ਜੈਤੋ, 16 ਮਾਰਚ - ‘ਨੌਜਵਾਨ ਵਿਦਿਆਰਥੀਆਂ ਨੂੰ ਪੰਜਾਬ ਦੇ ਅਮੀਰ ਵਿਰਸੇ ਤੋਂ ਪਰੇਰਨਾ ਲੈ ਕੇ ਆਪਣੀ ਸ਼ਖ਼ਸੀਅਤ ਉਸਾਰੀ ਕਰਨੀ ਚਾਹੀਦੀ ਹੈ ਕਿਉਂਕਿ ਉਸਾਰੂ ਪਰੰਪਰਾ ਅਤੇ ਆਧੁਨਿਕਤਾ ਦੇ ਉਚਿਤ ਸੁਮੇਲ ਵਿਚੋਂ ਹੀ ਜੀਵਨ ਵਿਚ ਉਚ ਮੁਕਾਮ ਹਾਸਲ ਕਰਨ ਦਾ ਹੁਨਰ ਹਾਸਲ ਕੀਤਾ ਜਾ ਸਕਦਾ ਹੈ।’ ਇਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਯੂਨੀਵਰਸਿਟੀ ਕਾਲਜ ਜੈਤੋ ਵਿਖੇ ਕਰਾਏ ‘ਅਲਵਿਦਾ ਬੀ. ਏ. ਫ਼ਾਈਨਲ 2014’ ਸਮਾਗਮ ਦੇ ਮੁੱਖ ਮਹਿਮਾਨ ਪ੍ਰਿੰਸੀਪਲ ਡਾ. ਇੰਦਰਜੀਤ ਕੌਰ ਦਿਓਲ ਨੇ ਸ਼ੁਭ ਕਾਮਨਾਵਾਂ ਵਿਅਕਤ ਕਰਦਿਆਂ ਕੀਤਾ।

ਜੀ ਆਇਆਂ ਕਹਿਣ ਦੀ ਰਸਮ ਬੀ. ਏ. ਭਾਗ ਦੂਜਾ ਦੇ ਅਰਸ਼ਨੂਰ ਮੁਹੰਮਦ ਨੇ ਨਿਭਾਈ। ਵਿਦਿਆਰਥੀਆਂ ਦੁਆਰਾ ਵਿਭਿੰਨ ਸਭਿਆਚਾਰਕ ਪੇਸ਼ਕਾਰੀਆਂ ਵਿਚ ਪੇਪਰ ਡਾਂਸ ਅਤੇ ਲੜਕਿਆਂ ਵੱਲੋਂ ਔਰਤਾਂ ਵਾਂਗ ਗਿੱਧਾ ਪਾਉਣ ਦੇ ਮੁਕਾਬਲੇ, ਨਵਨੀਤ ਕੌਰ, ਸਿਮਰਜੀਤ ਕੌਰ ਅਤੇ ਵੀਰਪਾਲ ਕੌਰ ਦੀਆਂ ਨਾਚ ਵੰਨਗੀਆਂ ਤੋਂ ਇਲਾਵਾ ਲਵਜੀਤ ਸਿੰਘ ਦਾ ਰੌਚਿਕ ਮੰਚ ਸੰਚਾਲਨ ਅਤੇ ‘ਰੈਪ’ ਕਲਾ ਨੂੰ ਬਹੁਤ ਪਸੰਦ ਕੀਤਾ ਗਿਆ। ਬੀ. ਏ ਭਾਗ ਤੀਜਾ ਦੇ ਖਾਗੇਸ਼ ਗੁਪਤਾ ਅਤੇ ਹਰਮਨਦੀਪ ਸਿੰਘ ਨੇ ਸ਼ਾਨਦਾਰ ਵਿਦਾਇਗੀ ਸਮਾਗਮ ਲਈ ਮੇਜ਼ਬਾਨ ਵਿਦਿਆਰਥੀਆਂ ਦਾ ਧੰਨਵਾਦ ਕੀਤਾ। ਵਿਦਾ ਹੋ ਰਹੇ ਵਿਦਿਆਰਥੀਆਂ ਨੇ ਪ੍ਰਿੰਸੀਪਲ ਡਾ. ਦਿਓਲ ਨੂੰ ਕਾਲਜ ਲਈ ਵਰਤੋਂ ਯੋਗ ਤੋਹਫ਼ਾ ਭੇਟ ਕੀਤਾ। ਸਮਾਗਮ ਨੂੰ ਡਾ. ਰੂਪਕਮਲ ਕੌਰ, ਪ੍ਰੋ. ਮਨਪ੍ਰੀਤ ਕੌਰ ਵੱਲੋਂ ਡਾ. ਸੁਭਾਸ਼ ਕੁਮਾਰ ਅਤੇ ਡਾ. ਸੁਭਾਸ਼ ਚੰਦਰ ਅਰੋੜਾ ਦੇ ਸਹਿਯੋਗ ਨਾਲ ਨਿਰਦੇਸ਼ਤ ਕੀਤਾ ਗਿਆ ਅਤੇ ਸਮੁੱਚੀ ਦੇਖ-ਰੇਖ ਡਾ. ਪਰਮਿੰਦਰ ਸਿੰਘ ਤੱਗੜ ਵੱਲੋਂ ਕੀਤੀ ਗਈ। ਕਾਲਜ ਦਾ ਸਮੂਹ ਸਟਾਫ਼ ‘ਅਲਵਿਦਾ’ ਸਮਾਗਮ ਵਿਚ ਸ਼ਾਮਲ ਸੀ।