ਅਕਤੂਬਰ 27,2013:  ਪੰਜਾਬੀ ਲੈਂਗੂਏਜ਼ ਐਸੋਸੀਏਸ਼ਨ (ਪਲੀ) ਪਿਛਲੇ ਬਹੁਤ ਸਾਰੇ ਸਾਲਾਂ ਤੋਂ ਪੰਜਾਬੀ ਦੀ ਤਰੱਕੀ ਲਈ ਆਪਣੀਆਂ ਕੋਸਿਸਾਂ ਮੁਖ ਤੌਰ ਤੇ ਤਿੰਨ ਖੇਤਰਾਂ ਤੇ ਕੇਂਦਰਤ ਕਰ ਰਹੀ ਹੈ. ਇਹ ਹਨ: ਕਨੇਡਾ ਵਿਚ ਪੰਜਾਬੀ ਭਾਈਚਾਰਾ, ਮੁਖਧਾਰਾ ਭਾਈਚਾਰਾ ਤੇ ਬੀ ਸੀ ਦੇ ਸਰਕਾਰੀ ਸਕੂਲ ਤੇ ਉੱਚ ਵਿਦਿਅਕ ਅਦਾਰੇ. ਪੰਜਾਬੀ ਦੇ ਸੁਭਚਿੰਤਕਾਂ ਲਈ ਇਨ੍ਹਾਂ ਖੇਤਰਾਂ ਵਿਚ ਪੰਜਾਬੀ ਦੇ ਵਿਕਾਸ ਵਿਚ ਹੋਇਆ ਵਾਧਾ ਮਾਣ ਵਾਲੀ ਗੱਲ ਹੈ. ਸਾਡੇ ਸਾਂਝੇ ਯਤਨਾਂ ਸਦਕਾ ਪੰਜਾਬੀ ਨੇ ਕਨੇਡਾ ਵਿਚ ਮਹੱਤਵਪੂਰਨ ਥਾਂ ਹਾਸਿਲ ਕਰ ਲਿਆ ਹੈ. ਕਨੇਡਾ ਦੀਆਂ ਦੋ ਮੁਖ ਸਰਕਾਰੀ ਭਾਸ਼ਵਾਂ ਅੰਗ੍ਰੇਜੀ ਤੇ ਫ੍ਰਾਂਸੀਸੀ ਤੋਂ ਬਾਅਦ ਪੰਜਾਬੀ ਤੀਜੀ ਵੱਡੀ ਬੋਲੀ ਹੈ, ਜਿਹੜੀ ਕਨੇਡਾ ਵਿਚ ਬੋਲੀ ਜਾਂਦੀ ਹੈ. ਮੈਟਰੋਪੋਲੀਟਿਨ ਵੈਨਕੂਵਰ, ਗਰੇਟਰ ਟਰਾਂਟੋ, ਕੈਲਗਿਰੀ ਅਤੇ ਐਡਮਿੰਟਨ ਵਰਗੇ ਸ਼ਹਿਰਾਂ ਵਿਚ ਪੰਜਾਬੀ ਵਿਚ ਸਾਈਨ ਬੋਰਡ ਆਮ ਦੇਖਣ ਨੂੰ ਮਿਲਦੇ ਹਨ.

ਪੰਜਾਬੀ ਹੁਣ ਪੰਜਾਬੀ ਭਾਈਚਾਰੇ ਦੇ ਨਾਲ ਨਾਲ ਮੁਖਧਾਰਾ ਵਿਚ ਵੀ ਖਾਸ ਸਥਾਨ ਰੱਖਦੀ ਹੈ. ਸਾਡੇ ਬਹੁਤੇ ਸਿਟੀ ਹਾਲ, ਹਸਪਤਾਲ, ਬੈਂਕ, ਕ੍ਰੈਡਿਟ ਯੂਨੀਅਨ ਤੇ ਹੋਰ ਬਹੁਤ ਸਾਰੇ ਵੱਡੇ ਵਪਾਰਕ ਅਦਾਰੇ ਬੜੇ ਮਾਣ ਨਾਲ ਆਪਣੇ ਸਾਈਨ ਬੋਰਡ ਲਾਉਂਦੇ ਹਨ, ਜਿਸਤੇ ਲਿਖਿਆ ਹੁੰਦਾ ਹੈ “ਅਸੀਂ ਪੰਜਾਬੀ ਬੋਲਦੇ ਹਾਂ”. ਹਾਲ ਹੀ ਵਿਚ ਇਨਸਿਓਰੈਂਸ ਕਾਰਪੋਰੇਸ਼ਨ ਆਫ਼ ਬ੍ਰਿਟਿਸ਼ ਕੋਲੰਬੀਆ (ਆਈ ਸੀ ਬੀ ਸੀ) ਵੱਲੋਂ ਆਪਣੀਆਂ ਕਲੇਮ ਸੇਵਾਵਾਂ ਨੂੰ ਪੰਜਾਬੀ ਵਿਚ ਸੁਰੂ ਕਰਦਿਆਂ ਵੇਖਣਾ ਇਕ ਹੋਰ ਮਾਣ ਵਾਲੀ ਗੱਲ ਹੈ. ਇਸ ਸੁਰੂਆਤ ਮੌਕੇ ਲਈ ਮਿਲੇ ਸੱਦੇ `ਤੇ ਪਹੁੰਚਦਿਆਂ ਮੈਂ ਆਈ ਸੀ ਬੀ ਸੀ ਨੂੰ ਇਸ ਇਤਿਹਾਸਕ ਕਦਮ ਦੀ ਵਧਾਈ ਦਿੱਤੀ. ਉਮੀਦ ਹੈ ਕਿ ਹੋਰ ਅਦਾਰੇ ਵੀ ਆਈ ਸੀ ਬੀ ਸੀ ਦੇ ਕਦਮ ਚਿੰਨ੍ਹਾਂ `ਤੇ ਚੱਲਣਗੇ.

ਅਕਾਦਮਿਕ ਮੁਹਾਜ ਤੇ, ਮੈਟਰੋ ਵੈਨਕੂਵਰ ਦੇ ਬਹੁਤ ਸਾਰੇ ਐਲੀਮੈਂਟਰੀ ਤੇ ਸੈਕੰਡਰੀ ਸਕੂਲਾਂ ਵਿਚ ਵੱਡੀ ਗਿਣਤੀ ਵਿਚ ਪੰਜਾਬੀ ਦੀਆਂ ਕਲਾਸਾਂ ਵੱਲ ਦੇਖ ਕੇ ਮਾਣ ਹੁੰਦਾ ਹੈ. ਕੈਲਗਿਰੀ, ਐਡਮਿੰਟਨ, ਬਰੈਂਪਟਨ ਤੇ ਮਿਸੀਸਾਗਾ ਵਰਗੇ ਸ਼ਹਿਰ ਵੀ ਇਸ ਖੇਤਰ ਵਿਚ ਪੁਲਾਂਘਾਂ ਪੁੱਟ ਰਹੇ ਹਨ.  ਬੀ ਸੀ ਵਿਚ ਹੁਣ ਚਾਰ ਯੂਨੀਵਰਸਿਟੀਆਂ ਵਿਚ ਪੰਜਾਬੀ ਪੜ੍ਹਾਈ ਜਾਂਦੀ ਹੈ. ਇਹ ਯੂਨੀਵਰਸਿਟੀਆਂ ਹਨ: ਯੂ ਬੀ ਸੀ, ਕਵਾਂਟਲਿਨ ਪੌਲੀਟਿਕਨਿਕ ਯੂਨੀਵਰਸਿਟੀ, ਯੂਨੀਵਰਸਿਟੀ ਆਫ਼ ਫਰੇਜ਼ਰਵੈਲੀ ਤੇ ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ. ਹਾਲ ਹੀ ਵਿਚ ਇਨ੍ਹਾਂ ਚਾਰਾਂ ਯੂਨੀਵਰਸਿਟੀਆਂ ਨੇ ਪੰਜਾਬੀ ਭਾਸਾ ਨੂੰ ਯੂਨੀਵਰਸਿਟੀ ਵਿਚ ਦਾਖਲੇ ਲਈ ਮਾਣਤਾ ਦੇ ਦਿੱਤੀ ਹੈ.

ਇਸ ਪਤਝੜ ਤੋਂ ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਨੇ ਆਪਣੇ ਸਰੀ ਕੈਂਪਸ ਵਿਚ ਵੀ ਪੰਜਾਬੀ ਪੜਾਉਣੀ ਸੁਰੂ ਕਰ ਦਿੱਤੀ ਹੈ.ਨਵੇਂ ਸਾਲ ਤੋਂ ਇਹ ਪੰਜਾਬੀ 148 (ਪੰਜਾਬੀ ਨਾਲ ਜਾਣ-ਪਹਿਚਾਣ) ਸੁਰੂ ਕਰਨਗੇ. ਇਹ ਕੋਰਸ ਪੰਜਾਬੀ ਦੀ ਬਹੁਤ ਥੋੜ੍ਹੀ ਜਾਂ ਬਿਲਕੁਲ ਹੀ ਨਾ ਜਾਣਕਾਰੀ ਵਾਲੇ ਵਿਦਿਆਰਥੀਆਂ ਲਈ ਤਿਆਰ ਕੀਤਾ ਗਿਆ ਹੈ. ਉਮੀਦ ਕਰਦੇ ਹਾਂ ਕਿ ਇਹ ਕੋਰਸ ਕਾਮਯਾਬ ਹੋਵੇਗਾ. ਪਲੀ ਪੰਜਾਬੀ ਭਾਸਾ ਅਤੇ ਸਾਹਿਤ ਨੂੰ ਪ੍ਰਫੁਲਤ ਕਰਨ ਲਈ ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਨਾਲ ਕੁਝ ਪ੍ਰੋਜੈਕਟਾਂ ਉਪਰ ਕੰਮ ਕਰ ਰਹੀ ਹੈ. ਪਲੀ ਵੱਲੋਂ ਮੈਂ ਢਾਹਾਂ ਪ੍ਰੀਵਾਰ ਦਾ ਧੰਨਵਾਦ ਕਰਦਾ ਹਾਂ ਅਤੇ ੳਨ੍ਹਾਂ ਨੂੰ ਵਧਾਈ ਦਿੰਦਾ ਹਾਂ ਕਿ ਉਨ੍ਹਾਂ ਨੇ ਗੁਰਮੁਖੀ ਤੇ ਸਾਹ ਮੁਖੀ ਦੀ ਤਰੱਕੀ ਲਈ ਇੰਟਰਨੈਸ਼ਨਲ ਤੌਰ `ਤੇ ਕਦਮ ਚੁੱਕੇ ਹਨ. ਢਾਹਾਂ ਪ੍ਰੀਵਾਰ ਨੇ ਗਲਪ ਸਾਹਿਤ ਲਈ ਇਕ ਬਹੁਤ ਵੱਡਾ ਇਨਾਮ ਰੱਖਿਆ ਹੈ. ਪੰਜਾਬੀ ਦੇ ਵਿਕਾਸ ਲਈ ਲੇਖਕਾਂ ਅਤੇ ਅਧਿਆਪਕਾਂ ਦਾ ਵੱਡਾ ਯੋਗਦਾਨ ਹੈ. ਇਸ ਗੱਲ ਨੂੰ ਮਾਨਤਾ ਦਿੰਦਿਆਂ, ਪਲੀ ਨੇ ਬਹੁਤ ਸਾਰੇ ਪੰਜਾਬੀ ਅਧਿਆਪਕਾਂ ਦੀ ਸਰੀ ਵਿਚ ਪੰਜਾਬੀ ਪੜ੍ਹਾਉਣ ਲਈ ਉਲਭਧ ਸਾਧਨਾ ਦੇ ਅਦਾਨ-ਪ੍ਰਦਾਨ ਲਈ ਇਕ ਵਰਕਸਾਪ ਲਗਾਈ.

ਪਲੀ ਮੈਂਬਰ ਪਰਵਿੰਦਰ ਧਾਰੀਵਾਲ ਤੇ ਰਣਬੀਰ ਜੌਹਲ ਨੇ ਇਸ ਵਿਚ ਮਹੱਤਵਪੂਰਨ ਰੋਲ ਅਦਾ ਕੀਤਾ. ਰਣਬੀਰ ਬਹੁਤ ਸਾਲਾਂ ਤੋਂ ਕਵਾਂਟਲਿਨ ਪੌਲੀਟਿਕਨਿਕ ਯੂਨੀਵਰਸਿਟੀ ਵਿਚ ਪੰਜਾਬੀ ਪੜ੍ਹਾ ਰਹੀ ਹੈ. ਪਰਵਿੰਦਰ ਵੀ ਰਣਬੀਰ ਦਾ ਸਹਿਯੋਗ ਦਿੰਦੀ ਸੀ ਅਤੇ ਹੁਣ ਉਹ ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਵਿਚ ਪੰਜਾਬੀ ਪੜ੍ਹਾਉਂਦੀ ਹੈ.  ਪੰਜਾਬੀ ਪੜ੍ਹਾਉਣ ਅਤੇ ਇਸਦੇ ਵਿਕਾਸ ਲਈ ਇਹ ਦੋਨੋਂ ਹੀ ਬਹੁਤ ਉਤਸਾਹੀ ਹਨ.  25 ਅਕਤੂਬਰ ਦਿਨ ਸੁਕਰਵਾਰ ਨੂੰ ਪੰਜਾਬੀ ਦੇ ਹੋਰ ਬਹੁਤ ਸਾਰੇ ਅਧਿਆਪਕਾਂ ਦਾ ਇਕ ਵਰਕਸਾਪ ਵਿਚ ਇਨ੍ਹਾਂ ਨਾਲ ਰਲ ਬੈਠਣਾ ਬਹੁਤ ਉਤਸਾਹਪੂਰਣ ਸੀ. ਇਨ੍ਹਾਂ ਨੇ ਇਕ-ਦੂਜੇ ਤੋਂ ਬਹੁਤ ਕੁਝ ਸਿਖਿਆ. ਵਰਕਸਾਪ ਦੀ ਸਮਾਪਤੀ ਤੇ ਇਨ੍ਹਾਂ ਸਭ ਨੂੰ ਪੰਜਾਬੀ ਪੜਾਉਣ ਲਈ ਵਰਤੇ ਜਾਂਦੇ ਸਾਧਨਾ ਦਾ ਇਕ ਪੈਕੇਜ ਦਿੱਤਾ ਗਿਆ ,ਜਿਹੜਾ ਰਣਬੀਰ ਜੌਹਲ ਨੇ ਤਿਆਰ ਕੀਤਾ ਸੀ.

ਕੁੱਲ ਮਿਲਾ ਕੇ ਪਲੀ ਨਾ ਸਿਰਫ ਕਨੇਡਾ ਵਿਚ ਸਗੋਂ ਸੰਸਾਰ ਭਰ ਵਿਚ ਮਾਂ- ਬੋਲੀ  ਦੇ ਵਿਕਾਸ ਦੀ ਤੋਰ `ਤੇ ਖੁਸ਼ ਹੈ. ਸਾਰੇ ਹੀ ਪੰਜਾਬੀ ਦੇ ਸੁਭਚਿੰਤਕਾਂ ਨੂੰ ਪੰਜਾਬੀ ਬੋਲੀ ਦੇ ਸਦਭਾਵਕ ਰਾਜਦੂਤ ਬਨਣ ਦੀ ਲੋੜ ਹੈ. ਪਲੀ ਸੀਮਤ ਕੰਮ ਹੀ ਕਰ ਸਕਦੀ ਹੈ. ਸਾਨੂੰ ਸਾਰਿਆਂ ਨੂੰ ਪੰਜਾਬੀ ਦੇ ਵਿਕਾਸ ਲਈ ਹਰ ਖੇਤਰ ਵਿਚ ਯਤਨਸੀਲ ਹੋਣ ਦੀ ਲੋੜ ਹੈ.  ਮਾਂ-ਬੋਲੀ ਲਈ ਮਾਣਮੱਤੇ ਹੋਣ ਅਤੇ ਆਪਣੇ ਬੱਚਿਆਂ ਵਿਚ ਇਹੀ ਚਿਣਗ ਜਲਾਉਣ ਲਈ ਲੰਮਾ ਪੈਂਡਾ ਤਹਿ ਕਰਨਾ ਪਵੇਗਾ.