ਯੂਨੀਵਰਸਿਟੀ ਕਾਲਜ ਜੈਤੋ ਦਾ ਦੂਜਾ ਸਲਾਨਾ ਖੇਡ ਸਮਾਰੋਹ ਸਥਾਨਕ ਖੇਡ ਸਟੇਡੀਅਮ ਵਿਖੇ ਹੋਇਆ। ਮੁੱਖ ਮਹਿਮਾਨ ਵਜੋਂ ਅਰਜਨ ਐਵਾਰਡੀ ਰਾਜਪਾਲ ਸਿੰਘ ਕੌਮਾਂਤਰੀ ਹਾਕੀ ਖਿਡਾਰੀ ਅਤੇ ਉਪ ਪੁਲਿਸ ਕਪਤਾਨ ਪੰਜਾਬ ਪੁਲਿਸ ਨੇ ਸ਼ਮੂਲੀਅਤ ਕੀਤੀ। ਖੇਡਾਂ ਸ਼ੁਰੂ ਕਰਨ ਦਾ ਐਲਾਨ ਕਰਦਿਆਂ ਉਨ੍ਹਾਂ ਵਿਦਿਆਰਥੀ ਖਿਡਾਰੀਆਂ ਨੂੰ ਸੱਚੀ ਲਗਨ ਅਤੇ ਖੇਡ ਭਾਵਨਾ ਨੂੰ ਬਰਕਰਾਰ ਰੱਖਦਿਆਂ ਖੇਡਾਂ ਵਿਚ ਪ੍ਰਾਪਤੀਆਂ ਹਾਸਲ ਕਰਕੇ ਜ਼ਿੰਦਗੀ ਵਿਚ ਸਫ਼ਲਤਾ ਹਾਸਲ ਕਰਨ ਦਾ ਸੁਨੇਹਾ ਦਿੱਤਾ।

ਖੇਡ ਸਮਾਰੋਹ ਵਿਚ ਵੱਖ ਵੱਖ ਐਥਲੈਟਿਕਸ ਮੁਕਾਬਲਿਆਂ ਵਿਚ ਵਿਦਿਆਰਥੀ ਖਿਡਾਰੀਆਂ ਨੇ ਆਪਣੀ ਖੇਡ ਪ੍ਰਤਿਭਾ ਦਾ ਮੁਜ਼ਾਹਰਾ ਕੀਤਾ, ਜਿਸ ਦੇ ਨਤੀਜੇ ਇਸ ਪ੍ਰਕਾਰ ਰਹੇ:

• ਲੜਕਿਆਂ ਦੀ ਸੌ ਮੀਟਰ ਦੌੜ ਵਿਚ ਜਸਵੰਤ ਸਿੰਘ ਪਹਿਲੇ, ਬਲਕਰਨ ਸਿੰਘ ਦੂਜੇ ਅਤੇ ਵਿੱਕੀ ਤੀਜੇ ਸਥਾਨ ’ਤੇ,
• ਲੜਕੀਆਂ ਵਿਚ ਰਜਨਪ੍ਰੀਤ ਕੌਰ ਪਹਿਲੇ, ਗਗਨਦੀਪ ਕੌਰ ਦੂਜੇ, ਕਰਮਜੀਤ ਕੌਰ ਤੀਜੇ ਸਥਾਨ ’ਤੇ,

• ਦੋ ਸੌ ਮੀਟਰ ਦੌੜ ਵਿਚ ਲੜਕਿਆਂ ’ਚੋਂ ਜਸਵੰਤ ਸਿੰਘ ਨੇ ਪਹਿਲਾ, ਸੁਖਮੰਦਰ ਸਿੰਘ ਨੇ ਦੂਜਾ ਅਤੇ ਜਸਪ੍ਰੀਤ ਸਿੰਘ ਨੇ ਤੀਜਾ ਸਥਾਨ ਹਾਸਲ ਕੀਤਾ, ਜਦ ਕਿ
• ਦੋ ਸੌ ਮੀਟਰ ਦੌੜ ਵਿਚ ਲੜਕੀਆਂ ’ਚੋਂ ਰਜਨਪ੍ਰੀਤ ਕੌਰ ਨੇ ਪਹਿਲਾ, ਸੰਦੀਪ ਕੌਰ ਨੇ ਦੂਜਾ ਅਤੇ ਵੀਰਪਾਲ ਕੌਰ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ।

• ਚਾਰ ਸੌ ਮੀਟਰ ਦੌੜ ਵਿਚ ਲੜਕੀਆਂ ’ਚੋਂ ਰਜਨਪ੍ਰੀਤ ਕੌਰ ਪਹਿਲੇ, ਸੰਦੀਪ ਕੌਰ ਦੂਜੇ, ਕਰਮਜੀਤ ਕੌਰ ਤੀਜੇ ਅਤੇ
• ਲੜਕਿਆਂ ’ਚੋਂ ਜਸਵੰਤ ਸਿੰਘ ਪਹਿਲੇ, ਸੁਖਚੈਨ ਸਿੰਘ ਦੂਜੇ ਅਤੇ ਜਸਪ੍ਰੀਤ ਸਿੰਘ ਤੀਜੇ ਸਥਾਨ ’ਤੇ ਰਹੇ।

• ਅੱਠ ਸੌ ਮੀਟਰ ਦੌੜ ਵਿਚ ਲੜਕਿਆਂ ਵਿਚ ਜਸਵੰਤ ਸਿੰਘ ਪਹਿਲੇ, ਸੁਖਚੈਨ ਸਿੰਘ ਦੂਜੇ, ਵਿੱਕੀ ਤੀਜੇ ਸਥਾਨ ’ਤੇ ਰਹੇ।

• ਪੰਦਰਾਂ ਸੌ ਮੀਟਰ ਦੌੜ ਵਿਚ ਕੁਲਵਿੰਦਰ ਸਿੰਘ ਪਹਿਲੇ, ਜਸਵੰਤ ਦੂਜੇ ਅਤੇ ਬੰਟੀ ਰਾਜਪੂਤ ਤੀਜੇ ਸਥਾਨ ’ਤੇ ਰਹੇ।

• ਪੱਚੀ ਸੌ ਮੀਟਰ ਪੈਦਲ-ਚਾਲ ਵਿਚ ਰਮਨਦੀਪ ਕੌਰ ਪਹਿਲੇ, ਬਲਜੀਤ ਕੌਰ ਦੂਜੇ ਅਤੇ ਰਾਜਿੰਦਰਪਾਲ ਕੌਰ ਤੀਜੇ ਸਥਾਨ ’ਤੇ ਰਹੀਆਂ।

• ਲੜਕਿਆਂ ਦੀ ਲੰਬੀ ਛਾਲ ਵਿਚ ਹਰਿੰਦਰ ਸਿੰਘ ਨੇ ਪਹਿਲਾ, ਲਖਵੀਰ ਸਿੰਘ ਨੇ ਦੂਜਾ ਅਤੇ ਜਗਸੀਰ ਸਿੰਘ ਨੇ ਤੀਜਾ ਸਥਾਨ ਹਾਸਲ ਕੀਤਾ।

• ਰੱਸਾਕਸ਼ੀ ਵਿਚ ਲੜਕਿਆਂ ਦੇ ਮੁਕਾਬਲੇ ਵਿਚ ਬੀ. ਏ. ਭਾਗ ਪਹਿਲਾ ਦੇ ਗੱਭਰੂਆਂ ਨੇ ਪਹਿਲਾ ਸਥਾਨ, ਬੀ. ਏ. ਭਾਗ ਦੂਜਾ ਨੇ ਦੂਜਾ ਸਥਾਨ ਅਤੇ ਬੀ. ਕਾਮ. ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ।
• ਰੱਸਾਕਸ਼ੀ ਵਿਚ ਲੜਕੀਆਂ ਨੇ ਵਿਸ਼ੇਸ਼ ਉਤਸ਼ਾਹ ਨਾਲ ਭਾਗ ਲਿਆ ਜਿਸ ਵਿਚ ਸੰਦੀਪ ਕਾਲੜਾ ਦੀ ਟੀਮ ਨੇ ਪਹਿਲਾ, ਜਸਪ੍ਰੀਤ ਕੌਰ ਦੀ ਟੀਮ ਨੇ ਦੂਜਾ ਅਤੇ ਰਜਨਪ੍ਰੀਤ ਕੌਰ ਦੀ ਟੀਮ ਨੇ ਤੀਜਾ ਸਥਾਨ ਹਾਸਲ ਕੀਤਾ।

ਉਪਰੋਕਤ ਤੋਂ ਇਲਾਵਾ ਡਿਸਕਸ ਥ੍ਰੋਅ, ਹੈਮਰ ਥ੍ਰੋਅ, ਸ਼ਾਟਪੁਟ, ਤਿੰਨ-ਲੱਤੀ ਦੌੜ, ਬੋਰੀ ਦੌੜ, ਆਲੂ ਦੌੜ ਜਿਹੀਆਂ ਰਸਮੀ ਅਤੇ ਮਨੋਰੰਜਕ ਖੇਡਾਂ ਵਿਚ ਭਾਗ ਲੈ ਕੇ ਖੇਡ ਸਮਾਰੋਹ ਦਾ ਅਨੰਦ ਮਾਣਿਆ। ਸਮੁੱਚੀ ਖੇਡ ਕਾਰਗ਼ੁਜ਼ਾਰੀ ਦੇ ਆਧਾਰ ’ਤੇ ਬੀ. ਏ. ਭਾਗ ਦੂਜਾ ਦੀ ਰਜਨਪ੍ਰੀਤ ਕੌਰ ਇਸਤ੍ਰੀ ਖਿਡਾਰੀਆਂ ’ਚੋਂ ਅਤੇ ਬੀ. ਏ. ਭਾਗ ਪਹਿਲਾ ਦਾ ਜਸਵੰਤ ਸਿੰਘ ਪੁਰਸ਼ ਖਿਡਾਰੀਆਂ ’ਚੋਂ ਸਰਵੋਤਮ ਐਥਲੀਟ ਐਲਾਨੇ ਗਏ। ਪਹਿਲੇ ਤਿੰਨ ਜੇਤੂ ਖਿਡਾਰੀਆਂ ਨੂੰ ਮੈਡਲਾਂ ਨਾਲ ਸਨਮਾਨਤ ਕੀਤਾ ਗਿਆ। ਕਾਲਜ ਦੇ ਪ੍ਰਿੰਸੀਪਲ ਅਤੇ ਸਟਾਫ਼ ਤੋਂ ਇਲਾਵਾ ਗੰਗਸਰ ਸਪੋਰਟਸ ਕਲੱਬ ਦੇ ਕੋਚ ਸਹਿਬਾਨ ਅਤੇ ਅਹੁਦੇਦਾਰਾਂ ਨੇ ਖੇਡ ਸਮਾਰੋਹ ਦੀ ਸਫ਼ਲਤਾ ਵਿਚ ਵਿਸ਼ੇਸ਼ ਯੋਗਦਾਨ ਪਾਇਆ।