ਪੰਜਾਬੀ ’ਵਰਸਿਟੀ ਦੀ ਪੰਜਾਬੀ ਵਿਸ਼ੇ ਵਿਚ ਝੰਡੀ -ਯੂ. ਜੀ. ਸੀ. ਨੈੱਟ ਪ੍ਰੀਖਿਆ ਦਸੰਬਰ 2012 ਨਤੀਜੇ
ਡਾ. ਪਰਮਿੰਦਰ ਸਿੰਘ ਤੱਗੜ, ਪਟਿਆਲਾ

ਭਾਸ਼ਾ ਦੇ ਨਾਂਅ ’ਤੇ ਸਥਾਪਤ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਉਪ ਕੁਲਪਤੀ ਡਾ. ਜਸਪਾਲ ਸਿੰਘ ਦੁਆਰਾ ਪੰਜਾਬੀ ਭਾਸ਼ਾ ਦੀ ਪ੍ਰਫੁਲਤਾ ਪ੍ਰਤੀ ਲਗਾਤਾਰ ਕੀਤੇ ਜਾ ਰਹੇ ਸੁਹਿਰਦ ਤੇ ਸਫ਼ਲ ਯਤਨਾਂ ਸਦਕਾ ਯੂਨੀਵਰਸਿਟੀ ਨੇ ਲਾਮਿਸਾਲ ਪ੍ਰਾਪਤੀਆਂ ਕੀਤੀਆਂ ਹਨ। ਇਸੇ ਕੜੀ ਵਿਚ ਬੀਤੀ 25 ਮਾਰਚ ਨੂੰ ਐਲਾਨੇ ਯੂ. ਜੀ. ਸੀ. ਨੈੱਟ ਪ੍ਰੀਖਿਆ ਦਸੰਬਰ 2012 ਦੇ ਨਤੀਜੇ ਦੀ ਪੜਚੋਲ ਹਿਤ ਹੈ ਕਿ ਪਿਛਲੀ ਵਾਰ ਦੀ ਤਰਾਂ ਇਸ ਵਾਰ ਵੀ ਪੰਜਾਬ ਯੂਨੀਵਰਸਿਟੀ ਚੰਡੀਗੜ ਅਤੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਦੇ ਮੁਕਾਬਲੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਕੇਂਦਰ ਦਾ ਪੰਜਾਬੀ ਵਿਸ਼ੇ ਦਾ ਨਤੀਜਾ ਸ਼ਾਨਦਾਰ ਰਹਿਣ ਸਦਕਾ ਇਸ ਯੂਨੀਵਰਸਿਟੀ ਦੀ ਪੰਜਾਬੀ ਭਾਸ਼ਾ ਪ੍ਰਤੀ ਅਕੀਦਤ ਇਕ ਵਾਰ ਫ਼ਿਰ ਸਾਬਤ ਹੋਈ ਹੈ।

ਉਕਤ ਤਿੰਨੋਂ ਯੂਨੀਵਰਸਿਟੀਆਂ ਵਿਚ ਸਾਂਝੇ ਤੌਰ ’ਤੇ 224 ਉਮੀਦਵਾਰਾਂ ਨੇ ਕੌਮੀ ਯੋਗਤਾ ਪ੍ਰੀਖਿਆ ਦੀ ਉਪਰਲੀ 15 ਫ਼ੀਸਦੀ ਮੈਰਿਟ ਵਿਚ ਸਥਾਨ ਗ੍ਰਹਿਣ ਕੀਤਾ ਜਿਸ ਵਿਚ ਪੰਜਾਬ ਯੂਨੀਵਰਸਿਟੀ ਦੇ 8 ਜੂਨੀਅਰ ਰਿਸਰਚ ਫ਼ੈਲੋ ਸਮੇਤ 46, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ 5 ਜੂਨੀਅਰ ਰਿਸਰਚ ਫ਼ੈਲੋ ਸਮੇਤ 52 ਉਮੀਦਵਾਰਾਂ ਨੇ ਸਫ਼ਲਤਾ ਹਾਸਲ ਕੀਤੀ ਹੈ ਜਦਕਿ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ 12 ਜੂਨੀਅਰ ਰਿਸਰਚ ਫ਼ੈਲੋ ਸਮੇਤ 126 ਉਮੀਦਵਾਰਾਂ ਨੇ ਸਫ਼ਲਤਾ ਹਾਸਲ ਕਰਕੇ ’ਵਰਸਿਟੀ ਦਾ ਰੁਤਬਾ ਬੁਲੰਦ ਰੱਖਿਆ ਹੈ।

27/03/2013