ਅਗਸਤ 10-11, 2013 ਨੂੰ ਮਿਡਲੈਂਡ ਯੂ ਕੇ ਦੇ ਰਾਇਲ ਸ਼ਹਿਰ ਲਮਿੰਗਟਨ ਸਪਾ ਵਿਖੇ ਇਕ ਖਾਸ ਕਾਨਫਰੰਸ ਹੋਈ। ਇਹ ਕਾਨਫਰੰਸ ਯੂ ਕੇ ਵਸਦੇ ਪੰਜਾਬੀਆਂ ਵਲੋਂ, ਪੰਜਾਬੀ ਬੋਲੀ ਦੀ ਪੰਜਾਬ ਵਿਚ ਤਰੱਕੀ ਬਾਰੇ ਅਤੇ ਪ੍ਰਦੇਸਾਂ ਵਿਚ ਯੋਗ ਥਾਂ ਪ੍ਰਾਪਤ ਕਰਨ ਲਈ ਬੁਲਾਈ ਗਈ। ਡਾ. ਬਲਦੇਵ ਸਿੰਘ ਕੰਦੋਲਾ, ਸ੍ਰ ਰਾਜਿੰਦਰ ਸਿੰਘ ਅਤੇ ਕੌਂਸਲਰ ਮੋਤਾ ਸਿੰਘ ਹੁਰਾਂ ਨੇ ਗੁਰਦੁਆਰਾ ਲਮਿੰਗਟਨ ਸਪਾ ਦੇ ਸਹਿਯੋਗ ਨਾਲ ਇਸ ਕਾਨਫਰੰਸ ਦਾ ਪ੍ਰਗਰਾਮ ਉਲੀਕਣ ਲਈ ਕਵੈਂਟਰੀ ਤੋਂ ਪੰਜਾਬੀ ਕਵੀ ਸ੍ਰ ਸਤਿਪਾਲ ਡੁਲਕੂ, ਵੁਲਵਰਹੈਂਮਟਨ ਤੋਂ ਪੰਜਾਬੀ ਸ਼ਾਇਰਾ ਸ੍ਰੀਮਤੀ ਦਲਵੀਰ ਕੌਰ, ਵਾਲਸਾਲ ਤੋਂ ਪੰਜਾਬੀ ਭਾਸ਼ਾ ਦੇ ਵਿਦਵਾਨ ਡਾ. ਮੰਗਤ ਭਾਰਦਵਾਜ ਅਤੇ ਗੁਰਦੁਆਰਾ ਲਮਿੰਗਟਨ-ਵਾਰਿਕ ਦੇ ਜਨਰਲ ਸਕੱਤਰ ਸ੍ਰ ਸ਼ਲਵਿੰਦਰ ਮੱਲ੍ਹੀ ਹੁਰਾਂ ਦਾ ਸਹਿਯੋਗ ਲਿਆ। ਕਾਨਫਰੰਸ ਤੋਂ ਦੋ ਹਫਤੇ ਪਹਿਲਾਂ ਪੰਜਾਬੀ ਮੀਡੀਆ ਦੇਸ-ਪ੍ਰਦੇਸ, ਮੱਨ ਜਿੱਤ ਵੀਕਲੀ ਅਤੇ ਟੈਲੀਵੀਯਨ ਚੈਨਲ ਸੰਗਤ ਟੀ ਵੀ ਦੇ ਸ੍ਰ ਦਰਸ਼ਨ ਸਿੰਘ ਭੋਗਲ ਦੇ ਸਹਿਯੋਗ ਨਾਲ ਖਬਰ ਸਾਰੇ ਯੂ ਕੇ ਵਿਚ ਪ੍ਰਸਾਰੀ ਗਈ। ਪੰਜਾਬੀ ਬੋਲੀ ਨਾਲ ਸਬੰਧਤ ਸਾਰੀਆਂ ਸੰਸਥਾਵਾਂ ਨੂੰ ਖੁੱਲਾ ਸੱਦਾ ਵੀ ਦਿੱਤਾ ਗਿਆ।

ਇਸ ਕਾਨਫਰੰਸ ਦੀ ਦੇ ਸ਼ੁਰੂ ਵਿਚ ਬਰਤਾਨੀਆ ਦੇ ਜਾਣੇ ਮਾਣੇ ਲੇਖਕ ਅਜਮੇਰ ਕਵੈਂਟਰੀ ਦੇ ਵਿਛੋੜੇ ਤੇ ਇਕ ਮਿੰਟ ਦੀ ਚੁੱਪ ਧਾਰ ਕੇ ਸ਼ਰਧਾਂਜਲੀ ਭੇਟ ਕੀਤੀ ਗਈ ਅਤੇ ਉਨ੍ਹਾ ਦੀ ਆਤਮਾ ਨੂੰ ਸ਼ਾਤੀ ਵਾਸਤੇ ਅਰਦਾਸ ਕੀਤੀ ਗਈ।

ਡਾ ਬਲਦੇਵ ਸਿਘ ਕੰਦੋਲਾ ਅਤੇ ਰਾਜਿੰਦਰ ਸਿੰਘ ਪਿਛਲੇ ਇਕ ਸਾਲ ਤੋਂ ਪੰਜਾਬ ਵਿਚ ਪੰਜਾਬੀ ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਨਾਲ ਗਲ ਬਾਤ ਕਰ ਰਹੇ ਸਨ ਅਤੇ ਇਕ ਵਾਰ ਪਟਿਆਲੇ ਜਾ ਵੀ ਆਏ ਸਨ। ਕਾਨਫਰੰਸ ਵਿਚ ਵਿਚਾਰੇ ਜਾਣ ਵਾਲਾ ਮੁੱਦਾ ਉਨ੍ਹਾਂ “ਆਧੁਨਿਕ ਵਿਗਿਆਨਕ ਯੁਗ ਵਿਚ ਪੰਜਾਬੀ ਭਾਸ਼ਾ ਦਾ ਸਥਾਨ” ਚੁਣਿਆ ਅਤੇ ਪੰਜਾਬ ਅਤੇ ਯੂਕੇ ਦੇ ਪੰਜਾਬੀ ਵਿਦਵਾਨਾਂ ਨੂੰ ਇਸ ਵਿਸ਼ੇ ਉਪਰ ਪਰਚੇ ਲਿਖਣ ਦੀ ਬੇਨਤੀ ਕੀਤੀ। ਦੋ ਕੁ ਮਹੀਨੇ ਦੇ ਖਤੋ-ਖਿਤਾਬ ਦਾ ਸਦਕਾ ਕਾਨਫਰੰਸ ਹੋਣ ਤੱਕ ਪਰਚੇ ਡਾ. ਬਲਦੇਵ ਸਿੰਘ ਹੋਰਾਂ ਨੂੰ ਪਹੁਚ ਗਏ ਅਤੇ ਟੈਕਨੀਕਲ ਕਮੇਟੀ ਨੇ ਨਿਮਨਲਿਖਤ ਪਰਚੇ ਚੁਣੇ,

1. ਭਾਸ਼ਾ ਨੀਤੀ ਬਾਰੇ ਅੰਤਰਰਾਸ਼ਟਰੀ ਖੋਜ, ਮਾਤ ਭਾਸ਼ਾ ਖੋਲ੍ਹਦੀ ਹੈ ਸਿੱਖਿਆ, ਗਿਆਨ ਅਤੇ ਅੰਗਰੇਜ਼ੀ ਸਿੱਖਣ ਦੇ ਦਰਵਾਜ਼ੇ, ਡਾ. ਜੋਗਾ ਸਿੰਘ, ਪੰਜਾਬੀ ਯੁਨੀਵਰਸਿਟੀ, ਪਟਿਆਲਾ,
2. ਆਧੁਨਿਕ ਯੁੱਗ ਵਿੱਚ ਪੰਜਾਬੀ ਭਾਸ਼ਾ ਨੂੰ ਪੇਸ਼ ਚੁਣੌਤੀਆਂ ਅਤੇ ਸਮਾਧਾਨ, ਉਚੇਰੀ ਵਿਗਿਆਨਕ ਸਿੱਖਿਆ ਦੇ ਮਾਧਿਅਮ ਦੇ ਪ੍ਰਸੰਗ ਵਿਚ, ਡਾ. ਰਾਜਿੰਦਰ ਪਾਲ ਸਿੰਘ, ਪੰਜਾਬੀ ਯੁਨੀਵਰਸਿਟੀ, ਪਟਿਆਲਾ,
3. ਅਜੋਕੇ ਸਮਿਆਂ ਵਿੱਚ ਪੰਜਾਬੀ ਭਾਸ਼ਾ ਲਈ ਚੁਣੌਤੀਆਂ, ਸੁਖਿੰਦਰ, ਟਰਾਂਟੋ, ਕਨੇਡਾ,
4. ਵਿਸ਼ਵੀਕਰਣ ਦੇ ਦੌਰ ਵਿਚ ਪੰਜਾਬੀ ਭਾਸ਼ਾ ਦੀ ਸਥਿਤੀ, ਡਾ. ਦੇਵਿੰਦਰ ਕੌਰ, ਯੂ ਕੇ,
5. ਕੀ ਵਿਗਿਆਨਕ ਸੋਚ ਮਾਤ ਭਾਸ਼ਾ ਤੋਂ ਬਗੈਰ ਸੰਭਵ ਹੈ ? ਇਸ ਸੰਦਰਭ ਵਿਚ ਮਾਤ ਭਾਸ਼ਾ ਕੀ ਹੈ? ਸ੍ਰੀਮਤੀ ਦਲਵੀਰ ਕੌਰ, ਯੂ ਕੇ
6. ਪਰਵਾਸੀ ਪੰਜਾਬੀਆਂ ਦੀ ਅਗਲੀ ਪੀੜ੍ਹੀ ਵਿੱਚ, ਮਾਂ-ਬੋਲੀ ਪੰਜਾਬੀ ਦੀ ਸੀਮਾ ਅਤੇ ਸੰਭਾਵਨਾ, ਓਂਕਾਰ ਮਾਨਵ, ਯੂ ਕੇ,
7. ਬਰਤਾਨਵੀ ਸਕੂਲਾਂ, ਲਾਇਬਰੇਰੀਆਂ ਅਤੇ ਪ੍ਰਸਾਰਣ ਮਾਧਿਅਮ ਵਿਚ, ਪੰਜਾਬੀ ਭਾਸ਼ਾ ਦਾ ਭਵਿੱਖ਼, ਡਾ. ਸਾਥੀ ਲੁਧਿਆਣਵੀ, ਲੰਡਨ।