ਵੈਨਕੂਵ: ਉਘੇ ਨਾਟਕਕਾਰ ਤੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਯੂਵਕ ਸੇਵਾਵਾਂ ਦੇ ਡਾਇਰੈਕਰਟ ਡਾ: ਸਤੀਸ਼ ਵਰਮਾ ਬੀਤੇ ਦਿਨੀ ਕੈਨੇਡਾ ਫੇਰੀ ਦੌਰਾਨ ਵੈਨਕੂਵਰ ਦੇ ਪੰਜਾਬੀ ਮਾਂ ਬੋਲੀ ਦੇ ਲਿਖਾਰੀਆਂ ਤੇ ਪਿਆਰਿਆਂ ਦੇ ਸਨਮੁਖ ਹੋਏ। ਜਰਨੈਲ ਆਰਟ ਗੈਲਰੀ ਵਿਚ ਹੋਏ ਇਸ ਸਮਾਗਮ ਵਿਚ ਅਰੰਭ ਵਿਚ ਚਿਤਰਕਾਰ ਜਰਨੈਲ ਸਿੰਘ ਵਲੋਂ ਡਾ; ਸਤੀਸ਼ ਵਰਮਾ ਨੂੰ ਜੀ ਆਇਆਂ ਤੋਂ ਬਾਦ ਪ੍ਰੋ: ਗੁਰਵਿੰਦਰ ਸਿੰਘ ਧਾਲੀਵਾਲ ਨੇ ਡਾ: ਸਤੀਸ਼ ਵਰਮਾ ਤੇ ਉਹਨਾਂ ਦੇ ਬਹੁਮੁਖੀ ਰਚਨਾਤਮਕ ਕਾਰਜ ਬਾਰੇ ਸਰੋਤਿਆਂ ਨੂੰ ਜਾਣਕਾਰੀ ਦਿਤੀ । ਇਸ ਤੋਂ ਬਾਦ ਡਾ: ਸਤੀਸ਼ ਵਰਮਾ ਸਰੋਤਿਆਂ ਦੇ ਸਨਮੁਖ ਹੋਏ ਤੇ ਅਪਣੇ ਜੀਵਨ ਸਫਰ ਦੇ ਨਾਲ ਨਾਲ ਸਾਹਿਤ ਤੇ ਸਮਾਜ ਵਿਚ ਪੰਜਾਬ, ਪੰਜਾਬੀਅਤ ਤੇ ਸਾਹਿਤ ਬਾਰੇ ਅਪਣੇ ਵਿਚਾਰ ਸਾਂਝੇ ਕੀਤੇ। ਉਹਨਾਂ ਕਿਹਾ ਕਿ ਜਿਥੇ ਵੀ ਪੰਜਾਬੀ ਗਏ ਹਨ ਉਹਨਾਂ ਨੇ ਇਕ ਵਖਰਾ ਪੰਜਾਬ ਸਿਰਜ ਲਿਆ ਹੈ।

ਬੋਲੀ ਬਾਰੇ ਉਹਨਾਂ ਦਾ ਖਿਆਲ ਸੀ ਕਿ ਜਿਵੇਂ ਅੰਗਰੇਜ਼ੀ ਅਨੇਕਾਂ ਥਾਵਾਂ ਕੈਨੇਡਾ, ਅਮਰੀਕਾ, ਇੰਗਲੈਂਡ, ਆਸਟਰੇਲੀਆ ਵਿਚ ਬੋਲੀ ਜਾਂਦੀ ਹੈ , ਪਰ ਹਰ ਮੁਲਕ ਦੀ ਅੰਗਰੇਜ਼ੀ ਦਾ ਅਪਣਾ ਵਖਰਾ ਲਹਿਜਾ ਤੇ ਉਚਾਰਣ ਹੈ, ਉਸੇ ਤਰਾਂ ਹੀ ਅਨੇਕਾਂ ਮੁਲਕਾਂ ਵਿਚ ਬੋਲੀ ਜਾਂਦੀ ਪੰਜਾਬੀ ਭਾਸ਼ਾ ਵੀ ਹੌਲੀ ਹੌਲੀ ਅਪਣਾ ਵਖਰਾ ਮੁਹਾਂਦਰਾ ਵਿਕਸਤ ਕਰ ਰਹੀ ਹੈ। ਇਸ ਨਾਲ ਬੋਲੀ ਦੀ ਅਮੀਰੀ ਤੇ ਸ਼ਬਦ ਭੰਡਾਰ ਵਿਚ ਵਾਧਾ ਹੁੰਦਾ ਹੈ। ਉਹਨਾਂ ਕਿਹਾ ਕਿ ਪੰਜਾਬੀ ਨੂੰ ਕੈਨੇਡਾ ਜਾਂ ਹੋਰ ਕਿਸੇ ਦੇਸ਼ ਵਿਚ ਵੀ ਕੋਈ ਖਤਰਾ ਨਹੀਂ, ਕਿਉਂਕਿ ਜਦੋਂ ਤਕ ਪਰਵਾਸ ਤੇ ਇੰਮੀਗਰੇਸ਼ਨ ਦਾ ਵਰਤਾਰਾ ਜਾਰੀ ਰਹੇਗਾ, ਪੰਜਾਬੀ ਭਾਸ਼ਾ ਨੂੰ ਕਿਸੇ ਤਰਾਂ ਦਾ ਕੋਈ ਖਤਰਾ ਨਹੀਂ ਇਹ ਵਧੇ ਫੁਲੇਗੀ। ਉਹਨਾਂ ਇਹਨਾਂ ਸਾਰੇ ਵਿਸ਼ਿਆਂ ਤੇ ਖੁਲ ਕੇ ਵਿਚਾਰ ਪ੍ਰਗਟਾਏ। ਇਸ ਮੌਕੇ ਸੁਖਮੰਦਰ ਬਰਾੜ, ਅਮਰੀਕ ਪਲਾਹੀ, ਕੁਲਜੀਤ ਕੌਰ, ਦਵਿੰਦਰ ਸਿੰਘ ਦੂਲੇ, ਅਜਮੇਰ ਰੋਡੇ, ਜਰਨੈਲ ਸਿੰਘ ਸੇਖਾ, ਜਗਦੇਵ ਸਿੰਘ ਸੰਧੂ, ਸ੍ਰੀਮਤੀ ਬਰਜਿੰਦਰ ਤੇ ਜਗਦੇਵ ਢਿਲੋਂ, ਮੋਹਨ ਗਿੱਲ, ਗੁਰਦੀਪ ਭੁਲਰ, ਪਾਲੀ ਵਿਰਕ, ਗੁਰਚਰਨ ਟੱਲੇਵਾਲੀਆ, ਹਰਚਰਨ ਸਿੰਘ ਪੁਨੀਆ, ਨਛੱਤਰ ਸਿੰਘ ਬਰਾੜ ਤੇ ਹੋਰ ਸਾਹਿਤ ਪ੍ਰੇਮੀ ਹਾਜ਼ਰ ਸਨ।

ਅਖੀਰ ਵਿਚ ਚਿਤਰਕਾਰ ਜਰਨੈਲ ਸਿੰਘ ਦੇ ਆਏ ਹੋਏ ਸਰੋਤਿਆਂ ਦਾ ਇਸ ਪ੍ਰੋਗਰਾਮ ਵਿਚ ਸ਼ਮੂਲੀਅਤ ਲਈ ਧੰਨਵਾਦ ਨਾਲ ਇਹ ਸ਼ਾਮ ਸਮਾਪਤ ਹੋਈ।