ਬਰੈਂਪਟਨ - ਇਸ ਵਰ੍ਹੇ ਹੋਂਦ ‘ਚ ਆਈ ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਆਫ਼ ਕੈਨੇਡਾ ਦੀ ਪਹਿਲੀ ਸਾਲਾਨਾ ਬਿਜ਼ਨਸ ਇਕੱਤਰਤਾ ਡੇਅਜ਼ ਇੰਨ, 260 ਕੁਈਨ ਸਟਰੀਟ ਈਸਟ, ਬਰੈਂਪਟਨ ਵਿਖੇ ਚੇਅਰਮੈਨ ਅਜੈਬ ਸਿੰਘ ਚੱਠਾ ਤੇ ਪ੍ਰਧਾਨ ਲਖਵੀਰ ਸਿੰਘ ਗਰੇਵਾਲ ਦੀ ਅਗਵਾਈ ਹੇਠ ਹੋਈ। ਮੀਟਿੰਗ ਦੋਰਾਨ ਕੈਨੇਡਾ ਦੇ ਫੈਡਰਲ ਖੇਡ ਮੰਤਰੀ ਬੱਲ ਗੋਸਲ ਅਤੇ ਟੋਰਾਂਟੋ ਸਥਿਤ ਇੰਡੀਅਨ ਕੌਸਲੇਟ ਦਫਤਰ ਤੋਂ ਪ੍ਰਿਤਪਾਲ ਸਿੰਘ ਬਤੌਰ ਵਿਸ਼ੇਸ਼ ਮਹਿਮਾਨ ਸ਼ਾਮਲ ਹੋਏ।

ਪ੍ਰੋਗਰਾਮ ਦੇ ਸ਼ੁਰੂ ਵਿੱਚ ਮੰਚ ਦੀ ਸੇਵਾ ਸੰਭਾਲਦਿਆਂ ਗਗਨਦੀਪ ਕੌਰ ਚੱਠਾ ਨੇ ਐਸੋਸ਼ੀਏਸ਼ਨ ਦੇ ਪ੍ਰਧਾਨ ਲਖਵੀਰ ਸਿੰਘ ਗਰੇਵਾਲ ਨੂੰ ਮੰਚ ਤੇ ਆਉਣ ਦਾ ਸੱਦਾ ਦਿੱਤਾ। ਲਖਵੀਰ ਸਿੰਘ ਗਰੇਵਾਲ ਨੇ ਆਪਣੇ ਸਵਾਗਤੀ ਭਾਸ਼ਨ ‘ਚ ਆਏ ਹੋਏ ਮਹਿਮਾਨਾਂ ਨੂੰ ਜੀ ਆਇਆ ਕਿਹਾ। ਉਪਰੰਤ ਕੁਲਜੀਤ ਸਿੰਘ ਜੰਜੂਆ ਨੇ ਸਲਾਈਡ ਸ਼ੋਅ ਰਾਹੀਂ ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਦੇ ਨਿਯਮਾਂ, ਨੀਤੀਆਂ, ਮੈਂਬਰਸ਼ਿਪ ਅਤੇ ਬਿਜ਼ਨਸ ਪ੍ਰੋਫ਼ੈਸ਼ਨਲਜ਼ ਦੀ ਭਲਾਈ ਬਾਰੇ ਸੰਸਥਾਂ ਵਲੋਂ ਉਲੀਕੇ ਪ੍ਰੋਗਰਾਮਾਂ ਬਾਰੇ ਜਾਣਕਾਰੀ ਸਰੋਤਿਆਂ ਨਾਲ ਸਾਂਝੀ ਕੀਤੀ। ਮੁੱਖ ਮਹਿਮਾਨ ਮਾਣਯੋਗ ਖੇਡ ਮੰਤਰੀ ਬੱਲ ਗੋਸਲ ਨੇ ਆਪਣੇ ਭਾਸ਼ਨ ‘ਚ ਐਸੋਸ਼ੀਏਸ਼ਨ ਦੇ ਸੰਚਾਲਕਾਂ ਨੂੰ ਇਸ ਸੰਸਥਾ ਦੇ ਗਠਨ ਦੀ ਵਧਾਈ ਦਿੰਦਿਆ ਕਿਹਾ ਕਿ ਪੰਜਾਬੀ ਕਮਿਉਨਿਟੀ ਕੈਨੇਡਾ ਦੇ ਅਰਥਚਾਰੇ ਦਾ ਇੱਕ ਪ੍ਰਮੁੱਖ ਅੰਗ ਹੈ ਜੋ ਆਪਣੇ ਕਾਰੋਬਾਰਾਂ ਰਾਹੀਂ ਕੈਨੇਡੀਅਨ ਅਰਥਚਾਰੇ ‘ਚ ਆਪਣਾਂ ਢੁੱਕਵਾਂ ਯੋਗਦਾਨ ਪਾ ਰਹੀ ਹੈ। ਅੱਜ ਲੋੜ ਸੀ ਕਿ ਪੰਜਾਬੀ ਬਿਜ਼ਨਸ ਅਤੇ ਪ੍ਰੋਫ਼ੈਸ਼ਨਲਜ਼ ਦੀ ਵੀ ਆਪਣੀ ਕੋਈ ਵਾਹਿਦ ਸੰਸਥਾ ਹੋਵੇ ਜੋ ਕਾਰੋਬਾਰਾਂ ਦੀ ਤਰੱਕੀ ਅਤੇ ਉੱਜਲੇ ਭਵਿੱਖ ਲਈ ਸੂਬੇ ਅਤੇ ਫੈਡਰਲ ਸਰਕਾਰ ਨਾਲ ਇੱਕ ਪੁੱਲ ਵਜੋਂ ਕੰਮ ਕਰੇ। ਉਨ੍ਹਾਂ ਕਿਹਾ ਕਿ ਮੈਨੂੰ ਖ਼ੁਸ਼ੀ ਹੈ ਕਿ ਕੁੱਝ ਸੁਹਿਰਦ ਲੋਕਾਂ ਨੇ ਇਸ ਸੰਸਥਾ ਨੂੰ ਹੋਂਦ ‘ਚ ਲਿਆਂਦਾ ਹੈ ਅਤੇ ਮੈਨੂੰ ਪੂਰਨ ਭਰੋਸਾ ਹੈ ਕਿ ਇਹ ਸੰਸਥਾ ਵਧੀਆ ਕਾਰਗੁਜ਼ਾਰੀ ਕਰੇਗੀ ।

ਉਨ੍ਹਾਂ ਹਾਲ ਹੀ ਵਿੱਚ ਮਾਣਯੋਗ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੀ ਅਗਵਾਈ ‘ਚ ਭਾਰਤ-ਕੇਨੇਡਾ ਕਾਰੋਬਾਰਕ ਸਬੰਧਾਂ ਨੂੰ ਵਧਾਉਣ ਦੀ ਨੀਤੀ ਤਹਿਤ ਭਾਰਤ ‘ਚ ਹੋਈਆਂ ਬੈਠਕਾਂ ਦਾ ਖੁਲਾਸਾ ਕਰਦੇ ਹੋਏ ਕਿਹਾ ਕਿ ਕੈਨੇਡਾ ਭਾਰਤ ਨਾਲ ਸ਼ੋਸ਼ਲ ਸਕਿਉਰਟੀ ਅਤੇ ਨਿਉਕਲੀਅਰ ਸੰਧੀ ਕਰਨ ਜਾ ਰਿਹਾ ਹੈ। ਇਸ ਸਿਲਸਿਲੇ ‘ਚ ਅਗਲੀ ਬੈਠਕ ਜਲਦੀ ਹੀ ਔਟਵਾ ‘ਚ ਹੋਣ ਜਾ ਰਹੀ ਹੈ ਜਿਸਦੀ ਜਾਣਕਾਰੀ ਉਹ ਐਸੋਸ਼ੀਏਸ਼ਨ ਦੇ ਨੁਮਾਇੰਦਿਆਂ ਨੂੰ ਜਰੂਰ ਪੁੱਜਦੀ ਕਰਨਗੇ। ਮਿਸੀਸਾਗਾ ਸਟਰੀਟਵਿੱਲ ਤੋਂ ਮੌਜੂਦਾ ਐਮ. ਪੀ. ਬਰੈਡ ਬੱਟ, ਜੋ ਗਰੇਟਰ ਟੋਰਾਂਟੋ ਅਪਾਰਟਮੈਂਟ ਐਸੋਸ਼ੀਏਸ਼ਨ ਦੇ ਪ੍ਰਧਾਨ ਅਤੇ ਮੁੱਖ ਨਿਰਦੇਸ਼ਕ ਰਹਿ ਚੁੱਕੇ ਹਨ, ਨੇ ਆਪਣੇ ਭਾਸ਼ਨ ‘ਚ ਕਿਹਾ ਕਿ ਬਿਜ਼ਨਸ ਸੰਸਥਾਵਾਂ ਕੁਝ ਕੁ ਲੋਕਾਂ ਦੁਆਰਾ ਸ਼ੁਰੂ ਕੀਤੀਆਂ ਜਾਂਦੀਆ ਹਨ ਅਤੇ ਹੌਲੀ-ਹੌਲੀ ਬਾਕੀ ਮੈਂਬਰ ਵੀ ਇਨ੍ਹਾਂ ਸੰਸਥਾਵਾਂ ਨਾਲ ਜੁੜਦੇ ਜਾਂਦੇ ਹਨ। ਗਰੇਟਰ ਟੋਰਾਂਟੋ ਅਪਾਰਟਮੈਂਟ ਐਸੋਸ਼ੀਏਸ਼ਨ ਦਾ ਹਵਾਲਾ ਦਿੰਦੇ ਹੋਏ ਉਨ੍ਹਾਂ ਕਿਹਾ ਕਿ ਇਹ ਸੰਸਥਾ ਵੀ ਕੁਝ ਕੁ ਲੋਕਾਂ ਦੁਆਰਾ ਸ਼ੁਰੂ ਕੀਤੀ ਗਈ ਸੀ ਜੋ ਅੱਜ ਇੱਕ ਬਹੁਤ ਵੱਡੀ ਅਤੇ ਠੋਸ ਸੰਸਥਾ ਬਣ ਗਈ ਹੈ। ਮੈਂਬਰਸ਼ਿਪ ਦੀ ਮਹੱਤਤਾ ਦੱਸਦਿਆਂ ਉਨ੍ਹਾਂ ਕਿਹਾ ਕਿ ਇਹੋ ਜਿਹੀਆਂ ਸੰਸਥਾਵਾਂ ਮੈਂਬਰਾਂ ਦੁਆਰਾ ਇਕੱਠੇ ਕੀਤੇ ਗਏ ਫੰਡਾਂ ਨਾਲ ਹੀ ਸਿਹਤਮੰਦ ਅਤੇ ਸਾਰਥਕ ਤਰੱਕੀਆਂ ਕਰ ਸਕਦੀਆਂ ਹਨ। ਇਸ ਲਈ ਕਮਿਉਨਿਟੀ ਦੇ ਕਾਰੋਬਾਰਾਂ ਨੂੰ ਵੱਧ ਤੋਂ ਵੱਧ ਇਸ ਸੰਸਥਾ ਨਾਲ ਜੁੜ੍ਹਨਾਂ ਚਾਹੀਦਾ ਹੈ ਤਾਂ ਜੋ ਇਹ ਸੰਸਥਾ ਕਾਰੋਬਾਰਕ ਲੋਕਾਂ ਦੀ ਸਹੀ ਅਗਵਾਈ ਕਰ ਸਕੇ। ਇੰਡੀਅਨ ਕੌਸਲੇਟ ਪ੍ਰਿਤਪਾਲ ਸਿੰਘ ਨੇ ਮੈਂਬਰਾਂ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਦਾ ਹੋਂਦ ‘ਚ ਆਉਣਾ ਇੱਕ ਸ਼ਲਾਘਾਯੋਗ ਕਦਮ ਹੈ ਤੇ ਜਿਸ ਨਾਲ ਭਾਰਤ-ਕੈਨੇਡਾ ਸਬੰਧਾਂ ਨੂੰ ਹੋਰ ਮਜ਼ਬੂਤੀ ਮਿਲੇਗੀ। ਉਨ੍ਹਾਂ ਭਾਰਤੀ ਸਫ਼ਾਰਤਖ਼ਾਨੇ ਵਲੋਂ ਇਸ ਸੰਸਥਾ ਦੀ ਤਰੱਕੀ ਲਈ ਹਰ ਯੋਗ ਮੱਦਦ ਕਰਨ ਦਾ ਪ੍ਰਣ ਵੀ ਕੀਤਾ।

ਮੀਟਿੰਗ ਦੋਰਾਨ ਸ਼੍ਰੀਮਤੀ ਰਿੱਕੀ ਗੋਗਨਾ ਨੇ ਆਪਣੀ ਪ੍ਰੇਰਨਾ ਭਰਪੂਰ ਤਕਰੀਰ ਰਾਹੀਂ ਮੈਂਬਰਾਂ ਨੂੰ ਸਟੀਫਨ ਕਵੀ ਦੀ ਉਤਸ਼ਾਹਿਤ ਕਰਨ ਵਾਲੀ ਕਿਤਾਬ ‘ਦੀ ਸੈਵਨ ਹੈਬਿਟਸ ਆਫ਼ ਹਾਈਲੀ ਇਫੈਕਟਿਵ ਪੀਪਲ‘ ਦੇ ਹਵਾਲੇ ਨਾਲ ਨਿੱਜੀ ਅਤੇ ਕਾਰੋਬਾਰਕ ਤਰੱਕੀ ਦੇ ਮੁੱਢਲੇ ਨਿਯਮਾਂ ਤੇ ਚਾਨਣਾ ਪਾਇਆ ਅਤੇ ਕਾਰੋਬਾਰਾਂ ਨੂੰ ਆਪਸੀ ਰਾਬਤਾ ਅਤੇ ਮੇਲ-ਜੋਲ ਵਧਾਉਣ ਦਾ ਮਸ਼ਵਰਾ ਦਿੱਤਾ। ਹਾਜ਼ਰ ਮੈਂਬਰਾਂ ਨੇ ਸ਼੍ਰੀਮਤੀ ਰਿੱਕੀ ਗੋਗਨਾ ਦੀ ਇਸ ਤਕਰੀਰ ਨੂੰ ਭਾਵ-ਭਿੰਨੀ ਦਾਦ ਦਿੱਤੀ। ਐਸੋਸ਼ੀਏਸ਼ਨ ਵਲੋਂ ਸ਼੍ਰੀਮਤੀ ਰਿੱਕੀ ਗੋਗਨਾ ਦਾ ਪਲੈਕ ਨਾਲ ਸਨਮਾਨ ਕੀਤਾ ਗਿਆ। ਸ਼੍ਰੀਮਤੀ ਸਰਾਏ ਨੇ ਲੱਕੀ ਡਰਾਅ ਦੇ ਇਨਾਮਾਂ ਦੀ ਵੰਡ ਕੀਤੀ। ਅੱਜ ਦੀ ਇਸ ਇਕੱਤਰਤਾ ‘ਚ ਐਸੋਸ਼ੀਏਸ਼ਨ ਦੇ ਫ਼ਾਊਂਡਿੰਗ ਮੈਂਬਰਾਂ ਦਲਬੀਰ ਕਥੂਰੀਆ, ਜਤਿੰਦਰ ਜਸਵਾਲ, ਕੁਲਜੀਤ ਸਿੰਘ ਜੰਜੂਆ, ਨਜੀਬ ਇਕਬਾਲ, ਜਗਜੀਤ ਸਾਚਾ, ਪਿਆਰਾ ਸਿੰਘ ਕੁੱਦੋਵਾਲ, ਗਿਆਨ ਸਿੰਘ ਕੰਗ, ਸਰਦੂਲ ਸਿੰਘ ਥਿਆੜਾ, ਅਜਵਿੰਦਰ ਚੱਠਾ, ਅਮਨਦੀਪ ਜਸਵਾਲ, ਇੰਦਰ ਚੋਪੜਾ, ਗੁਰਮੀਤ ਸਿੰਘ, ਨਰਿੰਦਰ ਢਿੱਲੋਂ, ਡਾ: ਦੀਦਾਰ ਸਿੰਘ ਸਰਾਏ, ਸੰਤੋਖ ਸਿੰਘ ਸੰਧੂ, ਭੁਪਿੰਦਰ ਬਾਜਵਾ, ਦਲਜੀਤ ਸਿੰਘ ਗੈਦੂ, ਰਣਦੀਪ ਸੰਧੂ, ਪਰਮਿੰਦਰ ਬਰਨ, ਸਤਿੰਦਰ ਸੰਧੂ, ਗੁਰਦੇਵ ਔਜਲਾ, ਕੁਲਦੀਪ ਗਿੱਲ, ਅਮਰਜੀਤ ਸਿੰਘ, ਸੰਨੀ ਗਿੱਲ, ਰਣਜੀਤ ਸਿੰਘ ਰੰਧਾਵਾ, ਧੰਨਦੇਵ ਸੰਧੂ, ਸੁਖਮਿੰਦਰ ਸੰਧੂ, ਅਜਾਇਬ ਸਿੰਘ ਸੰਧੂ, ਜਗਦੀਪ ਸਾਚਾ, ਅਸ਼ਵਨੀ ਤਾਂਗੜੀ, ਅਮਰੀਕ ਗੋਗਨਾ, ਰਿੱਕੀ ਗੋਗਨਾ, ਇਖ਼ਤਿਖ਼ਾਰ ਚੌਧਰੀ ਤੋਂ ਇਲਾਵਾ ਭਾਰਤੀ ਅਤੇ ਪਾਕਿਸਤਾਨੀ ਮੂਲ ਦੇ 100 ਤੋਂ ਵੀ ਵੱਧ ਪੰਜਾਬੀ ਕਾਰੋਬਾਰਕ ਅਤੇ ਪ੍ਰੋਫ਼ੈਸ਼ਨਲਜ਼ ਹਾਜ਼ਰ ਹੋਏ ਜਿਨ੍ਹਾਂ ‘ਚ ਸਰੋਕਾਰਾਂ ਦੀ ਅਵਾਜ਼ ਤੋਂ ਹਰਬੰਸ ਸਿੰਘ, ਲਿਬਰਲ ਆਗੂ ਬਲਜੀਤ ਬਾਵਾ, ਫ਼ਾਈਨੈਂਸ਼ੀਅਲ ਪਲੈਨਰ ਪਰਸੀ ਦਸਤੂਰ, ਬੈਰਿਸਟਰ ਜਸਪਾਲ ਸਿੰਘ ਭੁੱਲਰ, ਰਿਆਲਟਰ ਅਜ਼ਫ਼ਰ ਤਾਹਿਰ, ਸੱਦਤ ਅਹਿਮਦ ਆਦਿ ਪ੍ਰਮੁੱਖ ਸਨ। ਅੰਤ ਵਿੱਚ ਸੰਸਥਾ ਦੇ ਚੇਅਰਮੈਨ ਅਜੈਬ ਸਿੰਘ ਚੱਠਾ ਨੇ ਆਏ ਹੋਏ ਮਹਿਮਾਨਾਂ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ ਅਤੇ ਆਸ ਕੀਤੀ ਕਿ ਸਮੂਹ ਕਾਰੋਬਾਰਕ ਮੈਂਬਰਜ਼ ਅਤੇ ਪ੍ਰੋਫ਼ੈਸ਼ਨਲਜ਼, ਸੰਸਥਾ ਦੇ ਸੰਚਾਲਕਾਂ ਨੂੰ ਇਸੇ ਤਰ੍ਹਾਂ ਹੀ ਮਿਲਵਰਤਣ ਦੇ ਕੇ ਉਨ੍ਹਾਂ ਦੀ ਹੌਂਸਲਾ ਅਫ਼ਜ਼ਾਈ ਕਰਦੇ ਰਹਿਣਗੇ ਤਾਂ ਜੋ ਇਸ ਸੰਸਥਾ ਨੂੰ ਕਾਮਯਾਬੀ ਦੀਆਂ ਬੁਲੰਦੀਆਂ ਤੇ ਲਿਜਾਇਆ ਜਾ ਸਕੇ।