ਅਦਾਰਾ ਅਜੀਤ ਅਤੇ ਕਲਮ ਫ਼ਾਊਂਡੇਸ਼ਨ ਵਲੋਂ ਡਾ. ਹਰਕੇਸ਼ ਸਿੰਘ ਸਿੱਧੂ ਸਨਮਾਨਿਤ
ਕੁਲਜੀਤ ਸਿੰਘ ਜੰਜੂਆ, ਟਰਾਂਟੋ

ਟੋਰਾਂਟੋ - ਬੀਤੇ ਸ਼ਨੀਵਾਰ ਅਦਾਰਾ ਅਜੀਤ ਅਤੇ ਕਲਮ ਫ਼ਾਊਂਡੇਸ਼ਨ ਵਲੋਂ ਡਾ. ਹਰਕੇਸ਼ ਸਿੰਘ ਸਿੱਧੂ ਨਾਲ ਸੰਵਾਦ ਸਮਾਰੋਹ ਰਚਾਇਆ ਗਿਆ ਜਿਸ ਵਿਚ ਕਲਮ ਦੇ ਮੈਂਬਰਾਂ ਤੋਂ ਇਲਾਵਾ ਡਾ. ਸਿੱਧੂ ਦੇ ਪ੍ਰਸੰਸ਼ਕਾਂ ਅਤੇ ਸਰੋਤਿਆਂ ਨੇ ਭਾਰੀ ਗਿਣਤੀ ‘ਚ ਭਾਗ ਲਿਆ। ਡਾ. ਹਰਕੇਸ਼ ਸਿੰਘ ਸਿੱਧੂ ਦਾ ਅਜੀਤ ਭਵਨ ਵਿਖੇ ਪਹੁੰਚਣ ਤੇ ਅਜੀਤ ਅਤੇ ਕਲਮ ਦੀ ਸਰਪ੍ਰਸਤ ਕੰਵਲਜੀਤ ਕੌਰ ਬੈਂਸ, ਮੈਨੇਜਿੰਗ ਐਡੀਟਰ ਸੰਨੀ ਬੈਂਸ, ਚੇਅਰਮੈਨ ਅਜੈਬ ਸਿੰਘ ਚੱਠਾ ਅਤੇ ਪ੍ਰਧਾਨ ਕੁਲਜੀਤ ਸਿੰਘ ਜੰਜੂਆ ਨੇ ਹਾਰ ਪਾ ਕੇ ਸੁਆਗਤ ਕੀਤਾ। ਪ੍ਰੋਗਰਾਮ ਦਾ ਅਰੰਭ ਕਰਦਿਆਂ ਕੁਲਜੀਤ ਸਿੰਘ ਜੰਜੂਆ ਨੇ ਡਾ. ਹਰਕੇਸ਼ ਸਿੰਘ ਸਿੱਧੂ , ਕੰਵਲਜੀਤ ਕੌਰ ਬੈਂਸ, ਸੰਨੀ ਬੈਂਸ ਅਤੇ ਅਜੈਬ ਸਿੰਘ ਚੱਠਾ ਨੂੰ ਮੰਚ ਤੇ ਸੁਸ਼ੋਭਤ ਹੋਣ ਲਈ ਸੱਦਾ ਦਿਤਾ।

ਪ੍ਰੋਗਰਾਮ ਨੂੰ ਅੱਗੇ ਤੋਰਦਿਆਂ ਕੁਲਜੀਤ ਸਿੰਘ ਜੰਜੂਆ ਨੇ ਮੁੱਖ ਮਹਿਮਾਨ ਅਤੇ ਬਾਕੀ ਹਾਜ਼ਰ ਮਹਿਮਾਨਾਂ ਨੂੰ ਮਹਿਫ਼ਲ ‘ਚ ਜੀ ਆਇਆਂ ਕਹਿਣ ਉਪਰੰਤ ਡਾ. ਹਰਕੇਸ਼ ਸਿੰਘ ਸਿੱਧੂ ਬਾਰੇ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਮੈਂ ਅੱਜ ਤੁਹਾਨੂੰ ਇੱਕ ਇਹੋ ਜਿਹੇ ਸ਼ਖ਼ਸ਼ ਨਾਲ ਰੂਬਰੂ ਕਰਵਾਉਣ ਜਾ ਰਿਹਾ ਹਾਂ ਜਿਸ ਨੇ ਸਾਲ ‘ਚ ਦੋ-ਦੋ ਕਲਾਸਾਂ ਪਾਸ ਕਰਨ, ਫੰਡਾਂ ਦੀ ਕਮੀ ਕਾਰਣ ਕਾਲਿਜਾਂ ਦੀ ਸਹੁਲਤਾਂ ਤੋਂ ਰਹਿਤ ਪ੍ਰਾਈਵੇਟ ਤੌਰ ‘ਤੇ ਘਰ ਪੜ੍ਹਕੇ ਹੀ ਬੀ.ਏ. ਤੱਕ ਦੀ ਪੜਾਈ ਮੁਕੰਮਲ ਕਰਨ, ਬਾਅਦ ਵਿੱਚ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਲਾਅ ਦੀ ਡਿਗਰੀ ਪੂਰੀ ਕਰਕੇ ਸਰਕਾਰੀ ਵਕੀਲ, ਐਸ. ਡੀ. ਐਮ., ਏ. ਡੀ. ਸੀ., ਡੀ. ਸੀ. ਅਤੇ ਡਾਇਰੈਕਰ ਤੱਕ ਦੇ ਅਹੁਦਿਆਂ ਦਾ ਸਫ਼ਰ ਸਾਦਾ ਜਿੰਦਗੀ ਜੀਉਂਦਿਆ ਬੜੀ ਇਮਾਨਦਾਰੀ ਨਾਲ ਤਹਿ ਕੀਤਾ ਹੈ। ਮੇਰੀ ਮੁਰਾਦ ਡਾ: ਹਰਕੇਸ਼ ਸਿੰਘ ਸਿੱਧੂ ਤੋਂ ਹੈ। ਤੇ ਫਿਰ ਆਗਾਜ਼ ਹੋਇਆ ਡਾ: ਸਿੱਧੂ ਨਾਲ ਰੂਬਰੂ ਦਾ। ਡਾ: ਹਰਕੇਸ਼ ਸਿੰਘ ਸਿੱਧੂ ਨੇ ਆਪਣੀਆਂ ਸਾਹਿਤਕ ਲੇਖਣੀਆਂ ਬਾਰੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਉਨ੍ਹਾਂ ਨੇ ਜੋ ਕੁਝ ਵੀ ਲਿਖਿਆ ਹੈ ਉਹ ਸੱਚੀਆਂ ਘਟਨਾਵਾਂ ਅਤੇ ਜੋ ਕੁਝ ਉਨ੍ਹਾਂ ਨੇ ਆਪਣੇ ਆਲੇ-ਦੁਆਲੇ ਵਾਪਰਦਿਆਂ ਦੇਖਿਆ ਜਾਂ ਅਨੁਭਵ ਕੀਤਾ , ਦੇ ਅਧਾਰਿਤ ਹੀ ਹੈ। ਆਪਣੀ ਬਹੁ- ਚਰਚਿਤ ਲਘੂ-ਕਹਾਣੀ ਪੁਸਤਕ "ਸਾਚ ਕਹੂੰ" ਬਾਰੇ ਬੋਲਦਿਆਂ ਉਨ੍ਹਾਂ ਕਿਹਾ ਕਿ ਇਸ ਪੁਸਤਕ ਵਿੱਚ ਇੱਕ ਕਹਾਣੀ ਜੋ ਉਹਨਾਂ ਆਪਣੇ ਪਿੰਡ ਦੇ ਇੱਕ ਪ੍ਰੀਵਾਰ ਬਾਰੇ ਲਿਖੀ ਸੀ, ਨੂੰ ਪੜ੍ਹਕੇ ਇੱਕ ਦਿਨ ਇੰਗਲੈਂਡ ਤੋਂ ਇਕ ਪਾਠਕ ਦਾ ਫੋਨ ਆਇਆ ਜੋ ਕਹਿ ਰਿਹਾ ਸੀ ਕਿ ਸਿੱਧੂ ਸਾਹਿਬ ਇਹ ਤੁਸੀਂ ਕੀ ਕੀਤਾ, ਤੁਸੀਂ ਤੇ ਮੇਰੇ ਘਰ ਦੀ ਹੀ ਕਹਾਣੀ ਲਿਖ ਛੱਡੀ ਹੈ। ਇਹ ਤੁਸੀਂ ਠੀਕ ਨਹੀਂ ਕੀਤਾ ਹੈ ਇਸ ਨਾਲ ਮੇਰੇ ਪ੍ਰੀਵਾਰ ਦੀ ਬਦਨਾਮੀ ਹੋਵੇਗੀ। ਅਸਲ ਵਿੱਚ ਇਹ ਕਹਾਣੀ ਕਈ ਪ੍ਰੀਵਾਰਾਂ ਦੀ ਕਹਾਣੀ ਸੀ ਜਿਸ ਵਿੱਚ ਸਮਾਜਿਕ ਤਾਣੇ-ਬਾਣੇ, ਪੀੜ੍ਹਾਂ, ਰਿਸ਼ਤਿਆਂ ਵਿੱਚ ਤਰੇੜ ਅਤੇ ਹੋਰ ਦੁਨਾਆਵੀ ਮੁਸੀਬਤਾਂ ਬਾਰੇ ਲਿਖਿਆ ਗਿਆ ਸੀ। ਡਾ: ਸਿੱਧੂ ਨੇ ਦੱਸਿਆ ਕਿ ਅੱਜ ਤੱਕ ਦੇ ਸਾਹਤਿਕ ਸਫ਼ਰ ਵਿੱਚ ਉਹਨਾਂ ਅਜੀਤ ਵੀਕਲੀ ਲਈ ਹਫ਼ਤਾਵਾਰੀ ਕਾਲਮ ਦੇ ਨਾਲ-ਨਾਲ "ਸਾਚ ਕਹੂੰ", "ਮੱਸਿਆ ਦੀ ਖੀਰ" ਅਤੇ "ਪਿੰਡਾਂ ਵਿੱਚੋਂ ਪਿੰਡ ਸੁਣੀਦਾ" ਨਾਮਕ ਤਿੰਨ ਪੁਸਤਕਾਂ ਪਾਠਕਾਂ ਦੀ ਕਚਿਹਰੀ ‘ਚ ਪੇਸ਼ ਕੀਤੀਆਂ ਹਨ ਜੋ ਪਾਠਕਾਂ ਨੇ ਬੇਹੱਦ ਸਲਾਹੀਆਂ ਹਨ ਅਤੇ ਮੈਂਨੂੰ ਢੇਰ ਸਾਰਾ ਮਾਣ ਦਿੱਤਾ ਹੈ। ਇਹ ਪਾਠਕਾਂ ਦੀ ਹੌਸਲਾ ਅਫ਼ਜ਼ਾਈ ਹੀ ਹੈ ਜੋ ਮੈਂਨੂੰ ਸਮਾਜਿਕ ਬੁਰਾਈਆਂ ਅਤੇ ਉਨ੍ਹਾਂ ਤੋਂ ਛੁਟਕਾਰਾ ਪਾਉਣ ਲਈ ਕੁਝ ਨਾ ਕੁਝ ਲਿਖਣ ਲਈ ਪ੍ਰੇਰਤ ਕਰਦੀ ਹੈ। ਮੇਰੀ ਵੀ ਇਹ ਸਦਾ ਕੋਸ਼ਿਸ਼ ਰਹਿੰਦੀ ਹੈ ਕਿ ਮੈਂ ਆਪਣੇ ਪਾਠਕਾਂ ਦੀ ਕਸਵੱਟੀ ਤੇ ਖ਼ਰਾ ਉਤਰਾਂ। ਅਖ਼ੀਰ ਵਿੱਚ ਡਾ: ਸਿੱਧੂ ਨੂੰ ਅਦਾਰਾ ਅਜੀਤ, ਕੰਨਟੈਕਟ ਅਤੇ ਕਲਮ ਫ਼ਾਊਂਡੇਸ਼ਨ ਵਲੋਂ ਪਲੈਕ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਡਾ: ਸਿੱਧੂ ਨੇ ਅਜੀਤ ਵੀਕਲੀ ਦੀ ਸਰਪ੍ਰਸਤ ਕੰਵਲਜੀਤ ਕੌਰ ਬੈਂਸ, ਕੰਨਟੈਕਟ ਅਤੇ ਅਜੀਤ ਦੇ ਮੈਨੇਜਿੰਗ ਐਡੀਟਰ ਸੰਨੀ ਬੈਂਸ ਅਤੇ ਕਲਮ ਫ਼ਾਊਂਡੇਸ਼ਨ ਦੇ ਸਮੂਹ ਸਾਹਿਤਕਾਰਾਂ ਅਤੇ ਸਾਹਿਤ ਪ੍ਰੇਮੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਮੈਂ ਆਪ ਸਭ ਦਾ ਬਹੁਤ ਰਿਣੀ ਹਾਂ ਜੋ ਤੁਸੀਂ ਮੇਰੇ ਵਰਗੇ ਤੁੱਛ ਬੁੱਧੀ ਦੇ ਮਾਲਕ ਨੂੰ ਇੰਨ੍ਹਾਂ ਮਾਣ ਬਖ਼ਸ਼ਿਆ ਹੈ। ਡਾ: ਹਰਕੇਸ਼ ਸਿੰਘ ਸਿੱਧੂ ਦੇ ਪੁਰਾਣੇ ਸਹਿਯੋਗੀਆਂ ਡਾ: ਸਾਧਾ ਸਿੰਘ ਵੜਾਇਚ ਅਤੇ ਬਲਰਾਜ ਸਿੰਘ ਚੀਮਾ ਨੇ ਵੀ ਡਾ: ਸਿੱਧੂ ਨਾਲ ਆਪਣੇ ਬੀਤੇ ਸਮੇਂ ਦੇ ਪਲ ਸਾਝਿਆਂ ਕੀਤੇ।

ਪ੍ਰੋਗਰਾਮ ਦੇ ਦੂਸਰੇ ਸੈਸਨ ਵਿਚ ਕਵੀ ਦਰਬਾਰ ਹੋਇਆ ਜਿਸ ਵਿੱਚ ਕਲਮ ਦੇ ਨਾਮਵਾਰ ਸਾਹਿਤਕਾਰਾਂ, ਕਵੀਆਂ ਤੇ ਗੀਤਕਾਰਾਂ ਨੇ ਆਪਣੀਆਂ ਖੁਬਸੂਰਤ ਰਚਨਾਵਾਂ ਪੇਸ਼ ਕੀਤੀਆਂ। ਜਿੱਥੇ ਨਵਦੀਪ ਕੌਰ ਢਾਲਾ ਨੇ ਸਮਾਜ ਵਿੱਚ ਨਾਰੀ ਦੀ ਨਾਬਰਾਬਰਤਾ ਬਾਰੇ ਆਪਣੀ ਬਹੁਤ ਹੀ ਦਿਲ-ਟੁੰਬਵੀ ਕਹਾਣੀ ਪੜ੍ਹਕੇ ਸੁਣਾਈ ਅਤੇ ਵਾਹ ਵਾਹ ਖੱਟੀ ਉੱਥੇ ਕਵਿਤਾ, ਗਜ਼ਲ ਅਤੇ ਗੀਤ ਦੇ ਵੱਖ-ਵੱਖ ਰੰਗ ਵੀ ਹਾਜ਼ਰ ਸਰੋਤਿਆਂ ਨੂੰ ਮਾਨਣ ਲਈ ਮਿਲੇ। ਟੋਰਾਂਟੋ ਦੇ ਨਾਮਵਾਰ ਕਵੀ ਸੁਖਿੰਦਰ, ਪਾਕਿਸਤਾਨੀ ਕਵੀ ਸਲੀਮ ਪਾਸ਼ਾ, ਜੋਗਿੰਦਰ ਅਣਖ਼ੀਲਾ, ਮਹਿੰਦਰ ਪ੍ਰਤਾਪ ਸਿੰਘ, ਸੁਰਿੰਦਰ ਸਿੰਘ ਪਾਮਾ, ਸੁਰਜੀਤ ਕੌਰ, ਤਲਤ ਜ਼ਾਹਰਾ ਨੇ ਆਪਣੀਆਂ ਭਾਵਪੂਰਤ ਕਵਿਤਾਵਾਂ ਅਤੇ ਖੂਬਸੂਰਤ ਗਜ਼ਲਾਂ ਨਾਲ ਸਰੋਤਿਆਂ ਦਾ ਦਿਲ ਜਿੱਤਿਆ। ਗੀਤਕਾਰ ਸ਼ਿਵ ਰਾਜ ਸੰਨੀ ਅਤੇ ਡੋਲੀਸ਼ਾ ਨੇ ਤਰੰਨਮ ਵਿਚ ਗੀਤ ਗਾ ਕੇ ਇਸ ਸਾਹਿਤਕ ਮਹਿਫ਼ਲ ਨੂੰ ਸੁਰਮਈ ਸ਼ਾਮ ਬਣਾ ਦਿੱਤਾ।

ਹਾਜ਼ਰ ਪਤਵੰਤਿਆਂ ਵਿਚ ਕਈ ਹੋਰਨਾਂ ਤੋਂ ਇਲਾਵਾ ਪਿਆਰਾ ਸਿੰਘ ਕੁੱਦੋਵਾਲ, ਅਜੈਬ ਸਿੰਘ ਚੱਠਾ, ਪਰਮਜੀਤ ਕੌਰ ਦਿਉਲ, ਲੱਖ ਕਰਨਾਲਵੀ, ਤੀਰਥ ਦਿਉਲ, ਸੰਜੀਵ ਸਿੰਘ ਭੱਟੀ, ਅੰਕਲ ਜੈਕਾਰ ਲਾਲ ਦੁੱਗਲ, ਸੁਮਨ ਮੌਦਗਿਲ, ਮੀਨਾ ਰਾਣੀ, ਸਤਵੰਤ ਸਿੰਘ ਬੋਪਾਰਾਏ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਐਲੂਮਨੀ ਐਸੋਸ਼ੀਏਸ਼ਨ ਦੇ ਮਿਸਟਰ ਸੰਧੂ ਨੇ ਸ਼ਿਰਕਤ ਕੀਤੀ। ਪ੍ਰੋਗਰਾਮ ਦੇ ਅੰਤ ਵੱਲ ਵੱਧਦਿਆ ਕੁਲਜੀਤ ਸਿੰਘ ਜੰਜੂਆ ਵਲੋਂ ਆਏ ਹੋਏ ਸਾਰੇ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਗਿਆ ਤੇ ਅੱਗੋਂ ਲਈ ਵੀ ਅਜਿਹੇ ਭਰਪੁਰ ਹੁੰਗਾਰੇ ਦੀ ਅਪੀਲ ਅਤੇ ਸੁਝਾਵਾਂ ਦੀ ਮੰਗ ਕੀਤੀ ਗਈ ਤਾਂ ਜੋ ਇਨ੍ਹਾਂ ਸਾਹਤਿਕ ਮਿਲਣੀਆਂ ਨੂੰ ਹੋਰ ਰੌਚਿਕ ਬਣਾਇਆ ਜਾ ਸਕੇ। ਕੁਲ ਮਿਲਾ ਕੇ ਇਹ ਸਨਮਾਨ ਸਮਾਰੋਹ ਅਤੇ ਸਾਹਤਿਕ ਮਿਲਣੀ ਇੱਕ ਯਾਦਗਾਰੀ ਸਾਹਿਤਕ ਸ਼ਾਮ ਹੋ ਨਿੱਬੜੀ।

04/09/12