ਸਰੀ: ਪੰਜਾਬੀ ਪੁਸਤਕ ਮੇਲਾ ਸਰੀ ਵਿਚ ਸ਼ੁਰੂ ਹੋ ਗਿਆ ਹੈ। ਲੋਅਰ ਮੇਨਲੈਂਡ ਦੇ ਉਘੇ ਪੰਜਾਬੀ ਲੇਖਕਾਂ, ਪਤਰਕਾਰਾਂ ਤੇ ਬੁਧੀਜੀਵੀਆਂ ਦੀ ਹਾਜ਼ਰੀ ਵਿਚ ਇਸ ਮੇਲੇ ਦਾ ਫੀਤਾ ਕਟ ਕੇ ਰਸਮੀ ਉਦਘਾਟਨ ਕੈਨੇਡਾ ਡੇ 1 ਜੁਲਾਈ ਨੂੰ ਕੀਤਾ ਗਿਆ । ਇਹ ਮੇਲਾ ਬੀ ਸੀ ਪੰਜਾਬੀ ਕਲਚਰਲ ਫਾਂਊਡੇਸ਼ਨ ਅਤੇ ਚੇਤਨਾ ਪ੍ਰਕਾਸਨ ਲੁਧਿਆਣਾ ਦੇ ਸਾਂਝੇ ਉਦਮ ਸਦਕਾ ਆਯੋਜਿਤ ਕੀਤਾ ਗਿਆ ਹੈ।

ਉਦਘਾਟਨ ਸਮੇਂ ਆਰਟਿਸਟ ਜਰਨੈਲ ਸਿੰਘ, ਪੰਜਾਬੀ ਟ੍ਰਿਬਿਊਨ ਚੰਡੀਗੜ ਦੇ ਬਲਵਿੰਦਰ ਜੰਮੂ, ਨਦੀਮ ਪਰਮਾਰ , ਜਰਨੈਲ ਸਿੰਘ ਸੇਖਾ, ਜਸਕਰਨ, ਨਵਰੀਤ ਸੇਖਾ, ਨਛੱਤਰ ਸਿੰਘ ਬਰਾੜ ,ਮੋਹਨ ਗਿਲ, ਬਖਸ਼ਿੰਦਰ,ਅੰਗਰੇਜ਼ ਬਰਾੜ, ਮਾਸਟਰ ਬਚਿਤਰ ਸਿੰਘ ਰੋਡੇ, ਪਰਮਜੀਤ ਸੇਖੋਂ,ਜਗਦੇਵ ਤੇ ਬਰਜਿਮਦਰ ਢਿਲੋਂ, ਡਾ: ਰਘਬੀਰ ਸਿੰਘ ਸਿਰਜਣਾ, ਕਾਮਾਗਾਟਾਮਾਰੂ ਫਾਊਂਡੇਸ਼ਨ ਦੇ ਹਰਭਜਨ ਗਿਲ ਤੇ ਹੋਰ ਬੁਧੀਜੀਵੀ ਤੇ ਪੁਸਤਕ ਪ੍ਰੇਮੀ ਹਾਜ਼ਰ ਸਨ।

ਚੇਤਨਾ ਪ੍ਰਕਾਸ਼ਨ ਦੇ ਸਤੀਸ਼ ਗੁਲਾਟੀ ਹੋਰਾਂ ਨੇ ਦਸਿਆ ਕਿ ਪੰਜਾਬ ਦੇ ਮੁਕਾਬਲੇ ਇਥੋਂ ਦੇ ਪਾਠਕ ਗਲਪ ਜ਼ਿਆਦਾ ਪਸੰਦ ਕਰਦੇ ਹਨ ।ਉਹਨਾਂ ਨੇ ਦਸਿਆ ਕਿ ਉਹ ਤਕਰੀਬਨ ਹਰ ਸਾਲ ਕੈਨੇਡਾ ਤੇ ਅਮਰੀਕਾ ਵਿਚ ਪੁਸਤਕ ਮੇਲੇ ਆਯੋਜਿਤ ਕਰਦੇ ਹਨ। ਲੋਅਰ ਮੇਨਲੈਂਡ ਵਿਚ ਸਭ ਤੋਂ ਵਧ ਹੁੰਗਾਰਾ ਮਿਲਦਾ ਹੈ।ਰੋਜ਼ਾਨਾ 10 ਤੋਂ ਸ਼ਾਮ 7 ਵਜੇ ਤਕ ਚਲਣ ਵਾਲੇ ਇਸ ਮੇਲੇ ਵਿਚ ਕਵਿਤਾ, ਕਹਾਣੀ, ਨਾਵਲ, ਆਮ ਵਾਕਫੀ , ਆਲੋਚਨਾ, ਗਲ ਕੀ ਹਰ ਵਿਸ਼ੇ ਤੇ ਪੰਜਾਬੀ ਵਿਚ ਪੁਸਤਕਾਂ ਉਪਲਬਧ ਹਨ।ਪੁਸਤਕ ਮੇਲਾ 104, 8140, ਸਕਾਟ ਰੋਡ ਵਿਖੇ ਇੰਡੀਆ ਵੀਜ਼ਾ ਦਫਤਰ ਵਾਲੀ ਜਗਾਹ ਤੇ ਲਗਿਆ ਹੋਇਆ ਹੈ।

ਹੋਰ ਵਧੇਰੇ ਜਾਣਕਾਰੀ ਲਈ ਸਤੀਸ਼ ਗੁਲਾਟੀ ਨਾਲ 604 315 2775 ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।