'ਡਾਂਗ ਵੱਜੀ ਦਾ ਗਿਲਾ ਨਾ ਕੋਈ, ਧੋਖੇਬਾਜ ਹੋਣ ਯਾਰ ਨਾ', 'ਮਾੜੇ ਹੋ ਗਏ ਲੋਕ ਤੇ ਕਹਿੰਦੇ ਫਿਰਨ ਜਮਾਨੇ ਨੂੰ', 'ਜੀਹਦੇ ਠੋਕਰ ਦਿਲਾਂ ਨੂੰ ਜਾਵੇ ਵੱਜ ਨੀ' ਅਤੇ, 'ਹੀਰ', ਵਰਗੇ ਹਿੱਟ ਗੀਤਾਂ ਨੂੰ ਸੁਰੀਲੀ ਅਵਾਜ ਦੇਣ ਵਾਲਾ, ਉੱਘੇ ਸੰਗੀਤਕਾਰ ਮਾਸਟਰ ਰਣਜੀਤ ਸਿੰਘ ਜੀ ਦਾ ਲਾਡਲਾ ਸ਼ਗਿਰਦ, ਲੋਕ-ਗਾਇਕ ਰਹਿਮਤ ਅਲੀ ਇਕ ਐਸਾ ਲੋਕ-ਪ੍ਰਿਯਤਾ ਖੱਟ ਚੁੱਕਾ ਅਕਸ ਹੈ, ਜਿਸਦਾ ਨਾਂਓਂ ਹੀ ਉਸ ਦਾ ਸਿਰਨਾਵਾਂ ਬਣ ਗੁਜਰਿਆ ਹੈ। ਆਪਣੀ ਨਿਵੇਕਲੀ ਗਾਇਕੀ ਨੂੰ ਮਨਮੋਹਕ ਕਲਾਸੀਕਲ ਰੰਗਾਂ ਨਾਲ ਸ਼ਿੰਗਾਰ ਕੇ ਆਪਣੀ ਅੱਡਰੀ ਪਛਾਣ ਕਾਇਮ ਕਰਨ ਵਾਲਾ ਮਧੁਰ ਤੇ ਦਮਦਾਰ ਅਵਾਜ ਦਾ ਮਾਲਕ ਅਲੀ 2007 ਤੋਂ ਗਾਇਕੀ ਦੇ ਸਫਰ ਤੇ ਮਸਤ ਕਦਮੀ ਤੁਰਿਆ ਚਲਿਆ ਆ ਰਿਹਾ ਹੈ। ਲੋਕ-ਗਾਇਕੀ ਦੇ ਥੰਮ੍ਹ ਕਰਤਾਰ ਰਮਲਾ ਜੀ ਨਾਲ ਉਸ ਨੇ ਲਗਭਗ 4 ਸਾਲ ਸਟੇਜਾਂ ਉਤੇ ਕੋਰਸ ਦਿੱਤਾ। ਇਸ ਲੰਮੇ ਅਰਸੇ ਦੌਰਾਨ ਜਿੱਥੇ ਉਸ ਨੇ ਸਰੋਤਿਆਂ-ਦਰਸ਼ਕਾਂ ਦੀ ਨਬਜ ਪਛਾਣਨ ਦੇ ਗੁਰ ਸਿੱਖੇ, ਉਥੇ ਸਟੇਜੀ ਬਾਰੀਕੀਆਂ ਦੇ ਨਾਲ-ਨਾਲ ਗੀਤ-ਸੰਗੀਤ ਦੀਆਂ ਬਾਰੀਕੀਆਂ ਨੂੰ ਵੀ ਆਪਣੇ ਜਿਹਨ 'ਚ ਬਿਠਾਇਆ। 'ਨਾ ਵੇ ਪੀਰਾਂ ਨਾ', 'ਠੋਕਰਾਂ', 'ਮਾੜੇ ਲੋਕ', 'ਡਾਂਗ' ਅਤੇ 'ਪੀਰਾਂ ਨੂੰ ਸਲਾਮਾਂ' ਆਦਿ ਕੈਸਿਟਾਂ/ਐਲਬੰਮਾਂ ਮਾਰਕੀਟ ਵਿਚ ਪਹੁੰਚਾਉਣ ਵਾਲਾ ਇਹ ਸੁਰੀਲਾ ਗਾਇਕ, 'ਅਵਾਜ ਪੰਜਾਬ ਦੀ' ਵਿਚ ਵੀ ਆਪਣੀ ਸੁਰੀਲੀ ਅਵਾਜ ਦੇ ਜੌਹਰ ਦਿਖਾ ਚੁੱਕਾ ਹੈ।

ਸਾਂਈਂ ਮੀਤੇ ਸ਼ਾਹ (ਪਿਤਾ) ਅਤੇ ਚਰਨਜੀਤ (ਮਾਤਾ) ਜੀ ਦਾ ਲਾਡਲਾ, ਪਿੰਡ ਆਧਨੀਆ ਦਾ ਜੰਮਪਲ ਰਹਿਮਤ ਦੱਸਦਾ ਹੈ ਕਿ ਉਸ ਨੇ ਦਸਵੀਂ ਤੱਕ ਦੀ ਪੜ੍ਹਾਈ ਆਪਣੇ ਦੇ ਡਾਇਮੰਡ ਪਬਲਿਕ ਸਕੂਲ ਤੋਂ, ਪਲੱਸ-2 ਭਗਤਾ ਭਾਈਕਾ ਤੋਂ, ਬੀ. ਏ. ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਤੋਂ ਅਤੇ ਵੋਕਲ ਕਲਾਸੀਕਲ ਦਾ ਡਿਪਲੋਮਾ ਚੰਡੀਗੜ੍ਹ ਦੇ ਪ੍ਰਾਚੀਨ ਕਲਾ ਕੇਂਦਰ ਤੋਂ ਕੀਤਾ।

ਇਸ ਖੇਤਰ ਵਿਚ ਵਿਚਰਨ ਦਾ ਜਿੱਥੇ ਉਹ ਸਭ ਤੋਂ ਵੱਡਾ ਅਸ਼ੀਰਵਾਦ ਓਸ ਪਰਮ-ਪਿਤਾ ਪ੍ਰਮਾਤਮਾ ਦਾ ਮੰਨਦਾ ਹੈ, ਉਥੇ ਉਹ ਆਪਣੇ ਉਸਤਾਦ ਅਤੇ ਰਮਲਾ ਜੀ ਦੇ ਨਾਲ-ਨਾਲ ਆਪਣੇ ਪਰਿਵਾਰ ਅਤੇ ਪਿੰਡ ਆਧਨੀਆ ਦੇ ਹਰਪਾਲ ਮਾਨ (ਉੱਘੇ ਲੇਖਕ), ਵੈਦ ਬੋਹੜ ਖੁੱਡੀਆਂ, ਦਿਲਬਰ ਦਰਵੇਸ਼ (ਬਠਿੰਡਾ) ਅਤੇ ਲੋਕ-ਗਾਇਕ ਬਲਬੀਰ ਚੋਟੀਆਂ ਦੇ ਮਿਲੇ ਸਹਿਯੋਗ ਲਈ ਉਨ੍ਹਾਂ ਦਾ ਵੀ ਰਿਣੀ ਮਹਿਸੂਸ ਕਰਦਾ ਹੈ। ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਉਸ ਕਿਹਾ, 'ਮੈਂ ਜਲਦੀ ਹੀ ਆਉਣ ਵਾਲੇ ਸਮੇਂ ਵਿਚ ਸੁਪ੍ਰਸਿੱਧ ਗੀਤਕਾਰ ਜਿੰਦ ਸਵਾੜਾ ਅਤੇ ਕਰਮਜੀਤ ਪੁਰੀ ਦੀ ਕਲਮ 'ਚੋਂ ਨਿਕਲੇ ਗੀਤਾਂ ਨੂੰ ਰਿਕਾਰਡਿੰਗ ਦਾ ਜਾਮਾ ਪਹਿਨਾਕੇ ਸਰੋਤਿਆਂ ਦੀ ਕਚਹਿਰੀ ਵਿਚ ਲੈਕੇ ਆ ਰਿਹਾ ਹਾਂ। ਇਹ ਮੇਰੀ ਚਿਰੋਕਣੀ ਤਮੰਨਾ ਹੈ।' ਗਾਇਕੀ-ਖੇਤਰ ਵਿਚ ਪੱਕੇ ਪੈਰੀਂ ਨਿਕਲੇ ਰਹਿਮਤ ਨੇ ਅੱਗੇ ਕਿਹਾ, 'ਮੈਂ ਕਰਜਦਾਰ ਹਾਂ, ਦੇਸ਼-ਵਿਦੇਸ਼ ਦੇ ਉਨ੍ਹਾਂ ਸਮੂਹ ਸਰੋਤਿਆਂ ਤੇ ਦਰਸ਼ਕਾਂ ਦਾ, ਜੋ ਮੈਨੂੰ ਅੱਗੇ ਵਧਣ ਲਈ ਥਾਪੜਾ ਅਤੇ ਅਸੀਸਾਂ ਦਿੰਦੇ ਨਹੀਂ ਥੱਕਦੇ। ਮੇਰੀ ਹਮੇਸ਼ਾਂ ਕੋਸ਼ਿਸ਼ ਹੋਵੇਗੀ ਕਿ ਮੈਂ ਪੰਜਾਬੀ ਮਾਂ-ਬੋਲੀ ਦੇ ਵੱਡਮੁੱਲੇ ਸੱਭਿਆਚਾਰਕ ਵਿਰਸੇ ਨੂੰ ਸੰਭਾਲਣ ਲਈ ਆਪਣੇ ਆਖਰੀ ਸਾਹ ਤੱਕ ਲਾ ਦੇਵਾਂ ਅਤੇ ਰੱਬ ਵਰਗੇ ਸਰੋਤਿਆਂ ਦੀਆਂ ਆਸਾਂ ਉਤੇ ਖਰਾ ਉਤਰ ਸਕਾਂ, ਜਿਹੋ ਜਿਹੀਆਂ ਆਸਾਂ-ਉਮੀਦਾਂ ਲਾ ਰਹੇ ਹਨ, ਉਹ ਮੇਰੇ ਤੋਂ।'

ਰੱਬ ਕਰੇ! ਕਲਾਸੀਕਲ ਸੁਰਾਂ ਦੇ ਸ਼ਹਿਨਸ਼ਾਹ ਰਹਿਮਤ ਅਲੀ ਦੇ ਅਧੂਰੇ ਸੁਪਨਿਆਂ ਨੂੰ ਸ਼ਹਿਦ ਤੋਂ ਮਿੱਠਾ, ਰਸੀਲਾ ਤੇ ਸੰਘਣਾ ਬੂਰ ਪਵੇ! ਅਮੀਨ!

 ਪ੍ਰੀਤਮ ਲੁਧਿਆਣਵੀ, ਚੰਡੀਗੜ੍ਹ (9876428641)
ਸੰਪਰਕ : ਰਹਿਮਤ ਅਲੀ, (8427850060)

Terms and Conditions
Privacy Policy
© 1999-2012, 5abi.com

www.5abi.com
[ ਸਾਡਾ ਮਨੋਰਥ ][ ਈਮੇਲ ][ ਹੋਰ ਸੰਪਰਕ ][ ਸਾਹਿਤ ][ ਮਾਨਵ ਚੇਤਨਾ ]
[ ਵਿਗਿਆਨ ][ ਕਲਾ/ਕਲਾਕਾਰ ][ ਫਿਲਮਾਂ ][ ਖੇਡਾਂ ][ ਪੁਸਤਕਾਂ ][ ਇਤਿਹਾਸ ][ ਜਾਣਕਾਰੀ ]

©1999-2012, 5abi.com