ਹਾਲ ਹੀ ਵਿਚ ਰੀਲੀਜ ਹੋਏ ਅਤੇ ਅੱਜ ਕਲ ਖੂਬ ਚਰਚਾ ਦਾ ਵਿਸ਼ਾ ਬਣੇ ਗੀਤ 'ਰਿਪਲਾਈ ਟੂ ਟਰਾਲੀ' ਦੀ ਸੁਰੀਲੀ ਅਤੇ ਦਮਦਾਰ ਅਵਾਜ ਦੀ ਮਲਿਕਾ, ਗਾਇਕਾ ਜੋਤੀ ਕੋਹੇਨੂਰ ਦੀ ਗਾਇਕੀ ਉਤੇ ਪੂਰਾ ਜੋਬਨ ਹੈ, ਅੱਜ ਦਿਨ। ਆਪਣੇ ਆਪ ਨੂੰ ਸਵ: ਗਾਇਕ ਅਮਰ ਸਿੰਘ ਚਮਕੀਲਾ ਜੀ ਦਾ ਫੈਨ ਦੱਸਣ ਵਾਲੀ ਇਹ ਚੁਲਬੁਲੀ ਗਾਇਕਾ ਦੱਸਦੀ ਹੈ ਕਿ ਉਸ ਨੂੰ ਅਮਰ ਸਿੰਘ ਚਮਕੀਲਾ ਅਤੇ ਅਮਰਜੋਤ ਕੌਰ ਦੀ ਅਵਾਜ 'ਚ ਰਿਕਾਰਡ ਹੋਏ ਗੀਤਾਂ ਵਿਚੋਂ ਲਗਭਗ 80 ਗੀਤ ਮੂੰਹ-ਜੁਬਾਨੀ ਯਾਦ ਹਨ। ਗਾਇਕੀ ਦਾ ਕਹਿਰਾਂ ਦਾ ਜਨੂੰਨ ਪਾਲਣ ਵਾਲੀ ਜੋਤੀ ਲਈ ਕਦੀ ਉਹ ਵੇਲਾ ਵੀ ਸਿਰ ਉਤੇ ਆ ਗਿਆ ਸੀ, ਜਦੋਂ ਬਾਲ-ਬਰੇਸੇ ਹੀ ਪਿਤਾ ਅਰਜਨ ਸਿੰਘ ਅਤੇ ਮਾਤਾ ਜਸਵੰਤ ਕੌਰ ਜੀ ਦਾ ਸਿਰ ਤੋਂ ਸਾਇਆ ਸਦੀਵੀ ਤੌਰ ਤੇ ਉਠ ਜਾਣ ਦੀ ਬਦ-ਕਿਸਮਤੀ ਵਜੋਂ ਉਸ ਨੂੰ ਆਪਣੀ ਗਾਇਕੀ ਦੇ ਸ਼ੌਕ ਨੂੰ ਪਾਲਣ ਵਿਚ ਰੁਕਾਵਟ ਆ ਬਣੀ ਸੀ। ਉਸ ਦਾ ਭਰਾ ਜਗਦੇਵ ਸਿੰਘ ਨਹੀ ਸੀ ਚਾਹੁੰਦਾ ਕਿ ਉਹ ਸਟੇਜਾਂ ਉਪਰ ਜਾਵੇ ਅਤੇ ਉਹ ਗਾਇਕੀ ਨੂੰ ਇਕ ਪੇਸ਼ੇ ਵਜੋਂ ਅਪਣਾਵੇ। ਇਹ ਤਾਂ ਉਸ ਨੂੰ ਉਸ ਦੀ ਭੈਣ ਰਣਜੀਤ ਕੌਰ ਦਾ ਨਿੱਘਾ ਸਾਥ, ਸਹਿਯੋਗ ਤੇ ਮਿਲਵਰਤਨ ਮਿਲਿਆ ਜਿਸ ਸਦਕਾ ਉਹ ਇਕ ਕੈਸਿਟ ਤੋਂ ਬਾਅਦ ਦੂਜੀ ਅਤੇ ਦੂਜੀ ਤੋਂ ਬਾਅਦ ਤੀਜੀ ਕੈਸਿਟਾਂ ਦੀ ਲੜੀ ਲਾਂਉਂਦੀ ਸੱਤ ਸਮੁੰਦਰੋਂ ਪਾਰਲੀ ਧਰਤ ਤਕ ਆਪਣੀ ਗਾਇਕੀ ਦੀਆਂ ਲਾ-ਜੁਵਾਬ ਪੈੜਾਂ ਛੱਡ ਆਈ। ਵਿਦੇਸ਼ ਦਾ ਸਫਲ ਚੱਕਰ ਲੱਗਣ ਤੋਂ ਬਾਅਦ ਜਦੋਂ ਗੀਤ-ਸੰਗੀਤ ਜਗਤ ਵਿਚ ਜੋਤੀ ਕੋਹੇਨੂਰ ਦਾ ਨਾਂਓਂ ਬੱਚੇ-ਬੱਚੇ ਦੇ ਜੁਬਾਨ ਉਤੇ ਚੜ੍ਹ ਗਿਆ ਤਾਂ ਆਖਰ ਭਰਾ ਨੂੰ ਵੀ ਉਸ ਦੀ ਗਾਇਕੀ ਕਬੂਲਣੀ ਹੀ ਪਈ।

ਪਟਿਆਲਾ ਸ਼ਹਿਰ ਦੀ ਜੰਮਪਲ, ਸੁਹਣੀ ਸੂਰਤ ਤੇ ਸੀਰਤ ਵਾਲੇ ਹਸੂ-ਹਸੂ ਕਰਦੇ ਚਿਹਰੇ ਵਾਲੀ ਜੋਤੀ ਕੋਹੇਨੂਰ ਨੇ ਸੰਗੀਤਕਾਰ ਹੈਰੀ ਬਾਠ ਤੋਂ ਬਕਾਇਦਾ ਸੰਗੀਤਕ ਵਿੱਦਿਆ ਹਾਸਲ ਕਰਨ ਉਪਰੰਤ ਕੈਸਿਟ-ਕਲਚਰ ਵਿਚ ਨਰੋਏ ਕਦਮੀ ਪੈਰ ਧਰਿਆ। ਉਸ ਦੀ ਪਹਿਲੀ ਡਿਯੂਟ ਕੈਸਿਟ ਸੀ, ਗੀਤਕਾਰ ਤੇ ਗਾਇਕ ਜਿੰਦ ਸੰਧੂ ਨਾਲ 'ਦੱਸ ਕੀ ਕਰੀਏ।'

ਇਕ ਬਾਰ ਕੈਸਿਟ-ਕਲਚਰ ਵਿਚ ਪ੍ਰਵੇਸ਼ ਕਰਨ ਉਪਰੰਤ ਮੁੜ ਉਸਨੇ ਪਿੱਛੇ ਵੱਲ ਨਹੀ ਤੱਕਿਆ। ਉਪਰੋ-ਥਲੀ ਕਈ ਕੈਸਿਟਾਂ ਮਾਰਕੀਟ ਵਿਚ ਸੁੱਟੀਆਂ, ਜਿਨ੍ਹਾਂ ਵਿਚੋਂ 'ਰੰਗ 'ਚ ਭੰਗ' (ਗੁਰਜੀਤ ਬੱਲੀ ਸਮਾਣਾ ਨਾਲ), 'ਪੇਂਡੂ ਜੱਟ ਪੱਲੇ ਪੈ ਗਿਆ' (ਭੁਪਿੰਦਰ ਸੁੱਖ ਨਾਲ) ਅਤੇ 'ਅੜੀਆਂ ਨਾ ਕਰ ਜੀਜਾ' ਆਦਿ ਵਿਸ਼ੇਸ਼ ਵਰਣਨ ਯੋਗ ਕੈਸਿਟਾਂ ਹਨ। ਹੁਣ ਗੀਤ 'ਰਿਪਲਾਈ ਟੂ ਟਰਾਲੀ' ਤੋਂ ਬਾਅਦ ਜਲਦੀ ਹੀ 'ਨੋਟ ਬੁੱਕ' ਅਤੇ 'ਰੈਡੱ ਲਾਈਟ' ਰੀਲੀਜ ਹੋਣ ਜਾ ਰਹੇ ਹਨ, ਉਸ ਦੇ ਰਿਕਾਰਡ ਹੋਏ ਗੀਤ।

ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਕੋਹੇਨੂਰ ਨੇ ਦੱਸਿਆ ਕਿ ਉਹ ਹੁਣ ਤੱਕ ਨਾਮਵਰ ਗੀਤਕਾਰ ਰਾਜੂ ਨਾਹਰ, ਬੰਟੀ ਬੈਂਸ, ਜਿੰਦ ਸੰਧੂ, ਸ਼ੇਰ ਭਗਤ ਪੁਰਾ, ਸੁਖਵਿੰਦਰ ਧਨੇਠਾ, ਸੁਰਜੀਤ ਬਾਮਣਮਾਜਰਾ ਅਤੇ ਦਰਸ਼ਨ ਦੌਲਤ ਪੁਰ ਆਦਿ ਦੇ ਗੀਤਾਂ ਨੂੰ ਅਲੀ ਅਕਬਰ, ਹੈਰੀ ਬਾਠ, ਰਾਜ ਸੰਗਰੂਰ, ਕੁਲਦੀਪ ਪਟਿਆਲਾ ਅਤੇ ਸਰਗਮ ਸੂਰੀ ਆਦਿ ਜਿਹੇ ਸੁਪ੍ਰਸਿੱਧ ਸੰਗੀਤਕਾਰਾਂ ਦੀਆਂ ਲਾ-ਜੁਵਾਬ ਸੰਗੀਤਕ ਧੁਨਾਂ ਵਿਚ ਪ੍ਰੋ-ਕੇ ਸਰੋਤਿਆਂ ਦੀ ਕਚਹਿਰੀ 'ਚ ਪੇਸ਼ ਕਰ ਚੁੱਕੀ ਹੈ।

ਸ਼ਾਲ੍ਹਾ ! ਸੱਭਿਆਚਾਰਕ ਮੇਲਿਆਂ ਦੀ ਸ਼ਾਨ, ਨੌ-ਜਵਾਨ ਪੀੜ੍ਹੀ ਦੀ ਮਨ-ਪਸੰਦ ਗਾਇਕਾ ਜੋਤੀ ਕੋਹੇਨੂਰ, ਆਪਣੀ ਬੁਲੰਦ ਗਾਇਕੀ ਨਾਲ ਕੋਹੇਨੂਰ ਹੀਰੇ ਦੀ ਤਰਾਂ ਗਾਇਕੀ-ਜਗਤ ਵਿਚ ਚਮਕ ਉਠੇ, ਦਿਲੀ ਦੁਆ ਹੈ, ਇਸ ਕਲਮ ਦੀ! ਅਮੀਨ!

- ਪ੍ਰੀਤਮ ਲੁਧਿਆਣਵੀ, ਚੰਡੀਗੜ੍ਹ (9876428641)
ਸੰਪਰਕ: ਜੋਤੀ ਕੋਹੇਨੂਰ, ਪਟਿਆਲਾ 9888438983

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com