ਪਿਛਲੇ ਦਿਨੀ ਦੂਰ-ਦਰਸ਼ਨ ਜਲੰਧਰ ਦੇ ਵਿਹੜੇ, 'ਨਵੀਆਂ ਕਲਮਾਂ' ਪ੍ਰੋਗਰਾਮ ਵਿਚ ਸ਼ਾਨਦਾਰ ਹਾਜਰੀਆਂ ਭਰ ਕੇ ਆਏ, ਸਾਹਿਤਕ-ਖੇਤਰ ਦੇ ਜਾਣੇ-ਪਛਾਣੇ ਹਸਤਾਖਰ ਜਸਪਾਲ ਵਧਾਈਆਂ ਦੀ ਕਲਮ ਕਵਿਤਾਵਾਂ, ਗੀਤਾਂ, ਕਹਾਣੀਆਂ ਅਤੇ ਆਰਟੀਕਲਾਂ ਦੀ ਸਿਰਜਣਾ ਕਰਦੀ ਗਿਆਰਾਂ ਸੌ ਦੀ ਗਿਣਤੀ ਦਾ, ਸ਼ਗਨਾਂ ਦਾ ਟੀਚਾ ਪੂਰਾ ਕਰ ਚੁੱਕੀ ਹੈ। ਇਨ੍ਹਾਂ ਵਿਚੋਂ ਪੁਸਤਕ-ਪ੍ਰਕਾਸ਼ਨਾ ਵਲ ਕਦਮ ਵਧਾਂਉਂਦਿਆਂ ਆਪਣੀਆਂ ਚੋਣਵੀਆਂ ਕਵਿਤਾਵਾਂ ਤੇ ਗੀਤਾਂ ਨੂੰ ਲੈ ਕੇ ਉਹ 'ਮਹਿੰਗੇ ਮੁੱਲ ਦੇ ਹੰਝੂ' ਨਾਂਉਂ ਦੀ ਆਪਣੀ ਪਲੇਠੀ ਪੁਸਤਕ ਸਾਹਿਤ-ਪ੍ਰੇਮੀਆਂ ਦੇ ਹੱਥਾਂ ਤੱਕ ਅੱਪੜਦੀ ਕਰ ਚੁੱਕਾ ਹੈ।

ਜਸਪਾਲ ਦੱਸਦਾ ਹੈ ਕਿ ਉਸਦੀ ਉਮਰ ਉਦੋ ਮਹਿਜ ਇਕ ਸਾਲ ਦੀ ਸੀ ਜਦੋਂ ਉਸ ਦੇ ਪਿਤਾ ਜੀ ਉਸਨੂੰ ਸਦੀਵੀ ਵਿਛੋੜਾ ਦੇ ਗਏ ਸਨ। ਫਿਰ, ਉਮਰ ਦੇ ਵੱਧਣ ਦੇ ਨਾਲ-ਨਾਲ ਪ੍ਰੇਸ਼ਾਨੀਆਂ ਵੀ ਵਧਦੀਆਂ ਚਲੀਆਂ ਗਈਆਂ। ਬੜੇ ਨਾਜੁਕ ਦੌਰ ਦਾ ਸਾਹਮਣਾ ਕਰਨਾ ਪਿਆ। ਬਸ, ਅਧੂਰੀਆਂ ਰੀਝਾਂ, ਟੁੱਟਦੇ ਸੁਪਨਿਆਂ ਅਤੇ ਉਦਰੇਵੇਂ ਨੇ ਲਿਖਣ ਲਈ ਹੱਥ ਕਲਮ ਫਭਾ ਦਿੱਤੀ। ਦਿਲ ਵਿੱਚ ਉਠਦੇ ਇਹਨਾ ਵਲਵਲਿਆਂ, ਮਜਬੂਰੀਆਂ ਅਤੇ ਤੁਫਾਨਾਂ, ਨੇ ਉਸ ਨੂੰ ਕਦੋਂ ਲੇਖਕ ਬਣਾ ਦਿੱਤਾ, ਇਸ ਬਾਰੇ ਉਸ ਨੂੰ ਪਤਾ ਹੀ ਨਹੀ ਚੱਲਿਆ।

'ਅਦਬੀ ਪਰਿਕਰਮਾਂ', 'ਸੁਖਨ ਸੁਨੇਹੇ', 'ਪੰਜਾਬੀ ਸੱਚ ਕਹੂੰ' 'ਰੁਪਾਣਾ ਸਮਾਚਾਰ' ਅਤੇ 'ਸੱਜਰੀ ਸਵੇਰ' ਆਦਿ ਅਖਬਾਰਾਂ ਤੇ ਮੈਗਜੀਨਾਂ ਦਾ ਸ਼ਿੰਗਾਰ ਬਣ ਚੁੱਕੇ ਜਸਪਾਲ ਨੇ ਮੁਲਾਕਾਤ ਦੌਰਾਨ ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਕਿਹਾ, 'ਮੇਰੀਆਂ ਰਚਨਾਵਾਂ ਅਖਬਾਰਾਂ ਜਾਂ ਮੈਗਜੀਨਾਂ ਵਿੱਚ ਛਪਣ ਉਪਰੰਤ ਪਾਠਕਾਂ ਵਲੋਂ ਫੋਨ ਜਰੀਏ ਦਿੱਤੇ ਜਾਂਦੇ ਅਥਾਹ ਪਿਆਰ ਅਤੇ ਉਹਨਾਂ ਵੱਲੋਂ ਜੋ ਦੁਵਾਵਾਂ ਦਿੱਤੀਆਂ ਜਾਂਦੀਆਂ ਹਨ ਉਨ੍ਹਾਂ ਨੂੰ ਸ਼ਬਦਾਂ ਵਿੱਚ ਬੰਨਣਾ ਮੇਰੇ ਲਈ ਮੁਸ਼ਕਿਲ ਹੈ। ਇਸ ਤੋਂ ਇਲਾਵਾ ਸ਼੍ਰੋਮਣੀ ਪੰਜਾਬੀ ਲਿਖਾਰੀ ਸਭਾ, ਪੰਜਾਬ (ਰਜਿ:) ਵੱਲੋਂ ਜਿੱਥੇ ਆਪਣੇ ਛੇਵੇਂ ਕਾਵਿ-ਸੰਗ੍ਰਹਿ 'ਕਲਮਾਂ ਦੇ ਸਿਰਨਾਂਵੇਂ'(287 ਕਲਮਾਂ), ਵਿਚ ਮੈਨੂੰ ਛਪਣ ਦਾ ਮਾਣ ਦਿੱਤਾ, ਉਥੇ ਮੈਨੂੰ ਇਸ ਸੰਸਥਾ ਵਲੋਂ ਸਰਟੀਫਿਕੇਟ ਦੇ ਕੇ ਵੀ ਸਨਮਾਨਿਤ ਕੀਤਾ ਗਿਆ।'

ਆਪਣੇ ਵਿਰਸੇ ਦੇ ਨਾਂਓ ਦੋ ਸ਼ਬਦ ਕਰਦਿਆਂ ਜਸਪਾਲ ਨੇ ਕਿਹਾ, 'ਸਾਡਾ ਪੰਜਾਬੀ ਸੱਭਿਆਚਾਰਕ ਵਿਰਸਾ ਬੇਹੱਦ ਅਮੀਰ ਹੈ। ਮੈਨੂੰ ਪੰਜਾਬੀ ਹੋਣ ਤੇ ਮਾਣ ਹੈ। ਆਖਰੀ ਸਾਹ ਤੱਕ ਮੇਰੀ ਇਹੀ ਕੋਸ਼ਿਸ਼ ਰਹੇਗੀ ਕਿ ਇਸ ਦੀ ਮਹਾਨਤਾ ਨੂੰ ਕਾਇਮ-ਦਾਇਮ ਰੱਖਣ ਵਿੱਚ ਯਥਾ-ਯੋਗ ਹਿੱਸਾ ਪਾਵਾਂ। ਪ੍ਰਮਾਤਮਾਂ ਮੈਨੂੰ ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਕਰਨ ਦਾ ਬੱਲ ਬਖਸ਼ੇ!'

ਲੇਖਣੀ ਦੇ ਖੇਤਰ ਵਿੱਚ ਜਸਪਾਲ ਜਿੱਥੇ ਆਪਣੇ ਪਰਿਵਾਰ ਵਲੋਂ ਮਿਲਦੇ ਆ ਰਹੇ ਸਾਥ ਦਾ ਜਿਕਰ ਕਰਦਾ ਹੈ,ਉਥੇ ਉਸ ਨੂੰ ਹਰ ਮੋੜ ਉਤੇ ਗਾਈਡ ਕਰਕੇ ਜਿਹਨੀਂ ਉਸ ਦਾ ਹੋਸਲਾ ਵਧਾਇਆ ਉਹਨਾਂ ਵਿੱਚ ਉਹ ਮੈਡਮ ਤਜਿੰਦਰ ਕੌਰ ਧਾਲੀਵਾਲ (ਚੇਅਰਪਰਸਨ, ਪੰਜਾਬ ਸਕੂਲ ਸਿੱਖਿਆ ਬੋਰਡ) ਪੰਜਾਬੀ ਗਾਇਕਾ ਸੁਦੇਸ਼ ਕੁਮਾਰੀ, ਲੋਕ ਗਾਇਕ ਹਰਿੰਦਰ ਸੰਧੂ, ਗੀਤਕਾਰ ਅਲਬੇਲ ਬਰਾੜ, ਗੀਤਕਾਰ ਕਿਰਪਾਲ ਮਾਹਣਾ ਅਤੇ ਕਵਿੱਤਰੀ ਹਰਪਿੰਦਰ ਰਾਣਾ ਜੀ ਦਾ ਵੀ ਬੜੇ ਮਾਣ-ਸਤਿਕਾਰ ਨਾਲ ਜਿਕਰ ਕਰਦਿਆਂ ਉਨ੍ਹਾਂ ਦਾ ਧੰਨਵਾਦ ਕਰਦਾ ਹੈ।

-ਪ੍ਰੀਤਮ ਲੁਧਿਆਣਵੀ, ਚੰਡੀਗੜ੍ਹ (9876428641)
ਸੰਪਰਕ-ਜਸਪਾਲ ਵਧਾਈਆਂ, ਪਿੰਡ ਵਧਾਈਆਂ (ਸ੍ਰੀ ਮੁਕਤਸਰ ਸਾਹਿਬ) (99140-43045)

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com