ਸਥਾਨਕ ਬਾਬਾ ਫ਼ਰੀਦ ਲਾਅ ਕਾਲਜ ਦਾ ਸਾਲਾਨਾ ਇਨਾਮ ਵੰਡ ਸਮਾਗਮ ਪ੍ਰੋ: ਜਮਸ਼ੀਦ ਅਲੀ ਖ਼ਾਨ, ਡੀਨ, ਕਾਲਜ ਵਿਕਾਸ ਕੌਂਸਲ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ ਦੀ ਪ੍ਰਧਾਨਗੀ ਹੇਠ ਹੋਇਆ | ਇਸ ਮੌਕੇ ਇੰਦਰਜੀਤ ਸਿੰਘ ਖ਼ਾਲਸਾ ਮੁੱਖ ਸੇਵਾਦਾਰ, ਬਾਬਾ ਫ਼ਰੀਦ ਸੰਸਥਾਵਾਂ ਨੇ ਪ੍ਰੋ: ਖ਼ਾਨ ਦੀ ਜਾਣ-ਪਛਾਣ ਕਰਾਉਂਦਿਆਂ ਦੱਸਿਆ ਕਿ ਪ੍ਰੋ. ਖ਼ਾਨ ਰਾਜਨੀਤੀ ਵਿਗਿਆਨ ਦੇ ਖੇਤਰ 'ਚ ਉੱਘੇ ਸਿੱਖਿਆਕਾਰ ਅਤੇ ਵਿਦਵਾਨ ਵਜੋਂ ਜਾਣੇ ਜਾਂਦੇ ਹਨ ਅਤੇ ਉਨ੍ਹਾਂ ਨੇ ਰਾਜਨੀਤੀ ਵਿਗਿਆਨ, ਗਠਬੰਧਨ ਦੀ ਰਾਜਨੀਤੀ, ਪੰਜਾਬ ਦੀ ਰਾਜਨੀਤੀ ਅਤੇ ਹੋਰ ਕੋਈ ਭਖਦੇ ਮੁੱਦਿਆਂ 'ਤੇ ਕਿਤਾਬਾਂ ਲਿਖੀਆਂ ਹਨ, ਜਿਹੜੀਆਂ ਕਿ ਦੇਸ਼ ਦੀ ਹਰ ਲਾਇਬਰੇਰੀ ਵਿਚ ਮੌਜੂਦ ਹਨ |

ਇਸ ਤੋਂ ਇਲਾਵਾ ਪ੍ਰੋ: ਖ਼ਾਨ ਨੇ ਲਗਪਗ 50 ਖੋਜ-ਪੱਤਰ ਲਿਖੇ ਹਨ ਤੇ 100 ਤੋਂ ਵੱਧ ਅੰਤਰਰਾਸ਼ਟਰੀ ਅਤੇ ਰਾਸ਼ਟਰੀ ਪੱਧਰ ਦੇ ਸੰਮੇਲਨਾਂ ਵਿਚ ਭਾਗ ਲੈ ਕੇ ਪੰਜਾਬ ਦਾ ਨਾਂਅ ਰੌਸ਼ਨ ਕੀਤਾ ਹੈ, ਜਿਸ ਕਰਕੇ ਉਨ੍ਹਾਂ ਨੂੰ ਵਿਦਿਆਰਥੀਆਂ ਦੇ ਆਦਰਸ਼ ਵਜੋਂ ਇਥੇ ਬੁਲਾਇਆ ਗਿਆ ਤਾਂ ਜੋ ਸਾਲਾਨਾ ਇਨਾਮ ਵੰਡ ਸਮਾਗਮ ਵਿਚ ਉਹ ਵਿਦਿਆਰਥੀਆਂ ਨੂੰ ਸਨਮਾਨਿਤ ਕਰ ਕੇ ਉਨ੍ਹਾਂ ਦੀ ਹੌਸਲਾ ਅਫ਼ਜ਼ਾਈ ਕਰ ਸਕਣ | ਪ੍ਰੋ: ਖ਼ਾਨ ਨੇ ਬਾਬਾ ਫ਼ਰੀਦ ਲਾਅ ਕਾਲਜ ਨੂੰ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਅਧੀਨ ਮਾਨਤਾ ਪ੍ਰਾਪਤ ਕਾਲਜਾਂ ਵਿਚੋਂ ਮੋਹਰੀ ਤੇ ਉੱਚੇ ਮਿਆਰ ਸਥਾਪਿਤ ਕਰਨ ਵਾਲੀ ਵਿੱਦਿਅਕ ਸੰਸਥਾ ਦਾ ਖ਼ਿਤਾਬ ਦਿੱਤਾ | ਉਨ੍ਹਾਂ ਦੱਸਿਆ ਕਿ ਪੂਰੇ ਪੰਜਾਬ ਦੇ ਪ੍ਰਾਈਵੇਟ ਲਾਅ ਕਾਲਜਾਂ 'ਚੋਂ ਬਾਬਾ ਫ਼ਰੀਦ ਲਾਅ ਕਾਲਜ, ਇਲਾਕੇ ਦਾ ਪਹਿਲਾ ਲਾਅ ਕਾਲਜ ਹੈ ਜਿਸ ਨੇ ਭੂ-ਮੰਡਲੀਕਰਨ ਦੀ ਮੰਗ ਨੂੰ ਵੇਖਦੇ ਹੋਇਆ ਨਵੇਂ ਕੋਰਸ ਸ਼ੁਰੂ ਕਰਨ ਲਈ ਆਪਣੀ ਇੱਛਾ ਦਾ ਪ੍ਰਗਟਾਵਾ ਕੀਤਾ ਹੈ, ਜਿਸ ਦੀ ਯੂਨੀਵਰਸਿਟੀ ਪ੍ਰਸ਼ਾਸਨ ਵੱਲੋਂ ਕਾਫ਼ੀ ਪ੍ਰਸ਼ੰਸਾ ਕੀਤੀ ਗਈ | ਇਨਾਮ ਵੰਡ ਸਮਾਰੋਹ ਦੌਰਾਨ ਮਰਹੂਮ ਸ੍ਰੀ ਵੇਦ ਪ੍ਰਕਾਸ਼ ਗੋਇਲ (ਐਡਵੋਕੇਟ), ਚੈਰੀਟੇਬਲ ਟਰੱਸਟ ਵੱਲੋਂ ਦਿੱਤਾ ਗਿਆ 'ਸੋਨ ਤਗਮਾ' ਅਕਾਦਮਿਕ ਸੈਸ਼ਨ 2011-12 ਦੀ ਵਿਦਿਆਰਥਣ ਅਮਨਦੀਪ ਕੌਰ ਨੂੰ ਬੀ. ਏ. ਐਲਐਲ.ਬੀ. ਪੰਜਵੇਂ ਸਾਲ ਵਿਚ 75 ਫੀਸਦੀ ਅੰਕ ਹਾਸਲ ਕਰਨ 'ਤੇ ਦਿੱਤਾ ਗਿਆ | ਇਸ ਦੇ ਇਲਾਵਾ ਅਕਾਦਮਿਕ ਇਨਾਮਾਂ ਵਿਚੋਂ ਨਵਨੀਤ ਕੌਰ ਅਤੇ ਮਨਪ੍ਰੀਤ ਸਿੰਘ, ਬੀ. ਏ. ਐਲਐਲ.ਬੀ. ਭਾਗ ਚੌਥਾ 'ਚ ਹਰਸਿਮਰਨ ਸਿੰਘ, ਨੇਹਾ ਜੈਨ, ਬੀ.ਏ. ਐਲਐਲ.ਬੀ. ਭਾਗ-ਤੀਜਾ ਸ਼ਰੁਤਿਕਾ ਸ਼ਰਮਾ ਤੇ ਮਨਿੰਦਰ ਕੌਰ, ਬੀ.ਏ. ਐਲਐਲ.ਬੀ. ਭਾਗ-ਦੂਜਾ ਨਵਸੰਗੀਤ ਅਤੇ ਅਨਾਮਿਕਾ ਟੰਡਨ ਨੂੰ ਦਿੱਤੇ ਗਏ | ਐਲਐਲ.ਬੀ. (ਤਿੰਨ ਸਾਲਾ ਕੋਰਸ) ਵਿਚ ਸਰੁਚੀ ਬੱਤਾ, ਮਨਪ੍ਰੀਤ ਕੌਰ ਅਤੇ ਹਰਪ੍ਰੀਤ ਕੌਰ ਨੂੰ ਪਹਿਲਾ, ਦੂਸਰਾ ਤੇ ਤੀਸਰਾ ਸਥਾਨ ਲੜੀਵਾਰ, ਐਲਐਲ.ਬੀ. ਦੂਜਾ-ਸਾਲ ਵਿਚ ਹਰਲੀਨ ਕੌਰ ਅਤੇ ਸਰਨਾਮ ਸਿੰਘ ਨੂੰ ਪਹਿਲਾ ਅਤੇ ਦੂਸਰਾ ਸਥਾਨ ਲੜੀਵਾਰ, ਐਲਐਲ.ਬੀ.-ਤੀਸਰਾ ਸਾਲ ਵਿਚ ਅਮਰਜੀਤ ਕੌਰ ਅਤੇ ਗੁਰਪ੍ਰੀਤ ਕੌਰ ਨੂੰ ਦਿੱਤੇ ਗਏ | ਅਕਾਦਮਿਕ ਕਾਰਗੁਜ਼ਾਰੀ ਦੇ ਇਲਾਵਾ ਵਿਦਿਆਰਥੀਆਂ ਨੂੰ ਸਹਿ-ਵਿੱਦਿਅਕ ਖੇਡਾਂ ਅਤੇ ਹੋਰ ਸਮਾਜਿਕ ਸਰਗਰਮੀਆਂ ਲਈ ਵੀ ਸਨਮਾਨਿਤ ਕੀਤਾ ਗਿਆ | ਇਸ ਮੌਕੇ ਸੁਤੰਤਰਤਾ ਸੰਗਰਾਮੀ ਅਮਰ ਸਿੰਘ ਸੁਖੀਜਾ, ਲਛਮਣ ਗੁਪਤਾ, ਸੁਰਿੰਦਰ ਸਿੰਘ ਬਾਵਾ, ਰਮੇਸ਼ ਜੈਨ ਤੇ ਸ਼ਹਿਰ ਦੇ ਹੋਰ ਪਤਵੰਤੇ ਸੱਜਣ ਮੌਜੂਦ ਸਨ |