ਆਪਣੇ ਕਲਮੀ ਸ਼ੌਕ ਨੂੰ ਪਾਲਣ ਵਾਲੀ ਹੁਸ਼ਿਆਰਪੁਰ ਦੋਆਬੇ ਦੀ ਜੰਮਪਲ ਸਿਮਰਨਜੀਤ ਜੁਤਲਾ ਨੇ ਕੁਝ ਗੱਲਾਂ ਸਾਂਝੀਆਂ ਕਰਦਿਆਂ ਦੱਸਿਆ ਕਿ ਉਸ ਨੇ ਹੁਸਿਆਰਪੁਰ ਦੇ ਲਾਲਾ ਲਾਜਪਤ ਰਾਏ ਸਕੂਲ ਤੋਂ ਸਕੂਲੀ ਸਿੱਖਿਆ ਅਤੇ ਫਿਰ ਗੌਰਮਿੰਟ ਕਾਲਜ ਤੋਂ ਕਾਲਜ ਦੀ ਪੜਾਈ ਕੀਤੀ। ਫਿਰ ਭੋਪਾਲ ਯੂਨੀਵਰਸਿਟੀ ਤੋਂ ਉਸ ਨੇ ਕੰਪਿਊਟਰ ਦਾ ਡਿਪਲੋਮਾ ਕੀਤਾ। ਉਸ ਨੇ ਕਿਹਾ, 'ਸਕੂਲ ਵਿਚ ਕੋਈ ਵੀ ਪਾਰਟੀ ਜਾਂ ਫਿਰ ਕਿਸੇ ਵੀ ਤਰਾਂ ਦਾ ਕੋਈ ਪ੍ਰੋਗਰਾਮ ਹੁੰਦਾ ਸੀ ਤਾਂ ਮੈ ਜਰੂਰ ਭਾਗ ਲੈਂਦੀ ਸੀ। ਲਿਖਣ ਦਾ ਸ਼ੌਕ ਕਾਲਜ ਦੀ ਪੜਾਈ ਕਰਦੇ ਸਮੇਂ ਮੈਂਨੂੰ ਜਾਗ ਪਿਆ। ਜਦੋਂ ਕਾਲਜ ਦੇ ਕੁਝ ਦੂਜੇ ਵਿਦਿਆਰਥੀਆਂ ਨੂੰ ਮੈਂ ਲਿਖਦੇ ਦੇਖਣਾ ਤਾਂ ਉਸ ਸਮੇਂ ਮੇਰਾ ਦਿਲ ਵੀ ਕਰਨਾ ਕਿ ਮੈਂ ਵੀ ਕੁਝ ਲਿਖਾਂ।' ਉਸ ਦੱਸਿਆ ਕਿ ਨਵੰਬਰ 2012 ਦੀ ਗੱਲ ਹੈ, ਉਹ ਇਕੱਲੀ ਬੈਠੀ ਸੀ। ਉਸ ਨੂੰ ਪਤਾ ਹੀ ਨਹੀਂ ਲੱਗਾ ਕਿ ਲਿਖਣ ਲਈ ਉਸ ਕਦੋਂ ਕਲਮ ਚੁੱਕੀ ਅਤੇ ਕਦੋਂ ਕਵਿਤਾ ਲਿਖ ਵੀ ਹੋ ਗਈ। ਕਵਿਤਾ ਉਸ ਨੇ ਆਪਣੀਆਂ ਸਹੇਲੀਆਂ ਨੂੰ ਪੜਾਈ, ਸਭੇ ਹੈਰਾਨ ਰਹਿ ਗਈਆ। ਸਭਨਾਂ ਨੇ ਤਾਰੀਫ ਕੀਤੀ। ਬਸ, ਅਗਲੇ ਦਿਨ ਇਕ ਹੋਰ ਲਿਖੀ ਅਤੇ ਫਿਰ ਇਕ ਹੋਰ। ਜਿਉਂ-ਜਿਉਂ ਉਸ ਦੀ ਕਲਮ ਨੂੰ ਤਾਰੀਫ ਦੇ ਖੰਭ ਲੱਗਦੇ ਗਏ, ਤਿਉਂ-ਤਿਉ ਉਹ ਤਾਰੀਫ ਦੇ ਖੰਭਾਂ ਉਤੇ ਉਡਦੀ-ਉਡਦੀ ਹੋਣਹਾਰ ਕਵਿੱਤਰੀ ਬਣ ਗਈ। ਉਸ ਨੇ ਕਿਹਾ, 'ਕਾਲਜ ਸਮੇਂ, ਅਮਨ ਸਰ ਮਿਊਜ਼ਿਕ ਵਾਲੇ, ਮੇਰੇ ਗੁਰੂ ਗ਼ਜ਼ਲ-ਗਾਇਕ ਗੁਰਦੀਪ ਸਿੰਘ ਜੀ ਅਤੇ ਹੋਰ ਬਹੁਤ ਸਾਰਿਆਂ ਦਾ ਮੈਂਨੂੰ ਸਹਿਯੋਗ ਮਿਲਦਾ ਰਿਹਾ।' ਉਸ ਨੇ ਅੱਗੇ ਦੱਸਿਆ ਕਿ ਅੱਜ ਦਿਨ ਤੱਕ ਉਹ, 400 ਤੋਂ ਵੱਧ ਸ਼ਾਇਰੀ, 60 ਕੁ ਨਜਮਾਂ ਅਤੇ ਕਾਫੀ ਸਾਰੇ ਗੀਤ ਲਿਖ ਚੁੱਕੀ ਹੈ। ਜਿਨਾਂ ਵਿੱਚ 'ਮਾਂ', 'ਧੀਆਂ-ਭੈਂਣਾਂ', ਭਰੂਣ-ਹੱਤਿਆ, ਦਾਜ-ਦਹੇਜ ਅਤੇ ਰੁਮਾਂਟਿਕ ਆਦਿ ਵਿਸ਼ਿਆਂ ਨਾਲ ਸਬੰਧਤ ਰਚਨਾਵਾਂ ਹਨ। ਸੈਂਟਰਲ ਹਸਪਤਾਲ ਵਿਚ ਨੌਕਰੀ ਕਰਦਿਆਂ, ਡਾਕਟਰੀ-ਕਿੱਤੇ ਨਾਲ ਸਬੰਧਤ ਹੋਣ ਸਦਕਾ, 'ਅੱਖਾਂ ਦੀ ਸੰਭਾਲ' ਅਤੇ ਨਸ਼ਿਆਂ ਵਿਰੁੱਧ ਪ੍ਰਚਾਰ ਦਾ ਹੋਕਾ ਵੀ ਡੱਟਕੇ ਦਿੰਦੀਆਂ ਹਨ ਉਸ ਦੀਆਂ ਰਚਨਾਵਾਂ। ਲਿਖਣ ਤੋਂ ਇਲਾਵਾ ਉਸ ਨੂੰ ਗਾਉਣ ਦਾ, ਖਾਣਾ ਬਣਾਉਣ, ਕਿਤਾਬਾਂ ਪੜਨ ਅਤੇ ਡਾਂਸ ਦਾ ਵੀ ਕਾਫੀ ਸ਼ੌਕ ਹੈ।

ਸਿਮਰਨਜੀਤ ਨੇ ਇਕ ਸਵਾਲ ਦਾ ਜਵਾਬ ਦਿੰਦਿਆਂ ਕਿਹਾ, 'ਮਾਤਾ ਨਿਸ਼ਾ ਰਾਣੀ, ਵਰਧਮਾਨ ਫੈਕਟਰੀ ਵਿਚ ਜਰਨੇਟਰ ਡਿਪਾਰਟਮੈਂਟ ਵਿੱਚ ਕੰਮ ਕਰਦੇ ਮੇਰੇ ਪਿਤਾ ਗੁਰਜੀਤ ਸਿੰਘ, ਅਤੇ ਭਰਾ ਜਗਜੀਤ ਸਿੰਘ ਅਸਟ੍ਰੇਲੀਆ ਮੈਨੂੰ ਇਸ ਕਲਮੀ ਸ਼ੌਕ ਨੂੰ ਪਾਲਣ ਲਈ ਮੇਰਾ ਬਹੁਤ ਸਾਥ ਦਿੰਦੇ ਹਨ। ਅੱਜ ਜੋ ਕੁਝ ਵੀ ਮੈ ਹਾਂ, ਉਹ ਸਭ ਘਰਦਿਆਂ ਕਰਕੇ ਹੀ ਹਾਂ।'

ਆਪਣੇ ਕਲਮੀ ਸ਼ੌਕ ਨੂੰ ਰੂਹ ਨਾਲ ਪਾਲ ਰਹੀ ਮੁਟਿਆਰ ਕਵਿੱਤਰੀ ਸਿਮਰਨਜੀਤ ਨੇ ਕਿਹਾ, 'ਕਿਉਂਕਿ ਇਹ ਕਲਮ ਮੇਰੀ ਰੂਹ ਨੂੰ ਕਹਿਰਾਂ ਦਾ ਸਕੂਨ ਪ੍ਰਦਾਨ ਕਰਦੀ ਹੈ, ਇਸ ਲਈ ਮੈਂ ਆਪਣੀ ਕਲਮ ਨੂੰ ਨਿਰੰਤਰ ਵਗਦੇ ਰੱਖਾਂਗੀ ਅਤੇ ਆਪਣੇ ਸਮਾਜ ਅਤੇ ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਲਈ ਜਿੰਨਾ ਹੋ ਸਕਿਆ, ਚਲਾਵਾਂਗੀ। ਮੇਰਾ ਮੰਨਣਾ ਹੈ ਕਿ ਜਿਸ ਨਾਲ ਉਸ ਪ੍ਰਮਾਤਮਾ ਦਾ ਸਾਥ ਹੈ, ਉਸ ਨੂੰ ਦੁਨੀਆ ਦੀ ਕੋਈ ਵੀ ਤਾਕਤ ਅੱਗੇ ਵਧਣ ਤੋਂ ਰੋਕ ਨਹੀਂ ਸਕਦੀ !'
ਸ਼ਾਲਾ ! ਸਿਮਰਨਜੀਤ ਜੁਤਲਾ ਦੀਆਂ ਸੋਚਾਂ ਨੂੰ ਭਰਵਾਂ ਬੂਰ ਪਵੇ ! ਆਮੀਨ !

ਪ੍ਰੀਤਮ ਲੁਧਿਆਣਵੀ, ਚੰਡੀਗੜ (9876428641)
ਸੰਪਰਕ : ਸਿਮਰਨਜੀਤ ਜੁਤਲਾ, ਹੁਸ਼ਿਆਰਪੁਰ (8528145550)

21/12/16