ਪੁੱਤਰਾਂ ਦੀ ਤਾਂਘ ਵਿੱਚ, ਧੀਆਂ ਕਤਲ ਕਰਦੇ ਹਾਂ ਅਸੀਂ।
       ਪਰ ਦੁੱਖ ਹੀ ਮਿਲਦੇ ਨੇ, ਨਿਕੰਮੀ ਲੋਚ ਦੇ ਵਿੱਚ।
       ਉਨਾਂ ਦਾ ਵਪਾਰ ਨਹੀਂ ਵੱਧਦਾ ਫੁੱਲਦਾ,
       ਜਿਹੜੇ ਰਹਿੰਦੇ ਨੇ, ਕਾਮਿਆਂ ਦੀ ਹੀ ਨੋਚ ਦੇ ਵਿੱਚ।
ਇਨਾਂ ਸਤਰਾਂ ਨਾਲ ਆਪਣੇ ਸਾਹਿਤਕ ਸਫਰ ਦੀ ਗੱਲ ਸ਼ੁਰੂ ਕਰਨ ਵਾਲੀ ਨਾਮਵਰ ਕਲਮਕਾਰ ਬਲਵਿੰਦਰ ਕੌਰ ਲਗਾਣਾ ਹਰ ਖੁਸ਼ੀ-ਗਮੀ ਨੂੰ ਕਲਮ ਰਾਹੀਂ ਬਿਆਨ ਕਰਨ ਦੀ ਕਲਾ ਵਿੱਚ ਬਹੁਤ ਮਾਹਿਰ ਹੈ।  ਉਸ ਦਾ ਕਹਿਣਾ ਹੈ ਕਿ ‘ਕਵਿਤਾ ਮਨ ਦੇ ਵੱਲਵਲਿਆਂ ਵਿੱਚੋਂ ਪੈਦਾ ਹੁੰਦੀ ਹੈ।  ਕਵੀ ਦੇ ਅੰਦਰ ਪਿਆ ਇਸ ਕੋਮਲ ਕਲਾ ਦਾ ਬੀਜ ਜਦ ਪੁੰਗਰਦਾ ਹੈ ਤਾਂ ਕਵੀ ਉਸ ਨੂੰ ਅੱਖਰਾਂ ਦੇ ਵਸਤਰ ਪਾ ਕੇ ਪਾਠਕਾਂ ਦੇ ਸਨਮੁੱਖ ਪੇਸ਼ ਕਰਦਾ ਹੈ।  ਕਵਿਤਾਵਾਂ ਕਵੀ ਦੇ ਮਨ ਦਾ ਵਹਾਅ ਹੈ ਜੋ ਆਪ-ਮੁਹਾਰੇ ਸ਼ਬਦਾਂ ਵਿੱਚ ਢਲਦਾ ਹੈ।  ਸਮਾਜ ਦੇ ਚੰਗੇ -ਮਾੜੇ ਹਾਲਾਤ ਜਦੋਂ ਮੈਨੂੰ ਹਲੂਣਦੇ ਹਨ ਤਾਂ ਮੇਰੀ ਕਲਮ ਲਿਖਣ ਲਈ ਆਪ- ਮੁਹਾਰੇ ਉੱਠ ਜਾਦੀ ਹੈ।  ਕਵੀਆਂ ਦੀਆਂ ਕਵਿਤਾਵਾਂ ਕਈ ਨਿੱਜੀ ਪੀੜ ਦੇ ਨਾਲ-ਨਾਲ ਹਾਸਰਸ ਹੰਢਾਉਦੀਆਂ ਹਨ।’

ਸ: ਜੋਗਿੰਦਰ ਸਿੰਘ (ਪਿਤਾ) ਜੀ ਦੇ ਗ੍ਰਹਿ ਵਿਖੇ ਸ਼੍ਰੀਮਤੀ ਅੰਮਿ੍ਰਤ ਕੌਰ ਜੀ ਦੀ ਪਾਕ ਕੁੱਖੋਂ,  27 ਅਗਸਤ 1974 ਵਿੱਚ, ਪਿੰਡ ਡਡਿਆਣਾ ਕਲਾਂ, ਜਿਲਾ ਹੁਸ਼ਿਆਰਪੁਰ ਵਿੱਚ ਜਨਮੀ ਬਲਵਿੰਦਰ ਦੇ ਮਾਪਾ-ਪ੍ਰੀਵਾਰ ਮਹਾਨ ਸਖਸ਼ੀਅਤ ਤੇ ਚੰਗੇ ਸੰਸਕਾਰੀ ਹੋਣ ਸਦਕਾ,  ਉਨਾਂ ਨੇ ਆਪਣੀ ਲਾਡਲੀ ਧੀ ਨੂੰ ਗ੍ਰੇਜੂਏਸ਼ਨ,  ਐਮ. ਐਸ. ਟੀ., ਬੀ. ਲਿਵ ਕਰਵਾਉਣ ਦੇ ਨਾਲ-ਨਾਲ ਸਿਲਾਈ -ਕਢਾਈ ਤੇ ਪੇਟਿੰਗ ਵਿਚ ਵੀ ਪ੍ਰਵੀਨਤਾ ਦਿਵਾਈ।
 
ਲਗਾਣਾ ਨੂੰ ਲਿਖਣ ਦੀ ਚੇਟਕ ਬਾਲ ਉਮਰੇ ਹੀ ਲੱਗ ਗਈ ਸੀ।  ਕਾਲਜ ਵਿੱਚ  ਪੜਦਿਆਂ ਮੈਗਜੀਨ ਅਤੇ ਅਖਬਾਰਾਂ ਵਿਚ ਔਰਤ ਦੀ ਦੁਰਦਸ਼ਾ ਪ੍ਰਤੀ ਲੇਖ ਲਿਖਣ ਤੋਂ ਬਾਅਦ ਉਸ ਦੀ ਕਲਮ ਨੇ ਕਵਿਤਾਵਾਂ ਲਿਖਣ ਦਾ ਆਗਾਜ ਕੀਤਾ।   ਉਸ ਦੀ ਕਲਮ ਦਾ ਘੇਰਾ ਉਦੋਂ ਹੋਰ ਵੀ ਵਿਸ਼ਾਲਤਾ ਵੱਲ ਵਧਿਆ, ਜਦੋਂ ਸ਼੍ਰੋਮਣੀ ਪੰਜਾਬੀ ਲਿਖਾਰੀ ਸਭਾ ਪੰਜਾਬ (ਰਜਿ)  ਦੇ ਸਾਂਝੇ ਕਾਵਿ-ਸੰਗ੍ਰਹਿ ‘ਕਲਮਾਂ ਦੇ ਸਿਰਨਾਵੇਂ ’ (287 ਮਿਆਰੀ ਕਲਮਾਂ ) ਵਿੱਚ ਵਿਸ਼ੇਸ਼ ਤੌਰ ਤੇ ਸ਼ਾਮਲ ਹੋਣ ਦਾ ਉਸ ਨੂੰ ਮਾਣ ਹਾਸਲ ਹੋਇਆ ।  ਇਸ ਸੰਸਥਾ ਵੱਲੋਂ ਲਗਾਣਾ ਨੂੰ 2 ਅਪ੍ਰੈਲ 2017 ਨੂੰ ‘ਹੋਣਹਾਰ ਧੀ ਪੰਜਾਬ ਦੀ‘ ਦਾ ਐਵਾਰਡ ਤੇ ਸਨਮਾਨ-ਪੱਤਰ ਪ੍ਰਾਪਤ ਕਰਨ ਦਾ ਸੁਭਾਗ ਪ੍ਰਾਪਤ ਹੋਇਆ।   ਸਨਮਾਨਾਂ ਦੀ ਲੜੀ ਵਿਚ ਇਸ ਤੋਂ ਇਲਾਵਾ ਰੋਟਰੀ ਕਲੱਬ ਦਸੂਹਾ ਵੱਲੋਂ (ਔਰਤਾਂ ਦੀ ਭਲਾਈ ਤੇ ਸੰਵਿਧਾਨਕ ਹੱਕਾਂ ਤੇ ਨਸ਼ਿਆਂ ਪ੍ਰਤੀ ਜਾਗਰੂਕ ਕਰਨ ਤੇ ਸਨਮਾਨ- ਪੱਤਰ) , ਉਪ-ਮੰਡਲ ਮੈਜਿਸਟ੍ਰੇਟ ਦਸੂਹਾ ਵਲੋਂ (ਬੈਸਟ  ਬੀ. ਐਲ. ਓ. ਦਾ ਪ੍ਰਸੰਸਾ- ਪੱਤਰ),  ਨਗਰ ਕੌਂਸਲ ਦਸੂਹਾ ਤੇ ਐਸ. ਐਮ .ਓ . ਇੰਚਾਰਜ ਸਿਵਲ ਹਸਪਤਾਲ ਵਲੋਂ (ਸਮਾਜ ਪ੍ਰਤੀ ਸੇਵਾ ਕਰਨ ਕਰਕੇ ) ਪੰਜਾਬੀ ਸਾਹਿਤ ਸਭਾ (ਰਜਿ ) ਪਟਿਆਲਾ ਵੱਲੋਂ (ਸਾਂਝੀ ਪੁਸਤਕ ‘ਕਲਮ ਸ਼ਕਤੀ‘ ਤੇ ), ਡਿਪਟੀ ਕਮਿਸ਼ਨਰ ਹੁਸ਼ਿਆਰਪੁਰ ਵਲੋਂ ਦਿਆਨਦਾਰੀ,  ਇਮਾਨਦਾਰੀ ਤੇ ਤਨਦੇਹੀ ਨਾਲ ਸਮਾਜ- ਸੇਵੀ ਕੰਮਾਂ ਕਰਕੇ ਤੇ ਸਮਾਜਿਕ ਮੁੱਦਿਆਂ ਵਾਰੇ ਲੇਖ, ਕਵਿਤਾਵਾਂ ਛਪਣ ਕਰਕੇ) ਤੋਂ ਇਲਾਵਾ ਪੰਜਾਬੀ ਸੱਥ ਬਰਵਾਲੀ ਵਲੋਂ (ਸਲਾਨਾ ਸਾਹਿਤਕ ਸਮਾਗਮ ਜੋ ਸਮਰਾਲਾ ਵਿਖੇ 10 ਮਾਰਚ 2019 ਨੂੰ ਆਯੋਜਿਤ ਕੀਤਾ ਗਿਆ, ਵਿੱਚ 50 ਕਹਾਣੀਕਾਰਾਂ ਦੀਆਂ 135 ਮਿੰਨੀ ਕਹਾਣੀਆਂ ਦੇ ਕਹਾਣੀ ਮੁਕਾਬਲੇ ‘ਚੋਂ ਲਗਾਣਾ ਦੀ ਮਿੰਨੀ ਕਹਾਣੀ ‘ਜੁੜਵਾ‘  ਪਹਿਲੇ ਸਥਾਨ ਤੇ ਰਹਿਣ ਕਰਕੇ) ਆਦਿ ਮਿਲੇ ਮਾਨ-ਸਨਮਾਨਾਂ ਨੂੰ ਲਗਾਣਾ ਵਿਸ਼ੇਸ਼ ਜ਼ਿਕਰ ਯੋਗ ਅਭੁੱਲ ਸਨਮਾਨ ਮੰਨਦੀ  ਹੈ ।

ਪ੍ਰਕਾਸ਼ਨਾ ਖੇਤਰ ਵਿਚ ਵਧਦੇ ਕਦਮੀ ਉਸ ਨੂੰ ‘ਲਾਡੀ ਸਾਹਿਤ ਪ੍ਰਕਾਸ਼ਨ‘ ਦੇ ਸਾਂਝੇ ਕਾਵਿ- ਸੰਗ੍ਰਹਿ ‘ਰੁੱਖ ਪਾਣੀ ਅਨਮੋਲ‘  ਵਿੱਚ ਅਤੇ ਹੋਰ ਕਈ ਸਾਹਿਤ ਸਭਾਵਾਂ ਵਿੱਚ ਵੀ ਛਪਣ ਦਾ ਮੌਕਾ ਮਿਲਿਆ।
 
ਉਸ ਦੀਆਂ ਸੌ ਦੇ ਕਰੀਬ ਰਚਨਾਵਾਂ ਛੱਪ ਚੁੱਕੀਆ ਹਨ।  ਇਸ ਤੋਂ ਇਲਾਵਾ ਉੁਹ ਅਕਾਸ਼ਵਾਣੀ ਜਲੰਧਰ ਵਿਖੇ ਕਵੀ ਦਰਬਾਰ ‘ਪੰਜਾਬੀ ਕਵੀ ਸਭਾ‘ ਰਾਹੀਂ ਵੀ ਭਾਗ ਲੈ ਚੁੱਕੀ ਹੈ।
   
ਅਦਾਕਾਰ ਤੇ ਕਲਮਕਾਰ ਗੁਰਪ੍ਰੀਤ ਧਾਲੀਵਾਲ ਜੀ ਨੂੰ ਆਪਣਾ ਪ੍ਰੇਣਾ- ਸ੍ਰੋਤ ਮੰਨਣ ਵਾਲੀ ਬਲਵਿੰਦਰ ਕੌਰ ਲਗਾਣਾ ਨੇ ਲਿਖਣ ਦੇ ਨਾਲ-ਨਾਲ ਅਦਾਕਾਰੀ ਖੇਤਰ ਵਿਚ ਗੀਤ (ਰੀਵੈਂਜ) ਦਾ ਪਾਵਰ ਆਫ ਯੂਥ (ਸ: ਭਗਤ ਸਿੰਘ ਦੀ ਸੋਚ) ਵਿਚ ਬਾਖੂਬੀ ਅਦਾਕਾਰੀ ਕੀਤੀ ਹੈ।  ਪਾਣੀ ਦੀ ਮਹੱਤਤਾ ਨੂੰ ਬਿਆਨ ਕਰਦੀ ਲਘੂ ਫਿਲਮ ਵਿੱਚ ਵੀ ਉਸ ਨੇ ਬਾਖੂਬੀ ਕਿਰਦਾਰ ਨਿਭਾਇਆ ਹੈ।
 
ਕੁਦਰਤ ਦਾ ਆਨੰਦ ਮਾਨਣ ਵਾਲੀ ਲਗਾਣਾ ਦਾ ਕਹਿਣਾ ਹੈ ਕਿ ਕੁਦਰਤੀ ਨਜ਼ਾਰੇ ਸਾਨੂੰ ਬਹੁਤ ਸਕੂਨ ਦਿੰਦੇ ਹਨ।  ਇਹ ਵੀ ਦੱਸਣ ਯੋਗ ਹੈ ਕਿ ਉਹ ‘ਸੇਵ ਸ਼ਿਵਾਲਿਕ ਸੇਵ ਮਦਰ ਅਰਥ‘ ਸੰਸਥਾ ਦੀ ਮੈਂਬਰ ਹੋਣ ਕਾਰਨ ਬਹੁਤ ਸਾਰੇ ਬੂਟੇ ਲਾਉਂਦੀ ਹੈ।  ਪਾਣੀ ਦੀ ਬੱਚਤ ਤੇ ਵਾਤਾਵਰਣ ਨੂੰ ਬਚਾਉਣ ਬਾਰੇ ਲੋਕਾਂ ਨੂੰ ਜਾਗਰੂਕ ਕਰਦੀ ਹੈ ।
 
ਇਨਾਂ ਸਾਰੇ ਸਮਾਜ- ਸੇਵੀ ਕੰਮਾਂ ਦੇ ਨਾਲ- ਨਾਲ ਜਿੱਥੇ ਉਹ ਆਪਣੇ ਪਰਿਵਾਰ (ਪਤੀ ਕੁਲਜਿੰਦਰ ਸਿੰਘ, ਬੇਟੀ ਕੋਮਲ ਪ੍ਰੀਤ ਕੌਰ, ਬੇਟਾ ਰਾਜੇਸ਼ਵਰ ਸਿੰਘ ) ਪ੍ਰਤੀ  ਪੂਰੀ ਵਫ਼ਾਦਾਰ ਹੈ ਉਥੇ ਆਪਣੀ ਨੌਕਰੀ ਬਤੌਰ ਆਂਗਣਵਾੜੀ ਵਰਕਰ ਤੇ ਆਲ ਪੰਜਾਬ ਆਂਗਣਵਾੜੀ ਮੁਲਾਜਮ ਯੂਨੀਅਨ ਪੰਜਾਬ (ਰਜਿ) ਦੀ ਸੂਬਾ ਪ੍ਰੈਸ ਸਕੱਤਰ ਅਤੇ ਸਰਕਲ ਪ੍ਰਧਾਨ ਹੋਣ ਕਰਕੇ ਬਾਖੂਬੀ ਤਾਲਮੇਲ ਬਣਾ ਕੇ ਰੱਖਦੀ ਹੈ।  ਸਮਾਜਿਕ ਸੁਰੱਖਿਆ, ਇਸਤਰੀ ਤੇ ਬਾਲ-ਵਿਕਾਸ ਵਿਭਾਗ ਦਸੂਹਾ ਵਿਚ ਹਰੇਕ ਪ੍ਰੋਗਰਾਮ ਵਿੱਚ ਬਤੌਰ ਸਟੇਜ ਸੈਕਟਰੀ ਵਧੀਆ ਭੂਮਿਕਾ ਨਿਭਾਉਦੀ ਹੈ।  ਸਮੇਂ ਦੀ ਕਦਰ ਕਰਨਾ, ਸਮਾਜ ਸੇਵਾ ਲਈ ਆਪਾ ਸਮਰਪਣ ਕਰਨਾ, ਦੂਜਿਆ ਦੇ ਦੁੱਖ- ਸੁੱਖ ਵਿੱਚ ਸਦਾ ਸਹਾਈ ਹੋਣਾ, ਉਸ ਦੀ ਫਿਤਰਤ ਵਿਚ ਸ਼ਾਮਿਲ ਹੈ।  ਉਸ ਨੇ ਕਿਹਾ, ‘ਕੰਨਿਆ ਭਰੂਣ- ਹੱਤਿਆ, ਬੇਰੁਜ਼ਗਾਰੀ, ਔਰਤ ਦੀ ਦਸ਼ਾ, ਬਜੁਰਗਾਂ ਦੀ ਅਜੌਕੀ ਸਥਿਤੀ, ਗਰੀਬੀ, ਰਿਸ਼ਤਿਆਂ ਦਾ ਘਾਣ, ਨਸ਼ੇ, ਭਿ੍ਰਸਟਾਚਾਰ, ਪ੍ਰਦੂਸ਼ਿਤ ਵਾਤਾਵਰਣ ਦੇ ਖਿਲਾਫ਼ ਮੇਰੀ ਕਲਮ ਚੱਲਦੀ ਰਹੇਗੀ। ’
 
ਮਾਂ-ਬੋਲੀ ਦੇ ਮਿਆਰ ਨੂੰ ਉੱਚਾ ਚੁੱਕਣ ਲਈ  ਉਹ ਸਾਨੂੰ ਪੰਜਾਬੀ ਭਾਸ਼ਾ ਲਿਖਣ, ਪੜਨ ਤੇ ਬੋਲਣ ਦੀ ਅਪੀਲ ਕਰਦੀ ਹੈ ਤਾਂ ਕਿ ਅਸੀਂ ਨਿਘਾਰ ਵੱਲ ਜਾਂਦੇ ਹੋਏ ਆਪਣੇ ਸੱਭਿਆਚਾਰ ਅਤੇ ਵਿਰਸੇ ਨੂੰ ਸਾਂਭ ਸਕੀਏ।  ਇਸ ਮੁਕਾਮ ਤੱਕ ਪਹੁੰਚਣ ਲਈ ਉਹ ਵਾਹਿਗੁਰੂ ਜੀ ਦਾ ਕੋਟਨਿ- ਕੋਟ ਸ਼ੁਕਰਾਨਾ ਕਰਦੀ ਹੈ।
 
ਸ਼ਾਲਾ !   ਅਮੀਰ ਵਿਰਸੇ ਨੂੰ ਸੰਭਾਲਣ ਦੇ ਉਪਰਾਲਿਆਂ ਵਿੱਚ ਜੁਟੀ ਹੋਈ ਇਹ ਕਲਮ ਬੇਰੋਕ ਤੇ ਬੇਟੋਕ ਨਿਰੰਤਰ ਚਲਦੀ ਰਹੇ ਤੇ ਸਾਹਿਤ ਵਿੱਚ ਨਵੀਆਂ ਪਗਡੰਡੀਆਂ ਸਿਰਜਦੀ ਰਹੇ !  ਆਮੀਨ !

 ਪ੍ਰੀਤਮ ਲੁਧਿਆਣਵੀ, ਚੰਡੀਗੜ   (9876428641)
ਬਲਵਿੰਦਰ ਕੌਰ ਲਗਾਣਾ, ਦਸਮੇਸ਼ ਨਗਰ, ਦਸੂਹਾ (9464928014)