1 ਸਤੰਬਰ ਦਿਨ ਐਤਵਾਰ ਇੰਡੀਅਨ ਕਮਿਊਨਿਟੀ ਸੈਂਟਰ ਨੌਟਿੰਘਮ ‘ਚ ਇੱਕ ਸ਼ਾਨਦਾਰ ਸਮਾਗਮ ਆਯੋਜਤ ਕੀਤਾ ਗਿਆ ਜਿਸ ‘ਚ ਇੰਗਲੈਂਡ ‘ਚ ਵਸਦੇ ਕਵੀਆਂ ਤੇ ਬੁੱਧੀਜੀਵੀਆਂ ਨੇ ਭਾਗ ਲਿਆ। ਪ੍ਰੋਗਰਾਮ ਤਿੰਨ ਵਜੇ ਤੋਂ ਲੈ ਕੇ ਰਾਤ ਦੇ ਅੱਠ ਵਜੇ ਤੱਕ ਚਲਦਾ ਰਿਹਾ ਜਿਸਨੂੰ ਸੈਂਟਰ ਦੇ ਖ਼ੂਬਸੂਰਤ ਖਚਾ ਖਚ ਭਰੇ ਹਾਲ ‘ਚ 250 ਤੋਂ ਵੀ ਵੱਧ ਸਰੋਤਿਆਂ ਨੇ ਮਾਣਿਆ।

ਪ੍ਰੋਗਰਾਮ ਦੋ ਹਿੱਸਿਆਂ ‘ਚ ਵੰਡਿਆ ਗਿਆ ਸੀ। ਪਹਿਲੇ ਹਿੱਸੇ ‘ਚ ਪੰਜਾਬੀ ਦੇ ਅੱਧੀ ਸਦੀ ਤੋਂ ਵੀ ਵੱਧ ਜਾਣੇ ਬਹੁ-ਚਰਚਿਤ ਸਾਹਿਤਕਾਰ ਤੇ ਬ੍ਰੌਡਕਾਸਟਰ ਡਾ. ਸਾਥੀ ਲੁਧਿਆਣਵੀ ਨੇ ਸੰਤੋਖ ਧਾਲੀਵਾਲ ਦੇ ਨਵੇਂ ਨਾਵਲ ‘ਰਿਸ਼ਤਿਆਂ ਦੇ ਮਾਰੂਥਲ’ ਬਾਰੇ ਵਿਸਥਾਰ ‘ਚ ਜਾਣ ਪਹਿਚਾਣ ਕਰਵਾਈ। ਨਾਵਲ ਬਾਰੇ ਗਲ ਕਰਦਿਆਂ ਸਿਰਮੌਰ ਕਵੀ ਦਰਸ਼ਨ ਬੁਲੰਦਵੀ ਨੇ ਇਸਨੂੰ ਸੰਤੋਖ ਧਾਲੀਵਾਲ ਦੀ ਪੰਜਾਬੀ ਗਲਪ ‘ਚ ਬਹੁਤ ਹੀ ਅਹਿਮ ਯੋਗਦਾਨ ਪਾਉਣ ਵਾਲੀ ਰਚਨਾ ਕਿਹਾ। ਇਸ ਤੋਂ ਬਾਅਦ ਡਾ. ਦਵਿੰਦਰ ਕੌਰ ਨੇ ਕੈਨੇਡਾ ਵਸਦੀ ਸ਼ਾਇਰਾ ਤਨਦੀਪ ਤਮੰਨਾ ਦੀ ਸ਼ਾਇਰੀ ਦੀ ਪਲੇਠੀ ਪੁਸਤਕ ‘ਇੱਕ ਦੀਵਾ ਇੱਕ ਦਰਿਆ’ ਵਿਚਲੀ ਸ਼ਾਇਰੀ ਨੂੰ ਲਫਜ਼ਾਂ ਨੂੰ ਨਵੇਂ ਅਰਥ ਦੇਣ ਵਾਲੀ ਸ਼ਾਇਰੀ ਕਹਿੰਦਿਆਂ ਉਸਦਾ ਤੁਆਰਫ ਕਰਾਇਆ। ਇਸ ਤੋਂ ਪਿੱਛੋਂ ਸੰਤੋਖ ਧਾਲੀਵਾਲ ਦਾ ਨਾਵਲ ਤੇ ਤਨਦੀਪ ਤਮੰਨਾ ਦੀ ਕਵਿਤਾ ਦੀ ਕਿਤਾਬ ਦੋਨੋ ਰੀਲੀਜ਼ ਕੀਤੇ ਗਏ। ਪਰਧਾਨਗੀ ਮੰਡਲ ‘ਚ ਨਾਵਲਕਾਰ ਮੁਹਿੰਦਰਪਾਲ ਧਾਲੀਵਾਲ, ਬਹੁ ਵਿਧ ਸਾਹਿਤਕਾਰ ਹਰਜੀਤ ਅਟਵਾਲ, ਪੰਜਾਬੀ ਸੱਥ ਦੇ ਸੰਚਾਲਕ ਮੋਤਾ ਸਿੰਘ ਸਰਾਏ, ਸੁਖਦੇਵ ਸਿੰਘ ਬਾਂਸਲ, ਸਾਥੀ ਲੁਧਿਆਣਵੀ ਤੇ ਹਿੰਦੀ ਦੀ ਬਹੁ-ਚਰਚਿੱਤ ਸ਼ਾਇਰਾ ਜੈਅ ਵਰਮਾ ਜੀ ਸਸ਼ੋਭਤ ਸਨ।

ਦੂਜੇ ਸੈਸ਼ਨ ‘ਚ ਬਹੁ-ਭਾਸ਼ੀ ਤੇ ਸ਼ਾਨਦਾਰ ਕਵੀ ਦਰਬਾਰ ਕਰਵਾਇਆ ਗਿਆ ਜਿਸ ‘ਚ ਇੰਗਲੈਂਡ ਦੇ ਵੱਖ ਵੱਖ ਸ਼ਹਿਰਾਂ ਤੋਂ ਆਏ ਕਵੀਆਂ ਨੇ ਹਿੱਸਾ ਲਿਆ ਤੇ ਆਪਣੀਆਂ ਨਵੀਆਂ ਕਵਿਤਾਵਾਂ ਨਾਲ ਸਰੋਤਿਆਂ ਨੂੰ ਕੀਲੀ ਰੱਖਿਆ। ਪਰਧਾਨਗੀ ਮੰਡਲ ‘ਚ ਨਵੀਂ ਕਵਿਤਾ ਦਾ ਸਮਰੱਥ ਸ਼ਾਇਰ ਵਰਿੰਦਰ ਪਰਹਾਰ, ਕਵੀ, ਅਲੋਚਕ ਤੇ ਚਿੰਤਕ ਡਾ. ਦਵਿੰਦਰ ਕੌਰ, ਨਵੀਂ ਕਵਿਤਾ ਨੂੰ ਨਵੇਂ ਅਰਥ ਦੇਣ ਵਾਲੀ ਸ਼ਇਰਾ ਦਲਬੀਰ ਕੌਰ, ਪੰਜਾਬੀ ਗ਼ਜ਼ਲ ‘ਚ ਨਵੀਆਂ ਤੇ ਨਵੇਕਲੀਆਂ ਲੀਹਾਂ ਪਾਉਣ ਵਾਲਾ ਕਵੀ ਸੁਰਿੰਦਰ ਸੀਹਰਾ, ਇੰਗਲੈਂਡ ‘ਚ ਵਸਦੇ ਸ਼ਇਰਾਂ ‘ਚ ਪਰਵਾਨਿਆਂ ਗ਼ਜ਼ਲਗੋ ਅਜ਼ੀਮ ਸ਼ੇਖਰ ਬਿਰਾਜਮਾਨ ਹੋਏ। ਕਵੀ ਦਰਬਾਰ ‘ਚ ਵਰਿੰਦਰ ਪਰਹਾਰ, ਸਾਥੀ ਲੁਧਿਆਣਵੀ, ਡਾ. ਦਵਿੰਦਰ ਕੌਰ, ਦਰਸ਼ਨ ਬੁਲੰਦਵੀ, ਦਲਬੀਰ ਕੌਰ, ਸੁਰਿੰਦਰ ਸੀਹਰਾ, ਜਸਵਿੰਦਰ ਮਾਨ, ਮੁਸੱਰਤ ਤਾਰਿਕ, ਜੈਅ ਵਰਮਾ, ਓਂਕਾਰ ਮਾਨਵ, ਡਾ. ਰਤਨ ਰੀਹਲ, ਸੁਰਿੰਦਰ ਰਾਏ, ਕੁਲਦੀਪ ਸਿੰਘ, ਸੁਰਿੰਦਰਪਾਲ, ਸੰਤੋਖ ਹੇਅਰ, ਕੁਲਦੀਪ ਬਾਂਸਲ, ਮੁਹਿੰਦਰਪਾਲ ਧਾਲੀਵਾਲ, ਹਰਮਿੰਦਰ ਬਣਬੈਤ,ਅਵਤਾਰ ਡੋਹਲ ਤੇ ਰਾਜਿੰਦਜੀਤ। ਕਵੀ ਦਰਬਾਰ ਦੀ ਸਟੇਜ ਰਾਜਿੰਦਰਜੀਤ ਨੇ ਬਹੁਤ ਹੀ ਭਾਵਪੂਰਤ ਤੇ ਸਲੀਕੇ ਨਾਲ ਸੰਭਾਲੀ।