ਅੱਜ ਦੀ ਨੌਜਵਾਨ ਪੀੜ੍ਹੀ ਵਿੱਚ ਗਾਇਕੀ ਪ੍ਰਤੀ ਰੁਝਾਨ ਦਿਨ ਬਦਿਨ ਵਧ ਰਿਹਾ ਹੈ। ਹਰ ਰੋਜ਼ ਟੈਲੀਵੀਯਨ ਚੈਨਲਾਂ ਜਾਂ ਯੂ ਟਿਊਬ ਉੱਪਰ ਰਿਲੀਜ਼ ਹੋ ਰਹੇ ਨਿੱਤ ਨਵੇਂ ਗਾਣੇ ਪੰਜਾਬੀ ਯੂਥ ਦੇ ਅੰਦਰ ਛੁਪੀ ਪ੍ਰਤਿਭਾ ਨੂੰ ਆਪੋ ਆਪਣੇ ਸਰੋਤਾ ਵਰਗ ਵਿੱਚ ਸਥਾਪਿਤ ਕਰਨ ਵਿੱਚ ਸਹਾਈ ਹੋ ਰਹੇ ਹਨ। ਗਾਇਕੀ ਦੇ ਨਾਲ਼ ਨਾਲ਼ ਇੱਕ ਬਹੁਤ ਵੱਡਾ ਸਰੋਤਾ ਵਰਗ ਵੀ ਪੈਦਾ ਹੋ ਰਿਹਾ ਹੈ ਜਿਹੜਾ ਹਰ ਸਮੇਂ ਕੋਈ ਨਾ ਕੋਈ ਨਵਾਂ ਗੀਤ ਤਲਾਸ਼ ਕਰਦਾ ਅਤੇ ਸੁਣਦਾ ਦਿਖਾਈ ਦਿੰਦਾ ਹੈ ਤਕਰੀਬਨ ਹਰ ਘਰ ਅੰਦਰ। ਗਾਣਿਆਂ ਦੀ ਆਮਦ ਦੀ ਇਸ ਬਹੁਤਾਤ ਅੰਦਰ ਇਹ ਵੀ ਤਸੱਲੀ ਨਾਲ਼ ਨਹੀਂ ਕਿਹਾ ਜਾ ਸਕਦਾ ਕਿ ਸਭ ਕੁੱਝ ਵਧੀਆ ਹੀ ਆ ਰਿਹਾ ਹੈ ਅਤੇ ਉੱਚ ਪਾਏ ਦਾ ਵੀ ਹੈ। ਚੰਗੀ ਗਾਇਕੀ ਦੇ ਨਾਲ਼ ਨਾਲ਼ ਮਾੜੀ ਗਾਇਕੀ ਵੀ ਚਾਰੇ ਪਾਸੇ ਆਪਣਾ ਪਸਾਰ ਕਰਨ ਵਿੱਚ ਅੱਡੀ ਚੋਟੀ ਦਾ ਜ਼ੋਰ ਲਗਾ ਰਹੀ ਹੈ। ਇਸ ਸਭ ਕਾਸੇ ਦੇ ਬਾਵਜੂਦ ਵੀ ਕੁੱਝ ਅਜਿਹੇ ਗਾਇਕ ਹਨ ਜਿਹੜੇ ਕਿਸੇ ਵੀ ਕੀਮਤ ਉੱਪਰ ਵਿਰਸੇ ਵਿੱਚ ਮਿਲੀਆਂ ਆਪਣੀਆਂ ਕਦਰਾਂ ਕੀਮਤਾਂ ਅਤੇ ਵਿਰਾਸਤੀ ਗਾਇਕੀ ਨੂੰ ਨਹੀਂ ਭੁਲਾਉਣਾ ਚਾਹੁੰਦੇ ਉਸ ਕਿਸਮ ਦੇ ਗਾਇਕਾਂ ਵਿੱਚ ਇੱਕ ਨਵੀਂ ਪ੍ਰਤਿਭਾ ਸੰਪੰਨ ਗਾਇਕਾ 'ਸੈਫ਼ੀ ਸੇਖੋਂ' ਦੀ ਆਮਦ ਹੋਈ ਹੈ ਜਿਸਦੀ ਖੂਬਸੂਰਤ ਆਵਾਜ਼ ਵਿੱਚ ਅਜਿਹੀ ਕਸ਼ਿਸ਼ ਹੈ ਕਿ ਸੁਣਨ ਵਾਲ਼ਾ ਤਾਂ ਇੱਕ ਵਾਰ ਅਸ਼ ਅਸ਼ ਕਰ ਉੱਠਦਾ ਹੈ। ਅਜਿਹੀ ਫੋਕ ਬੁਲੰਦ ਆਵਾਜ਼ ਬਹੁਤ ਘੱਟ ਗਾਇਕਾਵਾਂ ਦੇ ਹਿੱਸੇ ਆਈ ਹੈ ਜਿਸਦੇ ਮਕਬੂਲ ਹੋਣ ਦੀ ਬੁਲੰਦੀ ਕਿਧਰੇ ਬਹੁਤ ਹੀ ਨੇੜੇ ਛੁਪੀ ਹੋਈ ਹੈ।

ਆਪਣੇ ਪਹਿਲ ਪਲੇਠੀ ਦੇ ਗੀਤ "ਟੱਕਰਾਂ" ਨਾਲ ਪੰਜਾਬੀ ਗਾਇਕੀ ਵਿੱਚ ਆਪਣੀ ਦਮਦਾਰ ਹਾਜ਼ਰੀ ਲਵਾ ਚੁੱਕੀ ਸੈਫ਼ੀ ਸੇਖੋਂ ਦਾ ਜਨਮ ਦੋ ਦਿਸੰਬਰ ਨੂੰ ਪਿਤਾ ਸ੍ਰ: ਐੱਸ ਐੱਸ ਸੇਖੋਂ ਅਤੇ ਮਾਤਾ ਸ਼੍ਰੀ ਮਤੀ ਸੁਖਰਾਜ ਕੌਰ ਹੋਰਾਂ ਦੀ ਕੁੱਖੋਂ ਜ਼ਿਲਾ ਮਾਨਸਾ ਦੇ ਪਿੰਡ ਕਿਸ਼ਨਗੜ੍ਹ ਫਰਵਾਹੀ ਵਿੱਚ ਹੋਇਆ। ਆਪਣੀ ਮੁੱਢਲੀ ਪੜ੍ਹਾਈ ਉਸਨੇ ਮਾਤਾ ਪਿਤਾ ਨਾਲ਼ ਰਹਿੰਦਿਆਂ ਹੀ ਮਾਨਸਾ ਦੇ ਸਕੂਲਾਂ ਵਿੱਚ ਪ੍ਰਾਪਤ ਕੀਤੀ। ਆਪਣੇ ਸਕੂਲ ਟਾਈਮ ਦੌਰਾਨ ਉਹ ਹਮੇਸ਼ਾ ਆਪਣੇ ਸਕੂਲ ਦੇ ਗਿੱਧੇ ਦੀ ਨਹੀਂ ਬਲਕਿ ਭੰਗੜੇ ਦੀ ਕੈਪਟਨ ਹੁੰਦੀ ਸੀ ਜਿਸ ਦੀਆਂ ਬਾਰੀਕੀਆਂ ਉਸਨੇ ਭੰਗੜਾ ਉਸਤਾਦ ਸੀ ਭੋਲਾ ਕਲਹਿਰੀ ਤੋਂ ਸਿੱਖੀਆਂ ਸਨ। ਪਲੱਸ ਵਨ ਵਿੱਚ ਉਸਨੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿੱਚ ਦਾਖਲਾ ਲੈ ਲਿਆ ਅਤੇ ਫਿਰ ਤਾਂ ਚੱਲ ਸੋ ਚੱਲ ਉਸਨੇ ਪਹਿਲਾਂ ਹਾਸਪੀਟੈਲਿਟੀ, ਏਅਰਲਾਈਨਜ਼ ਐਂਡ ਟੂਰਿਜ਼ਮ ਵਿੱਚ ਬੀ ਐੱਸ ਸੀ ਕਰਨ ਤੋਂ ਬਾਦ ਐੱਮ ਐੱਸ ਸੀ ਆਈ ਟੀ ਵੀ ਕਰ ਲਈ ਅਤੇ ਪੂਰਨ ਤੌਰ ਉੱਤੇ ਆਪਣੀਂ ਪ੍ਰਤਿਭਾ ਨੂੰ ਦੁਨੀਆਂ ਦੇ ਕੋਨੇ ਕੋਨੇ ਵਿੱਚ ਲਈ ਰਾਗਾਂ ਦੀ ਸਿੱਖਿਆ ਸ੍ਰੀ ਰਾਜਿੰਦਰ ਮੋਹਣੀ ਅਤੇ ਫੋਕ ਦੀ ਪੇਸ਼ਕਾਰੀ ਲਈ ਪੰਡਿਤ ਸ੍ਰੀ ਸ਼ਾਮ ਸਹੋਤਾ (ਕਰਨਾਲ) ਤੋਂ ਸਿੱਖਿਆ ਪ੍ਰਾਪਤ ਕਰਨੀ ਸ਼ੁਰੂ ਕਰ ਦਿੱਤੀ। ਆਪਣੇ ਮਾਤਾ ਪਿਤਾ ਇਲਾਵਾ ਉਸਦੇ ਰਿਸ਼ਤੇਦਾਰਾਂ, ਕਲਾਸ ਫ਼ੈਲੋਜ਼, ਦੋਸਤਾਂ ਅਤੇ ਉਸਦੇ ਨਿਰਦੇਸ਼ਕ ਅਨੀਤ ਸੇਖੋਂ ਦਾ ਉਸਨੂੰ ਬਹੁਤ ਵੱਡਾ ਸਹਿਯੋਗ ਪ੍ਰਾਪਤ ਹੈ ਜਿਹੜੇ ਹਰ ਸਮੇਂ ਉਸਨੂੰ ਹੋਸਲਾ ਅਫ਼ਜ਼ਾਈ ਦਿੰਦੇ ਰਹਿੰਦੇ ਹਨ ਅਤੇ ਉਸਦੀ ਬੁਲੰਦੀ ਲਈ ਦੁਆਵਾਂ ਮੰਗਦੇ ਹਨ।

ਸੈਫ਼ੀ ਸੇਖੋਂ ਦਾ ਸੁਪਨਾ ਹੈ ਆਪਣੀ ਜ਼ਿੰਦਗੀ ਦੀ ਰੋਜ਼ੀ ਰੋਟੀ ਸੁਰੱਖਿਅਤ ਕਰਕੇ ਇੱਕ ਦਿਨ ਉਹ ਪੂਰੀ ਦੀ ਪੂਰੀ ਸੂਫ਼ੀਆਨਾ ਅਤੇ ਕਲਾਸੀਕਲ ਗਾਇਕੀ ਨੂੰ ਸਮਰਪਿਤ ਹੋਕੇ ਉਸੇ ਹੀ ਰੰਗ ਵਿੱਚ ਰੰਗੀ ਜਾਵੇਗੀ। ਸੈਫ਼ੀ ਪੰਜਾਬੀ ਦੇ ਉਹਨਾਂ ਸਾਰੇ ਗੀਤਕਾਰਾਂ ਦਾ ਬਹੁਤ ਹੀ ਸਤਿਕਾਰ ਕਰਦੀ ਹੈ ਜਿਹਨਾਂ ਨੇ ਹਮੇਸ਼ਾ ਵਧੀਆ ਅਤੇ ਉਸਾਰੂ ਲਿਖਿਆ ਅਤੇ ਜਿਹਨਾਂ ਦੀ ਬਦੌਲਤ ਅੱਜ ਪੰਜਾਬੀ ਗਾਇਕੀ ਸਿਖਰਾਂ ਨੂੰ ਛੂੰਹਦੀ ਹੈ। ਉਹ ਉਹਨਾਂ ਮਹਾਨ ਸੰਗੀਤਕਾਰਾਂ ਨੂੰ ਹਮੇਸ਼ਾ ਨਤਮਸਤਕ ਹੁੰਦੀ ਹੈ ਜਿਹਨਾਂ ਦੀਆਂ ਸਿਰਜੀਆਂ ਧੁਨਾਂ ਇੱਕ ਗਾਇਕ ਅਤੇ ਸਰੋਤੇ ਅੰਦਰ ਰੌਸ਼ਨ ਰੌਸ਼ਨ ਕਰ ਦਿੰਦੀਆਂ ਹਨ। ਸ਼ਾਲਾ ਅਸੀਂ ਵੀ ਦੁਆ ਕਰਦੇ ਹਾਂ ਕਿ ਅਜਿਹੀ ਸੋਚ ਦੀ ਮਾਲਿਕ ਨੂੰ ਪ੍ਰਮਾਤਮਾ ਉਸ ਬੁਲੰਦੀ ਤੱਕ ਜਰੂਰ ਪੁਚਾਵੇ ਜਿੱਥੋਂ ਤੱਕ ਉਹ ਉੱਡਣਾ ਲੋਚਦੀ ਹੈ !!
ਹਰਬੰਸ ਬੁੱਟਰ ਕੈਨੇਡਾ

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com