ਪਿਛਲੇ ਸਾਲਾਂ ਵਾਂਗ ਇਸ ਸਾਲ ਵੀ ਨੌਟਿੰਘਮ ਦੇ 30 ਲੱਖ ਪੌਂਡ ਦੀ ਲਾਗਤ ਨਾਲ ਸਜਾਏ ਹਾਲ ’ਚ ਇੱਕ ਸ਼ਾਨਦਾਰ ਸਮਾਗਮ ਆਯੋਜਤ ਕੀਤਾ ਗਿਆ।ਸੱਭ ਤੋਂ ਪਹਿਲਾਂ ਕਸ਼ਮੀਰਾ ਸਿੰਘ ਪਰਧਾਨ 50+ਅਸੋਸੀਏਸ਼ਨ ਨੇ ਅੱਜ ਦੇ ਪ੍ਰੋਗਰਾਮ ’ਚ ਸ਼ਾਮਲ ਹੋਣ ਤੇ ਧੰਨਵਾਦ ਕੀਤਾ ਤੇ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਹਰੀ ਝੰਡੀ ਦਿੱਤੀ। ਪ੍ਰੋਗਰਾਮ ਦੋਂਹ ਹਿੱਸਿਆਂ ’ਚ ਵੰਡਿਆ ਗਿਆ। ਪਹਿਲੇ ਹਿੱਸੇ ’ਚ ਡਾ. ਮੰਗਤ ਰਾਮ ਭਾਰਦਵਾਜ਼ ਭਾਸ਼ਾ ਵਿਗਿਆਨੀ ਨੇ ਆਪਣਾ ਪਰਚਾ ਸੰਤੋਖ ਧਾਲੀਵਾਲ ਦਾ ਨਾਵਲ ‘ਰਿਸ਼ਤਿਆਂ ਦੇ ਮਾਰੂਥਲ’ ਪੜ੍ਹਦਿਆਂ ਮੇਰੇ ਅਨੁਭਵ, ਪੜ੍ਹਿਆ।ਜਿਸਤੇ ਭਰਵੀਂ ਬਹਿਸ ਹੋਈ। ਬਹਿਸ ਨੂੰ ਪੰਜਾਬੀ ਦੇ ਸਿਰਮੌਰ ਕਵੀ ਵਰਿੰਦਰ ਪਰਿਹਾਰ ਨੇ ਅਰੰਭ ਕੀਤਾ ਜਿਸ ’ਚ ਉਸਨੇ ਨਾਵਲ ਵਿਚਲੀ ਭਾਸ਼ਾ ਨੂੰ ਸਲਾਹੁੰਦਿਆਂ ਆਪਣੇ ਵਿਚਾਰ ਪੇਸ਼ ਕੀਤੇ ਤੇ ਪਰਚੇ ਤੇ ਕਈ ਸਵਾਲ ਉਠਾਉਂਦਿਆਂ ਵਿਸਥਾਰ ਦੀ ਮੰਗ ਕੀਤੀ। ਬਹਿਸ ’ਚ ਪਰਵਾਸੀ ਨਾਵਲ ਤੇ ਕਈ ਕਿੰਤੂ-ਪ੍ਰੰਤੂ ਵੀ ਉੱਭਰੇ ਤੇ ਸਤਹ-ਕਰੇਦੂ ਨਾਵਲਾਂ ਨਾਲ ਵਰਕੇ ਕਾਲੇ ਕਰਨ ਵਾਲੇ ਨਾਵਲਕਾਰਾਂ ਨੂੰ ਵਿਸ਼ਵ ਸਾਹਿਤ ਪੜ੍ਹ ਕੇ ਚੰਗੇ ਨਾਵਲ ਲਿਖਣ ਦੀ ਅਪੀਲ ਵੀ ਕੀਤੀ।ਵਰਿੰਦਰ ਪਰਿਹਾਰ ਤੋਂ ਮਗਰੋਂ ਬਹਿਸ ’ਚ ਸੁਖਦੇਵ ਬਾਂਸਲ, ਕਿਰਪਾਲ ਪੂਨੀ, ਕਵਿਤਰੀ ਕੁਲਵੰਤ ਢਿਲੋਂ, ਨਾਵਲਕਾਰ ਮੁਹਿੰਦਰਪਾਲ ਧਾਲੀਵਾਲ, ਸਾਥੀ ਲੁਧਿਆਣਵੀ, ਦਵਿੰਦਰ ਨੌਰਾ ਤੇ ਕਈ ਹੋਰ ਵਿਦਵਾਨਾਂ ਨੇ ਹਿੱਸਾ ਲਿਆ।ਕੁਲਵੰਤ ਢਿਲੋਂ ਨੇ ਕਿਹਾ ਕਿ ‘ਰਿਸ਼ਤਿਆਂ ਦੇ ਮਾਰੂਥਲ’ ’ਚ ਰਿਸ਼ਤੇ ਕਿਵੇਂ ਮੀਰਾਜ਼ਾਂ ਦਾ ਭੁਲੇਖਾ ਖਾ ਕੇ ਸਿਸਕ ਸਿਸਕ ਕੇ ਟੁੱਟਦੇ ਹਨ ਇਸਨੂੰ ਇਸ ਤਰ੍ਹਾਂ ਸੰਤੋਖ ਹੀ ਬਿਆਨ ਕਰ ਸਕਦਾ ਸੀ। ਸਾਥੀ ਲੁਧਿਆਣਵੀ ਨੇ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਕਿਹਾ ਕਿ ਸੰਤੋਖ ਨੇ ਐਡਲਟਰੀ ਦੇ ਮਾਅਨੇ ਹੀ ਬਦਲ ਦਿੱਤੇ ਹਨ।ਬੇਲਾਗ ਮੁਹੱਬਤ ’ਚ ਰੂਹਾਂ ਦੇ ਨਾਲ ਨਾਲ ਜਿਸਮਾਂ ਦਾ ਇੱਕ ਹੋਣਾ ਵੀ ਇੱਕ ਕੁਦਰਤੀ ਵਰਤਾਰਾ ਹੀ ਹੈ ਤੇ ਇਸ ਨੂੰ ਐਡਲਟਰੀ ਨਹੀਂ ਕਿਹਾ ਜਾ ਸਕਦਾ।ਅੰਤ ’ਚ ਡਾ. ਭਾਰਦਵਾਜ ਜੀ ਨੇ ਸਾਰੇ ਉਠਾਏ ਗਏ ਸਵਾਲਾਂ ਦੇ ਜਵਾਬ ਦਿੱਤੇ।ਇਸ ਸੈਸ਼ਨ ਦੀ ਸਟੇਜ ਸਾਥੀ ਲੁਧਿਆਣਵੀ ਨੇ ਬੜੇ ਹੀ ਭਾਵਪੂਰਤ ਸਲੀਕੇ ਨਾਲ ਨਿਭਾਈ।

ਕਵੀ ਦਰਬਾਰ ਸ਼ੁਰੂ ਕਰਨ ਤੋਂ ਪਹਿਲਾਂ ਕਾਲਵਿੰਦਰਜੀਤ ਧਾਲੀਵਾਲ ਟਰਸਟ ਜਿਸ ਬਾਰੇ ਜਾਣਕਾਰੀ ਸੰਤੋਖ ਧਾਲੀਵਾਲ ਨੇ ਦਿੰਦਿਆਂ ਕਾਲਵਿੰਦਰਜੀਤ ਦੀ ਬੇਮੌਕਾ ਮੌਤ ਤੇ ਥੋਹੜੇ ਸਮੇ ’ਚ ਕਾਲਵਿੰਦਰਜੀਤ ਦੀਆਂ ਪਰਾਪਤੀਆਂ ਤੇ ਚਾਨਣਾ ਪਾਇਆ ਤੇ ਟਰਸਟ ਵਲੋਂ ਕਾਲਵਿੰਦਰਜੀਤ ਦੇ ਭਰਾ ਪਰਮਜੀਤ ਤੇ ਉਨ੍ਹਾਂ ਦੀ ਪਤਨੀ ਹੈਲਨ, ਉਸਦੇ ਪਿਤਾ ਕਸ਼ਮੀਰਾ ਸਿੰਘ ਤੇ ਮਾਤਾ ਮਨਜੀਤ ਕੌਰ ਨੇ ਇਸ ਸਾਲ ਦਾ ਇਨਾਮ ਨੌਟਿਘੰਮ ਦੇ ਅੰਗ੍ਰੇਜ਼ੀ ’ਚ ਲਿਖਣ ਵਾਲੇ ਇੱਕ ਬਹੁ-ਪਰਤੀ ਸ਼ਖਸੀਅਤ, ਮਸ਼ਹੂਰ ਸ਼ਾਇਰ, ਸੈਲੀਬਰੇਟਡ ਫੋਟੋਗ੍ਰਾਫਰ ਤੇ ਸੰਗੀਤਕਾਰ ਹਰਮਿੰਦਰ ਨਾਗੀ ਨੂੰ ਇਕ ਸ਼ਾਲ, ਖੂਬਸੂਰਤ ਮੋਮੈਨਟੋ ਤੇ £250 ਪੌਂਡ ਦੀ ਰਾਸ਼ੀ ਨਾਲ ਨਿਵਾਜਿਆ । ਹਰਮਿੰਦਰ ਨਾਗੀ ਨੇ ਬੋਲਦਿਆਂ ਟਰਸਟ ਦਾ ਦਿਲੋਂ ਧੰਨਵਾਦ ਕੀਤਾ ਤੇ ਆਪਣੀ ਫੋਟੋਗ੍ਰਾਫੀ ਦੀ ਨਮਾਇਸ਼ ਬਾਰੇ ਦਸੱਣ ਮਗਰੋਂ ਆਪਣੀਆਂ ਨਵੀਆਂ ਲਿਖੀਆਂ ਨਜ਼ਮਾ ਸਣਾਈਆਂ।

ਪੰਜਾਬੀ ਦੇ ਮਸ਼ਹੂਰ ਸ਼ਾਇਰ ਤੇ ਚਿੰਤਕ ਰਵਿੰਦਰ ਭੱਠਲ ਦੀ ਨਵੀਂ ਕਵਿਤਾ ਦੀ ਕਿਤਾਬ ‘ਚਿਤਵਣੀ’ ਉਨ੍ਹਾਂ ਦੀ ਭੈਣ ਇੰਗਲੈਂਡ ’ਚ ਵਸਦੀ ਸਤਿਕਾਰਿਤ ਸ਼ਾਇਰਾ ਕੁਲਵੰਤ ਢਿਲੋਂ, ਸੰਤੋਖ ਧਾਲੀਵਾਲ, ਸਾਥੀ ਲੁਧਿਆਣਵੀ ਤੇ ਹੋਰ ਵਿਦਵਾਨਾਂ ਰਲ ਕੇ ਰੀਲੀਜ਼ ਕੀਤੀ। ਸਾਥੀ ਲੁਧਿਆਣਵੀ ਨੇ ‘ਚਿਤਵਣੀ’ ਨਾਲ ਪ੍ਰੀਚੈ ਕਰਵਾਉਂਦਿਆਂ ਭੱਠਲ ਹੋਰਾਂ ਦੀਆਂ ਨਜ਼ਮਾਂ ਵੀ ਸੁਣਾਈਆਂ।ਸੰਤੋਖ ਹੇਅਰ ਦੀ ਪੰਜਾਬੀ ਗੀਤਾਂ ਤੇ ਗਜ਼ਲਾਂ ਦੀ ਸੀ.ਡੀ. ਰੀਲੀਜ਼ ਕੀਤੀ ਗਈ।