ਗੁਰੂਆਂ, ਪੀਰਾਂ-ਫਕੀਰਾਂ ਦੀ ਚਰਨ-ਛੋਹ ਪ੍ਰਾਪਤ ਜਿਲਾ ਫਤਿਹਗੜ੍ਹ ਸਾਹਿਬ ਦੇ ਪਿੰਡ ਸੈਂਪਲਾ ਵਿਖੇ ਸ੍ਰ: ਨਰਾਤਾ ਸਿੰਘ ਦੇ ਘਰ ਮਾਤਾ ਮਹਿੰਦਰ ਕੌਰ ਦੀ ਪਾਕਿ ਕੁੱਖੋਂ ਜਨਮੇ ਕਾਲਾ ਸੈਂਪਲੇ ਵਾਲਾ, ਗੀਤਕਾਰੀ ਖੇਤਰ ਵਿਚ ਕੋਈ ਨਵਾਂ ਨਾਂਓਂ ਨਹੀਂ। 'ਸਦਾ ਰਹਿੰਦੇ ਓ ਅਮੀਰਾਂ ਵੱਲ ਤੱਕਦੇ ਗਰੀਬਾਂ ਨੂੰ ਵੀ ਤੱਕਿਆ ਕਰੋ' ਸੁਪਰ ਹਿੱਟ ਹੋਏ ਗੀਤ ਨਾਲ ਚੰਗੀ ਪਛਾਣ ਬਣਾ ਚੁੱਕਾ ਹੈ ਇਹ ਸਖਸ਼। ਗਲੇ ਵਿਚ ਦਮ, ਸੁਰੀਲਾ-ਪਨ, ਮਿਠਾਸ ਅਤੇ ਹਰਕਤਾਂ ਹੋਣ ਕਰਕੇ ਹੁਣ ਗਾਇਕੀ ਵਾਲੇ ਪਾਸੇ ਨੂੰ ਵੀ ਉਸ ਨੇ ਕਈ ਗੀਤਾਂ ਨਾਲ ਲੋਕ-ਗਾਇਕਾਂ ਵਿਚ ਦਾਖਲਾ ਲੈ ਲਿਆ ਹੈ। ਹੁਣੇ ਹੁਣ ਜਿਨ੍ਹਾਂ ਦੋ ਗੀਤਾਂ ਨਾਲ ਉਸ ਨੇ ਹਾਜਰੀ ਲਗਵਾਈ ਹੈ, ਉਨ੍ਹਾਂ ਵਿਚੋਂ ਇਕ ਗੀਤ, 'ਚਾਰ ਦਿਨਾਂ ਦਾ ਮੇਲਾ' ਲਿਖਿਆ ਹੈ, ਗੀਤਕਾਰ ਗੁਰਿੰਦਰ ਗਿੱਲ ਇਟਲੀ ਨੇ, ਜਦ ਕਿ ਦੂਜਾ ਗੀਤ, 'ਸੱਜਣ ਸਾਡਾ' ਲਿਖਿਆ ਹੈ, ਗੀਤਕਾਰ ਰਾਜੂ ਨਾਹਰ ਤੇ ਕਾਲਾ ਸੈਂਪਲੇ ਵਾਲੇ ਨੇ। ਇਨ੍ਹਾਂ ਗੀਤਾਂ ਨੂੰ ਇੰਨੀ ਮਿਹਨਤ ਨਾਲ ਤਿਆਰ ਕਰਕੇ ਕਾਲੇ ਨੇ ਪੇਸ਼ ਕੀਤਾ ਹੈ ਕਿ ਇੱਕ ਸਫਲ ਗਾਇਕ ਹੋਣ ਦਾ ਚੰਗਾ ਸਬੂਤ ਦਿੱਤਾ ਹੈ, ਉਸ ਨੇ। ਅੱਗੋਂ, ਇਨ੍ਹਾਂ ਗੀਤਾਂ ਨੂੰ ਸੰਗੀਤਕ ਧੁਨਾਂ ਦਿੰਦਿਆਂ ਪ੍ਰਸਿੱਧ ਸੰਗੀਤਕਾਰ ਲਾਲੀ ਧਾਲੀਵਾਲ (ਲਾਲ ਕਮਲ) ਜੀ ਨੇ ਵੀ ਪੂਰਾ ਪੂਰਾ ਇਨਸਾਫ ਮਰ ਦਿਖਾਇਆ ਹੈ, ਕਾਲੇ ਦੀ ਗਾਇਕੀ ਨਾਲ। ਲਾਲੀ ਧਾਲੀਵਾਲ ਤੇ ਗੁਰਿੰਦਰ ਗਿੱਲ ਇਟਲੀ ਦੀ ਪੇਸ਼ਕਸ਼ ਹੇਠ, 'ਜ੍ਸ਼ਨ ਐਂਡ ਰਿਕਾਰਡਜ ਕੰਪਨੀ' ਵੱਲੋਂ ਮਾਰਕੀਟ ਵਿਚ ਉਤਾਰੇ ਇਹਨਾਂ ਦੋਨੋ ਗੀਤਾਂ ਬਾਰੇ ਕਲਾ ਦੇ ਪਾਰਖੂਆਂ ਦੀ ਭਵਿੱਖ-ਬਾਣੀ ਹੈ ਕਿ ਕਾਲੇ ਸੈਂਪਲੇ ਵਾਲੇ ਦੀ ਇਹ ਕੋਸ਼ਿਸ਼, ਬਿਨਾਂ ਸ਼ੱਕ ਉਸ ਨੂੰ ਲੋਕ-ਗਾਇਕਾਂ ਦੀ ਕਤਾਰ ਵਿਚ ਖੜ੍ਹਾ ਹੋਣ ਦਾ ਪੂਰਨ ਮਾਣ ਜਰੂਰ ਬਖਸ਼ੇਗੀ। ਦੂਜੇ ਪਾਸੇ, ਸਰੋਤਿਆਂ ਵਲੋਂ ਫੋਨ ਸੁਨੇਹਿਆਂ ਦੁਆਰਾ ਮਿਲ ਰਹੀ ਹੱਲਾ-ਸ਼ੇਰੀ ਅਤੇ ਥਾਪੜੇ ਤੋਂ ਕਾਲਾ ਖੁਦ ਵੀ ਕਾਫੀ ਆਸਾਂ-ਉਮੀਦਾਂ ਲਗਾਈ ਬੈਠਾ ਹੈ।

ਕਾਲਾ ਸੈਂਪਲੇ ਵਾਲਾ ਦੱਸਦਾ ਹੈ ਕਿ ਉਸ ਨੂੰ ਗਾਇਕੀ ਕਲਾ ਵਿਰਾਸਤ ਵਿਚ ਹੀ ਮਿਲੀ ਹੈ: ਕਿਉਂਕਿ ਗਾਇਕੀ ਉਸ ਦਾ ਖਾਨਦਾਨੀ ਕਿੱਤਾ ਹੈ। ਉਸ ਦੇ ਦਾਦਾ ਸ੍ਰ: ਬਾਰੂ ਸਿੰਘ ਜੀ, ਗੁੱਗਾ ਜਾਹਰ ਪੀਰ ਜੀ ਦੇ ਰਾਤ ਜਾਗਿਆਂ ਵਿੱਚ ਗਾਇਆ ਕਰਦੇ ਸਨ। ਉਸ ਪਿੱਛੋਂ ਪਿਤਾ ਸ੍ਰ: ਨਰਾਤਾ ਸਿੰਘ ਅਤੇ ਤਾਇਆ ਸ੍ਰ: ਹਰਦਿਆਲ ਸਿੰਘ ਤੂੰਬੇ ਤੇ ਅਲਗੋਜਿਆਂ ਨਾਲ ਮੇਲਿਆਂ ਤੇ ਖੂਬ ਰੰਗ ਬੰਨ੍ਹਿਆ ਕਰਦੇ ਸਨ। ਘਰ ਵਿਚ 24 ਘੰਟੇ ਸੰਗੀਤ-ਮਈ ਮਹੌਲ ਚੱਲਦਾ ਰਹਿਣ ਸਦਕਾ ਕਾਲੇ ਦਾ ਬਾਲ-ਮਨ ਨੂੰ ਵੀ ਕਲਾ 'ਚ ਰੰਗਿਆ ਜਾਣਾ ਕੁਦਰਤੀ ਹੀ ਸੀ, ਜਿਹੜਾ ਕਿ ਪੂਰੀ ਤਰਾਂ ਰੰਗਿਆ ਗਿਆ।

ਪੰਜਾਬੀ ਮਾਂ-ਬੋਲੀ ਦਾ ਲਾਡਲਾ ਗੀਤਕਾਰ ਅਤੇ ਗਾਇਕ ਕਾਲਾ ਸੈਂਪਲੇ ਵਾਲਾ ਪ੍ਰਾਇਮਰੀ ਸਕੂਲ ਵਿੱਚ ਪੜ੍ਹਨ ਵਕਤ ਭਾਂਵੇਂ ਕਿ ਗੁਰਦਾਸ ਮਾਨ, ਲਾਲ ਚੰਦ ਯਮਲਾ ਜੱਟ, ਸੁਰਿੰਦਰ ਛਿੰਦਾ ਅਤੇ ਕੁਲਦੀਪ ਮਾਣਕ ਵਰਗੇ ਗਾਇਕੀ ਦੇ ਸਭ ਫੁੰਨਕਾਰਾਂ ਦੀਆਂ ਨਕਲਾਂ ਕਰਦਿਆਂ ਸੁਹਣੀਆਂ ਮੱਲਾਂ ਮਾਰਨ ਲੱਗ ਪਿਆ ਸੀ, ਪਰ ਗੁਰਦਾਸ ਮਾਨ ਦੇ ਗੀਤਾਂ ਤੋਂ ਤਾਂ ਉਸ ਦਾ ਰੋਮ-ਰੋਮ ਪ੍ਰਭਾਵਿਤ ਸੀ। ਇਹੀ ਕਾਰਨ ਹੈ ਕਿ ਉਸ ਨੇ ਗੁਰਦਾਸ ਮਾਨ ਨਾਲ ਬੇਸ਼ੱਕ ਉਸਤਾਦੀ-ਸ਼ਗਿਰਦੀ ਦੀ ਰਸਮ ਤਾਂ ਬਕਾਇਦਾ ਨਹੀ ਕੀਤੀ, ਪਰ ਉਸ ਨੇ ਦਿਲ-ਹੀ-ਦਿਲ ਗੁਰਦਾਸ ਮਾਨ ਨੂੰ ਆਪਣਾ ਮੁਰਸ਼ਿਦ ਮੰਨ ਲਿਆ। ਬਸ, ਫਿਰ ਕੀ ਸੀ, ਉਸ ਨੇ ਵੀ ਆਪਣੇ ਮੁਰਸ਼ਦ ਦੇ ਪਾਏ ਪੂਰਨਿਆਂ ਉਤੇ ਕਦਮ ਧਰਦਿਆਂ ਉਸੇ ਵਾਂਗ ਹੀ ਵਿਰਸੇ ਨੂੰ ਸੰਭਾਲਣ ਦੀਆਂ ਗੱਲਾਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ। ਅੱਜ ਹੋਰ, ਕੱਲ ਹੋਰ, ਹੁੰਦੇ ਹੁੰਦੇ ਉਸ ਦੀ ਗੀਤਕਾਰੀ ਵਿਚ ਵੀ ਚੰਗਾ ਨਿਖਾਰ ਆਇਆ ਅਤੇ ਅਵਾਜ ਵਿਚ ਵੀ। ਸਟੇਜ ਉਤੇ ਮਾਇਕ ਮੂਹਰੇ ਖੜ੍ਹਾ ਆਪਣੇ ਮੁਰਸ਼ਿਦ ਦੀਆਂ ਨਕਲਾਂ ਕਰਦਾ ਕਰਦਾ ਉਹ ਕਈ ਬਾਰ ਤਾਂ ਉਹ ਉਹਦਿਆਂ ਰੰਗਾਂ ਵਿਚ ਹੀ ਦੂਰ ਤੱਕ ਗੁਆਚ ਜਾਂਦਾ ਹੈ। ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਕਾਲੇ ਨੇ ਕਿਹਾ, 'ਮੈਂ ਬੜੀ ਉਤਸੁਕਤਾ ਨਾਲ ਉਨ੍ਹਾਂ ਸੁਹਾਵਣੇ ਪਲਾਂ ਦੀ ਇੰਤਜਾਰ ਵਿਚ ਹਾਂ, ਜਿਨ੍ਹਾਂ ਪਲਾਂ ਦੌਰਾਨ ਮੈਨੂੰ ਮੇਰੇ ਮੁਰਸ਼ਦ ਗੁਰਦਾਸ ਮਾਨ ਜੀ ਦੇ ਚਰਨਾ ਵਿਚ ਬੈਠਕੇ ਸ਼ਗਿਰਦੀ ਦਾ ਅਸ਼ੀਰਵਾਦ ਹਾਸਲ ਹੋ ਸਕੇ।

ਕਾਲਾ ਆਪਣੀ ਖੁਸ਼-ਕਿਸਮਤੀ ਮੰਨਦਾ ਹੈ ਕਿ ਸਫਰ ਤੇ ਚੱਲਦੇ-ਚੱਲਦੇ ਉਸ ਦਾ ਮਿਲਾਪ ਪ੍ਰਸਿੱਧ ਗਾਇਕ ਸਤਵਿੰਦਰ ਬੁੱਗਾ ਨਾਲ ਹੋਇਆ। ਬੁੱਗਾ ਜੀ ਨੂੰ ਕਾਲੇ ਦੀ ਕਲਮ ਵਿਚ ਚੰਗਾ ਦਮ ਨਜਰੀ ਆਇਆ, ਜਿਸਦੇ ਨਤੀਜਨ ਸਤਵਿੰਦਰ ਬੁੱਗਾ ਨੇ ਕਾਲੇ ਦਾ ਲਿਖਿਆ ਗੀਤ 'ਸਦਾ ਰਹਿੰਦੇ ਓ ਅਮੀਰਾਂ ਵੱਲ ਤੱਕਦੇ ਗਰੀਬਾਂ ਨੂੰ ਵੀ ਤੱਕਿਆ ਕਰੋ' ਆਪਣੀ ਆਵਾਜ ਵਿੱਚ ਅਤੇ ਸੰਗੀਤ ਸਮਰਾਟ ਜਨਾਬ ਚਰਨਜੀਤ ਆਹੂਜਾ ਦੇ ਜਾਦੂਮਈ ਸੰਗੀਤ ਵਿੱਚ ਰਿਕਾਰਡ ਕਰਵਾ ਕੇ 'ਟਿਪਸ' ਕੰਪਨੀ ਵੱਲੋਂ ਮਾਰਕੀਟ ਵਿਚ ਉਤਾਰਿਆ। ਇਸ ਤੋਂ ਇਲਾਵਾ ਉਸਦੇ ਲਿਖੇ ਗੀਤਾਂ ਨੂੰ ਜਸਵੀਰ ਬੱਗੜ, ਸੁਭਾਸ਼ ਭਾਟੀਆ ਤੇ ਪਰਮਜੀਤ ਪੰਮੀ ਆਦਿ ਕਈ ਗਾਇਕ-ਕਲਾਕਾਰਾਂ ਨੇ ਵੀ ਆਪੋ-ਆਪਣੀ ਅਵਾਜ ਵਿੱਚ ਰਿਕਾਰਡਿੰਗ ਦਾ ਜਾਮਾ ਪਹਿਨਾਇਆ ਹੈ।

ਹਾਲ ਹੀ ਵਿਚ, 'ਜਸ਼ਨ ਐਂਡ ਰਿਕਾਰਡਜ ਕੰਪਨੀ' ਵੱਲੋਂ, ਗੀਤਕਾਰ ਰਾਜੂ ਨਾਹਰ ਦੀ ਪੇਸ਼ਕਸ਼ ਹੇਠ ਮਾਰਕੀਟ ਵਿਚ ਉਤਾਰੀ ਗਈ ਮਲਟੀ ਟੇਪ 'ਟੁੱਟੀਆਂ ਮੁਹੱਬਤਾਂ' ਵਿੱਚ ਕਾਲੇ ਨੇ ਅੱਜ ਦੇ ਮਾਹੌਲ ਦਾ ਗੀਤ 'ਅੱਜ ਦਾ ਇਸ਼ਕ ਨਿਆਰਾ, ਇਸ਼ਕ ਨੇ ਪੱਟਿਆ ਜੱਗ ਸਾਰਾ', ਗਾਇਆ ਹੈ। ਇਨ੍ਹਾਂ ਬੋਲਾਂ ਨੂੰ ਕੰਪੋਜ ਵੀ ਕਾਲੇ ਨੇ ਖੁਦ ਹੀ ਕੀਤਾ ਹੈ।
ਕਾਲੇ ਦੀ ਕਲਮ ਦੀ ਇੱਥੇ ਹੀ ਬਸ ਨਹੀ, ਉਸ ਨੇ ਪੰਜਾਬੀ ਫਿਲਮਾਂ ਦੀਆਂ ਕਹਾਣੀਆਂ ਵੀ ਲਿਖ ਰੱਖੀਆਂ ਹਨ। ਇਸ ਤੋਂ ਇਲਾਵਾ ਉਹ ਅਦਾਕਾਰੀ ਦਾ ਸ਼ੌਕ ਵੀ ਸੁਹਣੀ ਰੂਹ ਨਾਲ ਪਾਲ ਰਿਹਾ ਹੈ।

ਆਪਣੀ ਜੀਵਨ-ਸਾਥਣ ਜਸਪ੍ਰੀਤ ਦੇ ਨਾਲ-ਨਾਲ ਤਿੰਨ ਲਾਡਲੀਆਂ ਬੇਟੀਆਂ ਅਮਨਪ੍ਰੀਤ, ਮਹਿਕਪ੍ਰੀਤ, ਸਹਿਜਪ੍ਰੀਤ ਅਤੇ ਬੇਟਾ ਸੁਖਮਨਪ੍ਰੀਤ ਨਾਲ ਖੁਸ਼ੀਆਂ ਭਰੀ ਜ਼ਿੰਦਗੀ ਗੁਜਾਰ ਰਿਹਾ ਕਾਲਾ ਦੱਸਦਾ ਹੈ ਕਿ ਉਸ ਨੂੰ ਗੀਤ-ਸੰਗੀਤ ਖੇਤਰ ਵਿਚ ਉਸਦੇ ਪਰਿਵਾਰ ਵਲੋਂ ਹਰ ਵਕਤ ਭਰਵਾਂ ਸਹਿਯੋਗ ਮਿਲਦਾ ਹੈ।
ਰੱਬ ਕਰੇ ! ਕਲਾ ਦੇ ਪੁਜਾਰੀ, ਕਾਲਾ ਸੈਂਪਲੇ ਵਾਲਾ ਦੀ ਹਰ ਰੀਝ ਪੂਰੀ ਹੋਵੇ! ਉਸ ਦੇ ਸੁਪਨਿਆਂ ਨੂੰ ਮਿੱਠੇ ਫਲ ਲੱਗਣ ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ੍ਹ (9876428641)
ਸੰਪਰਕ : ਕਾਲਾ ਸੈਂਪਲੇ ਵਾਲਾ, 9876998826

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com