'ਡਿਪਲੋਮਾ ਇਨ ਵੈਟਰਨਰੀ ਸਾਇੰਸ  ਕਰਨ ਉਪਰੰਤ ਪਸ਼ੂ ਪਾਲਣ ਵਿਭਾਗ ਵਿੱਚ ਅੱਜ ਕਲ ਬਤੌਰ ਵੈਟਰਨਰੀ ਇੰਸਪੈਕਟਰ  ਸੇਵਾ ਨਿਭਾਅ ਰਿਹਾ ਗੁਰਪ੍ਰੀਤ ਧਾਲੀਵਾਲ, ਥੀਏਟਰ  ਦੇ ਸਫ਼ਰ 'ਤੇ ਚੱਲਦਿਆਂ ਹੁਣ ਤੱਕ 300 ਨਾਟਕਾਂ 'ਚ ਕਿਰਦਾਰ ਨਿਭ ਚੁੱਕਾ ਹੈ। ਬਹੁਤਿਆਂ ਨਾਟਕਾਂ ਵਿੱਚ ਤਾਂ ਮੁੱਖ ਕਿਰਦਾਰ ਉਸ ਦਾ ਹੀ ਹੁੰਦਾ ਹੈ। ਉਸ ਨੇ, 'ਬਾਈ ਜੀ ਤੁਸੀਂ ਘੈਂਟ ਹੋ' ਅਤੇ 'ਨੋ ਟੀ ਜੱਟਸ' ਫਿਲਮਾਂ ਅਤੇ 'ਪਰਉਪਕਾਰੀ ਭਾਈ ਘੱਨਈਆ ਜੀ', 'ਕੇਸ ਨਾ ਕਟਾਇਓ', 'ਦੀਵਾ ਬਲੇ' ਅਤੇ 'ਪਾਲੀ' ਆਦਿ ਟੈਲੀਫਿਲਮਾਂ 'ਚ ਵੀ ਸ਼ਾਨਦਾਰ ਤੇ ਜਾਨਦਾਰ ਕਿਰਦਾਰ ਨਿਭਾਇਆ ਹੈ। ਇੱਥੇ ਹੀ ਬਸ ਨਹੀਂ, ਉਸ ਨੇ ਪੰਜਾਬੀ ਗੀਤਾਂ ਦੇ ਨਾਲ-ਨਾਲ ਹਰਿਆਣਵੀ ਗੀਤਾਂ 'ਚ ਵੀ ਕਿਰਦਾਰ ਨਿਭਾਇਆ ਹੈ।

ਜਿਲਾ ਫਤਿਹਗੜ ਸਾਹਿਬ ਦੇ ਪਿੰਡ ਕਲੌੜ ਦੇ ਵਸਨੀਕ ਸ੍ਰੀ ਰਾਮ (ਪਿਤਾ) ਦੇ ਗ੍ਰਹਿ ਵਿਖੇ, ਸ੍ਰੀਮਤੀ ਮਨਜੀਤ ਕੌਰ (ਮਾਤਾ) ਦੀ ਪਾਕ ਕੁੱਖੋਂ 1980 ਨੂੰ ਜਨਮੇ ਗੁਰਪ੍ਰੀਤ ਧਾਲੀਵਾਲ ਨੇ ਦੱਸਿਆ ਕਿ ਉਸ ਨੂੰ ਬਚਪਨ ਤੋਂ ਹੀ ਥੀਏਟਰ  ਕਰਨ ਦੀ ਅਤੇ ਕਵਿਤਾਵਾਂ ਲਿਖਣ ਦੀ ਚੇਟਕ ਲੱਗ ਗਈ ਸੀ। ਉਸ ਨੇ ਪਹਿਲੀ ਵਾਰ 2005 'ਚ ਥੀਏਟਰ ਪ੍ਰੋਗਰਾਮ ਵਿੱਚ ਭਾਗ ਲਿਆ। ਉਦੋਂ ਤੋਂ ਹੁਣ ਤੱਕ ਉਹ ਥੀਏਟਰ  ਦੇ ਸਫ਼ਰ ਤੇ ਚੱਲਦਿਆਂ ਕਾਮਯਾਬੀ ਭਰੀਆਂ ਸ਼ਲਾਘਾਯੋਗ ਪਲਾਂਘਾਂ ਪੁੱਟਦਿਆਂ ਲਗਾਤਾਰ ਅੱਗੇ ਵਧ ਰਿਹਾ ਹੈ।

ਗੁਰਪ੍ਰੀਤ ਨੂੰ ਥੀਏਟਰ  ਦਾ ਮੁੱਖ ਸ਼ੌਕ ਹੋਣ ਕਾਰਨ, ਉਹ ਪੰਜਾਬੀ ਭਾਸ਼ਾ ਅਤੇ ਪੰਜਾਬੀ ਸੱਭਿਆਚਾਰ ਦੀ ਸੇਵਾ ਲਈ ਵੀ ਯਤਨਸ਼ੀਲ ਰਹਿੰਦਾ ਹੈ। ਉਸ ਦੀਆਂ ਲਿਖੀਆਂ ਕਵਿਤਾਵਾਂ ਅਖਬਾਰਾਂ, ਮੈਗਜ਼ੀਨਾਂ 'ਚ ਵਿਸ਼ੇਸ਼ ਸਥਾਨ ਬਣਾ ਚੁੱਕੀਆਂ ਹਨ। ਉਹ ਹੁਣ ਜਲਦੀ ਹੀ ਆਪਣੀਆਂ ਕਵਿਤਾਵਾਂ ਦੀ ਕਿਤਾਬ ਪਾਠਕਾਂ ਦੇ ਸਨਮੁੱਖ ਲੈ ਕੇ ਆ ਰਿਹਾ ਹੈ।

ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਗੁਰਪ੍ਰੀਤ ਨੇ ਦੱਸਿਆ ਕਿ ਥੀਏਟਰ  ਕਰਨ ਲਈ ਬਹੁਤ ਹੀ ਮੁਸ਼ੱਕਤ ਤੇ ਲਗਨ ਦੀ ਲੋੜ ਹੁੰਦੀ ਹੈ। ਰੀਹੈਸਲ  ਕਰਨ ਦਾ ਕੋਈ ਸਮਾਂ ਨਿਯਤ ਨਾ ਹੋਣ ਦੇ ਬਾਵਜੂਦ ਵੀ ਅਦਾਕਾਰ ਦੀ ਕੋਸ਼ਿਸ਼ ਇਹੀ ਹੁੰਦੀ ਹੈ ਕਿ ਉਸਦੀ ਅਦਾਕਾਰੀ 'ਚ ਕੋਈ ਵੀ ਕਮੀ ਨਾ ਰਹਿ ਜਾਵੇ। ਦਿੱਤੇ ਕਿਰਦਾਰ ਨੂੰ ਆਪਣੀ ਅਦਾਕਾਰੀ ਕਰਕੇ ਪੂਰੀ ਲਗਨ ਨਾਲ ਉਤਸ਼ਾਹਿਤ ਹੋ ਕੇ ਬਾਖੂਬੀ ਨਿਭਾਉਣਾ ਅਤੇ ਵੱਖ-ਵੱਖ ਰੋਲ ਅਦਾ ਕਰਨ ਲਈ ਤੱਤਪਰ ਰਹਿਣਾ ਹੁੰਦਾ ਹੈ। ਦਰਸ਼ਕਾਂ ਦੀਆਂ ਤਾੜੀਆਂ ਦੀ ਗੂੰਜਦੀ ਆਵਾਜ਼ ਹੀ ਹੈ ਜੋ ਅਦਾਕਾਰ ਨੂੰ ਸਦਾ ਪ੍ਰੇਰਦੀ ਅਤੇ ਹੌਸਲਾ ਅਫਜਾਈ ਕਰਦੀ ਰਹਿੰਦੀ ਹੈ।

ਥੀਏਟਰ  ਅਤੇ ਟੀ. ਵੀ. ਦੀ ਪੇਸ਼ਕਾਰੀ ਦੇ ਅਸਰ ਦੇ ਅੰਤਰ ਦੀ ਗੱਲ ਦੱਸਦਿਆਂ ਧਾਲੀਵਾਲ ਨੇ ਕਿਹਾ, 'ਥੀਏਟਰ-ਅਦਾਕਾਰੀ ਵਿਚ ਅਸੀਂ ਅਦਾਕਾਰ ਨੂੰ ਰੂ-ਬ-ਰੂ ਜਿਊਂਦਾ-ਜਾਗਦਾ ਦੇਖਦੇ ਹਾਂ, ਜਦ ਕਿ ਮੂਵੀ/ ਟੀ. ਵੀ. /ਐੱਲ. ਸੀ. ਡੀ. ਆਦਿ ਤੇ ਜੋ ਸੁਣਦੇ-ਦੇਖਦੇ ਹਾਂ ਉਸ ਵਿਚ ਅਦਾਕਾਰ ਜਿਊਂਦਾ-ਜਾਗਦੇ ਸਾਡੇ ਸਨਮੁੱਖ ਨਹੀਂ ਹੁੰਦੇ। ਥੀਏਟਰ-ਨਾਟਕ 'ਚ ਜੋ ਵੀ ਸਿੱਟਾ ਨਿਕਲਦਾ ਹੈ, ਉਹ ਥੋੜੇ ਸਮੇਂ ਵਿੱਚ, ਬਹੁਤ ਵਧੀਆ ਅਦਾਕਾਰੀ ਦੇ ਨਾਲ-ਨਾਲ ਸਮੇਂ ਨੂੰ ਮੁੱਖ ਰੱਖਦੇ ਹੋਏ ਦਰਸ਼ਕਾਂ ਨੂੰ ਚੰਗੀ ਮਾੜੀ ਸੇਧ ਦੇ ਦਿੰਦਾ ਹੈ। ਭਾਵ ਕਿ ਸਾਰ ਅੰਸ਼ (ਸਿੱਟਾ) ਰੂ-ਬ-ਰੂ ਸਾਹਮਣੇ ਆ ਜਾਂਦਾ ਹੈ।'

ਗੁਰਪ੍ਰੀਤ ਦਾ ਕਹਿਣਾ ਹੈ ਕਿ 'ਜ਼ਿੰਦਗੀ ਵੀ ਇੱਕ ਥੀਏਟਰ ਹੈ', ਜਿਸ ਵਿੱਚ ਹਰੇਕ ਵਿਅੱਕਤੀ ਆਪਣੇ ਜੀਵਨ ਦਾ ਰੋਲ ਅਦਾ ਕਰਕੇ ਦੁਨੀਆਂ ਤੋਂ ਇੱਕ ਦਿਨ ਰੁਖ਼ਸਤ ਹੋ ਜਾਂਦਾ ਹੈ। ਪਰ, ਥੀਏਟਰ ਵਿੱਚ ਕੰਮ ਕਰਨਾ, ਵੱਖ-ਵੱਖ ਕਿਰਦਾਰ ਨਿਭਾਉਣੇ, ਦਰਸ਼ਕਾਂ ਦੇ ਰੂ-ਬ-ਰੂ ਹੋਣਾ, ਕਿਰਦਾਰ ਕਰਕੇ ਚੰਗੀ ਸੇਧ ਦੇਣਾ, ਇੱਕ ਅਮਿੱਟ ਛਾਪ ਛੱਡ ਜਾਣਾ, ਮਨ ਨੂੰ ਬਹੁਤ ਹੀ ਖੁਸ਼ੀ ਦਿੰਦਾ ਹੈ।

ਲੇਖਕ ਅਤੇ ਅਦਾਕਾਰ ਹੋਣ ਕਾਰਨ, ਰੂਪਕ ਕਲਾ ਮੰਚ (ਚੰਡੀਗੜ), ਸਤਕਾਰ ਕਲਾ ਮੰਚ (ਚੰਡੀਗੜ), ਰਸਮਾ ਇੰਟਰਪ੍ਰਾਈਜ਼ਜ਼, ਯੂਨੀਵਰਸਲ ਆਰਟ ਐਡ ਕਲਚਰਲ ਵੈਲਫੇਅਰ ਸੋਸਾਇਟੀ (ਮੋਹਾਲੀ), ਪੰਜਾਬੀ ਨਾਟਕ ਅਕੈਡਮੀ (ਮੋਹਾਲੀ), ਸਰਘੀ ਕਲਾ ਕੇਂਦਰ (ਮੋਹਾਲੀ), ਆਰਟ ਸੈਂਟਰ (ਸਮਰਾਲਾ) ਗੁਰਦੀਪ ਨਾਟਕ ਅਕੈਡਮੀ, ਸਰੀ (ਕੈਨੇਡਾ) ਪੈਸ਼ਨ ਥੀਏਟਰ (ਖਰੜ) ਆਦਿ ਅਨੇਕਾਂ ਸੰਸਥਾਵਾਂ ਨਾਲ ਜੁੜਿਆ ਚਲਿਆ ਆ ਰਿਹਾ ਧਾਲੀਵਾਲ ਹੁਣ ਤੱਕ ਅਨਗਿਣਤ ਮਾਨ-ਸਨਮਾਨ ਹਾਸਲ ਕਰ ਚੁੱਕਿਆ ਹੈ, ਜਿਨਾਂ ਵਿਚ ਪੰਜਾਬ ਕਲਾ ਭਵਨ (ਚੰਡੀਗੜ), ਆਜ਼ਾਦ ਕਲੱਬ (ਮੋਹਾਲੀ), ਪੰਜਾਬੀ ਵਿਰਸਾ ਸੱਭਿਆਚਾਰ ਸੁਸਾਇਟੀ (ਰਜਿ.) ਐਸ. ਏ. ਐਸ. ਨਗਰ, ਪੰਜਾਬੀ ਵਿਰਸਾ (ਮਹਿੰਦਰ ਏਜੰਸੀ), ਸਵਾਮੀ ਸਰੂਪਾਨੰਦ ਯਾਦਗਾਰੀ ਸਲਾਨਾ ਟੂਰਨਾਮੈਂਟ ਮੰਡ ਗੁਰਦਾਸਪੁਰ), ਸ਼ਹੀਦ ਭਗਤ ਸਿੰਘ ਜਾਗ੍ਰਿਤੀ ਮੰਚ (ਰਜਿ.), ਸ਼ਹੀਦ ਭਗਤ ਸਿੰਘ, ਰਾਜਗੁਰੂ ਤੇ ਸੁਖਦੇਵ ਜੀ ਦੀ ਯਾਦ ਨੂੰ ਸਮਰਪਿਤ, ਐਵਾਰਡ ਆਫ. ਆਨਰ : ਸੈਂਟਰ ਫਾਰ ਕਮਨੀਕੇਸ਼ਨ ਐਂਡ ਇੰਟਰਨੈਸ਼ਨਲ ਲਿੰਕਸ ਪੀ. ਏ. ਯੂ. (ਲੁਧਿਆਣਾ), ਯੂਥ ਕਲੱਬ, ਗ੍ਰਾਮ ਪੰਚਾਇਤ ਕੋਹਾਲਾ (ਜਲੰਧਰ), ਨਹਿਰੂ ਯੁਵਾ ਕੇਂਦਰ (ਜਲੰਧਰ), ਯੂਨੀਵਰਸਿਟੀ ਆਰਟ ਮੋਹਾਲੀ ਅਤੇ ਰਸਮਾਂ ਐਂਟਰਪ੍ਰਾਈਜਜ਼, ਗੁਰੂ ਘਰ ਸੇਵਕ ਜੱਥਾ (ਰਜਿ) ਦਿੱਲੀ ਅਤੇ ਸੇਵਾ ਗੁਰੂਦੁਆਰਾ ਬੰਗਲਾ ਸਾਹਿਬ (ਦਿੱਲੀ) ਆਦਿ ਸਨਮਾਨਾਂ ਦੀ ਸੈਕੜਿਆਂ ਦੀ ਗਿਣਤੀ ਦੀ ਇਕ ਲੰਬੀ ਸੂਚੀ ਵਿਸ਼ੇਸ਼ ਵਰਣਨ ਯੋਗ ਹੈ।

ਨੌਜਵਾਲ ਪੀੜੀ ਨੂੰ ਸੰਦੇਸ਼ ਦਿੰਦਿਆਂ ਧਾਲੀਵਾਲ ਨੇ ਕਿਹਾ, 'ਥੀਏਟਰ 'ਚ ਕਿਰਦਾਰ ਨਿਭਾਉਂਦਿਆਂ, ਸਮਾਜ ਵਿੱਚ ਫੈਲੇ ਭ੍ਰਿਸ਼ਟਾਚਾਰ, ਨਸ਼ੇ, ਬੇਰੁਜ਼ਗਾਰੀ, ਕੰਨਿਆ ਭਰੂਣ-ਹੱਤਿਆ, ਔਰਤ ਦੀ ਅਜੋਕੀ ਦਸ਼ਾ, ਰਿਸ਼ਤਿਆਂ ਦਾ ਘਾਣ, ਬਜੁਰਗਾਂ ਦੀ ਹਾਲਤ ਅਤੇ ਵਾਤਾਵਰਨ ਆਦਿ ਦੇ ਬਾਰੇ ਵਿਚ ਜੋ ਵੀ ਚੰਗੇ ਸੁਨੇਹੇ, ਚੰਗੀਆਂ ਗੱਲਾਂ ਅਤੇ ਚੰਗੇ ਪੱਖ ਦਰਸ਼ਕਾ ਨੂੰ ਵੇਖਣ-ਸੁਣਨ ਨੂੰ ਮਿਲਦੇ ਹਨ, ਦਰਸ਼ਕਾ ਨੂੰ ਉਨਾਂ ਨੂੰ ਅਪਣਾਉਣਾ ਚਾਹੀਦਾ ਹੈ ਅਤੇ ਸਾਨੂੰ ਸਭ ਨੂੰ ਇਨਾਂ ਦੇ ਖਾਤਮੇ ਲਈ ਅਮਲੀ ਰੂਪ 'ਚ ਯੋਗਦਾਨ ਪਾਉਣਾ ਚਾਹੀਦਾ ਹੈ।'

ਧਾਲੀਵਾਲ ਨੇ ਕਿਹਾ, 'ਦਰਸ਼ਕਾਂ ਦਾ ਇਕ ਪਿਆਰ ਹੀ ਹੈ ਜੋ ਮੈਨੂੰ ਹਰ ਕਦਮ-ਕਦਮ ਤੇ ਸਾਥ ਅਤੇ ਹੌਂਸਲਾ ਅਫਜ਼ਾਈ ਕਰਦਾ ਰਹਿੰਦਾ ਹੈ ਅਤੇ ਮੇਰਾ ਸਿਰ ਉਸ ਮਾਲਕ ਦੇ ਚਰਨਾਂ ਵਿਚ ਬਹੁਤ ਹੀ ਅਦਬ ਨਾਲ ਝੁੱਕ ਜਾਂਦਾ ਹੈ।'

ਆਪਣੀ ਜੀਵਨ-ਸਾਥਣ ਸ੍ਰੀਮਤੀ ਮਨਪ੍ਰੀਤ ਕੌਰ, ਬੇਟੇ ਅਰਸ਼ਪ੍ਰੀਤ ਧਾਲੀਵਾਲ ਅਤੇ ਅੰਸ਼ਪ੍ਰੀਤ ਧਾਲੀਵਾਲ ਨਾਲ ਖਰੜ ਵਿਖੇ ਖੁਸੀਆਂ ਭਰਿਆ ਜੀਵਨ ਕਰਦਿਆਂ, ਥੀਏਟਰ ਦੀਆਂ ਅਕਾਸ਼ ਨੂੰ ਛੂੰਹਦੀਆਂ ਉਡਾਣਾਂ ਭਰਨ ਵਾਲੇ ਗੁਰਪ੍ਰੀਤ ਨੇ ਦੱਸਿਆ ਕਿ ਇਸ ਖੇਤਰ ਵਿਚ ਉਸਨੂੰ ਉਸ ਦੇ ਪਰਿਵਾਰ ਦਾ ਪੂਰਨ ਯੋਗਦਾਨ ਹੈ, ਜੋ ਉਸ ਨੂੰ ਥੀਏਟਰ ਕਰਨ ਲਈ ਉਤਸ਼ਾਹਿਤ ਕਰਦੇ ਹਨ।

ਸ਼ਾਲਾ ! ਹਸੂੰ-ਹਸੂੰ ਕਰਦੇ ਚਿਹਰੇ ਵਾਲਾ, ਥੀਏਟਰ ਅਦਾਕਾਰ ਗੁਰਪ੍ਰੀਤ ਧਾਲੀਵਾਲ ਇਵੇਂ ਹੀ ਨਿਰੰਤਰ ਵੱਖ-ਵੱਖ ਕਿਰਦਾਰ ਨਿਭਾਉਂਦਾ, ਆਪਣੀਆਂ ਕਲਾਵਾਂ ਅਤੇ ਅਦਾਵਾਂ ਸਦਕਾ ਸਾਡੇ ਸਾਰਿਆਂ ਦੇ ਦਿਲਾਂ ਉਤੇ ਰਾਜ ਕਰਦਾ, ਲੰਬੇ ਸਮੇਂ ਤੱਕ ਆਪਣੀਆਂ ਅਮਿੱਟ ਯਾਦਗਾਰੀ ਪੈੜਾਂ ਛੱਡ ਜਾਵੇ ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ (9876428641)
ਸੰਪਰਕ : ਗੁਰਪ੍ਰੀਤ ਧਾਲੀਵਾਲ, 96-ਸੀ, ਸੈਕਟਰ-12, ਰਣਜੀਤ ਨਗਰ (ਖਰੜ), (9815122196)

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com