ਇਸੇ ਕਾਲਜ ਦੇ ਡਾ. ਪਰਮਿੰਦਰ ਸਿੰਘ ਪ੍ਰੋਗਰਾਮ ਅਫ਼ਸਰ ਕੌਮੀ ਸੇਵਾ ਯੋਜਨਾ ਅਤੇ ਮੁਖੀ ਜੌਗਰਫ਼ੀ ਵਿਭਾਗ ਨੇ ਸਤਿਕਾਰਤ ਮਹਿਮਾਨ ਵਜੋਂ ਸ਼ਿਰਕਤ ਕਰਦਿਆਂ ਵਲੰਟੀਅਰਾਂ ਨੂੰ ਨਸੀਹਤ ਦਿੱਤੀ ਕਿ ਉਹ ਆਪਣੀਆਂ ਮਾਵਾਂ ਸਮੇਤ ਬਾਕੀ ਪਰਿਵਾਰਕ ਮੈਂਬਰਾਂ ਨਾਲ ਹਕੀਕਤ ਵਿਚ ਭਾਵਨਾਤਮਕ ਤੌਰ ’ਤੇ ਜੁੜ ਕੇ ਰਹਿਣ ਅਤੇ ਸਮਾਜ ਵਿਚ ਰੁਤਬੇ ਹਾਸਲ ਕਰਕੇ ਮਾਪਿਆਂ ਲਈ ਫ਼ਖ਼ਰ ਦਾ ਬਾਇਸ ਬਣਨ ਅਤੇ ਕਾਲਜ ਦਾ ਨਾਂਅ ਰੌਸ਼ਨ ਕਰਨ।

ਸ਼ੁਰੂਆਤ ਮੌਕੇ ਮਹਿਮਾਨਾਂ ਨਾਲ ਜਾਣ ਪਛਾਣ ਅਤੇ ਸਵਾਗਤੀ ਸ਼ਬਦ ਬੀ. ਏ. ਭਾਗ ਦੂਜਾ ਦੀ ਵਿਦਿਆਰਥਣ ਅਤੇ ਕੌਮੀ ਸੇਵਾ ਯੋਜਨਾ ਵਲੰਟੀਅਰ ਸੁਖਦੀਪ ਕੌਰ ਨੇ ਕਹੇ। ਕੈਂਪ ਰਿਪੋਰਟ ਬੀ. ਏ. ਭਾਗ ਦੂਜਾ ਦੀ ਅਰਸ਼ਨੂਰ ਕੌਰ ਨੇ ਪੇਸ਼ ਕਰਦਿਆਂ ਦੱਸਿਆ ਕਿ ਵੱਖ ਵੱਖ ਦਿਨਾਂ ਦੌਰਾਨ ਸ਼੍ਰਮਦਾਨ ਵਜੋਂ ਕਾਲਜ ਦੀਆਂ ਛੱਤਾਂ ਦੀ ਸਫ਼ਾਈ, ਪ੍ਰਬੰਧਕੀ ਬਲਾਕ, ਸਾਇੰਸ ਬਲਾਕ ਅਤੇ ਆਰਟਸ ਬਲਾਕ ਦੀਆਂ ਖਿੜਕੀਆਂ ਦੇ ਸ਼ੀਸ਼ਿਆਂ ਦੀ ਸਫ਼ਾਈ ਕੀਤੀ ਗਈ। ਅਕਾਦਮਿਕ ਸੈਸ਼ਨਾਂ ਦੌਰਾਨ ਡਾ. ਜਗਦੀਪ ਕੌਰ ਆਹੂਜਾ ਨੇ ਕੌਮੀ ਸੇਵਾ ਯੋਜਨਾ ਦੇ ਮਹੱਤਵ, ਨਛੱਤਰ ਸਿੰਘ ਨੇ ਯੋਗਾ, ਅਮਰਜੀਤ ਸਿੰਘ ਇੰਸਟ੍ਰਕਟਰ ਨੇ ਘਰੇਲੂ ਬਿਜਲਈ ਸਹੂਲਤਾਂ ਦੀ ਮੁਰੰਮਤ ਅਤੇ ਵਰਤੋਂ ਬਾਰੇ, ਵੀ. ਐਲ. ਸੀ. ਸੀ. ਵੱਲੋਂ ਸੁੰਦਰਤਾ ਬਣਾਈ ਰੱਖਣ ਬਾਰੇ, ਪ੍ਰਿੰ. ਡਾ. ਸੁਮਨ ਲਤਾ ਵੱਲੋਂ ਭੋਜਨ ਦੀ ਪੌਸ਼ਟਿਕਤਾ ਬਾਰੇ ਜਾਣਕਾਰੀ ਦਿੱਤੀ ਗਈ। ਕਲਾਤਮਿਕ ਵੰਨਗੀਆਂ ਵਿਚ ਹਰਪ੍ਰੀਤ ਕੌਰ ਨੇ ਘੋੜੀ, ਮਨਪ੍ਰੀਤ ਕੌਰ ਤੇ ਸਾਥਣਾਂ ਵੱਲੋਂ ਸਕਿੱਟ, ਰਜਨੀ ਵੱਲੋਂ ਰਾਜਸਥਾਨੀ ਲੋਕ ਨਾਚ ਪੇਸ਼ ਕੀਤੇ ਗਏ। ਵੱਖ ਵੱਖ ਮੁਕਾਬਲਿਆਂ ਦੇ ਜੇਤੂ ਵਲੰਟੀਅਰਾਂ ਨੂੰ ਇਨਾਮ ਤਕਸੀਮ ਕੀਤੇ ਗਏ। ਮੇਜਬਾਨ ਕਾਲਜ ਦੇ ਪ੍ਰਿੰਸੀਪਲ ਵੱਲੋਂ ਮਹਿਮਾਨਾਂ ਦਾ ਧਨਵਾਦ ਕੀਤਾ ਗਿਆ।