ਸੰਜੀਦਾ ਤਬੀਅਤ ਦੇ ਵਿਅਕਤੀਆਂ ਲਈ ਖ਼ੁਸ਼ਕ ਮਹਿਕਮੇ ਫ਼ੂਡ ਕਾਰਪੋਰੇਸ਼ਨ ਆਫ਼ ਇੰਡੀਆ ’ਚੋਂ ਸੇਵਾਮੁਕਤ ਅਤੇ ਸਮਰੱਥ ਲੇਖਕ ਜੰਗਪਾਲ ਸਿੰਘ ਦੀ ਚੌਥੀ ਪੁਸਤਕ ‘ਪੋਲੀਟੀਕਲ ਇਨਸਾਈਕਲੋਪੀਡੀਆ ਆਫ਼ ਪੰਜਾਬ’ ਦਾ ਰਿਲੀਜ਼ ਸਮਾਗਮ ਸਥਾਨਕ ਅਫ਼ਸਰ ਕਲੱਬ ਵਿਖੇ ਪੰਜਾਬੀ ਸਾਹਿਤ ਸਭਾ ਫ਼ਰੀਦਕੋਟ ਦੇ ਬੈਨਰ ਹੇਠ ਕਰਵਾਇਆ ਗਿਆ। ਜਿਸ ਵਿਚ ਮੁੱਖ ਮਹਿਮਾਨ ਵਜੋਂ ਰਾਜਨੀਤੀ ਸ਼ਾਸਤਰ ਦੇ ਪ੍ਰੋਫ਼ੈਸਰ ਡਾ. ਜਮਸ਼ੀਦ ਅਲੀ ਖ਼ਾਨ, ਡੀਨ (ਕਾਲਜ ਵਿਕਾਸ ਕੌਂਸਲ) ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਨੇ ਸ਼ਿਰਕਤ ਕੀਤੀ। ਪ੍ਰਸਿਧ ਪੱਤਰਕਾਰ ਅਤੇ ਰੋਜ਼ਾਨਾ ਅਜੀਤ ਉਪ ਦਫ਼ਤਰ ਫ਼ਰੀਦਕੋਟ ਦੇ ਇੰਚਾਰਜ ਗੁਰਮੀਤ ਸਿੰਘ ਕੋਟਕਪੂਰਾ ਨੇ ਮੁੱਖ ਮਹਿਮਾਨ ਡਾ. ਖ਼ਾਨ ਬਾਰੇ ਕਰਾਏ ਤੁਆਰਫ਼ ਤਹਿਤ ਉਨਾਂ ਦੇ ਪੰਜਾਬ ਦੀ ਰਾਜਨੀਤੀ ਬਾਰੇ ਕੀਤੇ ਖੋਜ ਕਾਰਜ ਦਾ ਖ਼ੁਲਾਸਾ ਪੇਸ਼ ਕੀਤਾ ਅਤੇ ਪੁਸਤਕ ਰਚੇਤਾ ਜੰਗਪਾਲ ਸਿੰਘ ਦੇ ਤੁਆਰਫ਼ ਮੌਕੇ ਉਨਾਂ ਦੀਆਂ ਪਹਿਲਾਂ ਛਪ ਚੁੱਕੀਆਂ ਤਿੰਨ ਪੁਸਤਕਾਂ ਮੇਰਾ ਪਿੰਡ ਹਰੀਨੌ (2003), ਅੱਧੀ ਸਦੀ ਦਾ ਇਤਿਹਾਸ (2003) ਅਤੇ ਪਾਕਿਸਤਾਨ ਦਾ ਦੁਖਾਂਤ : ਖ਼ਾਕੀ ਪਰਛਾਵੇਂ (2007) ਬਾਰੇ ਸੰਖੇਪ ਸ਼ਬਦਾਂ ਵਿਚ ਭਾਵਪੂਰਤ ਜਾਣਕਾਰੀ ਦਿੱਤੀ।

ਡਾ. ਖ਼ਾਨ, ਹਰਜਿੰਦਰ ਸਿੰਘ ਤਾਂਘੜੀ (ਚਾਚਾ ਜੀ), ਰਣਜੀਤ ਸਿੰਘ ਕੰਵਲ, ਜ਼ੋਰਾ ਸਿੰਘ ਸੰਧੂ, ਨਵਰਾਹੀ ਘੁਗਿਆਣਵੀ ਅਤੇ ਹੋਰ ਪ੍ਰਮੁੱਖ ਹਸਤੀਆਂ ਵੱਲੋਂ ਪੁਸਤਕ ਰਿਲੀਜ਼ ਕਰਨ ਦੀ ਰਸਮ ਅਦਾ ਕੀਤੀ ਗਈ। ਪੁਸਤਕ ਦੇ ਸਬੰਧ ਵਿਚ ਪ੍ਰਸਿਧ ਕਲਾ-ਇਤਿਹਾਸਕਾਰ ਡਾ. ਸੁਭਾਸ਼ ਪਰਿਹਾਰ ਨੇ ਜਾਣਕਾਰੀ ਸਾਂਝੀ ਕੀਤੀ। ਪੁਸਤਕ ਬਾਰੇ ਪਰਖ਼-ਪੜਚੋਲ ਵਜੋਂ ਡਾ. ਜਮਸ਼ੀਦ ਅਲੀ ਖ਼ਾਨ ਨੇ ਵਿਸਥਾਰ ਵਿਚ ਚਰਚਾ ਕਰਦਿਆਂ ਕਿਹਾ ਕਿ ਇਹ ਪੁਸਤਕ ਰਾਜਨੀਤੀ ਸ਼ਾਸਤਰ ਦੇ ਖੋਜਾਰਥੀਆਂ ਲਈ ਬਹੁਤ ਲਾਹੇਵੰਦ ਸਾਬਤ ਹੋਵੇਗੀ। ਉਨਾਂ ਕਿਹਾ ਕਿ ਜੰਗਪਾਲ ਸਿੰਘ ਦੀ ਇਸ ਰੈਂਫ਼ਰੈਂਸ ਪੁਸਤਕ ਵਜੋਂ ਉਪਲਬਧੀ ਨਿਰਸੰਦੇਹ ਪੰਜਾਬ ਦੀ ਰਾਜਨੀਤੀ ਨਾਲ ਸਬੰਧਤ ਸਾਂਭਣਯੋਗ ਦਸਤਾਵੇਜ਼ ਹੈ। ਉਨਾਂ ਜੰਗਪਾਲ ਸਿੰਘ ਦੀ ਖੋਜ ਸਮਰੱਥਾ ਦੀ ਸ਼ਲਾਘਾ ਕਰਦਿਆਂ ਉਮੀਦ ਜਤਾਉਂਦੇ ਹੋਏ ਇਸ ਦੇ ਅਗਲੇ ਸੰਸਕਰਨ ਮੌਕੇ ਸ਼ਾਮਲ ਵੇਰਵਿਆਂ ਨੂੰ ਹੋਰ ਵਿਸਥਾਰਨ ਦੀ ਰਾਏ ਵੀ ਦਿੱਤੀ ਤਾਂ ਕਿ ਉਨਾਂ ਦੀ ਅਕਾਦਮਿਕ ਲਿਆਕਤ ਦਾ ਵੱਧ ਤੋਂ ਵੱਧ ਲਾਹਾ ਲਿਆ ਜਾ ਸਕੇ। ਜੰਗਪਾਲ ਸਿੰਘ ਨੇ ਆਪਣੀ ਸਿਰਜਣ ਪ੍ਰਕਿਰਿਆ ਬਾਰੇ ਜ਼ਿਕਰ ਕਰਦਿਆਂ ਕਿਹਾ ਕਿ ਉਹ ਹਮੇਸ਼ਾਂ ਨਵੀਂ ਥਾਂ ਵੇਖਣ ਅਤੇ ਉਸ ਬਾਰੇ ਜਾਨਣ ਅਤੇ ਸਾਹਿਤ ਰਾਹੀਂ ਹੋਰਾਂ ਤੱਕ ਪੁਚਾਉਣ ਦੇ ਆਹਰ ਵਿਚ ਵਧੇਰੇ ਆਨੰਦ ਮਹਿਸੂਸ ਕਰਦੇ ਹਨ। ਹਥਲੀ ਪੁਸਤਕ ਦੀ ਤਿਆਰੀ ਬਾਰੇ ਉਨਾਂ ਕਿਹਾ ਕਿ ਚੋਣਾਂ ਨਾਲ ਸਬੰਧਤ ਵਿਭਾਗਾਂ ਦੇ ਜ਼ਿਲਾ ਅਤੇ ਰਾਜ ਪੱਧਰ ਦੇ ਦਫ਼ਤਰਾਂ ਤੋਂ ਇਲਾਵਾ ਵਿਧਾਨ ਸਭਾ ਦੀ ਲਾਇਬਰੇਰੀ ਅਤੇ ਰਾਜਨੀਤਕ ਮੱਸ ਰੱਖਣ ਵਾਲੇ ਖ਼ਾਸ ਲੋਕਾਂ ਤੋਂ ਇਕੱਤਰ ਜਾਣਕਾਰੀ ਨੂੰ ਪੁਸਤਕ ਦਾ ਹਿੱਸਾ ਬਣਾਇਆ ਗਿਆ ਹੈ। ਪੁਸਤਕ ਬਾਰੇ ਵਿਚਾਰ-ਚਰਚਾ ਵਿਚ ਦਰਸ਼ਨ ਸਿੰਘ ਬਰਾੜ ਸੇਵਾਮੁਕਤ ਮੰਡਲ ਸਿਖਿਆ ਅਫ਼ਸਰ, ਗੁਰਮੇਲ ਸਿੰਘ ਚੰਦ ਨਵਾਂ, ਡਾ. ਹਰਿੰਦਰਪਾਲ ਸਿੰਘ ਸੰਧੂ ਨੇ ਹਿੱਸਾ ਲਿਆ।

ਸਮਾਗਮ ਦਾ ਸੰਚਾਲਨ ਪਾਲ ਸਿੰਘ ਪਾਲ ਵੱਲੋਂ ਕੀਤਾ ਗਿਆ। ਪ੍ਰਮੁੱਖ ਸ਼ਖ਼ਸੀਅਤਾਂ ਵਿਚ ਬਨਾਰਸੀ ਦਾਸ ਪ੍ਰਧਾਨ ਪੰਜਾਬੀ ਸਾਹਿਤ ਸਭਾ ਫ਼ਰੀਦਕੋਟ, ਕੁਲਦੀਪ ਸਿੰਘ ਉਦਯੋਗਪਤੀ, ਡਾ. ਰਸ਼ਪਾਲ ਸਿੰਘ ਸੰਧੂ, ਪ੍ਰੋ. ਸਾਧੂ ਸਿੰਘ, ਪ੍ਰੋ. ਰਾਜਪਾਲ ਸਿੰਘ ਸੋਹੀ, ਪ੍ਰਿੰ. ਗੁਰਦੀਪ ਸਿੰਘ ਢੁੱਡੀ, ਡਾ. ਪਰਮਿੰਦਰ ਸਿੰਘ ਤੱਗੜ, ਮਨਜੀਤ ਕੌਰ, ਪ੍ਰੋ. ਕੁਲਵਿੰਦਰ ਸਿੰਘ ਸੰਧੂ, ਸਤਵਿੰਦਰ ਸਿੰਘ ਸੰਧੂ ਸੱਤੀ ਕੋਚ, ਜਾਗੀਰ ਸਿੰਘ, ਸ਼ਾਮ ਸੁੰਦਰ ਅਗਰਵਾਲ, ਕੁਲਦੀਪ ਸਿੰਘ ਮਾਣੂੰਕੇ, ਬਾਜ ਸਿੰਘ, ਸੁਰਿੰਦਰ ਮਚਾਕੀ, ਇਕਬਾਲ ਘਾਰੂ, ਬਿੱਕਰ ਸਿੰਘ ਆਜ਼ਾਦ, ਗੁਰਾਂਦਿੱਤਾ ਸਿੰਘ ਸੰਧੂ, ਡਾ. ਪਰਮਜੀਤ ਸਿੰਘ ਬਰਾੜ ਤੇ ਪ੍ਰਿੰ. ਇੰਦਰਜੀਤ ਕੌਰ, ਵਤਨਬੀਰ ਸਿੰਘ, ਹਸਰਤ, ਗੁਰਮੇਲ ਸਿੰਘ ਮੂਰਤੀਕਾਰ, ਰਾਜਪਾਲ ਸਿੰਘ, ਖ਼ੁਸ਼ਵੰਤ ਬਰਗਾੜੀ, ਨਿਰਮੋਹੀ ਫ਼ਰੀਦਕੋਟੀ, ਪ੍ਰਿੰ. ਮੁਖਤਿਆਰ ਸਿੰਘ, ਸੁਨੀਲ ਚੰਦਿਆਣਵੀ, ਮਹਿੰਦਰ ਕੌਰ ਸੇਵਾਮੁਕਤ ਡੀ. ਈ. ਓ., ਸਾਧੂ ਸਿੰਘ, ਸਾਕੀ ਫ਼ਰੀਦਕੋਟੀ ਸਮੇਤ ਸਮਾਗਮ ਦੀ ਖ਼ਾਸੀਅਤ ਇਹ ਸੀ ਕਿ ਸਰੋਤਿਆਂ ਦੇ ਤੀਜੇ ਹਿੱਸੇ ਵਜੋਂ ਔਰਤਾਂ ਸ਼ਾਮਲ ਸਨ।