ਸਾਡਾ ਵੱਡਮੁੱਲਾ ਸੱਭਿਆਚਾਰਕ ਪੰਜਾਬੀ ਵਿਰਸਾ ਇਕ ਪਾਸੇ ਭਾਂਵੇ ਕਿ ਲੀਰੋ-ਲੀਰ ਹੁੰਦਾ ਜਾ ਰਿਹਾ ਹੈ, ਪਰ ਦੂਜੇ ਪਾਸੇ ਕੁਝ ਇਕ ਐਸੀਆਂ ਵੀ ਕਲਮਾਂ ਅਤੇ ਅਵਾਜਾਂ ਵੀ ਹਨ ਜੋ ਆਪਣੇ ਸੱਭਿਆਚਾਰ ਦੀ ਸਾਂਭ-ਸੰਭਾਲ ਲਈ ਅਜੇ ਵੀ ਪੂਰੀ ਤਨ-ਦੇਹੀ, ਇਮਾਨਦਾਰੀ, ਦਿਆਂਤਦਾਰੀ, ਲਗਨ ਤੇ ਸੌਕ ਨਾਲ ਜੁਟੀਆਂ ਹੋਈਆਂ ਹਨ।  ਉਦੋਂ ਹੋਰ ਵੀ ਮਾਣ ਅਤੇ ਫਖਰ ਮਹਿਸੂਸ ਹੁੰਦੈ, ਜਦੋਂ ਪੂਰੇ-ਦੇ -ਪੂਰੇ ਪਰਿਵਾਰ ਨੂੰ ਹੀ ਸੱਭਿਆਚਾਰ ਦੀ ਸੇਵਾ ਲਈ ਜੁਟੇ ਹੋਏ ਵੇਖੀਦਾ ਹੈ।   ਐਸੇ ਖੁਸ਼-ਨਸੀਬ ਪਰਿਵਾਰਾਂ ਵਿਚੋਂ ਸੱਭਿਆਚਾਰ ਦੀਆਂ ਮਹਿਕਾਂ, ਗੁਲਜਾਰਾਂ ਅਤੇ ਖੁਸ਼ਬੂਆਂ ਵਿਖੇਰਦੇ ਜਿਲਾ ਗੁਰਦਾਸਪੁਰ ਦੇ ਪਿੰਡ ਸ਼੍ਰੀ ਹਰਗੋਬਿੰਦਪੁਰ ਵਿਖੇ ਵਸਦੇ ਪਰਿਵਾਰ ਵਿੱਚੋਂ ਇਕ ਨਾਂਓਂ ਹੈ -ਰੁਪਿੰਦਰ ਕੌਰ ਰੂਪ ਖਾਲਸਾ।
 
ਜ਼ਿਲਾ ਹੁਸ਼ਿਆਰਪੁਰ ਦੇ ਪਿੰਡ ਸਰਹਾਲਾ ਵਿਖੇ ਸ.ਕਰਨੈਲ ਸਿੰਘ (ਪਿਤਾ) ਦੇ ਗ੍ਰਹਿ ਵਿਖੇ ਮਾਤਾ ਕੁਲਵੰਤ ਕੌਰ ਦੀ ਪਾਕਿ ਕੁੱਖੋਂ ਪੈਦਾ ਹੋਈ ਰੁਪਿੰਦਰ ਨੇ ਮੁੱਢਲੀ ਸਿੱਖਿਆ ਡੀ.  ਏ. ਵੀ.  ਹਾਈ ਸਕੂਲ ਗੜਦੀਵਾਲਾ ਤੋਂ ਪ੍ਰਾਪਤ ਕੀਤੀ। ਬੀ. ਏ. ਨੈਸ਼ਨਲ ਕਾਲਜ ਫਾਰ ਵੋਮੈਨ ਤੋਂ ਕਰਨ ਤੋਂ ਬਾਅਦ  ਅਧਿਆਪਕ ਟ੍ਰੇਨਿੰਗ  (ਈ. ਟੀ. ਟੀ. )  ਹੁਸ਼ਿਆਰਪੁਰ ਡਾਇਟ ਤੋਂ ਕੀਤੀ। ਅਕਤੂਬਰ 1998 ਵਿੱਚ ਅਧਿਆਪਨ ਕਿੱਤੇ ਦੌਰਾਨ ਐਮ. ਏ. ਹਿੰਦੀ, ਬੀ. ਐੱਡ ਕਰਨ ਤੋਂ ਬਾਅਦ ਉਹ ਸਰਕਾਰੀ ਮਿਡਲ ਸਕੂਲ ਪੇਜੋ ਚੱਕ ਗੁਰਦਾਸਪੁਰ ਵਿਖੇ ਜੂਨ 2006 ਤੋਂ  ਬਤੌਰ ਹਿੰਦੀ ਅਧਿਆਪਕਾ ਸੇਵਾ ਨਿਭਾਅ ਰਹੀ ਹੈ। ਇਕ ਮੁਲਾਕਾਤ ਦੌਰਾਨ ਬੀਬੀ ਰੁਪਿੰਦਰ ਕੌਰ ਰੂਪ ਖਾਲਸਾ ਨੇ ਦੱਸਿਆ ਕਿ ਉਸ ਨੂੰ ਲਿਖਣ ਅਤੇ ਗਾਉਣ ਦਾ ਸ਼ੌਂਕ ਕਾਲਜ ਪੜਨ ਦੌਰਾਨ ਪਿਆ। ਕਾਲਜ ਦੇ ਹਰ ਪ੍ਰੋਗਰਾਮ 'ਚ ਉਸ ਦਾ ਹੋਣਾ ਜਰੂਰੀ ਸੀ। ਗਿੱਧਾ, ਕਵਿਤਾ, ਭਾਸ਼ਣ, ਡਰਾਮੇ, ਸਕਿੱਟਾਂ, ਗੀਤ ਪੇਂਟਿੰਗ, ਹਰ ਤਰਾਂ ਦੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣਾ ਉਸ ਦਾ ਸ਼ੌਕ ਸੀ। ਪੇਕੇ ਪਰਿਵਾਰ ਦੇ ਸਹਿਯੋਗ ਸਦਕਾ ਪੜਨ ਅਤੇ ਇਨਾਂ ਗਤੀਵਿਧੀਆਂ ਵਿੱਚ  ਉਸ ਨੂੰ ਬਹੁਤ ਉਤਸ਼ਾਹ ਮਿਲਿਆ। ਕੀਰਤਨ ਸਿੱਖਣ ਦਾ ਸ਼ੌਂਕ ਸਹੁਰੇ ਪਰਿਵਾਰ ਵਿੱਚ ਆ ਕੇ ਪੂਰਾ ਹੋ ਗਿਆ। ਸਹੁਰੇ ਪਰਿਵਾਰ ਵਿੱਚ ਤਕਰੀਬਨ ਸਾਰੇ ਹੀ ਬਾਣੀ- ਬਾਣੇ ਦੇ ਧਾਰਨੀ ਹੋਣ ਕਾਰਣ ਗੁਰੂ ਘਰ ਨਾਲ ਬਹੁਤ ਪ੍ਰੇਮ ਰੱਖਦੇ ਹਨ। ਉਸ ਨੇ  ਕਿਹਾ, 'ਮੇਰਾ ਕੀਰਤਨ- ਗੁਰੂ ਮੇਰੇ ਮੰਮੀ ਜੀ (ਸੱਸ) ਹਨ। ਮੇਰੇ ਪਤੀ ਕੁਲਵਿੰਦਰ ਸਿੰਘ ਵੀ ਕੀਰਤਨ ਕਰਦੇ ਹਨ। ਮੈ ਭਾਈ ਬੋਧ ਰਾਜ ਸਿੰਘ ਜੀ ਦੇ ਕੀਰਤਨੀ ਜੱਥੇ ਨਾਲ ਕੀਰਤਨ ਦੀ ਸੇਵਾ ਕਰਦੀ ਹਾਂ।  ਪਤੀ ਕੁਲਵਿੰਦਰ ਸਿੰਘ, ਸੰਗੀਤ-ਗੁਰੂ ਭਾਈ ਅਨੂਪ ਸਿੰਘ ਹਜੂਰੇ-ਰਾਗੀ ਦਰਬਾਰ ਸਾਹਿਬ ਸ਼੍ਰੀ ਅਮ੍ਰਿਤਸਰ ਜੀ ਦੀ ਪ੍ਰੇਰਨਾ ਸਦਕਾ ਮੇਰੇ ਕੀਰਤਨ ਕਲਾ ਵਿੱਚ ਨਿਖਾਰ ਆਇਆ।'

 ਰੂਪ ਖਾਲਸਾ ਨੇ ਦੱਸਿਆ ਕਿ ਆਪਣਾ ਇਹ ਸ਼ੌਕ ਉਹ ਆਪਣੇ ਵਿਦਿਆਰਥੀਆਂ 'ਚ ਵੀ ਭਰਨ ਦੀ ਕੋਸ਼ਿਸ਼ ਕਰਦੀ ਹੈ। ਹਿੰਦੀ ਅਤੇ ਪੰਜਾਬੀ ਦੋਵਾਂ ਭਾਸ਼ਾਵਾਂ ਵਿੱਚ ਕਵਿਤਾ ਲਿਖਣਾ, ਧਾਰਮਿਕ ਗੀਤ ਲਿਖਣੇ, ਗਾਉਣੇ, ਕੀਰਤਨ ਕਰਨਾ ਜਿੰਦ-ਜਾਨ ਹਨ ਉਸਦੇ।  ਮਾਨ- ਸਨਮਾਨ ਦੀ ਗੱਲ ਛਿੜੀ ਤਾਂ ਉਸਨੇ ਦੱਸਿਆ ਕਿ ਸਾਖਰਤਾ ਅਭਿਆਨ ਦੌਰਾਨ ਡੀ. ਸੀ. ਹੁਸ਼ਿਆਰਪੁਰ, ਐਸ. ਡੀ. ਐਮ. ਦਸੂਹਾ,  ਸਾਬਕਾ ਵਿਧਾਇਕ ਸ਼੍ਰੀ ਰਾਮ ਪ੍ਰਕਾਸ਼ ਜੀ ਅਤੇ ਹੋਰ ਵੀ ਅਨੇਕਾਂ ਸਟੇਜਾਂ ਤੋਂ ਸਸ਼ਖਸੀਅਤਾਂ ਵਲੋਂ ਉਸਨੇ ਸਨਮਾਨ ਪ੍ਰਾਪਤ ਕੀਤੇ ਹਨ। ਇਕ ਸਵਾਲ ਦਾ ਜੁਵਾਬ ਦਿੰਦਿਆਂ ਬੀਬੀ ਖਾਲਸਾ ਨੇ ਕਿਹਾ, 'ਮੇਰੇ ਦੋਵੇਂ ਬੱਚੇ ਰਣਜੋਤ ਸਿੰਘ ਅਤੇ ਸ਼ੁੱਭਨੀਤ ਕੌਰ ਗੁਰਦੁਆਰਾ ਗ੍ਰੰਥੀਆਂ (ਛੇਵੀਂ ਪਾਤਸ਼ਾਹੀ ਸ਼੍ਰੀ ਹਰਗੋਬਿੰਦਪੁਰ) ਵਿਖੇ ਭਾਈ ਹਰਵਿੰਦਰ ਸਿੰਘ ਜੀ ਪਾਸੋਂ ਕੀਰਤਨ ਸਿੱਖ ਰਹੇ ਹਨ।'

ਉਸਨੇ ਅਗੇ ਦੱਸਿਆ ਕਿ ਵਾਤਾਵਰਨ ਦੀ ਸੰਭਾਲ ਖਾਤਿਰ ਪੌਦੇ ਲਗਾਉਣ ਦਾ ਕੰਮ ਵੀ ਉਹ ਕਰਦੀ ਹੈ। ਨਸ਼ੇ ਵਿਰੁੱਧ ਸੇਵਾ ਸੁਸਾਇਟੀ ਨਾਲ ਜੁੜੀ ਹੈ। ਉਸ ਦੀਆਂ ਰਚਨਾਵਾਂ ਸ਼੍ਰੋਮਣੀ ਪੰਜਾਬੀ ਲਿਖਾਰੀ ਸਭਾ ਪੰਜਾਬ ਰਜਿ; ਦੇ ਅਗਲੇ ਕਾਵਿ-ਸੰਗ੍ਰਹਿ ਵਿੱਚ ਹੁਣ ਛਪ ਰਹੀਆਂ ਹਨ।

ਸ਼੍ਰੀ ਹਰਗੋਬਿੰਦਪੁਰ ਵਿਖੇ ਆਪਣੇ ਪਰਿਵਾਰ ਵਿਚ ਸੁਖੀ ਜੀਵਨ ਬਿਤਾ ਰਹੀ, ਆਪਣੇ ਵਿਰਸੇ ਨੂੰ ਸੰਭਾਲਣ ਲਈ ਯਤਨਸ਼ੀਲ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੀ ਸੱਚੀ-ਸੁੱਚੀ ਮੂਰਤ ਇਹ ਮੁਟਿਆਰ ਬੀਬੀ ਰੁਪਿੰਦਰ ਕੌਰ ਰੂਪ ਖਾਲਸਾ ਇਸੇ ਤਰਾਂ ਨਿਰੰਤਰ ਸੇਵਾ ਵਿਚ ਜੁਟੀ ਪੰਜਾਬੀ ਮਾਂ-ਬੋਲੀ ਦੇ ਖਜਾਨੇ ਨੂੰ ਮਾਲੋ-ਮਾਲ ਕਰਦੀ ਰਵੇ !  ਅੰਬਰ ਦੇ ਭਰਵੇ ਤਾਰਿਆਂ ਜਿੰਨੀਆਂ ਇੱਛਾਵਾਂ ਤੇ ਦੁਆਵਾਂ ਹਨ ਮੇਰੀਆਂ !  ਆਮੀਨ !

ਪ੍ਰੀਤਮ ਲੁਧਿਆਣਵੀ  (ਚੰਡੀਗੜ) 9876428641
ਸੰਪਰਕ:  ਬੀਬੀ ਰੁਪਿੰਦਰ ਕੌਰ ਰੂਪ ਖਾਲਸਾ  (9877978863)