ਪੰਜਾਬ ਵਿਚ ਖੁੱਲੇ ਆਮ ਵਿਕ ਰਹੇ ਚਿੱਟਾ

ਕਿਸੇ ਸਮੇਂ ਮਾਲਵੇ ਨੂੰ ਨਸ਼ਈਆਂ ਦਾ ਖੇਤਰ ਕਿਹਾ ਜਾਂਦਾ ਰਿਹਾ ਹੈ ਪਰ ਹੁਣ ਮਾਝਾ, ਮਾਲਵਾ ਅਤੇ ਦੋਆਬਾ ਸਮੇਤ ਪੂਰਾ ਪੰਜਾਬ ਹੀ ਇਸ ਨਾਮਕਰਨ ਨਾਲ ਚਰਚਾ ਵਿਚ ਹੈ। ਜਿਥੇ ਪਹਿਲਾਂ ਤੰਬਾਕੂ, ਬੀੜੀ, ਸਿਗਰਟ, ਸ਼ਰਾਬ ਆਦਿ ਨਸ਼ਿਆਂ ਦੇ ਪੂਰਕ ਵਜੋਂ ਜਾਣੇ ਜਾਂਦੇ ਸਨ ਉਥੇ ਸਮੇਂ ਨੇ ਜਿਵੇਂ ਜਿਵੇਂ ਤਰੱਕੀ ਕੀਤੀ ਹੈ ਉਵੇਂ ਹੀ ਨਸ਼ਿਆਂ ਦਾ ਪਸਾਰਾ ਵੱਖੋ ਵੱਖਰੇ ਨਾਵਾਂ ਨਾਲ ਸੁਨਣ ਨੂੰ ਮਿਲ ਰਿਹਾ ਹੈ। ਹੁਣ ਗੱਲ ਟੀਕੇ, ਗੋਲ਼ੀਆਂ, ਕੈਪਸੂਲ, ਭੁੱਕੀ, ਅਫ਼ੀਮ ਜਾਂ ਬਾਕੀ ਰਵਾਇਤੀ ਨਸ਼ਿਆਂ ਤੱਕ ਸੀਮਤ ਨਹੀਂ ਰਹੀ। ਬਲਕਿ ਅੱਜ ਕੱਲ ਨਵਾਂ ਕੈਮੀਕਲ ਨਸ਼ਾ, ਜਿਸ ਨੂੰ ‘ਚਿੱਟਾ’ ਕਿਹਾ ਜਾਂਦਾ ਹੈ, ਉਸ ਤੱਕ ਆਣ ਪੁੱਜੀ ਹੈ। ਜਿਸ ਦੀ ਇਕ ਗ੍ਰਾਮ ਦੀ ਕੀਮਤ 4000 ਰੁਪਏ ਤੱਕ ਦੱਸੀ ਜਾ ਰਹੀ ਹੈ। ਸੁਨਣ ਵਿਚ ਆਇਆ ਹੈ ਕਿ ਭੂਰੇ ਰੰਗ ਦੀ ਭਾਅ ਮਾਰਦਾ ਇਹ ਨਸ਼ਾ ਖਾਣਾ ਲਪੇਟਣ ਵਾਲੀ ਸਿਲਵਰ ਫ਼ਾਇਲ ਦੇ ਉਤੇ ਰੱਖ ਕੇ ਅਤੇ ਥੱਲੋਂ ਅੱਗ ਦੀ ਲੋਅ ਨਾਲ ਗਰਮ ਕਰਕੇ ਉਤੋਂ ਨੋਟਾਂ ਦੀ ਬੱਤੀਆਂ ਬਣਾ ਕੇ ਸੂਟੇ ਲਾਏ ਜਾਂਦੇ ਹਨ।

ਇਹ ਵੀ ਗੱਲ ਚਰਚਾ ਵਿਚ ਹੈ ਕਿ ਸੋਚੀ ਸਮਝੀ ਚਾਲ ਵਜੋਂ ਪੰਜਾਬ ਵਿਚੋਂ ਸਸਤੀ ਦਰ ’ਤੇ ਮਿਲਣ ਵਾਲੇ ਭੁੱਕੀ ਵਰਗੇ ਨਸ਼ੇ ਗਾਇਬ ਕਰ ਦਿੱਤੇ ਗਏ ਹਨ ਅਤੇ ਪੰਜਾਬੀ ਨੌਜਵਾਨਾਂ ਨੂੰ ਚਿੱਟੇ ਦੀ ਚਾਟ ’ਤੇ ਲਾਇਆ ਜਾ ਰਿਹਾ ਹੈ ਤਾਂ ਕਿ ਮਰਦਾਨਗੀ ਦੇ ਨਾਲ ਨਾਲ ਜੇਬ ਦੀ ਜੜ ਵੀ ਪੱਟੀ ਜਾ ਸਕੇ। ਮਜ਼ਬੂਰਨ ਚਿੱਟੇ ਦੀ ਪ੍ਰਾਪਤੀ ਲਈ ਹਜ਼ਾਰਾਂ ਰੁਪਏ ਇਕ ਕਸ਼ ’ਤੇ ਖਰਚ ਕਰਕੇ ਆਰਥਿਕ ਪੱਖੋਂ ਵੀ ਖਾਤਾ ਖਾਲੀ ਕੀਤਾ ਜਾ ਰਿਹਾ ਹੈ। ਲੋਕ ਦੱਸਦੇ ਹਨ ਕਿ ਇਕ-ਇਕ ਗ੍ਰਾਮ ਦੇ ਪੈਕਟਾਂ ਵਿਚ ਬੰਦ ਇਹ ਚਿੱਟਾ ਮੋਟਰਸਾਈਕਲ ਸਵਾਰਾਂ ਵੱਲੋਂ ਲੋੜਵੰਦਾਂ ਤੱਕ ਪੁੱਜਦਾ ਕੀਤਾ ਜਾਂਦਾ ਹੈ ਅਤੇ ਉਹ ਇਕ ਗ੍ਰਾਮ ਦੇ 3000 ਤੋਂ 4000 ਰੁਪਏ ਵਸੂਲ ਕੇ ਰਫ਼ੂਚੱਕਰ ਹੋ ਜਾਂਦੇ ਹਨ। ਇਸ ਸੌੜੀ ਰਾਜਨੀਤਕ ਚਾਲ ਨੂੰ ਸਮਝ ਕੇ ਜੇਕਰ ਮੌਕੇ ਸਿਰ ਕਾਬੂ ਨਾ ਪਾਇਆ ਗਿਆ ਤਾਂ ਪੰਜਾਬ ਦੀਆਂ ਮੁਟਿਆਰਾਂ ਲਈ ਜੀਵਨ ਸਾਥੀ ਪੰਜਾਬ ਵਿਚੋਂ ਲੱਭਣੇ ਮੁਸ਼ਕਲ ਹੋ ਜਾਣਗੇ। ਪੰਜਾਬ ਦੀ ਨੌਜਵਾਨੀ ਨੂੰ ਆਰਥਿਕ ਅਤੇ ਸਰੀਰਕ ਤੌਰ ’ਤੇ ਨਪੁੰਸਕ ਬਨਾਉਣ ਦੇ ਰਾਹ ਤੁਰੀ ਇਸ ਖ਼ਤਰਨਾਕ ਰਾਜਨੀਤੀ ਦਾ ਮੂੰਹਤੋੜ ਜਵਾਬ ਦੇਣ ਲਈ ਲਾਮਬੰਦ ਹੋਣ ਦੀ ਲੋੜ ਹੈ, ਨਹੀਂ ਤਾਂ ਪੰਜਾਬੀ ਹੱਥ ਮਲ਼ਦੇ ਰਹਿ ਜਾਣਗੇ।