ਫਿਲਹਾਲ ਦੇ ਸੰਪਾਦਕ ਗੁਰਬਚਨ ਨਾਲ ਸਾਹਿਤਕਾਰਾਂ ਦੀ ਇਕ ਬੈਠਕ
ਜਰਨੈਲ ਸਿੰਘ, ਸਰੀ

ਵੈਨਕੂਵਰ ਦੀ ਫੇਰੀ 'ਤੇ ਆਏ, ਚੌਮਾਸਕ ਮੈਗਜ਼ੀਨ 'ਫਿਲਹਾਲ' ਦੇ ਸੰਪਾਦਕ ਡਾ. ਗੁਰਬਚਨ ਨਾਲ ਜਰਨੈਲ ਆਰਟ ਗੈਲਰੀ ਸਰੀ ਵਿਖੇ, 4 ਜੁਲਾਈ, ਦੁਪਹਿਰ ਸਮੇਂ, ਇਕ ਗੈਰਰਸਮੀ ਮਿਲਣੀ ਕੀਤੀ ਗਈ, ਜਿਸ ਵਿਚ ਵੈਨਕੂਵਰ ਦੇ ਕੁਝ ਨਾਮਵਰ ਲੇਖਕ ਅਤੇ ਪੱਤਰਕਾਰ ਸ਼ਾਮਲ ਹੋਏ। ਸਭ ਤੋਂ ਪਹਿਲਾਂ ਜਰਨੈਲ ਸਿੰਘ ਆਰਟਿਸਟ ਨੇ ਥੋੜੇ ਸਮੇਂ ਦੇ ਸੱਦੇ 'ਤੇ ਸਭ ਸ਼ਖਸੀਅਤਾਂ ਦੇ ਆਰਟ ਗੈਲਰੀ ਵਿਚ ਆਉਣ ਲਈ ਧੰਨਵਾਦ ਕੀਤਾ। ਉਸ ਤੋਂ ਮਗਰੋਂ ਸ੍ਰੋਮਣੀ ਸਾਹਿਤਕਾਰ ਸ. ਅਜਾਇਬ ਸਿੰਘ ਚਿਤ੍ਰਕਾਰ ਦੇ ਅਕਾਲ ਚਲਾਣੇ 'ਤੇ ਡੂੰਘੇ ਦੁੱਖ ਦਾ ਇਜ਼ਹਾਰ ਕਰਦਿਆਂ ਉਹਨਾਂ ਨੂੰ ਭਾਵ ਭਿੰਨੀ ਸ਼੍ਰਧਾਂਜਲੀ ਭੇਟ ਕੀਤੀ ਗਈ।

ਫਿਰ ਜਰਨੈਲ ਸਿੰਘ ਆਰਟਿਸਟ ਨੇ ਮੀਟਿੰਗ ਦੀ ਕਾਰਵਾਈ ਸ਼ੁਰੂ ਕਰਦਿਆਂ ਅਜਮੇਰ ਰੋਡੇ ਨੂੰ ਡਾ. ਗੁਰਬਚਨ ਬਾਰੇ ਕੁਝ ਸ਼ਬਦ ਕਹਿਣ ਲਈ ਸੱਦਾ ਦਿੱਤਾ। ਅਜਮੇਰ ਨੇ ਡਾ. ਗੁਰਬਚਨ ਤੇ ਉਹਨਾਂ ਵੱਲੋਂ ਕੱਢੇ ਜਾ ਰਹੇ ਚੌਮਾਸਕ ਪੰਜਾਬੀ ਪੱਤਰ 'ਫਿਲਹਾਲ' ਬਾਰੇ ਸੰਖੇਪ ਜਾਣਕਾਰੀ ਦੇਣ ਮਗਰੋਂ ਡਾ. ਗੁਰਬਚਨ ਨੂੰ ਆਪਣੇ ਵਿਚਾਰ ਪੇਸ਼ ਕਰਨ ਲਈ ਕਿਹਾ।

ਡਾ. ਗੁਰਬਚਨ ਨੇ ਬੜੇ ਸੰਖੇਪ ਸ਼ਬਦਾਂ ਵਿਚ ਪੰਜਾਬੀ ਸਾਹਿਤ ਦੇ ਪਿਛੋਕੜ ਨੂੰ ਬਿਆਨ ਕਰਦਿਆਂ ਭਾਈ ਵੀਰ ਸਿੰਘ, ਗੁਰਬਖਸ਼ ਸਿੰਘ ਪ੍ਰੀਤ ਲੜੀ ਅਤੇ ਸੰਤ ਸਿੰਘ ਸੇਖੋਂ ਦੀ ਪੰਜਾਬੀ ਸਾਹਿਤ ਨੂੰ ਦੇਣ ਅਤੇ ਸਾਹਿਤ ਵਿਚ ਆਏ ਬਦਲਾ ਦੀ ਗੱਲ ਕਰਨ ਦੇ ਨਾਲ ਨਾਲ ਪੰਜਾਬੀਆਂ ਦੇ ਸਾਹਿਤਕ ਪਰਵਾਸ, ਪੰਜਾਬੀ ਸਾਹਿਤ ਵਿਚ ਭ੍ਰਿਸ਼ਟਾਚਾਰ, ਸਾਹਿਤਕ ਪੁਰਸਕਾਰਾਂ ਵਿਚ ਖੋਟ ਦੀ ਗੱਲ ਵੀ ਕੀਤੀ। ਉਹਨਾਂ ਕਿਹਾ ਕਿ ਸ਼ਬਦ ਤੁਹਾਨੂੰ ਤਾਕਤ ਦਿੰਦੇ ਹਨ ਤੇ ਨਿਡਰ ਬਣਾਉਂਦੇ ਹਨ। ਉਹਨਾਂ ਕਿਹਾ ਕਿ ਮੈਂ ਨਿਡਰ ਹੋ ਕੇ ਸਾਹਿਤ ਖੇਤਰ ਵਿਚ ਫੈਲੇ ਭ੍ਰਿਸ਼ਟਾਚਾਰ ਬਾਰੇ ਲਿਖਦਾ ਹਾਂ ਤੇ ਦੋਸਤ ਨਾਰਾਜ਼ ਹੁੰਦੇ ਹਨ ਪਰ ਫਿਰ ਆਪੇ ਠੀਕ ਵੀ ਹੋ ਜਾਂਦੇ ਹਨ।

ਵਿਚਾਰ ਵਟਾਂਦਰੇ ਵਿਚ ਭਾਗ ਲੈਂਦਿਆਂ ਜਗਜੀਤ ਸੰਧੂ ਨੇ ਕਿਹਾ ਕਿ ਗੁਰਬਚਨ ਦੀ ਵਾਰਤਕ ਸ਼ੈਲੀ ਬਹੁਤ ਸੁੰਦਰ ਹੈ, ਲਿਖਤ ਵਿਚ ਬੜੀ ਜਾਨ ਹੈ ਪਰ ਉਸ ਵਿਚ ਨਿਕਾਰਾਤਮਿਕਤਾ ਭਾਰੂ ਜਾਪਦੀ ਹੈ। ਸਾਧੂ ਬਿਨਿੰਗ ਤੇ ਸੁਖਵੰਤ ਹੁੰਦਲ ਨੇ ਗੁਰਬਚਨ ਦੇ ਨਜ਼ਰੀਏ ਬਾਰੇ ਜਾਨਣਾ ਚਾਹਿਆ। ਅਜਮੇਰ ਰੋਡੇ ਦਾ ਵਿਚਾਰ ਸੀ ਕਿ ਲੇਖਕ ਨੂੰ ਇਕ ਨਜ਼ਰੀਆ ਸਾਹਮਣੇ ਰੱਖ ਕੇ ਨਹੀਂ ਲਿਖਣਾ ਚਾਹੀਦਾ। ਜਰਨੈਲ਼ ਸਿੰਘ ਸੇਖਾ ਦਾ ਵਿਚਾਰ ਸੀ ਕਿ ਨਜ਼ਰੀਏ ਤੋਂ ਬਿਨਾ ਸਾਹਿਤ, ਜਰਨਲਿਜ਼ਮ ਦੀ ਇਕ ਖ਼ਬਰ ਬਣ ਕੇ ਰਹਿ ਜਾਵੇਗਾ। ਡਾ. ਸਾਧੂ ਸਿੰਘ ਦਾ ਕਹਿਣਾ ਸੀ ਕਿ ਨਜ਼ਰੀਏ ਦੀ ਗੱਲ ਛੱਡੋ, ਗੁਰਬਚਨ ਲਿਖਦਾ ਬੇਬਾਕ ਤੇ ਵਧੀਆ ਹੈ। ਡਾ. ਗੁਰਬਚਨ ਦਾ ਕਹਿਣਾ ਸੀ ਕਿ ਮੈਗਜ਼ੀਨ ਵਿਚ ਜੋ ਲਿਖਿਆ ਹੈ ਉਹੋ ਮੇਰਾ ਨਜ਼ਰੀਆ ਹੈ। ਉਹਨਾਂ ਨੇ ਬਹੁਤ ਸਾਰੇ ਸਵਾਲਾਂ ਦੇ ਜਵਾਬ ਬੜੇ ਤਹੱਮਲ ਨਾਲ ਦਿੱਤੇ। ਉਪਰੋਕਤ ਨਾਵਾਂ ਤੋਂ ਬਿਨਾਂ ਵਿਚਾਰ ਵਟਾਂਦਰੇ ਵਿਚ ਭਾਗ ਲੈਣ ਵਾਲਿਆਂ ਵਿਚ ਪ੍ਰਿੰਸੀਪਲ ਹਰਚਰਨ ਸਿੰਘ ਪੂਨੀਆ, ਵੈਨਕੂਵਰ ਦੀ ਜਾਣੀ ਪਹਿਚਾਣੀ ਸ਼ਖਸੀਅਤ ਕਵੀ ਮੋਹਣ ਗਿੱਲ, ਨਾਵਲਕਾਰ ਨਛੱਤਰ ਸਿੰਘ ਬਰਾੜ, ਤਰਕਸ਼ੀਲ ਸੁਸਾਇਟੀ ਦੀ ਜ. ਸਕੱਤਰ ਬੀਬੀ ਪਰਮਿੰਦਰ ਸਵੈਚ, ਸੀਨੀਅਰ ਰੇਡੀਉ ਹੋਸਟ ਕੁਲਜੀਤ ਕੌਰ, ਇੰਟਰਨੈਸ਼ਨਲ ਪੰਜਾਬੀ ਟਰੀਬਿਊਨ ਦੇ ਰਛਪਾਲ ਸਿੰਘ ਗਿੱਲ, ਪੰਜਾਬ ਟਾਈਮਜ਼ ਦੇ ਅਮਰਪਾਲ ਸਿੰਘ ਅਤੇ ਗੁਰਦੀਪ ਅਕਾਡਮੀ ਦੇ ਗੁਰਦੀਪ ਸਿੰਘ ਭੁੱਲਰ ਅਤੇ ਕਈ ਹੋਰ।

11/07/12