ਪੰਜਾਬੀ ਸਾਹਿਤ ਕਲਾ ਕੇਂਦਰ ਵਲੋਂ ਕੈਨੇਡਾ ਦੇ ਸ਼ਾਇਰ ਮੁਹਿੰਦਰਪਾਲ ਸਿੰਘ ਦਾ ਸੁਆਗਤ
ਡਾ. ਸਾਥੀ ਲੁਧਿਆਣਵੀ, ਲੰਡਨ

ਸਵਰਗਵਾਸੀ ਸ਼ਾਇਰ ਬਿਸ਼ੰਭਰ ਸਿੰਘ ਸਾਕੀ ਦੇ ਸਪੁੱਤਰ ਮੁਹਿੰਦਰ ਪਾਲ ਸਿੰਘ ਪਾਲ ਦੇ ਸਨਮਾਨ ਵਿਚ ਪੰਜਾਬੀ ਸਾਹਿਤ ਕਲਾ ਕੇਂਦਰ ਯੂ ਕੇ ਵਲੋਂ ਇਕ ਵਿਸ਼ੇਸ਼ ਸਮਾਰੋਹ ਕੀਤਾ ਗਿਆ ਜਿਸ ਵਿਚ ਕਈਆਂ ਦੋਸਤਾਂ ਨੇ ਭਾਗ ਲਿਆ। ਮੁਹਿੰਦਰ ਪਾਲ ਕੈਲਗ਼ਰੀ ਵਿਚ ਰਹਿਣ ਵਾਲ਼ਾ ਇਕ ਵਧੀਆ ਸ਼ਾਇਰ ਹੈ ਤੇ ਕਈਆਂ ਪੁਸਤਕਾਂ ਦਾ ਰਚੇਤਾ ਹੈ। ਜਦੋਂ ਪੁਛਿਆ ਗਿਆ ਕਿ ਲਿਖ਼ਣ ਦੀ ਚੇਟਕ ਕਿੱਥੋਂ ਲੱਗੀ ਤਾਂ ਮੁਹਿੰਦਰਪਾਲ ਨੇ ਬੜੇ ਮਾਣ ਨਾਲ਼ ਕਿਹਾ ਕਿ ਇਹ ਤਾਂ ਉਸ ਨੂੰ ਗੁੜ੍ਹਤੀ ਵਿਚ ਹੀ ਸ਼ਾਇਰ ਪਿਤਾ ਵਲੋਂ ਮਿਲ਼ ਗਈ ਸੀ ਤੇ ਮੇਰੀ ਕੋਸ਼ਸ਼ ਹੈ ਕਿ ਮੈਂ ਉਨ੍ਹਾਂ ਵਰਗੀਆਂ ਰਚਨਾਵਾਂ ਰਚ ਸਕਾਂ ਭਾਵੇਂ ਕਿ ਮੰਜ਼ਲ ਹਾਲੀਂ ਬਹੁਤ ਦੂਰ ਲਗਦੀ ਹੈ। ਮਹਿੰਦਰਪਾਲ ਨੇ ਕੈਨੇਡਾ ਪਰ ਖ਼ਾਸ ਕਰਕੇ ਕੈਲਗਰੀ ਦੀਆਂ ਸਾਹਿਤਕ ਸਭਾਵਾਂ ਅਤੇ ਸਾਇਹਤਕ ਗਤੀਵਿਧੀਆਂ ਉੱਤੇ ਚਾਨਣਾ ਪਾਇਆ।

ਸਾਕੀ ਜੀ ਦੇ ਵੱਡੇ ਬੇਟੇ ਜਸਪਾਲ ਸਿੰਘ ਨੇ, ਸਾਕੀ ਜੀ ਦੀ ਬਜ਼ੁਰਗ ਪਤਨੀ ਨੇ, ਉਨ੍ਹਾਂ ਦੀ ਕਵਿਤਰੀ ਬੇਟੀ ਮਨਜੀਤ ਕੌਰ ਪੱਡਾ ਨੇ ਅਤੇ ਮਿਸਟਰ ਪੱਡਾ ਤੇ ਹੋਰ ਪਰਵਾਰਕ ਮੈਂਬਰਾਂ ਨੇ ਆਏ ਮਹਿਮਾਨਾਂ ਦਾ ਭਰਪੂਰ ਸੁਆਗ਼ਤ ਤੇ ਪ੍ਰਾਹੁਣਾਚਾਰੀ ਕੀਤੀ। ਕਵਿਤਾਵਾਂ ਦੇ ਦੌਰ ਵਿਚ ਮਿਸਜ਼ ਕੁਲਵੰਤ ਕੌਰ ਢਿੱਲੋਂ, ਗਰੁਨਾਮ ਸਿੰਘ ਗਰੇਵਾਲ, ਡਾ. ਸਾਥੀ ਲੁਿਧਆਣਵੀ, ਮੁਹਿੰਦਰਪਾਲ ਸਿੰਘ ਧਾਲੀਵਾਲ, ਮਨਜੀਤ ਕੌਰ ਪੱਡਾ, ਹਰਜੀਤ ਅਟਵਾਲ, ਅਵਤਾਰ ਉੱਪਲ, ਅਤੇ ਸਤਵਿੰਦਰ ਨੇ ਹਿੱਸਾ ਲਿਆ।ਪਰੰਤੂ ਬਹੁਤੀਆਂ ਕਵਿਤਾਵਾਂ ਕੈਲਗਰੀ ਤੋਂ ਆਏ ਹੋਏ ਮਹਿਮਾਨ ਕਵੀ ਮਹਿੰਦਰਪਾਲ ਸਿੰਘ ਪਾਲ ਕੋਲ਼ੋਂ ਸੁਣੀਆਂ ਗਈਆਂ ਤੇ ਬਹੁਤ ਸਲਾਹੀਆਂ ਵੀ ਗਈਆਂ।ਬਿਸ਼ੰਭਰ ਸਿੰਘ ਸਾਕੀ ਹੁਰਾਂ ਦੀ ਯਾਦ ਵਿਚ ਵੀ ਬਹੁਤ ਕੁਝ ਪਰਵਾਰ ਨਾਲ਼ ਸਾਂਝਾ ਕੀਤਾ ਗਿਆ।

12/05/2013