2ਆਰਜ਼ ਕਮਿਉਨਿੱਟੀ ਰੀਸੋਰਸ ਸੈਂਟਰ ਵੁਲਵਰਹੈਂਪਟਨ ਵਿਖੇ ਕੇਂਦਰੀ ਪੰਜਾਬੀ ਸਾਹਿਤ ਸਭਾ ਯੂ ਕੇ ਦੀ ਮਾਸਿਕ ਇੱਕਤਰਤਾ ਹੋਈ। ਖਿਮਾ ਜਾਚਨਾ ਤੋਂ ਉਪ੍ਰਰੰਤ ਡਾ: ਰਤਨ ਰੀਹਲ ਨੇ ਸਭਾ ਦੀ ਚੋਣ ਪਰਿਕਿਰਿਆ ਬਾਰੇ ਦਸਦਿਆਂ ਹੋਇਆਂ ਅਹੁਦਿਆਂ ਵਾਸਤੇ ਆਏ ਨਾਮੀਨੇਸ਼ਨ ਫਾਰਮਾਂ ਦਾ ਵੇਰਵਾ ਪੜ੍ਹ ਕੇ ਸੁਣਾਇਆ। ਹੇਠ ਲਿਖੇ ਦੀ ਤਰ੍ਹਾਂ ਆਏ ਮੈਂਬਰਾਂ ਦੇ ਸਹਿਜੋਗ ਨਾਲ ਸਰਬ ਸੰਮਤੀ ਨਾਲ ਪ੍ਰਬੰਧਕ ਕਮੇਟੀ ਥਾਪ ਦਿਤੀ ਗਈ। ਡਾ. ਸਾਥੀ ਲੁਧਿਆਣਵੀ ਚੇਅਰਮੈਨ, ਪ੍ਰੋ: ਸੁਰਜੀਤ ਸਿੰਘ ਖਾਲਸਾ ਸੀਨੀਅਰ ਵਾਈਸ ਚੇਅਰਮੈਨ, ਡਾ: ਗੁਰਨਾਮ ਗਿੱਲ ਵਾਈਸ ਚੇਅਰਮੈਨ, ਸੰਤੋਖ ਧਾਲੀਵਾਲ ਪ੍ਰਧਾਨ, ਜਸਪਾਲ ਸਿੰਘ ਝੀਤਾ ਮੀਤ ਪ੍ਰਧਾਨ, ਭੂਪਿੰਦਰ ਸਿੰਘ ਸੱਗੂ ਜਨਰਲ ਸਕੱਤਰ, ਜੰਡੂਲਿੱਤਰਾਂਵਾਲਾ ਸਹਾਇਕ ਸਕੱਤਰ , ਰਾਜਿੰਦਰਜੀਤ ਕਲਚਰਲ ਸਕੱਤਰ , ਮੁਹਿੰਦਰ ਦਿਲਬਰ ਸਹਾਇਕ ਕਲਚਰਲ ਸਕੱਤਰ, ਦਲਜੀਤ ਸਿੰਘ ਉੱਪਲ ਖਜ਼ਾਨਚੀ।

ਆਰਜੀ ਪ੍ਰਬੰਧਕਾਂ ਦੇ ਮੁਤਾਬਕ ਜੋ ਗਤੀਵਿਧੀਆਂ ਕੀਤੀਆ ਜਾਂਦੀਆਂ ਸਨ ਜਾਂ ਕਰਨ ਵਾਲੀਆਂ ਰਹਿ ਗਈਆਂ ਸਨ ਉਹਦੀ ਜਾਣਕਾਰੀ ਡਾ: ਰਤਨ ਰੀਹਲ ਨੇ ਨਵੀਂ ਕਮੇਟੀ ਨੂੰ ਦੱਸੀ। ਅਗੋਂ ਨਵੀਂ ਕਮੇਟੀ ਇਨ੍ਹਾਂ ਕਾਰਜਾਂ ਨੂੰ ਅਗੇ ਤੋਰਦੀ ਹੈ ਜਾਂ ਕੋਈ ਨਵੇਂ ਢੰਗਾਂ ਨਾਲ ਕਾਰਜਸ਼ੀਲ ਹੁੰਦੀ ਹੈ ਤਾਂ ਫਾਊਂਡਰ ਮੈਂਬਰ ਉਨ੍ਹਾਂ ਨਾਲ ਮੋਢੇ ਨਾਲ ਮੋਢਾ ਲਾ ਕੇ ਨੇਪਰੇ ਚਾੜ੍ਹਨ ਵਾਸਤੇ ਤੱਤਪਰ ਤੇ ਉਤਸਕ ਰਹਿਣਗੇ। । ਜੋ ਕਾਰਜ ਪਾਈਪ ਲਾਇਨ ਵਿਚ ਹਨ ਜਿਵੇਂ ਕੇਂਦਰੀ ਸਭਾ ਦੇ ਕੌਮੀ ਪੱਧਰ ਉਪਰ ਸਾਲ ਵਿਚ ਦੋ ਸੈਮੀਨਾਰ ਕਰਵਾਏ ਜਾਇਆ ਕਰਨਗੇ। ਇਹ ਸੈਮੀਨਾਰ ਕੇਂਦਰੀ ਸਭਾ ਦੇ ਬੈਨਰ ਹੇਠ ਕਿਸੇ ਵੀ ਸ਼ਹਿਰ ਵਿਚ ਆਯੋਜਿਤ ਕੀਤੇ ਜਾ ਸਕਦੇ ਹਨ ਪਰ ਆਰਥਿਕ ਮੱਦਦ ਸਾਰੇ ਮੈਂਬਰ ਰਲ ਮਿਲ ਕੇ ਕਰਿਆ ਕਰਨਗੇ। ਸੈਮੀਨਾਰਾਂ ਵਿਚ ਆਲੋਚਨਾ ਪੱਤਰ ਅਤੇ ਪੱਛਮੀ ਕਲਚਰ ਵਿਚ ਪੰਜਾਬੀ ਸਮਾਜ ਨੂੰ ਦਰਸਾਉਂਦੇ ਇਕਾਂਗੀ ਵੀ ਖੇਡੇ ਜਾਇਆ ਕਰਨਗੇ। ਕਵੀ ਦਰਬਾਰ ਅਤੇ ਨਵੇਂ ਸਾਹਿਤਕਾਰਾਂ ਵਾਸਤੇ ਵਰਕਸ਼ਾਪਾਂ ਵੀ ਲਾਈਆਂ ਜਾਇਆ ਕਰਨਗੀਆਂ ।ਨਵੇਂ ਪ੍ਰਧਾਨ ਸੰਤੋਖ ਧਾਲੀਵਾਲ ਨੇ ਬੋਲਦਿਆਂ ਕਿਹਾ ਕਿ ਕੇਂਦਰੀ ਸਭਾ ਦੇ ਬੈਨਰ ਹੇਠ ਉਹ ਨੌਂਟੀਘਮ ਵਿਚ ਇਕ ਵਿਸ਼ਾਲ ਸੈਮੀਨਾਰ ਕਰਵਾਉਂਣ ਦੀ ਜਿੰਮੇਦਾਰੀ ਲੈਂਦੇ ਹਨ। ਮੈਂਬਰਾਂ ਨੇ ਧਾਲੀਵਾਲ ਦੇ ਇਸ ਫੈਸਲੇ ਨੂੰ ਬਹੁਤ ਉਤਸ਼ਾਹ ਜਨਕ ਦਸਿਆ।

ਮੈਂਬਰ ਗ਼ਜ਼ਲਗੋਆਂ ਕਵੀਆਂ ਅਤੇ ਗੀਤਕਾਰਾਂ ਨੇ ਜਿਵੇ ਚੰਨ ਜੰਡਿਆਲਵੀ, ਜੰਡੂ ਲਿੱਤਰਾਂਵਾਲਾ, ਡਾ: ਰਤਨ ਰੀਹਲ,  ਸੰਤੋਖ ਧਾਲੀਵਾਲ, ਸੁਰਜੀਤ ਸਿੰਘ ਖਾਲਸਾ, ਮਹਿੰਦਰ ਦਿਲਬਰ, ਕੇਵਲ ਸਿੰਘ ਅਨੰਦ, ਭੂਪਿੰਦਰ ਸਿੰਘ ਸੱਗੂ ਆਦਿ ਨੇ ਆਪਣੀਆਂ ਭਾਵਪੂਰਤ ਗ਼ਜ਼ਲਾਂ, ਕਵਿਤਾਵਾਂ ਅਤੇ ਗੀਤ ਪੇਸ਼ ਕੀਤੇ।

ਕੇਂਦਰੀ ਸਭਾ ਦੇ ਨਵੇਂ ਪ੍ਰਧਾਨ ਸੰਤੋਖ ਧਾਲੀਵਾਲ ਨੇ ਸਮਾਗਮ ਦੀ ਸਮਾਪਤੀ ਕਰਦਿਆਂ ਕਿਹਾ ਕਿ ਕੇਂਦਰੀ ਸਭਾ ਦੀ ਸਥਾਪਤੀ ਸਮੇਂ ਦੀ ਲੋੜ ਹੈ। ਹਰ ਸ਼ਹਿਰ ਦੀ ਪੰਜਾਬੀ ਸਾਹਿਤ ਸਭਾ ਆਪਣੇ ਆਪ ਵਿਚ ਆਜ਼ਾਦ ਸਭਾ ਹੈ ਪਰ ਪੰਜਾਬੀ ਬੋਲੀ ਅਤੇ ਪੰਜਾਬੀ ਸਾਹਿਤ ਦੇ ਪਾਸਾਰ ਅਤੇ ਪਰਸਾਰ ਵਾਸਤੇ ਕੇਂਦਰੀ ਸਭਾ ਦਾ ਹਰ ਸਾਹਿਤਕਾਰ ਨੂੰ ਮੈਂਬਰ ਬਣਨਾ ਚਾਹੀਦਾ ਹੈ।