ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ ਦੇ ਪੰਜ ਵਿਭਾਗਾਂ ਦੇ ਨਵੇਂ ਮੁਖੀ ਨਿਯੁੱਕਤ ਕੀਤੇ ਗਏ ਹਨ। ਇਹ ਜਾਣਕਾਰੀ ਸਾਂਝੀ ਕਰਦਿਆਂ ਡਾ. ਪ੍ਰਯਾਗ ਦੱਤ ਜੁਆਲ, ਯੂਨੀਵਰਸਿਟੀ ਰਜਿਸਟਰਾਰ ਨੇ ਦੱਸਿਆ ਕਿ ਵੈਟਨਰੀ ਐਨਾਟਮੀ ਅਤੇ ਹਿਸਟਾਲੋਜੀ ਵਿਭਾਗ ਵਿੱਚ ਡਾ. ਨੀਲਮ ਬਾਂਸਲ ਨੂੰ ਵਿਭਾਗ ਮੁਖੀ ਲਗਾਇਆ ਗਿਆ ਹੈ।

ਡਾ.ਨੀਲਮ ਨੇ ਬਤੌਰ ਸਹਾਇਕ ਪ੍ਰੋਫੈਸਰ ਆਪਣੇ ਕਿੱਤੇ ਦੀ ਸ਼ੁਰੂਆਤ ਕੀਤੀ। ਉਹ ਹੁਣ ਤੱਕ 150 ਅੰਡਰ-ਗ੍ਰੈਜੁਏਟ ਅਤੇ ਪੋਸਟ ਗ੍ਰੈਜੁਏਟ ਕੋਰਸ ਪੜਾ ਚੁੱਕੇ ਹਨ ਅਤੇ 135 ਖੋਜ ਪੱਤਰ ਲਿੱਖ ਚੁੱਕੇ ਹਨ। ਉਨਾਂ ਨੇ ਦੇਸ਼-ਵਿਦੇਸ਼ ਵਿੱਚ ਕਈ ਕਾਨਫਰੰਸਾਂ ਵਿੱਚ ਸ਼ਮੂਲੀਅਤ ਕੀਤੀ ਹੈ ਅਤੇ ਸਨਮਾਨ ਹਾਸਿਲ ਕੀਤੇ ਹਨ। ਔਰਤਾਂ ਦੀ ਸੁਰੱਖਿਆ ਪ੍ਰਤੀ ਬਣਾਈ ਯੂਨੀਵਰਸਿਟੀ ਟਾਸਕ ਫੋਰਸ ਵਿੱਚ ਉਹ ਮਹੱਤਵਪੂਰਨ ਕਾਰਗੁਜ਼ਾਰੀ ਨਿਭਾ ਰਹੇ ਹਨ।

ਡਾ. ਜਸਵਿੰਦਰ ਸਿੰਘ ਭੱਟੀ ਨੇ ਪਸਾਰ ਸਿੱਖਿਆ ਵਿਭਾਗ ਦੇ ਮੁਖੀ ਦੇ ਤੌਰ ਤੇ ਅਹੁਦਾ ਸੰਭਾਲਿਆ।ਉਨਾਂ ਨੇ 1988 ਵਿੱਚ ਬਤੌਰ ਸਹਾਇਕ ਪ੍ਰੋਫੈਸਰ ਯੂਨੀਵਰਸਿਟੀ ਦੀ ਸੇਵਾ ਸ਼ੁਰੂ ਕੀਤੀ। ਉਨਾਂ ਦੇ ਹੁਣ ਤੱਕ 30 ਖੋਜ ਪੱਤਰ ਅਤੇ 125 ਪਸਾਰ ਪਰਚੇ ਛੱਪ ਚੁੱਕੇ ਹਨ। ਪਸ਼ੂ ਪਾਲਣ ਦੇ ਖੇਤਰ ਵਿੱਚ ਉਨਾਂ ਨੇ 22 ਸੈਮੀਨਾਰ ਅਤੇ ਕਾਰਜਸ਼ਾਲਾਵਾਂ ਕਰਵਾਈਆਂ ਹਨ। ਯੂਨੀਵਰਸਿਟੀ ਦੀ ਸਥਾਪਨਾ ਤੋਂ ਬਾਅਦ ਸ਼ੁਰੂ ਕੀਤੇ ਗਏ ਪਸ਼ੂ ਪਾਲਣ ਮੇਲੇ ਵਿੱਚ ਉਨਾਂ ਦੀ ਅਹਿਮ ਭੂਮਿਕਾ ਰਹੀ ਹੈ।

ਡਾ. ਹਰਮਨਜੀਤ ਸਿੰਘ ਬਾਂਗਾ ਨੇ ਵੈਟਨਰੀ ਪਥਾਲੋਜੀ ਦੇ ਵਿਭਾਗ ਮੁਖੀ ਦੇ ਤੌਰ ਤੇ ਅਹੁਦਾ ਸੰਭਾਲਿਆ। ਉਨਾਂ ਨੇ ਵੀ 1988 ਵਿੱਚ ਸਹਾਇਕ ਪ੍ਰੋਫੈਸਰ ਦੇ ਤੌਰ ਤੇ ਸੇਵਾ ਸ਼ੁਰੂ ਕੀਤੀ। ਕਾਮਨਵੈਲਥ ਵਜ਼ੀਫੇ ਨਾਲ ਉਨਾਂ ਨੇ ਕੈਨੇਡਾ ਤੋਂ ਆਪਣੀ ਪੀ ਐਚ ਡੀ ਦੀ ਡਿਗਰੀ ਹਾਸਿਲ ਕੀਤੀ। ਡਾ. ਬਾਂਗਾ 100 ਤੋਂ ਵਧੇਰੇ ਖੋਜ ਪੱਤਰ ਪ੍ਰਕਾਸ਼ਿਤ ਕਰਵਾ ਚੁੱਕੇ ਹਨ ਜਿਨਾਂ ਵਿੱਚੋਂ ਦੋ ਦਰਜਨ ਅੰਤਰ-ਰਾਸ਼ਟਰੀ ਰਸਾਲਿਆਂ ਵਿੱਚ ਛਪੇ ਹਨ। ਪਸ਼ੂਆਂ ਦੇ ਰੋਗ ਨਿਵਾਰਣ ਵਿਸ਼ੇ ਤੇ ਉਨਾਂ ਦੀਆਂ ਕਿਤਾਬਾਂ ਵੀ ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ।

ਡਾ. ਕਰਨਲ ਪੀ.ਐਸ.ਮਾਵੀ ਨੂੰ ਵੈਟਨਰੀ ਕਲੀਨੀਕਲ ਕੰਪਲੈਕਸ ਭਾਵ ਪਸ਼ੂ ਹਸਪਤਾਲ ਮਹਿਕਮੇ ਦੇ ਮੁਖੀ ਦੇ ਤੌਰ ਤੇ ਨਿਯੁੱਕਤ ਕੀਤਾ ਗਿਆ। ਉਹ ਪੰਜਾਬ ਪਸ਼ੂ ਪਾਲਣ ਵਿਭਾਗ, ਮਿਲਕਫੈੱਡ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਅਤੇ ਫੌਜ ਵਿੱਚ ਸੇਵਾ ਨਿਭਾ ਚੁੱਕੇ ਹਨ। ਫੌਜ ਦੀ ਟੈਰੀਟੋਰੀਅਲ ਆਰਮੀ ਨਾਲ ਜੁੜੇ ਹੋਣ ਕਾਰਣ ਉਨਾਂ ਨੇ ਉਸ ਖੇਤਰ ਵਿੱਚ ਕਈ ਸਨਮਾਨ ਹਾਸਿਲ ਕੀਤੇ ਹਨ। ਡਾ. ਮਾਵੀ ਦਾ ਵਿਚਾਰ ਹੈ ਕਿ ਵੈਟਨਰੀ ਸਿੱਖਿਆ ਦੇ ਸਿਖਾਂਦਰੂਆਂ ਨੂੰ ਪਸ਼ੂ ਹਸਪਤਾਲ ਦੇ ਮੁਖੀ ਦੇ ਤੌਰ ਤੇ ਉਹ ਹੋਰ ਨਿਪੁੰਨਤਾ ਦੇਣ ਦਾ ਯਤਨ ਕਰਨਗੇ।

ਡਾ. ਸੁਰੇਸ਼ ਕੁਮਾਰ ਸ਼ਰਮਾ ਨੇ ਫਾਰਮਾਕੋਲੋਜੀ ਅਤੇ ਟਾਕਸੀਕੋਲੋਜੀ ਵਿਭਾਗ ਦੇ ਮੁਖੀ ਦੇ ਅਹੁਦਾ ਸੰਭਾਲਿਆ ਹੈ।ਉਹ 20 ਸਾਲ ਤੋਂ ਵੱਧ ਸਮੇਂ ਤੋਂ ਅਧਿਆਪਨ ਨਾਲ ਜੁੜੇ ਹੋਏ ਹਨ। ਉਨਾਂ ਦੇ 60 ਤੋਂ ਵਧੇਰੇ ਖੋਜ ਪੱਤਰ ਰਾਸ਼ਟਰੀ ਅਤੇ ਅੰਤਰ-ਰਾਸ਼ਟਰੀ ਰਸਾਲਿਆਂ ਵਿੱਚ ਛੱਪ ਚੁੱਕੇ ਹਨ। ਉਨਾਂ ਦੇ ਕਈ ਖੋਜ ਪੱਤਰਾਂ ਨੂੰ ਸਨਮਾਨਿਆ ਵੀ ਗਿਆ ਹੈ ਅਤੇ ਉਨਾਂ ਨੂੰ ਨੌਜਵਾਨ ਵਿਗਿਆਨੀ ਦਾ ਸਨਮਾਨ ਵੀ ਮਿਲ ਚੁੱਕਾ ਹੈ। ਡਾ. ਸ਼ਰਮਾ ਆਪਣੇ ਖੇਤਰ ਦੀਆਂ ਕਈ ਜੱਥੇਬੰਦੀਆਂ ਨਾਲ ਜੁੜੇ ਹੋਏ ਹਨ।