ਫ਼ਿੰਨਲੈਂਡ 18 ਅਗਸਤ ਫ਼ਿੰਨਲੈਂਡ ਦੇ ਸ਼ਹਿਰ ਕੇਰਾਵਾ `ਚ ਬੀਤੇ ਐਤਵਾਰ ਇੰਡੀਅਨ ਓਵਰਸੀਜ਼ ਕਾਂਗਰਸ ਫ਼ਿਨਲੈੰਡ ਨੇ ਭਾਰਤ ਦੀ ਆਜ਼ਾਦੀ ਦੀ 68ਵੀਂ ਵਰੇਗੰਡ ਬੜੀ ਧੂਮਧਾਮ ਨਾਲ ਮਨਾਈ । ਜਿਸ ਵਿੱਚ ਭਾਰਤੀਆਂ ਨੇ ਵੱਡੀ ਗਿਣਤੀ ਵਿੱਚ ਸ਼ਮੂਲੀਅਤ ਕੀਤੀ। ਇਸ ਮੌਕੇ ਤਿਰੰਗਾ ਲਹਿਰਾਉਣ ਦੀ ਰਸਮ ਭਾਰਤੀ ਰਾਜਦੂਤ ਸ਼੍ਰੀ ਏ. ਮਾਨਿਕਕਾਮ ਨੇ ਅਦਾ ਕੀਤੀ ਤੇ ਫ਼ਿੰਨਲੈਂਡ ਵਿੱਚ ਵਸਦੇ ਸਾਰੇ ਭਾਰਤੀਆਂ ਨੂੰ ਵਧਾਈ ਦਿੱਤੀ। ਆਪਣੇ ਭਾਸ਼ਣ ਦੌਰਾਨ ਸ਼੍ਰੀ ਮਾਨਿਕਕਾਮ ਨੇ ਇੰਡੀਅਨ ਓਵਰਸੀਜ਼ ਕਾਂਗਰਸ ਫ਼ਿੰਨਲੈਂਡ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕੇ ਉਹ ਵਧਾਈ ਦੇ ਪਾਤਰ ਹਨ ਜੋ ਹਰ ਸਾਲ ਫ਼ਿਨਲੈੰਡ ਵਿੱਚ ਭਾਰਤੀ ਸੁਤੰਤਰਤਾ ਦਿਵਸ ਮਨਾਉਂਦੇ ਹਨ।

ਇਸ ਮੌਕੇ ਤੇ ਇੰਡੀਅਨ ਓਵਰਸੀਜ਼ ਕਾਂਗਰਸ ਫ਼ਿੰਨਲੈਂਡ ਦੇ ਪ੍ਰਧਾਨ ਸ੍ਰ. ਦਵਿੰਦਰ ਸਿੰਘ ਸੈਣੀ ਨੇ ਆਪਣੇ ਭਾਸ਼ਣ ਦੌਰਾਨ ਸਾਰੇ ਭਾਰਤ ਵਾਸੀਆਂ ਨੂੰ ਆਜ਼ਾਦੀ ਦਿਵਸ ਦੀਆਂ ਵਧਾਈਆਂ ਦਿੰਦਿਆਂ ਹੋਇਆਂ ਕਿਹਾ ਕਿ ਜਿਥੇ ਭਾਰਤ ਦੇਸ `ਚ ਅੱਜ ਭਾਰਤ ਵਾਸੀ ਅਜਾਦੀ ਦੇ 68ਵੇਂ ਦਿਹਾੜੇ ਤੇ ਜਸ਼ਨ ਮਨਾ ਰਹੇ ਹਨ ਉਥੇ ਇਸ ਪਵਿੱਤਰ ਮੌਕੇ ਤੇ ਨੌਜਵਾਨ ਪੀੜੀ ਨੂੰ ਪ੍ਰਣ ਕਰਨਾ ਚਾਹੀਦਾ ਹੈ ਕਿ ਜੋ ਸਮਾਜ ਚ ਸਮਾਜਿਕ ਕੁਰਿਤੀਆਂ ਜਿਵੇ ਨਸ਼ਾਖੋਰੀ, ਭਿਸ਼ਟਾਚਾਰ, ਅਨਪੜਤਾ, ਗਰੀਬੀ,ਦਾਜ ਪ੍ਰਥਾ ਅਤੇ ਭਰੂਣ ਹੱਤਿਆ ਵਰਗੀਆਂ ਬੁਰਾਈਆਂ ਜੋ ਸਮਾਜ ਦੇ ਮੱਥੇ ਤੇ ਕਲੰਕ ਹਨ, ਦੇ ਖਿਲਾਫ ਅਵਾਜ ਬੁਲੰਦ ਕਰਕੇ ਲੋਕਾਂ ਵਿੱਚ ਜਾਗਰੂਕਤਾ ਪੈਦਾ ਕੀਤੀ ਜਾਵੇ ਤਾਂ ਜੋ ਸਿਹਤਮੰਦ ਅਤੇ ਨਰੋਏ ਸਮਾਜ ਦੀ ਸਿਰਜਨਾਂ ਹੋ ਸਕੇ। ਇਸ ਤੋਂ ਬਾਅਦ ਕੇ. ਕੇ. ਇੰਟਰਟੇਨਮਿੰਟ ਅਤੇ ਬੌਲੀਬੀਟ ਡਾਂਸ ਗਰੁੱਪ ਵਲੋਂ ਸ਼ਾਨਦਾਰ ਭਾਰਤੀ ਡਾਂਸ ਦਾ ਮੁਜ਼ਾਹਿਰਾ ਕੀਤਾ ਗਿਆ।

ਪ੍ਰੋਗਰਾਮ ਦੌਰਾਨ ਬੱਚਿਆਂ ਵਲੋਂ ਦੇਸ਼ ਭਗਤੀ ਨੂੰ ਸਮਰਪਿਤ ਇੱਕ ਡਰੈਸ ਸ਼ੋ ਕੀਤਾ ਗਿਆ ਜੋ ਕਿ ਬਾ-ਕਮਾਲ ਸੀ। ਅਖੀਰ ´ਚ ਹਰਦੀਪ ਸਿੰਘ ਸੈਣੀ ਨੇ ਪੰਜਾਬੀ ਗੀਤ ਤੇ ਭੰਗੜਾ ਪੇਸ਼ ਕਰਕੇ ਸਾਰੇ ਆਏ ਹੋਏ ਸਾਰੇ ਮਹਿਮਾਨਾਂ ਦਾ ਮਨ ਮੋਹ ਲਿਆ। ਭਾਰਤ ਦੇ ਇਸ ਆਜ਼ਾਦੀ ਦਿਵਸ ਦੇ ਪ੍ਰੋਗਰਾਮ ਵਿੱਚ ਫ਼ਿੰਨਲੈਂਡ ਭਾਰਤੀ ਸੋਸਾਇਟੀ ਦੇ ਨੁਮਾਇੰਦਿਆਂ ਨੇ ਵਿਸ਼ੇਸ਼ ਤੌਰ ਤੇ ਸ਼ਿਰਕਿਤ ਕੀਤੀ। ਇਸ ਮੌਕੇ ਭਾਰਤੀ ਭਾਈਚਾਰੇ ਦੀਆਂ ਕਈ ਨਾਮਵਰ ਸਖਸ਼ੀਅਤਾਂ ਵੀ ਮੌਜੂਦ ਸਨ ਜਿਨਾਂ ਵਿੱਚ ਵਾਨਤਾ ਸ਼ਹਿਰ ਦੇ ਕਾਂਸਲਰ ਸ਼੍ਰੀ ਰਣਬੀਰ ਸਿੰਘ ਸੋਢੀ, ਸ਼੍ਰੀ ਨਰੇਸ਼ਪਾਲ ਬੁੱਗੀਪੁਰਾ, ਸ੍ਰ. ਪ੍ਰੀਤਮ ਸਿੰਘ ਸੈਣੀ,ਸ੍ਰ. ਮਾਨ ਸਿੰਘ, ਮੁਨੀਸ਼ ਸ਼ਰਮਾ ਬੌਬੀ, ਸ੍ਰ. ਗੁਰਦੀਪ ਸਿੰਘ ਮਾਨ, ਦੀਪਕ ਚੌਹਾਨ, ਮਨੋਜ਼ ਸ਼ਰਮਾ, ਸੁਖਦੇਵ ਸਿੰਘ ਸੋਢੀ, ਰਾਜ ਕੁਮਾਰ ਸੂਦ, ਅਮਰੀਕ ਸੈਣੀ, ਚਰਨਜੀਤ ਸਿੰਘ ਬੁੱਗੀਪੁਰਾ, ਭੁਪਿੰਦਰ ਸਿੰਘ ਬਰਾੜ, ਰਣਜੀਤ ਸਿੰਘ ਗਿੱਲ,ਹਰਵਿੰਦਰ ਸਿੰਘ ਖਹਿਰਾ, ਰਾਮ ਬਡਵਾਲ, ਖਰੈਤੀ ਲਾਲ, ਮਾਨਵ ਫੁੱਲ, ਸੰਜੀਵ ਪਾਬਲਾ,ਸੋਨਾ ਧਵਨ, ਰਿੰਕਾਂ ਧਵਨ, ਡਾਲਰ ਸਿੰਘ, ਸੋਨੂੰ ਬਨਵੈਤ ਅਤੇ ਵਿੱਕੀ ਮੋਗਾ ਨੇ ਸਮੂਹ ਭਾਰਤੀਆਂ ਨੂੰ ਆਜ਼ਾਦੀ ਦਿਵਸ ਦੀਆਂ ਮੁਬਾਰਕਾਂ ਦਿੱਤੀਆਂ।

ਅਖੀਰ ਵਿੱਚ ਪ੍ਰਧਾਨ ਸ੍ਰ. ਦਵਿੰਦਰ ਸਿੰਘ ਸੈਣੀ ਨੇ ਸਾਰੇ ਭਾਰਤ ਵਾਸੀਆਂ ਨੂੰ ਵਧਾਈ ਦਿੰਦੇ ਹੋਏ ਆਏ ਹੋਏ ਸਾਰੇ ਮਹਿਮਾਨਾਂ ਦਾ ਧੰਨਵਾਦ ਕੀਤਾ।