ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਕੰਸਟੀਚੂਐਂਟ, ਯੂਨੀਵਰਸਿਟੀ ਕਾਲਜ ਜੈਤੋ (ਜ਼ਿਲਾ ਫ਼ਰੀਦਕੋਟ) ਵਿਖੇ ਸ਼ਾਨਦਾਰ ਸਲਾਨਾ ਸਮਾਗਮ ਕਰਵਾਇਆ ਗਿਆ ਜਿਸ ਵਿਚ ਬਤੌਰ ਮੁੱਖ ਮਹਿਮਾਨ ਸ: ਦਰਸ਼ਨ ਸਿੰਘ ਗਰੇਵਾਲ (ਸੇਵਾਮੁਕਤ ਪੀ.ਸੀ.ਐਸ.) ਐਸ. ਡੀ. ਐਮ. ਜੈਤੋ ਸ਼ਾਮਲ ਹੋਏ। ਵਿਸ਼ੇਸ਼ ਮਹਿਮਾਨਾਂ ਵਿਚ ਪ੍ਰੋ. ਤਰਸੇਮ ਨਰੂਲਾ ਅਤੇ ਇੰਦਰਜੀਤ ਸ਼ਰਮਾ ਨੇ ਸ਼ਿਰਕਤ ਕੀਤੀ। ਕਾਲਜ ਗਤੀਵਿਧੀਆਂ ਦਾ ਖ਼ੁਲਾਸਾ ਬਿਆਨ ਕਰਦੀ ਸਲਾਨਾ ਰਿਪੋਰਟ ਨੂੰ ਰੀਲੀਜ਼ ਕਰਨ ਦੀ ਰਸਮ ਮੁੱਖ ਮਹਿਮਾਨ, ਵਿਸ਼ੇਸ਼ ਮਹਿਮਾਨਾਂ ਅਤੇ ਪ੍ਰਿੰਸੀਪਲ ਨੇ ਅਦਾ ਕੀਤੀ। ਉਪਰੰਤ ਪ੍ਰਿੰਸੀਪਲ ਡਾ. ਸੁਮਨ ਲਤਾ ਨੇ ਰਿਪੋਰਟ ਪੜੀ।

ਸਮਾਰੋਹ ਨੂੰ ਮਨੋਰੰਜਨਕ ਬਨਾਉਣ ਲਈ ਵਿਦਿਆਰਥੀਆਂ ਵੱਲੋਂ ਸਭਿਆਚਾਰਕ ਵੰਨਗੀਆਂ ਪੇਸ਼ ਕੀਤੀਆਂ ਗਈਆਂ। ਰਵਾਇਤ ਮੁਤਾਬਕ ਪੰਜਾਬੀ ਯੂਨੀਵਰਸਿਟੀ ਦੀ ਧੁਨੀ ਦੇ ਗਾਇਨ ਨਾਲ ਪ੍ਰੋਗਰਾਮ ਦਾ ਸ਼ੁਭ ਆਗ਼ਾਜ਼ ਕੀਤਾ ਗਿਆ। ਗੁਰਮਤਿ ਸੰਗੀਤ ਦੇ ਪ੍ਰੋ. ਹਰਮਨਦੀਪ ਸਿੰਘ ਦੀ ਸੰਗੀਤ ਨਿਰਦੇਸ਼ਨਾ ਵਿਚ ਸਿੱਖ ਗੁਰੂ ਇਤਿਹਾਸ ਨੂੰ ਬਿਆਨ ਕਰਦੀ ‘ਵਾਰ’, ‘ਕੱਵਾਲੀ’-ਦਮਾਦਮ ਮਸਤ ਕਲੰਦਰ, ‘ਗੀਤ’-ਜੁੱਤੀ ਕਸੂਰੀ ਪੈਰੀਂ ਨਾ ਪੂਰੀ ਨੂੰ ਦਰਸ਼ਕਾਂ ਨੇ ਬਹੁਤ ਪਸੰਦ ਕੀਤਾ। ਨਾਚ ਵੰਨਗੀਆਂ ਵਿਚ ‘ਮਾਹੀਆ’ ਲੋਕ ਨਾਚ ਵਿਚ ਵਿਦਿਆਰਥੀਆਂ ਦੀ ਪੇਸ਼ਕਾਰੀ ਬੇਹੱਦ ਪਸੰਦ ਕੀਤੀ ਗਈ। ਹਾਸਰਸ ਅਤੇ ਵਿਅੰਗ ਭਰਪੂਰ ਲਘੂ-ਨਾਟਕ ‘ਆਰ. ਐਸ. ਵੀ. ਪੀ.’ (ਰੋਂਦੇ ਸਾਰੇ ਵਿਆਹ ਪਿੱਛੇ) ਦੀ ਪੇਸ਼ਕਾਰੀ ਵਾਲੇ ਵਿਦਿਆਰਥੀ-ਅਦਾਕਾਰਾਂ ਦੀ ਕਲਾ ਨੂੰ ਬਹੁਤ ਸਲਾਹਿਆ ਗਿਆ। ਅਕਾਦਮਿਕ, ਖੇਡਾਂ, ਸਭਿਆਚਾਰਕ ਅਤੇ ਹੋਰ ਗਤੀਵਿਧੀਆਂ ਵਿਚ ਪ੍ਰਾਪਤੀਆਂ ਹਾਸਲ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਮੁੱਖ ਮਹਿਮਾਨ ਵੱਲੋਂ ਇਨਾਮ ਵੰਡੇ ਗਏ ਜਿਸ ਵਿਚ ਕਾਮਰਸ ਵਿੰਗ ਵਿੱਚੋਂ ਕਰਮਜੀਤ ਕੌਰ ਬੀ. ਕਾਮ. ਸਮੈਸਟਰ ਚੌਥਾ ਅਤੇ ਆਰਟਸ ਵਿੰਗ ਵਿਚੋਂ ਸੁਖਦੀਪ ਕੌਰ ਬੀ. ਏ. ਭਾਗ ਦੂਜਾ ਨੂੰ ‘ਸਰਬਾਂਗੀ ਵਿਦਿਆਰਥੀ’ ਦੇ ਖ਼ਿਤਾਬ ਨਾਲ ਨਿਵਾਜਿਆ ਗਿਆ।

ਸਨਮਾਨ ਸਮਾਰੋਹ ਵਿਚ ਵਿਸ਼ੇਸ਼ ਤੌਰ ’ਤੇ ਸੱਦੇ ਗਏ ਵਿਦਿਆਰਥੀਆਂ ਦੇ ਮਾਪਿਆਂ ਨੂੰ ਵੀ ਸਨਮਾਨ ਚਿੰਨ ਦਿੱਤੇ ਗਏ। ਮੁੱਖ ਮਹਿਮਾਨ ਨੇ ਇਨਾਮ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਵਧਾਈ ਦਿੱਤੀ ਅਤੇ ਆਪਣੀ ਸਫ਼ਲਤਾ ਦੀ ਕਹਾਣੀ ਵਿਦਿਆਰਥੀਆਂ ਨਾਲ ਸਾਂਝੀ ਕਰਕੇ ਪ੍ਰੇਰਨਾਦਾਇਕ ਮਾਹੌਲ ਸਿਰਜਿਆ। ਮੰਚ ਸੰਚਾਲਕਾ ਵਜੋਂ ਪ੍ਰੋ. ਮਨਪ੍ਰੀਤ ਕੌਰ ਨੇ ਬਾਖ਼ੂਬੀ ਜਿੰਮੇਵਾਰੀ ਨਿਭਾਈ। ਸਮਾਰੋਹ ਨੂੰ ਸਿਖ਼ਰ ਤੱਕ ਲੈ ਜਾਣ ਲਈ ਕਾਲਜ ਦੀ ਗਿੱਧਾ ਟੀਮ ਨੇ ਧਮਾਲਾਂ ਪਾਈਆਂ ਅਤੇ ਸ਼ਾਨੋਸ਼ੌਕਤ ਨਾਲ ਸਮਾਰੋਹ ਸੰਪੰਨ ਹੋਇਆ।