ਆਮ ਵੇਖਣ ਵਿਚ ਆਉਂਦਾ ਰਿਹਾ ਹੈ ਕਿ ਕਾਵਿ-ਖੇਤਰ ਵਿਚ ਕਵਿੱਤਰੀਆਂ ਦੀ ਕਲਮ ਜਿਆਦਾ-ਤਰ ਕਵਿਤਾ ਜਾਂ ਗ਼ਜ਼ਲ ਤੱਕ ਹੀ ਪਹੁੰਚ ਕਰਿਆ ਕਰਦੀ ਸੀ। ਫਿਰ ਹੁਣ ਹੌਲੀ ਹੌਲੀ ਇਕ ਕਦਮ ਹੋਰ ਵਧਾਉਦਿਆਂ ਕਵਿੱਤਰੀਆਂ ਗੀਤਕਾਰੀ ਖੇਤਰ ਵਿਚ ਵੀ ਨਿਤਰਨ ਦਾ ਹੌਸਲਾ ਕਰਦੀਆਂ ਮਿਲਣ ਲੱਗ ਪਈਆਂ। ਪਰ, ਹੁਣ ਇਸ ਤੋਂ ਵੀ ਅੱਗੇ ਇਨਾਂ ਗੀਤਕਾਰਾਂ ਵਿਚੋਂ ਟਾਂਵੀਆਂ-ਟਾਂਵੀਆਂ ਕਲਮਾਂ ਵੱਡਾ ਜਿਹਾ ਜਿਗਰਾ ਕਰਕੇ ਆਪਣੇ ਲਿਖੇ ਗੀਤਾਂ ਨੂੰ ਰਿਕਾਰਡਿੰਗ ਕੰਪਨੀਆਂ ਤੱਕ ਲਿਜਾਣ ਦਾ ਵੀ ਹੰਭਲਾ ਮਾਰਨ ਲੱਗ ਪਈਆਂ ਹਨ। ਆਪਣੇ ਲਿਖੇ ਗੀਤਾਂ ਨਾਲ ਰਿਕਾਰਡਿੰਗ ਦਾ ਮਾਣ ਖੱਟ ਰਹੇ ਇਹਨਾਂ ਬਹੁਤ ਹੀ ਵਿਰਲੇ ਨਾਵਾਂ ਵਿਚੋ ਇਕ ਖੂਬਸੂਰਤ ਕਲਮ ਦਾ ਨਾਮ ਹੈ- ਗਗਨਦੀਪ ਕੌਰ ਸਿਵੀਆ।

ਗਗਨਦੀਪ ਕੌਰ ਦਾ ਜਨਮ, ਜਿਲਾ- ਸ਼੍ਰੀ ਮੁਕਤਸਰ ਸਾਹਿਬ ਦੀ ਤਹਿਸੀਲ, ਮਲੋਟ ਦੇ ਪਿੰਡ ਤੱਪਾ-ਖੇੜਾ ਵਿਖੇ, ਪਿਤਾ ਸ. ਰਛਪਾਲ ਸਿੰਘ ਬਰਾੜ ਦੇ ਗ੍ਰਹਿ ਵਿਖੇ ਮਾਤਾ ਹਰਦੀਪ ਕੌਰ ਬਰਾੜ ਦੀ ਪਾਕਿ ਕੁੱਖੋਂ 1982 ਨੂੰ ਹੋਇਆ। ਬੜੀ ਦੇਰ ਬਾਅਦ ਸੰਤਾਨ ਦੀ ਪ੍ਰਾਪਤੀ ਹੋਣ ਕਾਰਣ ਗਗਨਦੀਪ ਕੌਰ ਨੂੰ ਪੁੱਤਾਂ ਵਾਂਗ ਪਾਲਿਆ ਗਿਆ। ਗਗਨਦੀਪ ਨੇ ਮਿਡਲ ਤੱਕ ਦੀ ਪੜਾਈ ਸੈਕਰਟ ਹਾਰਟ ਕੌਨਵੈਂਟ  ਸਕੂਲ, ਮਲੋਟ ਤੋਂ ਪੂਰੀ ਕੀਤੀ। ਇਸ ਦੌਰਾਨ ਅਚਨਚੇਤ ਕਿਸੇ ਸਰੀਰਕ ਬੀਮਾਰੀ ਕਾਰਨ ਗਗਨਦੀਪ ਲੱਤਾਂ ਤੋਂ ਤੁਰਨ ਵਿੱਚ ਅਸਮਰੱਥ ਹੋ ਗਈ। ਪਰ, ਉਸਨੇ ਮਾਪਿਆਂ ਦੇ ਹੌਂਸਲੇ ਅਤੇ ਆਪਣੀ ਲਗਨ ਨਾਲ ਘਰ ਵਿੱਚ ਪੜਾਈ ਜਾਰੀ ਰੱਖੀ। ਕੁੱਝ ਸਮਾਂ ਬਾਅਦ ਬੀਮਾਰੀ ਤੋਂ ਛੁਟਕਾਰਾ ਮਿਲਣ ਉਪਰੰਤ ਬੀ. ਏ. ਤੋਂ ਬਾਅਦ ਐਮ. ਸੀ. ਏ. ਤੱਕ ਦੀ ਪੜਾਈ ਪੂਰੀ ਕੀਤੀ ਅਤੇ ਸਤੰਬਰ 2009 ਵਿੱਚ ਬਤੌਰ ਕੰਪਿਊਟਰ ਫੈਕਲਟੀ, ਆਪਣੇ ਹੀ ਪਿੰਡ ਤੱਪਾ-ਖੇੜਾ ਵਿਖੇ ਸਰਕਾਰੀ ਸਕੂਲ ਵਿੱਚ ਨੌਕਰੀ ਤੇ ਜੁਆਇੰਨ ਕੀਤਾ।

ਗੱਲਬਾਤ ਦੌਰਾਨ ਗਗਨਦੀਪ ਨੇ ਦੱਸਿਆ ਕਿ ਲਿਖਣ ਦਾ ਸ਼ੌਕ ਉਸ ਨੂੰ ਬਚਪਨ ਤੋਂ ਹੀ ਸੀ। ਪਰ, ਘਰ ਵਿੱਚ ਕਿਸੇ ਦਾ ਇਸ ਪਾਸੇ ਨੂੰ ਰੁਝਾਨ ਨਾ ਹੋਣ ਕਾਰਣ ਉਸ ਨੇ ਇਸ ਸ਼ੌਕ ਨੂੰ ਆਪਣੀਆਂ ਕਾਪੀਆਂ ਤੱਕ ਹੀ ਸੀਮਤ ਰੱਖਿਆ। ਸਤੰਬਰ 2010 ਵਿੱਚ ਉਸ ਦਾ ਵਿਆਹ ਜਿਲਾ ਸ਼੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ-ਨੰਦਗੜ ਵਿਖੇ ਸ. ਪਰਮਿੰਦਰ ਸਿੰਘ ਸਿਵੀਆ ਨਾਲ ਹੋਇਆ। ਪਤੀ ਦੇ ਅਗਾਂਹ-ਵਧੂ ਵਿਚਾਰਾਂ ਅਤੇ ਹੌਸਲੇ ਸਦਕਾ ਉਸ ਨੇ ਕਲਮ ਦੌਬਾਰਾ ਚੁੱਕ ਲਈ ਅਤੇ ਉਸ ਨੇ ਆਪਣੀ ਪਹਿਲੀ ਕਵਿਤਾ 'ਅਣਜੰਮੀ ਧੀ ਦੀ ਪੁਕਾਰ' ਲਿਖੀ। ਉਸ ਨੂੰ ਫੇਸਬੁੱਕ ਤੇ ਪਾਇਆ, ਜਿਸ ਨੂੰ ਸਰੋਤਿਆਂ ਨੇ ਭਰਪੂਰ ਪਿਆਰ ਬਖਸ਼ਿਆ। ਉਸ ਤੋਂ ਬਾਅਦ ਗਗਨਦੀਪ ਨੇ ਕਦੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ ਅਤੇ ਅਣਗਿਣਤ ਲਿਖਤਾਂ ਸਮਾਜ ਦੀ ਝੋਲੀ ਪਾਈਆਂ ਅਤੇ ਇਹ ਸਿਲਸਿਲਾ ਸਰਗਰਮੀ ਨਾਲ ਲਗਾਤਾਰ ਜਾਰੀ ਹੈ। ਕਵਿਤਾਵਾਂ ਪਿਛੋਂ ਉਸ ਦੇ ਲਿਖਣ ਦਾ ਰੁਝਾਨ ਗੀਤਾਂ ਵੱਲ ਨੂੰ ਹੋ ਗਿਆ। ਉਸ ਦਾ ਲਿਖਿਆ ਪਹਿਲਾ ਦੋਗਾਣਾ, 'ਚੁੰਨੀ ਚੀਨ ਮੀਨ ਦੀ', 'ਅਮਰ ਆਡੀਉ ਕੰਪਨੀ' ਵੱਲੋਂ ਰਿਲੀਜ ਹੋਇਆ ਜੋ ਸਰੋਤਿਆਂ ਦੀ ਪਹਿਲੀ ਪਸੰਦ ਬਣਿਆ। ਫਿਰ, 'ਫਰੈਸ਼ਰ ਰਿਕਾਰਡ ਨਾਭਾ' ਵੱਲੋਂ 'ਨਖਰੋ ਵੀ ਰੱਖਦੀ', ਉਸ ਦਾ ਗੀਤ ਮਾਰਕੀਟ ਵਿੱਚ ਆਇਆ, ਜੋ ਖੂਬ ਚੱਲ ਰਿਹਾ ਹੈ, ਇਸ ਵਕਤ। ਸ਼ੋਸ਼ਲ ਮੀਡੀਆ ਤੇ ਬੋਲ ਕੇ ਪਾਈ ਲਿਖਤ, 'ਮਾਂ ਮੈਂ ਤੇਰੀ ਬੁੱਕਲ ਦੇ ਵਿੱਚ', ਨੂੰ ਕਲਾਕਾਰ ਮੰਗਤ ਖਾਂ ਪਟਿਆਲਾ ਵੱਲੋਂ ਆਪਣੀ ਖੂਬਸੂਰਤ ਅਵਾਜ ਵਿੱਚ ਸ਼ਿੰਗਾਰਿਆ ਗਿਆ, ਜੋ ਕਿ ਜਲਦ ਹੀ ਸਰੋਤਿਆਂ ਦੇ ਰੂਬਰੂ ਕੀਤਾ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਗਗਨਦੀਪ ਦਾ ਗੀਤ 'ਕੁੜਤਾ-ਚਾਦਰਾ', ਕਲਾਕਾਰ ਐਚ. ਡੀ. ਸਿੰਘ ਦੀ ਅਵਾਜ ਵਿੱਚ ਕੁੱਝ ਦਿਨਾਂ ਤੱਕ ਰਿਲੀਜ ਕੀਤਾ ਜਾਵੇਗਾ। ਗਗਨਦੀਪ ਸਿਵੀਆ ਨੇ ਅੱਗੇ ਦੱਸਿਆ ਕਿ ਉਸ ਦੀ ਹਮੇਸ਼ਾਂ ਇਹੀ ਕੋਸ਼ਿਸ਼ ਰਹੀ ਹੈ ਅਤੇ ਅੱਗੋਂ ਰਹੂਗੀ ਵੀ ਕਿ ਸਮਾਜ ਨੂੰ ਸੇਧ ਦੇਣ ਲਈ ਕੁੱਝ ਲਿਖਿਆ ਜਾਵੇ।

ਅੱਜ ਕਲ ਸ. ਸੀਨੀ. ਸੈਕੰ. ਸਕੂਲ. ਭੁਲੇਰੀਆਂ ਵਿਖੇ ਡਿਊਟੀ ਕਰਦਿਆਂ, ਮਲੋਟ ਸ਼ਹਿਰ ਵਿੱਚ ਡੇਰੇ ਲਾਈ ਬੈਠੀ, ਗਗਨਦੀਪ ਸਿਵੀਆ ਨੇ ਆਪਣੇ ਸੰਦੇਸ਼ ਰਾਹੀਂ ਧੀਆਂ ਵਾਲਿਆਂ ਨੂੰ ਅਪੀਲ ਕੀਤੀ ਕਿ ਉਹ ਧੀਆਂ ਨੂੰ ਵੱਧ ਤੋਂ ਵੱਧ ਪੜਾਉਣ ਅਤੇ ਉਹਨਾਂ ਨੂੰ ਹਰ ਖੇਤਰ ਵਿੱਚ ਅੱਗੇ ਲੈ ਕੇ ਆਉਣ ਵਿੱਚ ਉਹਨਾਂ ਦਾ ਬਣਦਾ ਸਾਥ ਦੇਣ। ਉਹਨਾਂ ਨੇ ਧੀਆਂ ਨੂੰ ਵੀ ਕਿਹਾ ਕਿ ਉਹ ਵੀ ਆਪਣੇ ਮਾਪਿਆਂ ਦੀ ਇੱਜਤ ਦਾ ਖਿਆਲ ਰੱਖ ਕੇ ਅੱਗੇ ਵੱਧਣ।

ਗੀਤਕਾਰੀ ਦੇ ਮੈਦਾਨ ਵਿਚ ਬੁਲੰਦ ਹੌਂਸਲੇ ਅਤੇ ਜੁਰਅਤ ਨਾਲ ਨਿਕਲੀ ਗਗਨਦੀਪ ਕੌਰ ਸਿਵੀਆ ਲਈ ਉਹ ਦਿਨ ਦੂਰ ਨਹੀ, ਜਦ ਉਸ ਦਾ ਨਾਮ ਏ-ਕਲਾਸ ਗੀਤਕਾਰਾਂ ਵਿਚ ਸ਼ੁਮਾਰ ਹੋਵੇਗਾ। ਰੱਬ ਕਰੇ, ਉਹ ਸੁਭਾਗੀ ਸਵੇਰ ਜਲਦੀ ਆਵੇ ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ (9876428641)
ਸੰਪਰਕ : ਗਗਨਦੀਪ ਕੌਰ ਸਿਵੀਆ, 2- ਪ੍ਰੀਤ ਨਗਰ, ਮਲੋਟ, (8146822522)

01/07/17