ਗੁਰਦੁਆਰਾ ਬਰੈਂਟ ਸਟਰੀਟ ਕਿੰਗਜ਼ਬਰੀ ਵਿਖੇ ਬੀਬੀ ਸੁਰਿੰਦਰ ਕੌਰ ਤੇ ਕਮੇਟੀ ਮੈਂਬਰਾਨ ਦੇ ਸਹਿਯੋਗ ਨਾਲ ਕੁੜੀਆਂ ਦੀ ਲੋਹੜੀ ਦਾ ਸਮਾਗਮ ਆਯੋਜਿਤ ਕੀਤਾ ਗਿਆ। ਇਸ ਸਮੇਂ ਕੀਤੇ ਗਏ ਰੰਗਾਰੰਗ ਸਮਾਰੋਹ ਦੌਰਾਨ ਗਾਇਕ ਰਾਜ ਸੇਖੋਂ ਅਤੇ ਟੀ.ਵੀ. ਪੇਸ਼ਕਾਰਾ ਰੂਪ ਦਵਿੰਦਰ ਨੇ ਸਾਂਝੇ ਤੌਰ 'ਤੇ ਗੀਤਾਂ ਬੋਲੀਆਂ ਰਾਹੀਂ ਹਾਜਰੀਨ ਤੋਂ ਵਾਹ ਵਾਹ ਖੱਟੀ। ਮਨਦੀਪ ਕੌਰ ਸਿੱਧੂ ਅਤੇ ਸੋਨਲ ਕੌਰ ਵੱਲੋਂ ਗਿੱਧੇ ਦੀ ਪੇਸ਼ਕਾਰੀ ਬਾਖੂਬੀ ਕੀਤੀ ਗਈ।

ਇਸ ਸਮੇਂ ਵਿਸ਼ੇਸ਼ ਸੰਬੋਧਨ ਦੌਰਾਨ ਬੀਬੀ ਸੁਰਿੰਦਰ ਕੌਰ ਨੇ ਕਿਹਾ ਕਿ ਬਰਤਾਨੀਆ ਵਰਗੇ ਅਤਿਵਿਕਸਤ ਮੁਲਕ ਦੇ ਬਾਸਿ਼ੰਦੇ ਬਣਕੇ ਸਾਡਾ ਸਭ ਦਾ ਫਰਜ਼ ਬਣਦਾ ਹੈ ਕਿ ਮੁੰਡੇ ਅਤੇ ਕੁੜੀ ਬਾਰੇ ਲੋਕ ਮਨਾਂ ਵਿੱਚ ਪਲ ਰਹੇ ਪਾੜੇ ਨੂੰ ਦੂਰ ਕਰਨ ਲਈ ਅਜਿਹੇ ਸਮਾਗਮਾਂ ਦਾ ਆਯੋਜਨ ਅਤੀ ਜਰੂਰੀ ਹੈ। ਉਹਨਾਂ 'ਪੁੱਤ ਦੀ ਨਾ, ਧੀ ਦੀ...ਲੋਹੜੀ ਮਨਾਈਏ ਜੀਅ ਦੀ" ਦੇ ਹੋਕੇ ਦੀ ਆਵਾਜ਼ ਉੱਚੀ ਕਰਨ ਦਾ ਸੱਦਾ ਦਿੱਤਾ। ਹਾਜਰੀਨ ਵੱਲੋਂ ਗਾਇਕ ਰਾਜ ਸੇਖੋਂ ਦੁਆਰਾ ਪੇਸ਼ ਕੀਤੇ ਪਰਿਵਾਰਕ ਗੀਤਾਂ ਦੀ ਰੱਜਵੀਂ ਸਰਾਹਨਾ ਕੀਤੀ ਗਈ।