਜੀਤ ਸਿੰਘ ਲਵਲੀ ਦੀ ਦੇਖ-ਰੇਖ ਹੇਠ ਮਿਊਜ਼ਿਕ ਕੇਅਰ ਕੰਪਨੀ ਰਾਂਹੀ ਆਪਣੇ ਚਹੇਤਿਆਂ ਦੀ ਕਚਹਿਰੀ ਨਵਾਂ ਟਰੈਕ “ਫੁੱਲਾਂ ਵਾਲੀ ਕਾਰ” ਲੈ ਕੇ ਹਾਜ਼ਿਰ ਹੋਇਆ ਹੈ। ਗੀਤਕਾਰ ਹਰਜਿੰਦਰ ਚੱਕ ਕੰਨੀਆ ਦੇ ਕਲਮ-ਬੱਧ ਕੀਤੇ ਇਸ ਗੀਤ ਦਾ ਸੰਗੀਤ ਪੈਵੀ ਨੇ ਬੜੀ ਹੀ ਰੂਹ ਨਾਲ ਤਿਆਰ ਕੀਤਾ। ਜਿਸ ਦੇ ਵੀਡੀਓ ਡਾਇਰੈਕਟਰ ਮਿਸਟਰ ਪ੍ਰੈਟੀ ਨੇ, ਜਿੰਨ੍ਹਾਂ ਨੇ ਇੱਕ ਅੱਲੜ ਕੁੜੀ ਦੇ ਆਪਣੇ ਮਹਿਬੂਬ ਪ੍ਰਤੀ ਹੁੰਦੀਆ ਭਾਵਨਾਵਾਂ ਨੂੰ ਇਸ ਵੀਡੀਓ ਰਾਂਹੀ ਬੜੇ ਹੀ ਵਧੀਆ ਤਰੀਕੇ ਨਾਲ ਫ਼ਿਲਮਾਂਕਣ ਕੀਤਾ। ਵੱਖ-ਵੱਖ ਚੈਨਲਾਂ ਦੀ ਸ਼ਾਨ ਬਣੇ ਇਸ ਗੀਤ ਨੂੰ ਬਹੁਤ ਪਿਆਰ/ ਸਤਿਕਾਰ ਮਿਲ ਰਿਹਾ।

ਐਸ ਵੇਲੇ ਗਾਇਕ ਗਿੱਲ ਕਮਲ ਦੀ ਸੰਗੀਤ ਪ੍ਰਤੀ ਲਗਨ ਤੇ ਸਖਤ ਮਿਹਨਤ ਨੂੰ ਦੇਖਦਿਆਂ, ਇਹ ਅੰਦਾਜ਼ਾ ਸਹਿਜੇ ਹੀ ਲਾਇਆ ਜਾ ਸਕਦਾ ਹੈ ਕਿ ਆਉਣ ਵਾਲੇ ਸਮੇਂ ਚ’ ਉਹਦਾ ਸੰਗੀਤਕ ਖੇਤਰ ਵਿੱਚ ਇੱਕ ਵੱਖਰਾ ਮੁਕਾਮ ਹੋਵੇਗਾ। ਪੰਜਾਬੀ ਗਾਇਕੀ ਜਗਤ ਤੇ ਉਸਦੇ ਸਰੋਤਿਆਂ ਨੂੰ ਵੀ ਗਿੱਲ ਕਮਲ ਤੋਂ ਬਹੁਤ ਆਸ਼ਾਂ/ ਉਮੀਦਾ ਹਨ। ਸ਼ਾਲਾ! ਇਹ ਮਾਣਮੱਤਾ ਗਾਇਕ ਹਰ ਦਿਨ ਨਵੀਆਂ ਬੁਲੰਦੀਆਂ ਛੂਹੇ। ਜਿਲ੍ਹਾ ਮੋਗਾ ਦੇ ਪਿੰਡ ਭਿੰਡਰ ਖੁਰਦ ਵਿੱਚ ਆਪਣੇ ਪੂਰੇ ਪਰਿਵਾਰ ਨਾਲ ਖੁਸ਼ੀਆ ਭਰੀ ਜ਼ਿੰਦਗੀ ਗੁਜ਼ਾਰ ਰਿਹਾ ਗਾਇਕ ਗਿੱਲ ਕਮਲ ਆਪਣੀ ਸ਼ੁਰੀਲੀ ਤੇ ਬੁਲੰਦ ਅਵਾਜ਼ ਦੇ ਨਾਲ ਹਰ ਇੱਕ ਦਿਲ ‘ਤੇ ਰਾਜ਼ ਕਰੇ ਅਤੇ ਆਉਣ ਵਾਲੇ ਕੱਲ੍ਹ ‘ਚ ਉਹਦਾ ਸੰਗੀਤਕ ਖੇਤਰ ਵਿੱਚ ਇੱਕ ਵੱਖਰਾ ਮੁਕਾਮ ਹੋਵੇ।
 

ਗੁਰਬਾਜ ਗਿੱਲ 98723-62507
{ਸੰਪਾਦਕ- ਜਸਟ ਪੰਜਾਬੀ}
ਨੇੜੇ ਬੱਸ ਸਟੈਂਡ, ਸਾਹਮਣੇ ਛੋਟਾ ਗੇਟ, ਬਠਿੰਡਾ (ਪੰਜਾਬ) -151001

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com