12 ਅਪ੍ਰੈਲ 2013 ਨੂੰ ਇੰਡੀਅਨ ਸੈਂਟਰਲ ਸਕੂਲ ਜਲੀਬ ਅਲ ਸ਼ੁਵੇਕ ਦੇ ਆਡੀਟੋਰੀਅਮ ਵਿੱਚ ਸ਼ਹੀਦ ਭਗਤ ਸਿੰਘ ਵੈਲਫੇਅਰ ਤੇ ਵਿਚਾਰ ਮੰਚ ਕੁਵੈਤ ਵਲੋਂ ਵਿਸ਼ਾਲ ਤਰਕਸ਼ੀਲ ਮੇਲਾ ਕਰਵਾਇਆ ਗਿਆ। ਇਸ ਮੇਲੇ ਵਿੱਚ ਭਾਰੀ ਗਿਣਤੀ ਵਿੱਚ ਕੰਮ ਕਰਦੇ ਪੰਜਾਬੀ ਭਾਈਚਾਰੇ ਨੇ ਹਾਜ਼ਰੀ ਲੁਆਈ। ਮੇਲੇ ਦੀ ਸ਼ੁਰੂਆਤ ਭਗਤ ਸਿੰਘ ਯੂਥ ਕਲੱਬ ਵਲੋਂ ਭੰਗੜਾ ‘ਹਰ ਗੱਭਰੂ ਵਿੱਚ ਦਿਸਦੀ ਤਸਵੀਰ ਤੇਰੀ ਭਗਤ ਸਿੰਆਂ’’ ਪੇਸ਼ ਕਰਕੇ ਕੀਤੀ ਗਈ। ਇਸ ਤੋਂ ਬਾਅਦ ਚੇਤਨਾ ਕਲਾ ਕੇਂਦਰ ਬਰਨਾਲਾ ਦੇ ਹਰਵਿੰਦਰ ਦੀਵਾਨਾ ਦੀ ਅਗਵਾਈ ’ਚ ਕੋਰੀਓਗ੍ਰਾਫੀ ‘‘ਧੀ ਦੀ ਪੁਕਾਰ’’ ਨੂੰ ਦਰਸ਼ਕਾਂ ਨੇ ਤਾੜੀਆਂ ਮਾਰ ਕੇ ਖੂਬ ਸਲਾਹਿਆ। ਸਟੇਜ ਸਕੱਤਰ ਦੀ ਡਿਉਟੀ ਸ਼ਹੀਦ ਭਗਤ ਸਿੰਘ ਵੈਲਫੇਅਰ ਤੇ ਵਿਚਾਰ ਮੰਚ ਦੇ ਪ੍ਰਧਾਨ ਗੁਰਮੀਤ ਮੱਲਾ ਵੱਲੋਂ ਨਿਭਾਈ ਗਈ।

ਇਸ ਸਮੇਂ ਇੰਡੀਅਨ ਅੰਬੇਸੀ ਦੇ ਫਸਟ ਸੈਕਟਰੀ ਵਿਨੋਦ ਜੀ ਅਤੇ ਮਾਰਕੋਜ਼ ਵਿਲੀਅਮ ਵਲੋਂ ਸਮਾਂ ਰੋਸ਼ਨ ਕਰਕੇ ਕੀਤੀ ਗਈ। ਉਹਨਾਂ ਦੇ ਨਾਲ ਤਰਕਸ਼ੀਲ ਸੁਸਾਇਟੀ ਦੇ ਬਾਨੀ ਮੇਘ ਰਾਜ ਮਿੱਤਰ ਅਤੇ ਕੁਵੈਤ ਦੇ ਦੋਹੇਂ ਗੁਰਦੁਆਰਿਆਂ ਦੇ ਮੁਖੀ ਤਰਨਵੀਰ ਸਿੰਘ ਤੇ ਭਾਈ ਅਰਜਣ ਸਿੰਘ ਸ਼ਾਮਿਲ ਸਨ।

ਅਗਲੀ ਪੇਸ਼ਕਸ਼ ਭਗਤ ਸਿੰਘ ਦੀ ਵਿਚਾਰਧਾਰਾ ਨਾਲ ਸਬੰਧਤ ਨਾਟਕ ‘‘ਮੈਂ ਫਿਰ ਆਵਾਂਗਾ’’ ਖੇਡਿਆ ਗਿਆ। ਹੋਲੀ ਡੇ ਇੰਨ ਦੇ ਚੀਫ ਇੰਜਨੀਅਰ ਬ੍ਰਹਮ ਦਾਸ ਕੌਸਲ ਨੇ ਇਸ ਮੇਲੇ ਦੇ ਉਦੇਸ਼ ’ਤੇ ਚਾਨਣਾ ਪਾਇਆ। ਇਸ ਤੋਂ ਬਾਅਦ ਵਾਰੀ ਮੇਘ ਰਾਜ ਮਿੱਤਰ ਦੀ ਆਈ ਉਹਨਾਂ ਨੇ ਤਰਕਸ਼ੀਲਾਂ ਵਲੋਂ ਰੱਖੀ ਚੁਣੌਤੀ ਦੀਆਂ ਸ਼ਰਤਾਂ ਦਾ ਜ਼ਿਕਰ ਕਰਕੇ ਚਮਤਕਾਰੀ ਸ਼ਕਤੀਆਂ ਦੇ ਦਾਅਵੇਦਾਰਾਂ ਨੂੰ ਇੱਕ ਕਰੋੜ ਰੁਪਏ ਦਾ ਇਨਾਮ ਜਿੱਤਣ ਦੀ ਪੇਸ਼ਕਸ ਦੁਹਰਾਈ, ਕੁਵੈਤ ਵਰਗੇ ਇਸਲਾਮੀ ਮੁਲਕ ਵਿੱਚ ਇਸ ਕਿਸਮ ਦਾ ਪ੍ਰੋਗਰਾਮ ਪੇਸ਼ ਕਰ ਜਾਣਾ ਆਪਣੇ ਆਪ ਵਿੱਚ ਪਹਿਲੀ ਉਦਾਹਰਣ ਹੈ।

ਗੁਰਮੀਤ ਮੱਲਾ ਨੇ ਜਾਦੂ ਰਾਹੀਂ ਗੁਰਪਾਲ ਸਿੰਘ ਨੂੰ ਹਵਾ ਵਿੱਚ ਉਠਾ ਕੇ ਜਾਦੂ ਬਾਰੇ ਲੋਕਾਂ ਦੇ ਭਰਮ ਭੁਲੇਖੇ ਦੂਰ ਕੀਤੇ।

ਅਗਲਾ ਨਾਟਕ ਪ੍ਰੇਤ ਇੱਕ ਅਜਿਹੇ ਫੌਜੀ ਦੀ ਕਹਾਣੀ ਸੀ ਜੋ ਆਪਣੇ ਘਰ ਵਿੱਚ ਸਖਤ ਡਿਸਪਲਿਨ ਰੱਖਣਾ ਚਾਹੁੰਦਾ ਸੀ। ਉਸਦੇ ਘਰ ਵਿੱਚ ਘਟਨਾਵਾਂ ਵਾਪਰਨ ਦਾ ਸਿਲਸਿਲਾ ਸ਼ੁਰੂ ਹੋ ਜਾਂਦਾ ਹੈ। ਤਰਕਸ਼ੀਲ ਇਸਨੂੰ ਕਿਵੇਂ ਠੀਕ ਕਰਦੇ ਹਨ, ਨਾਟਕ ਵਿੱਚ ਦਿਖਾਇਆ ਗਿਆ। ਇਸ ਨਾਟਕ ਨੇ ਵੀ ਲੋਕਾਂ ਦੀ ਚੇਤਨਾ ਨੂੰ ਜਾਗ ਲਾਇਆ। ਇਸ ਤੋਂ ਬਾਅਦ ਮਹਿਮਾਨਾਂ ਨੂੰ ਸਨਮਾਨ ਚਿੰਨ ਭੇਂਟ ਕੀਤੇ ਗਏ। ਯਾਦ ਰਹੇ ਇਸ ਪ੍ਰੋਗਰਾਮ ਲਈ ਸਹਿਯੋਗ ਸ਼ਹੀਦ ਭਗਤ ਸਿੰਘ ਕਲੱਬ, ਦੋਹੇ ਗੁਰਦੁਆਰਿਆਂ ਦੇ ਮੁਖੀ, ਗਰੀਨ ਕੰਪਨੀ ਦੇ ਮਾਲਕ ਭਾਈ ਮਨਜੀਤ ਸਿੰਘ ਤੇ ਸਵਰਨ ਸਿੰਘ ਅਤੇ ਕਰੇਨ ਕੰਪਨੀ ਦੇ ਮਾਲਕ ਜਨਕ ਸਿੰਘ ਵਲੋਂ ਮਿਲਿਆ। ਲਾ ਅੱਲਾ ਕੰਪਨੀ ਦੇ ਸ੍ਰੀ ਜਸਵਿੰਦਰ ਸਿੰਘ ਤੇ ਹਰਜੀਤ ਸਿੰਘ ਆਪਣੇ ਬਹੁਤ ਸਾਰੇ ਸਾਥੀਆਂ ਨੂੰ ਇੱਕ ਬੱਸ ਵਿੱਚ ਭਰ ਕੇ ਲਿਆਏ। ਮੇਲੇ ਦੀ ਸਮਾਪਤੀ ਕੋਰੀਓਗ੍ਰਾਫੀ ‘ਧਰਤੀ ਪੰਜਾਬ ਦੀ’ ਵਿਖਾ ਕੇ ਕੀਤੀ ਗਈ।

ਸਾਰੇ ਪ੍ਰੋਗਰਾਮ ਨੂੰ ਹਾਜ਼ਰ ਲੋਕਾਂ ਨੇ ਭਰਪੂਰ ਸਲਾਹਿਆ ਅਤੇ ਮੰਗ ਕੀਤੀ ਗਈ ਕਿ ਕੁਵੈਤ ਦੀ ਧਰਤੀ ’ਤੇ ਹਰ ਸਾਲ ਅਜਿਹਾ ਇੱਕ ਮੇਲਾ ਕਰਵਾਇਆ ਜਾਵੇ। ਭਾਅ ਜੀ ਹਰਜੀਤ ਸਿੰਘ ਮੇਹਰਾ ਨੇ ਪਲੇਅ ਬੈਕ ਸੰਗੀਤ ਦੇ ਕੇ ਨਾਟਕਾਂ ਦੀ ਪੇਸ਼ਕਾਰੀ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਇਆ। ਇਸਤਰੀ ਕਲਾਕਾਰ ਪ੍ਰਮਜੀਤ ਕੌਰ, ਗੁਰਜੀਤ ਕੌਰ ਤੇ ਜਸਪ੍ਰੀਤ ਨੇ ਵੀ ਮੇਲੇ ਵਿੱਚ ਅੰਤ ਤੱਕ ਦਰਸ਼ਕਾਂ ਨੂੰ ਕੀਲ ਕੇ ਰੱਖਿਆ। ਪੁਰਸ਼ ਕਲਾਕਾਰ ਜਗਤਾਰ ਸਿੰਘ ਨੇ ਦਹੇਜ ਲਈ ਸਤਾਈ ਲੜਕੀ ਦਾ ਰੋਲ ਕਰਕੇ ਦਰਸ਼ਕਾਂ ਨੂੰ ਖੂਬ ਰਵਾਇਆ। ਇਸ ਪ੍ਰੋਗਰਾਮ ਨੇ ਦਰਸ਼ਕਾਂ ਦਾ ਮਨੋਰੰਜਨ ਕਰਨ ਦੇ ਨਾਲ ਨਾਲ ਉਨ੍ਹਾਂ ਨੂੰ ਵਹਿਮਾਂ ਭਰਮਾਂ ਵਿੱਚੋਂ ਨਿਕਲਣ ਦਾ ਸੁਨੇਹਾ ਵੀ ਦਿੱਤਾ।