1 ਮਾਰਚ 2014, ਸ਼ਨਿਚਰਵਾਰ ਵਾਲੇ ਦਿਨ ਅੰਤਰਰਾਸ਼ਟਰੀ ਪੰਜਾਬੀ ਵਿਕਾਸ ਮੰਚ ਵਲੋਂ ਇਹ  ਸਮਾਗਮ, 2R ਕਮਿਊਨਿਟੀ ਰੀਸੋਰਸਜ਼ ਸੈਂਟਰ, ਵੁਲਵਰਹੈਂਪਟਨ ਵਿਖੇ ਅਯੋਜਤ ਕੀਤਾ ਗਿਆ । ਪਹਿਲੇ ਭਾਗ ਵਿੱਚ ਮੰਚ ਦੇ ਸੰਚਾਲਕਾਂ ਦੀ ਮੀਟਿੰਗ ਹੋਈ ਜਿਸ ਵਿੱਚ ਕੁੱਝ ਬਹੁਤ ਮਹੱਤਵਪੂਰਨ ਫੈਸਲੇ ਕੀਤੇ ਗਏ । ਸਰਬਸੰਮਤੀ ਨਾਲ ਪਾਸ ਹੋਇਆ ਕਿ ਪੰਜਾਬੀ ਭਾਸ਼ਾ ਤੇ ਭਾਸ਼ਾ ਦੇ ਤਕਨੀਕੀ ਵਿਕਾਸ ਲਈ ਯਤਨ ਕੀਤੇ ਜਾਣਗੇ ਅਤੇ ਇਸ ਮਨੋਰਥ ਨੂੰ ਪੂਰਨ ਲਈ ਯੂ:ਕੇ, ਪੰਜਾਬ ਅਤੇ ਅੰਤਰਰਾਸ਼ਟਰੀ ਪੰਜਾਬੀ ਸਾਹਿਤਕ ਅਦਾਰਿਆਂ ਨਾਲ ਤਾਲਮੇਲ ਕੀਤਾ ਜਾਵੇਗ । ਪੰਜਾਬ ਵਿੱਚ ਸਾਰੇ ਸਰਕਾਰੀ ਕੰਮ ਕਾਜ ਪੰਜਾਬੀ ਭਾਸ਼ਾ ਵਿੱਚ ਕਰਨ ਅਤੇ ਪੰਜਾਬੀ ਭਾਸ਼ਾ ਨੂੰ ਸਰਕਾਰੀ ਭਾਸ਼ਾ ਦਾ ਦਰਜਾ ਦੇਣ ਲਈ ਪੰਜਾਬ ਦੀ ਸਰਕਾਰ ਨਾਲ ਸਿੱਧਾ ਸੰਪਰਕ ਕੀਤਾ ਜਾਵੇਗਾ ।

ਦੂਜੇ ਭਾਗ ਵਿੱਚ ਅੰਤਰਰਾਸ਼ਟਰੀ ਪੰਜਾਬੀ ਵਿਕਾਸ ਮੰਚ ਦੇ ਮੋਢੀ ਸੰਸਥਾਪਕ ਡਾਕਟਰ ਬਲਦੇਵ ਸਿੰਘ ਕੰਦੋਲਾ ਨੇ ਮੰਚ ਦੇ ਉਦੇਸ਼ ਅਤੇ ਗਤੀ ਵਿਧੀਆਂ ਵਾਰੇ ਜਾਣਕਾਰੀ ਦਿੰਦਿਆਂ ਪੰਜਾਬੀ ਭਾਸ਼ਾ ਅਤੇ ਪੰਜਾਬੀ ਭਾਸ਼ਾ ਦੇ ਤਕਨੀਕੀ ਵਿਕਾਸ ਸਬੰਧੀ ਚਿੰਤਾ ਪ੍ਰਗਟ ਕਰਦਿਆਂ ਦੱਸਿਆ ਕਿ ਭਾਵੇਂ ਅਨੇਕਾਂ ਹੀ ਪੰਜਾਬੀ ਫੌਂਟਸ ਦੀ ਵਰਤੋਂ ਕੀਤੀ ਜਾਂਦੀ ਹੈ ਪਰ ਅਜਿਹਾ ਕੋਈ ਵੀ ਫੌਂਟ ਨਹੀਂ ਹੈ ਜਿਸ ਨੂੰ ਇੱਕ ਸਹੀ ਫੌਂਟ ਮੰਨ ਕੇ ਸਾਰਾ ਪੰਜਾਬੀ ਜਗਤ ਵਰਤ ਸਕੇ ਅਤੇ ਸਰਕਾਰੀ ਮਾਣਤਾ ਪ੍ਰਾਪਤ ਕਰ ਸਕੇ । ਡਾਕਟਰ ਕੰਦੋਲਾ ਹੋਰਾਂ ਨੇ ਇਸ ਗੱਲ ਤੇ ਵੀ ਜੋਰ ਦਿੱਤਾ ਕਿ ਬੀ ਬੀ ਸੀ ਅਤੇ ਸਾਰੇ ਲੋਕਲ ਰੇਡੀਉ ਸਟੇਸ਼ਨਾਂ ਉੱਤੇ ਜੋ ਪੰਜਾਬੀ ਬੋਲੀ ਜਾਂਦੀ ਹੈ ਉਸ ਦਾ ਮਿਆਰ ਬਹੁਤ ਹੀ ਘਟੀਆ ਹੈ ਜਿਸ ਸਬੰਧੀ ਯੂ: ਕੇ ਦੇ ਸਾਰੇ ਪੰਜਾਬੀ ਅਦਾਰਿਆਂ ਨੂੰ ਅਵਾਜ਼ ਉਠਾਣੀ ਚਾਹੀਦੀ ਹੈ । ਇਸ ਤੋਂ ਵਾਅਦ ਮਨਮੋਹਣ ਸਿੰਘ ਮਹੇੜੂ ਹੋਰਾਂ ਨੇ ਆਪਣੀ ਅੰਗ੍ਰੇਜ਼ੀ ਵਿੱਚ ਲਿਖੀ ਪੁਸਤਕ ਉੱਤੇ ਅਧਾਰਤ ਪੰਜਾਬੀ ਸੱਭਿਆਚਾਰ ਦੇ ਸਿਰਲੇਖ ਨਾਲ ਪਰਚਾ ਪਰਚਾ ਪੜ੍ਹਿਆ । ਇਸ ਪਰਚੇ ਸਬੰਧੀ ਐਸ ਬਲਵੰਤ, ਮੋਤਾ ਸਿੰਘ, ਦਵਿੰਦਰ ਨੌਰਾ, ਵਰਿੰਦਰ ਪਰਹਾਰ, ਭੂਪਿੰਦਰ ਸੱਗੂ, ਕਿਰਪਾਲ ਪੂਨੀ, ਅਤੇ ਡਿਪਟੀ ਲੌਰਡ ਲੈਫਟੀਨੈਂਟ ਸਤਿੰਦਰ ਕੌਰ ਟੌਂਕ ਓ ਬੀ ਈ ਹੋਰਾਂ ਨੇ ਆਪਣੇ ਵਿਚਾਰ ਪ੍ਰਗਟ ਕੀਤੇ ।