ਸ਼੍ਰੀ ਅਨੰਦਪੁਰ ਸਾਹਿਬ/ਰੂਪਨਗਰ, 26 ਨਵੰਬਰ- ਵਿਰਾਸਤ-ਏ-ਖਾਲਸਾ ਨੂੰ ਮਾਨਵਤਾ ਲਈ ਸਮਰਪਤ ਦਿਵਸ ਦੀ ਸਮਾਪਤੀ ਬੀਤੀ ਦੇਰ ਰਾਤ ਕੀਰਤਨ ਦਰਬਾਰ ਅਤੇ ਬੋਲੇ ਸੋ ਨਿਹਾਲ ਰੌਸ਼ਨੀ ਤੇ ਆਵਾਜ਼ ਪ੍ਰੋਗਰਾਮ ਨਾਲ ਹੋਈ ਜਿਸ ਦੀ ਪ੍ਰਧਾਨਗੀ ਡਾ: ਉਪਿੰਦਰਜੀਤ ਕੌਰ ਖਜਾਨਾ ਮੰਤਰੀ ਪੰਜਾਬ ਨੇ ਕੀਤੀ।

ਇਸ ਪ੍ਰੋਗਰਾਮ ਦੀ ਸ਼ੁਰੂਆਤ ਵਡਾਲੀ ਭਰਾਵਾਂ ਨੇ ਬੜੇ ਰਸਭਿੰਨੇ ਅਤੇ ਸਰੋਤਿਆਂ ਨੂੰ ਮੰਤਰਮੁਗਧ ਕਰ ਦੇਣ ਵਾਲੇ ਗੁਰੂਆਂ ਦੀ ਬਾਣੀ ਨਾਲ ਸਬੰਧਤ ਸ਼ਬਦ ਗਾਇਨ ਨਾਲ ਕੀਤੀ ਜਿਸ ਦੌਰਾਨ ਉਨਾਂ ਵਲੋਂ ਪੇਸ਼ ਕੀਤੇ ਭਗਤੀ ਰਸ ਨਾਲ ਭਰਪੂਰ ’ਮਿੱਤਰ ਪਿਆਰੇ ਨੂੰ- ਹਾਲ ਮੁਰੀਦਾਂ ਦਾ ਕਹਿਣਾ ਆਦਿ ਸ਼ਬਦ ਕੀਰਤਨ ਦੀ ਸੰਗਤਾਂ ਵਲੋਂ ਭਰਪੂਰ ਸ਼ਲਾਘਾ ਕੀਤੀ ਗਈ ।

ਇਸ ਉਪਰੰਤ ਸ਼੍ਰੀ ਹਰਬਖਸ਼ ਲਾਟਾ ਦੀ ਪੇਸ਼ਕਾਰੀ ਸਿੱਖ ਗੁਰੂਆਂ ’ਤੇ ਅਧਾਰਤ ਰੌਸ਼ਨੀ ਅਤੇ ਆਵਾਜ਼ ਦਾ ਪ੍ਰੋਗਰਾਮ ਬੋਲੇ ਸੋ ਨਿਹਾਲ ਦਿਖਾਇਆ ਗਿਆ ਜਿਸ ਵਿੱਚ ਪਹਿਲੀ ਪਾਤਸ਼ਾਹੀ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਤੋਂ ਲੈ ਕੇ ਦਸਾਂ ਗੁਰੂ ਸਾਹਿਬਾਨ ਦਾ ਸਮਕਾਲੀ ਇਤਿਹਾਸ ਸਮੇਤ ਜੰਗ-ਏ-ਅਜ਼ਾਦੀ, ਕੂਕਾ ਮੋਰਚਾ, ਛੋਟਾ ਘੱਲੂਘਾਰਾ, ਵੱਡਾ ਘੱਲੂਘਾਰਾ ਜਿਸ ਦੌਰਾਨ 35 ਹਜਾਰ ਸਿੰਘ ਸ਼ਹੀਦ ਹੋਏ, ਸਿੱਖ ਪੰਥ ਦੀ ਸਿਰਜਣਾ, ਛੋਟੇ ਸਾਹਿਬਜਾਦਿਆਂ ਅਤੇ ਵੱਡੇ ਸਾਹਿਬਜਾਦਿਆਂ ਦੀ ਸ਼ਹਾਦਤ, ਜਲਿਆਂਵਾਲਾ ਬਾਗ ਦਾ ਸਾਕਾ, ਮਹਾਰਾਜਾ ਰਣਜੀਤ ਸਿੰਘ ਦਾ ਰਾਜ, ਬੰਦਾ ਸਿੰਘ ਬਹਾਦਰ ਦਾ ਰਾਜ ਅਤੇ ਜੈਤੋਂ ਦੀ ਲੜਾਈ ਵਰਗੇ ਯਾਦਗਾਰੀ ਸਾਕੇ ਦੀ ਭਾਵਪੂਰਕ ਅਤੇ ਦਿਲ ਟੁੰਭਵੀਂ ਪੇਸ਼ਕਾਰੀ ਕੀਤੀ ਗਈ। ਇਸ ਰੌਸ਼ਨੀ ਅਤੇ ਅਵਾਜ਼ ਦੇ ਪ੍ਰੋਗਰਾਮ ਦੌਰਾਨ ਲੋਕਾਂ ਦੀਆਂ ਅੱਖਾਂ ਨਮ ਹੋ ਗਈਆਂ ਅਤੇ ਦੇਰ ਰਾਤ ਤੱਕ ਚੱਲੇ ਇਸ ਪ੍ਰੋਗਰਾਮ ਦਾ ਠੰਡ ਦੇ ਬਾਵਜੂਦ ਸੰਗਤਾਂ ਨੇ ਬੜਾ ਅਨੰਦ ਮਾਣਿਆ।

ਇਸ ਕੀਰਤਨ ਅਤੇ ਰੌਸ਼ਨੀ ’ਤੇ ਆਵਾਜ਼ ਪ੍ਰੋਗਰਾਮ ਦੌਰਾਨ ਸਿੰਘ ਸਾਹਿਬ ਗਿਆਨੀ ਤਰਲੋਚਨ ਸਿੰਘ ਜਥੇਦਾਰ ਤਖਤ ਸ਼੍ਰੀ ਕੇਸਗੜ ਸਾਹਿਬ ਸ਼੍ਰੀ ਐਸ.ਸੀ.ਅਗਰਾਵਲ ਮੁੱਖ ਸਕੱਤਰ ਪੰਜਾਬ, ਸ਼੍ਰੀ ਦਰਬਾਰਾ ਸਿੰਘ ਗੁਰੂ ਪ੍ਰਮੁੱਖ ਸਕੱਤਰ ਮੁੱਖ ਮੰਤਰੀ ਪੰਜਾਬ, ਸ਼੍ਰੀ ਨਰੇਸ਼ ਅਰੋੜਾ ਡੀ.ਆਈ.ਜੀ., ਸ਼੍ਰੀ ਜੀ.ਕੇ. ਸਿੰਘ ਡਿਪਟੀ ਕਮਿਸ਼ਨਰ ਰੂਪਨਗਰ, ਸ਼੍ਰੀ ਕਰਮਜੀਤ ਸਿੰਘ ਸਰਾਂ ਸੀ.ਈ.ਓ.ਸ਼੍ਰੀ ਅਨੰਦਪੁਰ ਸਾਹਿਬ ਫਾਉਂਡੇਸ਼ਨ, ਸ਼੍ਰੀ ਜਤਿੰਦਰ ਸਿੰਘ ਔਲਖ ਐਸ.ਐਸ.ਪੀ., ਪ੍ਰਿੰਸੀਪਲ ਸੁਰਿੰਦਰ ਸਿੰਘ ਮੈਂਬਰ ਐਸ.ਜੀ.ਪੀ.ਸੀ. ਸ਼੍ਰੀ ਪੁਨੀਤ ਗੋਇਲ ਐਸ.ਡੀ.ਐਮ.ਰੂਪਨਗਰ, ਸ਼੍ਰੀ ਕਿਰਨਬੀਰ ਸਿੰਘ ਮਾਨ ਐਸ.ਡੀ.ਐਮ. ਅਨੰਦਪੁਰ ਸਾਹਿਬ, ਸ਼੍ਰੀ ਉਪਕਾਰ ਸਿੰਘ ਐਸ.ਡੀ.ਐਮ. ਚਮਕੌਰ ਸਾਹਿਬ , ਸ਼੍ਰੀ ਏ.ਪੀ.ਐਸ. ਸੰਧੂ ਐਸ.ਡੀ.ਐਮ.ਫਤਹਿਗੜ ਸਾਹਿਬ ਅਤੇ ਸ਼੍ਰੀ ਦਲਜੀਤ ਸਿੰਘ ਓ.ਐਸ.ਡੀ. ਸ਼੍ਰੀ ਅਨੰਦਪੁਰਸਾਹਿਬ ਫਾਉਂਡੇਸ਼ਨ ਵੀ ਹਾਜਰ ਸਨ।