ਅਜੋਕੀ ਪੰਜਾਬੀ ਗਾਇਕੀ ਵਿੱਚ ਨਿੱਤ ਨਵੇਂ ਅਣਸਿੱਖੇ ਗਾਇਕ/ ਗਾਇਕਾਵਾਂ ਦੀ ਭਰਮਾਰ ਭਾਂਵੇਂ ਦਿਨ-ਬ-ਦਿਨ ਵਧੀ ਜਾ ਰਹੀ ਹੈ, ਪਰ ਇਹਨਾਂ ਵਿੱਚੋਂ ਕੁਝ ਕੁ ਤਾਂ 'ਦੁਪਹਿਰ ਖਿੜੀ' ਦੇ ਫੁੱਲਾਂ ਵਾਂਗ ਕੁਝ ਦੇਰ ਪਿੱਛੋਂ ਹੀ ਕੁਮਲਾਅ/ ਮੁਰਝਾਅ ਜਾਂਦੇ ਹਨ ਤੇ ਕੁਝ ਕੁ ਸਖਤ ਮਿਹਨਤ, ਦ੍ਰਿੜ ਇਰਾਦੇ, ਅਟੁੱਟ ਲਗਨ ਅਤੇ ਆਪਣੀ ਦਮਦਾਰ ਕਲਾ ਦੀ ਮਹਿਕ ਨੂੰ ਹਮੇਸ਼ਾਂ ਬਰਕਰਾਰ ਰੱਖਣ ਲਈ ਦਿਨ-ਰਾਤ ਇੱਕ ਕਰ ਦਿੰਦੇ ਹਨ। ਉਹਨਾਂ ਦਿਨ-ਰਾਤ ਇੱਕ ਕਰ ਦੇਣ ਵਾਲਿਆਂ ਵਿੱਚੋਂ ਹੀ ਇੱਕ ਹੈ, ਅਦਾਕਾਰੀ ਦੇ ਨਾਲ-ਨਾਲ ਗਾਇਕੀ ਵੱਲ ਆਈ ਦੋਗਾਣਾ ਜੋੜੀ, ਗੁਰਬਾਜ ਗਿੱਲ- ਮਨਦੀਪ ਲੱਕੀ।

ਗਾਇਕੀ ਖੇਤਰ ਵਿੱਚ ਆਈ ਇਹ ਜੋੜੀ ਅਦਾਕਾਰੀ ਦੇ ਖੇਤਰ ਵਿੱਚ ਕਿਸੇ ਜਾਣ-ਪਛਾਣ ਦੀ ਮੁਥਾਜ ਨਹੀਂ। ਜਿੱਥੋਂ ਤੱਕ ਗਾਇਕਾ ਮਨਦੀਪ ਲੱਕੀ ਦੀ ਗੱਲ ਹੈ, ਮਨਦੀਪ ਨੇ ਦੱਸਿਆ ਕਿ ਉਸਨੇ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਉਹ ਸੰਗੀਤਕ ਖੇਤਰ ਵੱਲ ਵੀ ਚਲੀ ਜਾਵੇਗੀ । ਪਰ, ਉਸਦੀ ਤਕਦੀਰ ਨੇ ਅਜਿਹੀ ਖੇਡ ਖੇਡੀ ਕਿ ਉਸਦਾ ਵਾਹ-ਵਾਸਤਾ ਹੀ ਸੰਗੀਤਕ ਲਾਈਨ ਨਾਲ ਪਾ ਦਿੱਤਾ। ਪ੍ਰਸਿੱਧ ਕੰਪਨੀ ਸ਼ੀਮਾਰੂ 'ਚ ਆਈ ਕਾਮੇਡੀ ਫ਼ਿਲਮ, 'ਮੂਰਖਾਂ ਦਾ ਥਾਣਾ' ਦੀ ਸ਼ੂਟਿੰਗ ਸਮੇਂ ਉਸਨੂੰ ਗੁਰਬਾਜ ਗਿੱਲ ਨਾਲ ਮਿਲਣ ਦਾ ਮੌਕਾ ਮਿਲਿਆ। ਇਸ ਫ਼ਿਲਮ ਵਿੱਚ ਉਸਦਾ ਪ੍ਰਸਿੱਧ ਅਦਾਕਾਰ ਪ੍ਰਕਾਸ਼ ਗਾਧੂ (ਜੋਰਾ ਜੈਲਦਾਰ/ ਸਾਡੀ ਵੀ ਕੋਈ ਇੱਜ਼ਤ ਆ ਵਾਲਾ) ਨਾਲ ਇੱਕ ਛੋਟਾ ਜਿਹਾ ਰੋਲ ਸੀ। ਉਸ ਤੋਂ ਬਾਅਦ ਤਾਂ ਉਸਨੇ ਪਿਛਾਂਅ ਮੁੜਕੇ ਨਹੀਂ ਵੇਖਿਆ। ਬਥੇਰੀਆਂ ਤੰਗੀਆਂ-ਤੁਰਸ਼ੀਆਂ ਅਤੇ ਵਾਹ-ਵਰੋਲੇ ਆਏ, ਪਰ ਉਹ ਆਪਣੇ ਸਿਦਕੋਂ ਨਾ ਡੋਲੀ। ਜਿਸ ਦੇ ਫਲਸਰੂਪ ਅੱਜ ਅਦਾਕਾਰੀ ਖੇਤਰ ਵਿੱਚ ਉਸਦਾ ਵਧੀਆ ਨਾਂ ਹੈ। ਹੁਣ ਤੱਕ ਉਹ, 'ਪੁੱਤਾਂ ਵਰਗੀ ਧੀ', 'ਵਾਰਿਸ਼', 'ਮਹਿਮਾ ਮਾਂ ਪੱਲੂ ਕੋਟ ਵਾਲੀ ਦੀ', 'ਕਰਾਂਗੇ ਖਾਤਮਾ', 'ਜ਼ਿੰਦ-ਜਾਨ' ਅਤੇ ਜਲਦ ਹੀ ਆਨੰਦ ਮਿਊਜ਼ਿਕ ਵੱਲੋਂ ਰਿਲੀਜ਼ ਕੀਤੀ ਜਾ ਰਹੀ ਕਾਮੇਡੀ ਫ਼ਿਲਮ, 'ਗੁੱਡੂ ਉੱਲੂ ਦਾ ਪੱਠਾ' ਆਦਿ ਡੇਢ ਦਰਜਨ ਦੇ ਕਰੀਬ ਟੈਲੀ ਫ਼ਿਲਮਾਂ ਵਿੱਚ ਕੰਮ ਕਰ ਚੁੱਕੀ ਹੈ, ਜਿਨਾਂ ਵਿੱਚ ਉਸਨੇ ਅਦਾਕਾਰੀ ਦੇ ਨਾਲ-ਨਾਲ ਮੇਕ-ਅੱਪ ਵੀ ਕੀਤਾ ਅਤੇ ਦਰਜਨ ਦੇ ਕਰੀਬ ਗੀਤਾਂ ਵਿੱਚ ਮਾਡਲਿੰਗ ਵੀ ਕੀਤੀ ਹੈ।

ਦੂਜੇ ਸਾਥੀ, ਗੁਰਬਾਜ ਗਿੱਲ ਦੀ ਅਦਾਕਾਰੀ ਦੀ ਜੇ ਗੱਲ ਕਰੀਏ ਤਾਂ ਉਹ ਹੁਣ ਤੱਕ, 'ਬੱਗਾ ਬੂਟਾ', 'ਅਤਰੋ ਚੁਗਲਖ਼ੋਰ', 'ਕਾਰੇ ਅਤਰੋ ਦੇ', 'ਭਜਨਾ ਅਮਲੀ ਸੱਪਾਂ ਵਾਲਾ', 'ਮੂਰਖਾਂ ਦਾ ਲਾਣਾ', 'ਸਕਿਓਰਟੀ ਟਾਈਟ', 'ਖਜਾਨਾ ਛੜਿਆਂ ਦਾ', 'ਨਖਰੇ ਦਾ ਮੁੱਲ', 'ਮੂਰਖਾਂ ਦਾ ਥਾਨਾ', 'ਪੁੱਤਾਂ ਵਰਗੀ ਧੀ', 'ਵਾਰਿਸ਼', 'ਮਹਿਮਾ ਮਾਂ ਪੱਲੂ ਕੋਟ ਵਾਲੀ ਦੀ', 'ਸੰਕਲਪ', 'ਬੂਰ ਦੇ ਲੱਡੂ', 'ਕਰਾਂਗੇ ਖਾਤਮਾ', 'ਜ਼ਿੰਦ-ਜਾਨ', 'ਤੇਰੇ ਪਿੰਡ ਲਾਦੇਨ' ਅਤੇ ਜਲਦ ਹੀ ਆਨੰਦ ਮਿਊਜ਼ਿਕ ਵੱਲੋਂ ਰਿਲੀਜ਼ ਕੀਤੀ ਜਾ ਰਹੀ ਕਾਮੇਡੀ ਫ਼ਿਲਮ, 'ਗੁੱਡੂ ਉੱਲੂ ਦਾ ਪੱਠਾ' ਆਦਿ ਤਿੰਨ ਦਰਜਨ ਦੇ ਕਰੀਬ ਟੈਲੀ ਫ਼ਿਲਮਾਂ ਵਿੱਚ ਕੰਮ ਕਰਨ ਦੇ ਨਾਲ-ਨਾਲ, ਇਹਨਾਂ 'ਚੋਂ ਕੁਝ ਫ਼ਿਲਮਾਂ ਨੂੰ ਡਾਇਰੈਕਟ ਵੀ ਕਰ ਚੁਕੇ ਹਨ, ਉਹ। ਪੰਜਾਬ ਦੇ ਬਾਈ ਭੋਲਾ ਯਮਲਾ, ਮਾਣਕ ਪ੍ਰੀਤ, ਪ੍ਰੀਤਮ ਪ੍ਰਦੇਸ਼ੀ, ਬਲਵੰਤ ਬਲਵਾਨ-ਅਮਨਪ੍ਰੀਤ, ਮਿਸ ਨੇਹਾ, ਸ਼ੰਟੀ ਗੂੰਬਰ, ਓਂਕਾਰ ਗਿੱਲ, ਐਚ. ਮੋਹੀ, ਜੱਸੀ ਘਾਰੂ, ਅਰਸੀ ਗਿੱਲ, ਮਨਪ੍ਰੀਤ ਰੰਧਾਵਾ, ਗੁਰਮੀਤ ਧਾਲੀਵਾਲ-ਲਵਜੀਤ ਧਾਲੀਵਾਲ, ਪਾਲ ਦ੍ਰਾਵਿੜ, ਹਰਮੀਤ ਜੱਸੀ, ਸਤਵਿੰਦਰ ਕੌਰ, ਮੰਨੂ ਪ੍ਰਦੇਸ਼ੀ, ਗੁਰਮੀਤ ਵਿਰਕ, ਗੁਰਪ੍ਰੀਤ ਖਾਨ, ਸਾਗਰ ਚਹਿਲ, ਰਾਜਦੀਪ ਗਿੱਲ, ਲਾਭ ਭੰਗੜ ਅਤੇ ਚਮਕੌਰ ਛੱਤਾ ਆਦਿ ਨਾਮੀ ਗਾਇਕਾਂ ਦੇ ਪੰਜ ਦਰਜਨ ਦੇ ਕਰੀਬ ਗੀਤਾਂ ਦਾ ਵੀਡੀਓ ਨਿਰਦੇਸ਼ਨ ਵੀ ਕੀਤਾ ਹੈ, ਉਹਨਾਂ ਨੇ।

ਮੁਲਾਕਾਤ ਦੌਰਾਨ ਗੁਰਬਾਜ ਗਿੱਲ ਜੀ ਨੇ ਦੱਸਿਆ ਕਿ ਹੁਣ ਉਹ ਅਦਾਕਾਰੀ ਦੇ ਨਾਲ-ਨਾਲ ਪੰਜਾਬੀ ਗਾਇਕੀ ਦੀ ਸਿੱਖਿਆ ਲੈ ਕੇ ਗਾਇਕੀ ਦੇ ਪਿੜ ਵਿੱਚ ਨਿੱਤਰੇ ਹਨ। ਉਸਤਾਦ ਅਮਰਜੀਤ ਤੋਂ ਉਹਨਾਂ ਨੇ ਗਾਇਕੀ ਦੀ ਸੂਰੂਆਤੀ ਤਾਲੀਮ ਹਾਸਿਲ ਕੀਤੀ ਅਤੇ ਬਾਰੀਕੀਆ ਬਾਰੇ ਜਾਣਿਆ। ਕੁਝ ਸਮਾਂ ਉਹਨਾਂ ਦੀ ਸੰਗਤ ਕਰਨ ਤੋਂ ਬਾਅਦ ਮਾਸਟਰ ਸੁਖਵਿੰਦਰ ਸਰਗਮ ਜੀ ਕੋਲ ਵੀ ਤਿਆਰੀ ਕੀਤੀ। ਗੁਰਬਾਜ ਗਿੱਲ–ਮਨਦੀਪ ਲੱਕੀ ਨਾਂਓਂ ਦੀ ਇਹ ਗਾਇਕ ਜੋੜੀ ਇਨਾਂ ਸ਼ਖ਼ਸ਼ੀਅਤਾਂ ਦੇ ਨਾਲ-ਨਾਲ ਕੇ. ਐਸ. ਗਰੇਵਾਲ, ਗਗਨਦੀਪ ਖੋਖਰ, ਪ੍ਰੋਜੈਕਟ ਇੰਨਚਾਰਜ ਗੁਰਮੀਤ ਜੰਡੂ ਅਤੇ ਐਡੀਟਰ ਰਾਜ ਮਾਨ ਜੀ ਦੀ ਬੇਹੱਦ ਧੰਨਵਾਦੀ ਹੈ, ਜਿਨਾਂ ਨੇ ਉਨਾਂ ਦੇ ਸੁਪਨਿਆਂ ਨੂੰ ਸਾਕਾਰ ਕਰਨ ਵਿਚ ਅਹਿਮ ਰੋਲ ਨਿਭਾਇਆ।

ਹੁਣ ਪ੍ਰੋਡਿਊਸਰ ਮੁਕੇਸ਼ ਕੁਮਾਰ ਦੀ ਰਹਿਨੁਮਾਈ ਹੇਠ ਅਨੰਦ ਮਿਊਜ਼ਿਕ ਵਿੱਚ ਆਪਣਾ ਡਿਊਟ ਟਰੈਕ, 'ਤਜ਼ਰਬਾ' ਲੈ ਕੇ ਗਾਇਕੀ ਖੇਤਰ 'ਚ ਆਈ ਹੈ, ਇਹ ਗਾਇਕ ਜੋੜੀ । ਪੇਸ਼ਕਾਰ ਲਾਡੀ ਨਿੱਝਰ ਅਤੇ ਦਰਸ਼ਨ ਭਾਈਰੂਪਾ ਦੀ ਪੇਸ਼ਕਸ ਵਿੱਚ ਪ੍ਰਸਿੱਧ ਗੀਤਕਾਰ ਬਿੱਕਰ ਮਹਿਰਾਜ ਦੇ ਲਿਖੇ ਅਤੇ ਸੰਗੀਤਕਾਰ ਹੌਵੀ ਸ਼ਰਮਾ ਦੇ ਸੰਗੀਤ-ਬੱਧ ਕੀਤੇ ਇਸ ਟਰੈਕ ਦਾ ਜਲਦੀ ਹੀ ਵੀਡੀਓ ਸ਼ੂਟ ਕੀਤਾ ਜਾ ਰਿਹਾ।

ਸ਼ਾਲਾ ! ਗੁਰਬਾਜ ਗਿੱਲ ਤੇ ਮਨਦੀਪ ਲੱਕੀ ਨਾਂਓ ਜਿਵੇਂ ਅਦਾਕਾਰੀ ਖੇਤਰ ਵਿਚ ਕਲਾ-ਪ੍ਰੇਮੀਆਂ ਦੇ ਬੁੱਲਾਂ ਉਤੇ ਚੜ ਚੁੱਕਾ ਹੈ, ਉਵੇਂ ਹੀ ਹੁਣ ਗਾਇਕੀ ਖੇਤਰ ਵੀ ਆਪਣੀ ਦਮਦਾਰ ਅਵਾਜ਼ ਅਤੇ ਮਿਹਨਤ ਦੇ ਬੱਲਬੂਤੇ ਸੰਗੀਤ-ਪ੍ਰੇਮੀਆਂ ਦੇ ਦਿਲਾਂ ਤੇ ਰਾਜ਼ ਕਰਦਿਆਂ ਆਉਣ ਵਾਲੇ ਕੱਲ ਦੀ ਵਸੀਅਤ ਆਪਣੇ ਨਾਂਓਂ ਲਿਖਵਾਉਣ 'ਚ ਕਾਮਯਾਬੀਆਂ ਹਾਸਲ ਕਰੇ, ਢੇਰ ਸਾਰੀਆਂ ਸ਼ੁਭ ਇੱਛਾਵਾਂ ਤੇ ਦੁਆਵਾਂ ਹਨ, ਮੇਰੀਆਂ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ (9876428641)
ਸੰਪਰਕ : ਗੁਰਬਾਜ ਗਿੱਲ (9872362507)

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com