ਵਿਦੇਸ਼ ਜਾ ਕੇ ਵਸਣ ਦੀ ਤਾਂਘ ਰੱਖਣ ਵਾਲੇ ਨੌਜਵਾਨਾਂ ਨੂੰ ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਉਥੋਂ ਦੀ ਜ਼ਿੰਦਗੀ ਏਨੀ ਸੁਖਾਲ਼ੀ ਨਹੀਂ ਹੈ ਜਿੰਨੀ ਉਹ ਸਮਝ ਰਹੇ ਹਨ। ਖ਼ਾਸ ਕਰਕੇ ਕੁੜੀਆਂ ਨੂੰ ਕੇਵਲ ਵਿਦੇਸ਼ੀ ਚਕਾਚੌਂਧ ਦਾ ਸ਼ਿਕਾਰ ਹੋ ਕੇ ਆਪਣਾ ਭਵਿੱਖ ਦਾਅ ’ਤੇ ਲਾਉਣ ਤੋਂ ਬਚਣਾ ਚਾਹੀਦਾ ਹੈ।

ਇਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸਮਾਜ ਸੇਵਿਕਾ ਅਤੇ ਪ੍ਰਵਾਸੀ ਕਹਾਣੀਕਾਰਾ ਗੁਰਮੀਤ ਪਨਾਗ ਨੇ ਯੂਨੀਵਰਸਿਟੀ ਕਾਲਜ ਜੈਤੋ ਦੇ ਵਿਦਿਆਰਥੀਆਂ ਦੇ ਰੂ-ਬ-ਰੂ ਹੁੰਦੇ ਹੋਏ ਵਿਦੇਸ਼ੀ ਜੀਵਨ ਦੇ ਤਜਰਬੇ ਸਾਂਝੇ ਕਰਦਿਆਂ ਕੀਤਾ। ਉਨਾਂ ਕਿਹਾ ਕਿ ਪੰਜਾਬੀ ਮਾਪੇ ਅਕਸਰ ਧੀ ਦੀਆਂ ਸਧਰਾਂ ਨੂੰ ਦਾਅ ’ਤੇ ਲਾ ਕੇ ਇਧਰਲੇ ਪਰਵਾਰ ਦੇ ਮੈਂਬਰਾਂ ਨੂੰ ਵਿਦੇਸ਼ ਸੈੱਟ ਕਰਨ ਦੇ ਚੱਕਰ ਵਿਚ ਪੈ ਜਾਂਦੇ ਹਨ । ਇੰਜ ਉਹ ਧੀ ਦੇ ਮਾੜੇ ਭਵਿੱਖ ਅਤੇ ਪਰਵਾਰਕ ਦੁੱਖ ਦੇ ਜ਼ਿੰਮੇਵਾਰ ਬਣਦੇ ਹਨ। ਰੂ-ਬ-ਰੂ ਉਪਰੰਤ ਉਨਾਂ ਲੜਕੀਆਂ ਨਾਲ ਗ਼ੈਰਰਸਮੀ ਤੌਰ ’ਤੇ ਗੱਲਬਾਤ ਕਰਦਿਆਂ ਨਸੀਹਤ ਕੀਤੀ ਕਿ ਉਹ ਆਪਣੀ ਪੜਾਈ ’ਤੇ ਧਿਆਨ ਕੇਂਦਰਤ ਕਰਕੇ ਵਿਸ਼ੇਸ਼ਤਾ ਹਾਸਲ ਕਰਨ ਅਤੇ ਆਪਣੇ ਕੈਰੀਅਰ ਨੂੰ ਧਿਆਨ ਵਿਚ ਰੱਖਣ ਲਈ ਮਾਪਿਆਂ ਨੂੰ ਪਰੇਰਤ ਕਰਨ। ਵਿਦਿਆਰਥਣਾਂ ਨੇ ਆਪਣੇ ਮਨ ਦੀਆਂ ਗੱਲਾਂ ਗੁਰਮੀਤ ਪਨਾਗ ਨਾਲ ਸਾਂਝੀਆਂ ਕੀਤੀਆਂ ਅਤੇ ਸ਼ੰਕੇ ਦੂਰ ਕੀਤੇ।

ਕਾਲਜ ਦੇ ਪ੍ਰਿੰਸੀਪਲ ਡਾ. ਇੰਦਰਜੀਤ ਕੌਰ ਦਿਓਲ ਨੇ ਉਨਾਂ ਨੂੰ ਫ਼ੁਲਕਾਰੀ ਅਤੇ ਸਨਮਾਨ ਨਿਸ਼ਾਨੀ ਭੇਟ ਕੀਤੀ। ਕਹਾਣੀਕਾਰਾ ਗੁਰਮੀਤ ਪਨਾਗ ਵੱਲੋਂ 20000 ਰੁਪਏ ਦੀ ਕੀਮਤ ਦਾ ਵਰਤੋਂ ਯੋਗ ਤੋਹਫ਼ਾ ਕਾਲਜ ਨੂੰ ਭੇਟ ਕੀਤਾ ਗਿਆ। ਇਸ ਮੌਕੇ ਪੰਜਾਬੀ ਯੂਨੀਵਰਸਿਟੀ ਤੋਂ ਡਾ. ਗੁਰਮੇਲ ਸਿੰਘ ਤੇ ਡਾ. ਬਲਵਿੰਦਰਜੀਤ ਕੌਰ, ਡਾ. ਇਕਬਾਲ ਸਿੰਘ ਬਰਾੜ, ਪ੍ਰੋ. ਸੁਖਚੈਨ ਸਿੰਘ ਦਿਓਲ, ਮਨਜੀਤ ਕੌਰ ਬਰਾੜ, ਹਰਪਾਲ ਕੌਰ, ਡਾ. ਪਰਮਿੰਦਰ ਸਿੰਘ ਤੱਗੜ, ਪ੍ਰੋ. ਮਨਪ੍ਰੀਤ ਕੌਰ, ਡਾ. ਸੁਭਾਸ਼ ਚੰਦਰ ਅਰੋੜਾ ਇੰਜ: ਅਰਸ਼ਦੀਪ ਬਰਾੜ ਵਿਸ਼ੇਸ਼ ਤੌਰ ’ਤੇ ਸ਼ਾਮਲ ਸਨ।