ਸਿੱਖ ਪੰਥ ਦੀ ਧਾਰਮਿਕ ਯੁੱਧ ਕਲਾ ਗਤਕਾ ਹੁਣ ਪੰਜਾਬ ਦੇ ਸਕੂਲਾਂ ਵਿੱਚ ਬਹੁਤ ਹੀ ਹਰਮਨ ਪਿਆਰਾ ਹੋ ਰਿਹਾ ਹੈ। ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਨੇ ਆਪਣੇ ਕਾਰਜਕਾਲ ਦੌਰਾਨ ਇਸ ਕਲਾ ਨੂੰ ਪਹਿਲਾਂ ਇਤਿਹਾਸਿਕ ਦਿਹਾੜਿਆਂ ਤੇ ਗਤਕੇ ਦੇ ਪੁਰਾਣੇ ਉਸਤਾਦਾਂ ਦੀ ਮਦਦ ਨਾਲ ਸਾਬਤ ਸੂਰਤ ਖਿਡਾਰੀਆਂ ਦੇ ਸੂਬਾ, ਕੌਮੀਂ ਅਤੇ ਕੌਮਾਂਤਰੀ ਮੁਕਾਬਲੇ ਕਰਵਾਉਣੇ ਅਰੰਭ ਕਰਵਾਏ ਅਤੇ ਵੱਡੇ ਇਨਾਮ ਵੀ ਦਿੱਤੇ ਗਏ। ਜਿਸ ਨਾਲ ਸਾਰੇ ਸੰਸਾਰ ਅੰਦਰ ਬਹੁਤ ਅਖਾੜੇ ਹੋਂਦ ਵਿੱਚ ਆ ਗਏ ਅਤੇ ਹਰ ਥਾਂ ਤੇ ਗਤਕੇ ਦੇ ਮੁਕਾਬਲੇ ਹੋਣੇ ਸ਼ੁਰੂ ਹੋ ਗਏ। ਇਸਦੇ ਨਾਲ ਹੀ ਉਹਨਾ ਨੇ ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧ ਹੇਠ ਚੱਲ ਰਹੇ ਸਾਰੇ ਸਕੂਲਾਂ ਵਿੱਚ ਵੀ ਗਤਕੇ ਦੀਆਂ ਟੀਮਾਂ ਬਣਾਉਣ ਦਾ ਹੁਕਮ ਕਰ ਦਿੱਤਾ ਅਤੇ ਕਮੇਟੀ ਦੇ ਸਾਰੇ ਹੀ ਸਕੂਲਾਂ/ ਕਾਲਜਾਂ ਵਿੱਚ ਗਤਕੇ ਦੀਆਂ ਟੀਮਾਂ ਬਣਨੀਆਂ ਸ਼ੁਰੂ ਹੋ ਗਈਆਂ। ਇਸੇ ਦੌਰਾਂਨ ਹੀ ਜਦੋਂ ਕੁਝ ਪੱਤਿਤ ਲੋਕਾਂ ਵੱਲੋਂ ਵੀ ਇਸ ਖੇਡ ਨੂੰ ਪ੍ਰਦਸ਼ਿਤ ਕਰਨਾ ਸ਼ੁਰੂ ਕਰ ਦਿੱਤਾ ਤਾਂ 22 ਨਵੰਬਰ 2012 ਨੂੰ ਪੰਜ ਸਿੰਘ ਸਾਹਿਬਾਨ ਨੇ ਸ੍ਰੀ ਅਕਾਲ ਤਖਤ ਸਹਿਬ ਤੋਂ ਫੈਸਲਾ ਸੁਣਾ ਦਿੱਤਾ ਕਿ ਗਤਕਾ ਸ਼ਬਦ ਸਾਬਤ ਸੂਰਤ ਸਿੱਖ ਦੀ ਤਰਜਮਾਨੀ ਕਰਦਾ ਹੈ। ਇਸ ਲਈ ਕੋਈ ਵੀ ਪੱਤਿਤ ਗਤਕਾ ਸ਼ਬਦ ਵਰਤ ਕੇ ਖੇਡ ਨਹੀਂ ਸਕਦਾ ਅਤੇ ਨਾ ਹੀ ਕੋਈ ਪਤਿਤ ਗਤਕੇ ਦੀ ਕਿਸੇ ਜਥੇਬੰਦੀ ਦਾ ਅਹੁਦੇਦਾਰ ਹੀ ਬਣ ਸਕਦਾ ਹੈ। ਹੁਣ ਜਦੋਂ ਕੇਂਦਰ ਦੇ ਖੇਡ ਮੰਤਰਾਲੇ ਨੇ ਗਤਕੇ ਨੂੰ ਕੋਈ ਸਧਾਰਨ ਖੇਡ ਨਾ ਮੰਨ ਕੇ ਸਿੱਖ ਪੰਥ ਦੀ ਰਵਾਇਤੀ ਖੇਡ ਹੋਣ ਦੀ ਮਾਨਤਾ ਦੇ ਦਿੱਤੀ ਹੈ ਅਤੇ ਸਰਕਾਰੀ ਪੱਧਰ ਤੇ ਸਾਬਤ ਸੂਰਤ ਬੱਚਿਆਂ ਦੀ ਟੀਮ ਵੀ ਬਣਾਈ ਜਾ ਰਹੀ ਹੈ। ਜਦੋਂ ਸ਼੍ਰੋਮਣੀ ਗੁਰਦੁਆਰ ਪ੍ਰਬੰਧਕ ਕਮੇਟੀ ਨੇ ਸਕੂਲਾਂ ਵਿੱਚ ਗਤਕੇ ਦੀਆਂ ਟੀਮਾਂ ਬਣਾਈਆਂ ਤਾਂ ਇਸਦੇ ਅਸਰ ਹੇਠ ਪੰਜਾਬ ਦੇ ਸਰਕਾਰੀ ਅਤੇ ਗੈਰ ਸਰਕਾਰੀ ਸਕੂਲਾਂ/ਕਾਲਜਾਂ ਵਿੱਚ ਵੀ ਗਤਕੇ ਦੀਆਂ ਟੀਮਾਂ ਬਣ ਗਈਆਂ ਅਤੇ ਉਥੇ ਵੀ ਮੁਕਾਬਲੇ ਸ਼ੁਰੂ ਹੋ ਗਏ।

ਪਿਛਲੇ ਸਾਲ ਜਥੇਦਾਰ ਅਵਤਾਰ ਸਿੰਘ ਨੇ 9ਵੇਂ ਖਾਲਸਾਈ ਖੇਡ ਉਤਸਵ ਦੌਰਾਂਨ ਝਾੜ ਸਾਹਿਬ ਵਿਖੇ ਆਦੇਸ਼ ਜਾਰੀ ਕੀਤਾ ਸੀ ਕਿ ਸ਼੍ਰੋਮਣੀ ਗੁਰਦੁਅਰਾ ਪ੍ਰਬੰਧਕ ਕਮੇਟੀ ਦੇ ਸਾਰੇ ਸਕੂਲਾਂ/ਕਾਲਜਾਂ ਵਿੱਚ ਗਤਕੇ ਦੀਆਂ ਟੀਮਾਂ ਜਰੂਰੀ ਹਨ ਅਤੇ ਨਾਲ ਹੀ ਸ਼੍ਰੋਮਣੀ ਗੁਦੁਆਰਾ ਪ੍ਰਬੰਧਕ ਕਮੇਟੀ ਅੰਦਰ ਗਤਕਾ ਡਾਇਰੈਕਟੋਰੇਟ ਵੀ ਬਣਾ ਦਿੱਤਾ। ਜਿਸਦੇ ਸਿੱਟੇ ਵਜੋਂ ਐਤਕੀਂ 6 ਤੋਂ 8 ਨਵੰਬਰ ਤੱਕ ਕਰਵਾਏ ਗਏ 10ਵੇਂ ਖਾਲਸਾਈ ਖੇਡ ਉਤਸਵ ਦੌਰਾਨ 12 ਲੜਕਿਆਂ ਅਤੇ 14 ਲੜਕੀਆਂ ਦੀਆਂ ਸਾਬਤ ਸੂਰਤ ਟੀਮਾਂ ਨੇ ਭਾਗ ਲਿਆ। ਜਿਸਦਾ ਉਦਘਾਟਨ ਕਰਨ ਲਈ ਜਥੇਦਾਰ ਅਵਤਾਰ ਸਿੰਘ ਵੱਲੋਂ ਵਿਸ਼ੇਸ਼ ਤੌਰ ਤੇ ਭੇਜੇ ਮੀਤ ਸਕੱਤਰ ਡਾ: ਪਰਮਜੀਤ ਸਿੰਘ ਸਰੋਆ ਨੇ ਕੀਤਾ।

ਆਸ ਤੋਂ ਵੀ ਵੱਧ ਫਸਵੇਂ ਮੁਕਾਬਲਿਆਂ ਦੌਰਾਂਨ ਸੈਮੀਫਾਈਨਲ ਮੈਚਾਂ ਵਿੱਚ ਲੜਕੀਆਂ ਵਿੱਚੋਂ ਮਾਤਾ ਗੁਜਰੀ ਕਾਲਜ ਫਤਹਿਗੜ੍ਹ ਸਾਹਿਬ ਨੇ ਖਾਲਸਾ ਕਾਲਜ ਪਟਿਆਲਾ ਅਤੇ ਮਾਤਾ ਸਾਹਿਬ ਕੌਰ ਗਰਲਜ ਕਾਲਜ ਤਲਵੰਡੀ ਸਾਬੋ ਨੇ ਗੁਰੂ ਨਾਨਕ ਕਾਲਜ ਸ੍ਰੀ ਮੁਕਤਸਰ ਸਾਹਿਬ ਨੂੰ ਹਰਾ ਕੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਜਿਸ ਵਿੱਚ ਫਾਈਨਲ ਮੁਕਾਬਲੇ ਵਿੱਚ ਬਹੁਤ ਹੀ ਜੱਦੋ ਜਹਿਦ ਬਾਅਦ ਤਲਵੰਡੀ ਸਾਬੋ ਦੀ ਟੀਮ ਪਹਿਲੇ ਸਥਾਂਨ ਰਹੀ ਅਤੇ ਫਤਿਹਗੜ੍ਹ ਸਾਹਿਬ ਦੂਜੇ ਅਤੇ ਮੁਕਤਸਰ ਦੀ ਟੀਮ ਤੀਜੇ ਸਥਾਨ ਤੇ ਰਹੀ।

ਇਸੇ ਤਰ੍ਹਾਂ ਹੀ ਲੜਕਿਆਂ ਦੇ ਮੁਕਾਬਲੇ ਹੋਰ ਵੀ ਰੌਚਕ ਹੋ ਗਏ। ਸੈਮੀਫਾਈਨਲ ਵਿੱਚ ਖਾਲਸਾ ਕਾਲਜ ਪਟਿਆਲਾ ਨੇ ਮਾਤਾ ਗੁਜਰੀ ਕਾਲਜ ਸ੍ਰੀ ਫਤਿਹਗੜ੍ਹ ਸਾਹਿਬ ਨੂੰ ਹਰਾਇਆ ਅਤੇ ਗੁਰੂ ਨਾਨਕ ਕਾਲਜ ਬਟਾਲਾ ਨੇ ਬਾਬਾ ਬੰਦਾ ਸਿੰਘ ਬਹਾਦਰ ਇੰਜੀਅਰਿੰਗ ਕਾਲਜ ਫਤਿਹਗੜ੍ਹ ਸਾਹਿਬ ਨੂੰ ਹਰਾ ਕੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ।

ਫਾਈਨਲ ਵਿੱਚ ਬਹੁਤ ਹੀ ਗਹਿਗੱਚ ਮੁਕਾਬਲੇ ਵਿੱਚ ਸਥਿੱਤੀ ਬਹੁਤ ਹੀ ਰੌਚਕ ਹੋ ਗਈ ਜਦੋਂ ਦੋਂਵੇ ਟੀਮਾਂ ਹੀ ਬਰਾਬਰੀ ਤੇ ਆ ਗਈਆਂ ਅਤੇ ਫੈਸਲਾ ਗੰਢ ਤੋੜ ਤੇ ਆ ਗਿਆ। ਇਸ ਲਈ ਸਾਰੀ ਸ਼੍ਰੋਮਣੀ ਗਤਕਾ ਫੈਡਰੇਸ਼ਨ ਆਫ ਇੰਡੀਆ ਮੈਦਾਨ ਵਿੱਚ ਆ ਗਈ ਡਾਇਰੈਕਟਰ ਗਤਕਾ ਵੱਲੋਂ ਦੋ ਰੈਫਰੀ ਮੈਦਾਨ ਵਿੱਚ ਚਾਰ ਲਾਈਨ ਤੇ ਚਾਰ ਜੱਜ ਲਾਏ ਗਏ ਅਤੇ ਆਪ ਵੀ ਸੀਟੀ ਲੈ ਕੇ ਮੈਦਾਨ ਵਿੱਚ ਆ ਗਏ। ਅਖੀਰ ਗੁਰੂ ਨਾਨਕ ਕਾਲਜ ਬਟਾਲਾ ਨੇ ਪਹਿਲਾਂ ਅੰਕ ਲੈ ਕੇ ਪਹਿਲਾ ਸਥਾਨ ਹਾਸਲ ਕੀਤਾ ਜਦੋਂ ਕਿ ਖਾਲਸਾ ਕਾਲਜ ਪਟਿਆਲਾ ਦੁਜੇ ਅਤੇ ਮਾਤਾਗੁਜਰੀ ਕਾਲਜ ਫਤਹਿਗੜ੍ਹ ਸਾਹਿਬ ਤੀਜੇ ਸਥਾਨ ਤੇ ਰਹੇ। ਆਸ ਕੀਤੀ ਜਾਂਦੀ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਗਤਕਾ ਸਿੱਖ ਪੰਥ ਵਿੱਚ ਹੋਰ ਵੀ ਹਰਮਨ ਪਿਆਰੀ ਹੋ ਜਾਵੇਗੀ।