ਸਾਊਥਾਲ, ਸਲੋਹ ਅਤੇ ਅਦਾਰਾ ਸ਼ਬਦ ਵਲੋਂ ਸਾਂਝਿਆਂ ਤੌਰ ਤੇ ਹੇਜ਼ ਦੇ ਪਿੰਕ ਸਿਟੀ ਰੈਸਟੋਰੈਂਟ ਵਿਚ ਪਿਛਲੇ ਸ਼ਨਿਚਰਵਾਰ ਦੀ ਸ਼ਾਮ ਨੂੰ ਇਕ ਸਾਹਿਤਕ ਡਿਨਰ ਦਾ ਆਯੋਜਨ ਕੀਤਾ ਗਿਆ ਜਿਸ ਦਾ ਮੁੱਖ਼ ਮਕਸਦ ਕੈਨੇਡਾ ਦੇ ਮਸ਼ਹੂਰ ਕਵੀ ਕਮਿਊਨਿਟੀ ਹਸਤਾਖ਼ਰ ਇਕਬਾਲ ਰਾਮੂਵਾਲੀਆ ਅਤੇ ਪੰਜਾਬੀ ਦੇ ਸਿਰਮੌਰ ਪ੍ਰਕਾਸ਼ਕ, ਕਵੀ ਅਤੇ ਲੇਖ਼ਕ ਐਸ ਬਲਬੰਤ ਨੂੰ ਜੀਅ ਆਇਆਂ ਕਹਿਣਾ ਸੀ। ਇਕਬਾਲ ਰਾਮੂਵਾਲੀਆ ਹੁਣੇ ਹੁਣੇ ਹੀ ਭਾਰਤ ਤੋਂ ਹੋ ਕੇ ਆਏ ਸਨ ਜਿਥੇ ਉਨ੍ਹਾ ਨੇ ''ਆਪ" ਪਾਰਟੀ ਦੇ ਸਮਰਥਨ ਵਿਚ ਪਰਚਾਰ ਕੀਤਾ।

ਇਕਬਾਲ ਨੇ ਭਾਰਤ ਦੀ ਅਜੋਕੀ ਰਾਜਨੀਤੀ 'ਤੇ ਚਾਨਣਾ ਪਾਇਆ। ਕੈਨੇਡਾ ਵਿਚ ਰਚੇ ਜਾਂਦੇ ਪੰਜਾਬੀ ਸਾਹਿਤ ਤੇ ਉਥੋਂ ਦੀਆਂ ਸਹਿਤਕ ਗਤੀਵਿਧੀਆਂ ਵਾਰੇ ਵੀ ਦੱਸਿਆ। ਐਸ ਬਲਬੰਤ ਨੇ ਪੰਜਾਬੀ ਪਬਲਿਸ਼ਿੰਗ ਅਤੇ ਇਸ ਬਿਜ਼ਨੈਸ ਨੂੰ ਐਕਸਪਲੌਇਟ ਕਰਨ ਵਾਲੇ ਲੋਕਾਂ ਵਾਰੇ ਦੱਸਿਆ। ਆਪ ਨੇ ਕਿਹਾ ਕਿ ਇਹ ਗੱਲ ਠੀਕ ਨਹੀਂ ਕਿ ਪੰਜਾਬੀ ਦੀਆਂ ਕਿਤਾਬਾਂ ਨਹੀਂ ਵਿਕਦੀਆਂ-ਅਗ਼ਰ ਵਧੀਆ ਸਾਹਿਤ ਲਿਖ਼ਿਆ ਜਾਵੇ ਤਾਂ ਹਰਗ਼ਿਜ਼ ਵਿਕਦਾ ਹੈ। ਡ. ਸਾਥੀ ਲੁਧਿਆਣਵੀ ਨੇ ਕਿਹਾ ਕਿ ਪ੍ਰਕਾਸ਼ਕ ਅਗ਼ਰ ਕਿਤਾਬ ਦੀ ਕੀਮਤ ਘੱਟ ਰੱਖਣ ਤਾਂ ਪਾਠਕਾਂ ਵਿਚ ਹੋਰ ਵੀ ਵਾਧਾ ਹੋ ਸਕਦਾ ਹੈ। ਸਾਹਿਤ ਅਤੇ ਪੰਜਾਬੀ ਭਾਸ਼ਾ ਵਾਰੇ ਵੀ ਗੱਲਾਂ ਹੋਈਆਂ। ਇਸ ਕਿਸਮ ਦੀ ਬਹਿਸ ਵਿਚ ਕੁਲਵੰਤ ਕੌਰ ਢਿੱਲੋਂ (ਕਨਵੀਨਰ ਪੰਜਾਬੀ ਸਾਹਿਤ ਕਲਾ ਕੇਂਦਰ), ਅਮਰ ਜਿਓਤੀ, ਗੁਰਨਾਮ ਗਰੇਵਾਲ, ਹਰਜੀਤ ਅਟਵਾਲ (ਅਦਾਰਾ ਸ਼ਬਦ), ਮੋਹਿੰਦਰਪਾਲ ਧਾਲੀਵਾਲ (ਪ੍ਰਧਾਨ ਪੰਜਾਬੀ ਪਾਠਕ- ਲੇਖ਼ਕ ਸਭਾ), ਐਸ ਬਲਵੰਤ, ਅਜ਼ੀਮ ਸ਼ੇਖ਼ਰ (ਸਕੱਤਰ ਪੰਜਾਬੀ ਸਾਹਿਤ ਕਲਾ ਕੇਂਦਰ), ਬਿੱਟੂ ਖ਼ੰਗੂੜਾ (ਦੇਸੀ ਰੇਡੀਓ), ਯਸ਼ ਸਾਥੀ, ਅਵਤਾਰ ਉੱਪਲ, ਬਲਬਿੰਦਰ ਕੌਰ, ਭਜਨ ਕੌਰ ਆਦਿ ਨੇ ਵੀ ਭਾਗ ਲਿਆ।