ਮੁੱਖ ਪਾਰਲੀਮਾਨੀ ਸਕੱਤਰ ਵੱਲੋਂ ਕੁੜੀਆਂ ਦੇ ਸਰਕਾਰੀ ਸਕੂਲ ਨੂੰ ਦੋ ਲੱਖ ਦੀ ਗ੍ਰਾਂਟ
ਭਰੂਣ ਹੱਤਿਆ ਰੋਕੂ ਸਮਾਗਮ ਵਿਚ ਪ੍ਰੋਫ਼ੈਸਰ ਅਜਮੇਰ ਔਲਖ ਦੇ ਨਾਟਕ ਦੀ ਪੇਸ਼ਕਾਰੀ
ਅੰਮ੍ਰਿਤ ਅਮੀ, ਕੋਟਕਪੂਰਾ 

ਕੋਟਕਪੂਰਾ – ਸਥਾਨਕ ਡਾ. ਚੰਦਾ ਸਿੰਘ ਮਰਵਾਹ ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਨੂੰ ਮਨਤਾਰ ਸਿੰਘ ਬਰਾੜ ਮੁੱਖ ਪਾਰਲੀਮਾਨੀ ਸਕੱਤਰ, ਪੇਂਡੂ ਵਿਕਾਸ ਅਤੇ ਪੰਚਾਇਤ ਮੰਤਰਾਲਾ, ਪੰਜਾਬ ਸਰਕਾਰ ਵੱਲੋਂ ਆਪਣੇ ਅਖ਼ਤਿਆਰੀ ਫ਼ੰਡ ’ਚੋਂ ਪੀਣ ਵਾਲ਼ੇ ਪਾਣੀ ਦੇ ਸੁਚਾਰੂ ਪ੍ਰਬੰਧਾਂ ਲਈ ਦੋ ਲੱਖ ਰੁਪਏ ਦੀ ਗ੍ਰਾਂਟ ਦਾ ਐਲਾਨ ਕੀਤਾ ਹੈ। ਉਕਤ ਸਕੂਲ ਦੇ ਸਹਿਯੋਗ ਨਾਲ਼ ਸਮਾਜਿਕ ਸੁਰੱਖਿਆ ਇਸਤਰੀ ਅਤੇ ਬਾਲ ਵਿਕਾਸ ਵਿਭਾਗ ਦੀ ਤਰਫ਼ੋਂ ਕਰਾਏ ਭਰੂਣ ਹੱਤਿਆ ਸਬੰਧੀ ਸਮਾਗਮ ਦੌਰਾਨ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਦਿਆਂ ਸ: ਬਰਾੜ ਨੇ ਲੜਕੀਆਂ ਲਈ ਮਿਆਰੀ ਸਿੱਖਿਆ ਯਕੀਨੀ ਬਨਾਉਣ ਅਤੇ ਸਰਕਾਰੀ ਸਕੂਲਾਂ ਨੂੰ ਮੁਢਲੀਆਂ ਸਹੂਲਤਾਂ ਪੱਖੋਂ ਸੰਪੰਨ ਕਰਨ ਲਈ ਪੰਜਾਬ ਸਰਕਾਰ ਦੇ ਪ੍ਰੋਗਰਾਮਾਂ ਅਤੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੀ ਲੜਕੀਆਂ ਦੀ ਸਿੱਖਿਆ ਪ੍ਰਤੀ ਅਗਾਂਹਵਧੂ ਸੋਚ ਦਾ ਖ਼ੁਲਾਸਾ ਕੀਤਾ। ਉਨਾਂ ਕਿਹਾ ਕਿ ਜਿਸ ਸਕੂਲ ਵਿਚ ਉਹ ਖੜੇ ਹਨ ਇਸ ਨੇ ਇਲਾਕੇ ਭਰ ਦੀਆਂ ਲੜਕੀਆਂ ’ਚੋਂ ਜੱਜ, ਡਾਕਟਰ, ਪ੍ਰੋਫ਼ੈਸਰ, ਪ੍ਰਿੰਸੀਪਲ, ਅਧਿਆਪਕ ਅਤੇ ਸਮਾਜਕ ਤੇ ਸੰਵਿਧਾਨਕ ਅਹੁਦਿਆਂ ’ਤੇ ਬਿਰਾਜਮਾਨ ਅਨੇਕਾਂ ਸਿਰਕੱਢ ਸ਼ਖ਼ਸੀਅਤਾਂ ਪੈਦਾ ਕਰਕੇ ਇਹ ਸਾਬਤ ਕਰ ਵਿਖਾਇਆ ਹੈ ਕਿ ਲੜਕੀਆਂ ਕਿਸੇ ਵੀ ਪੱਖੋਂ ਲੜਕਿਆਂ ਨਾਲ਼ੋਂ ਘੱਟ ਨਹੀਂ ਹਨ।

ਮੰਚ ਸੰਚਾਲਨ ਕਰਦਿਆਂ ਸਕੂਲ ਦੀ ਅਧਿਆਪਕਾ ਗੁਰਮਿੰਦਰ ਕੌਰ ਨੇ ਭਰੂਣ ਹੱਤਿਆ ਸਬੰਧੀ ਉਕਤ ਸਮਾਗਮ ਨੂੰ ਸਫ਼ਲ ਬਨਾਉਣ ਵਿਚ ਔਰਤਾਂ ਦੇ ਯੋਗਦਾਨ ਵਜੋਂ ਸਕੂਲ ਦੀ ਪ੍ਰਿੰਸੀਪਲ ਬੀਬੀ ਜਰਨੈਲ ਕੌਰ, ਸਮਾਗਮ ਦੀ ਮੁੱਖ ਪ੍ਰਬੰਧਕ ਬੀਬੀ ਅਮਰਜੀਤ ਕੌਰ ਸੀ. ਡੀ. ਪੀ. ਓ. ਕੋਟਕਪੂਰਾ, ਸਮਾਗਮ ਦੀ ਪ੍ਰਧਾਨਗੀ ਕਰ ਰਹੇ ਬੀਬੀ ਪਰਮਜੀਤ ਕੌਰ ਢਿੱਲੋਂ ਪ੍ਰਧਾਨ ਨਗਰ ਕੌਂਸਲ ਕੋਟਕਪੂਰਾ ਦਾ ਉਚੇਚਾ ਜ਼ਿਕਰ ਕੀਤਾ ਅਤੇ ਲੜਕੀਆਂ ਦੀ ਸਿੱਖਿਆ ਨੂੰ ਸਮਰਪਿਤ ਇਲਾਕੇ ਦੇ ਇਸ ਪ੍ਰਥਮ ਸਕੂਲ ਦੀ ਮੁੱਢਲੀ ਅਧਿਆਪਕਾ ਸਵ: ਬੀਬੀ ਈਸ਼ਰ ਕੌਰ ਦੁਆਰਾ ਇਲਾਕੇ ਵਿਚ ਇਸਤਰੀ ਸਿੱਖਿਆ ਪ੍ਰਤੀ ਵਿੱਢੇ ਅਤੇ ਪੂਰ ਚੜਾਏ ਇਤਹਾਸਕ ਮਿਸ਼ਨ ਪ੍ਰਤੀ ਸਿਜਦਾ ਕੀਤਾ।

ਸ਼ਿਰਕਤ ਕਰਨ ਵਾਲ਼ੀਆਂ ਸ਼ਖ਼ਸੀਅਤਾਂ ਵਿਚ ਅਮਰਜੀਤ ਸਿੰਘ ਖੋਖਰ ਉਪ ਮੰਡਲ ਸਿੱਖਿਆ ਅਫ਼ਸਰ ਫ਼ਰੀਦਕੋਟ, ਗੁਰਦੀਪ ਸਿੰਘ ਨਿਵਾਡਾ ਅੰਕੜਾ ਅਧਿਕਾਰੀ ਫ਼ਰੀਦਕੋਟ, ਪ੍ਰੋਫ਼ੈਸਰ (ਡਾ.) ਪਰਮਿੰਦਰ ਸਿੰਘ ਤੱਗੜ ਯੂਨੀਵਰਸਿਟੀ ਕਾਲਜ ਜੈਤੋ, ਪ੍ਰਿੰਸੀਪਲ ਤੇਜਿੰਦਰ ਸਿੰਘ ਸਸਸਸ ਬਰਗਾੜੀ, ਨਰਿੰਦਰ ਸਿੰਘ ਨਿੰਦਾ ਨਗਰ ਕੌਂਸਲਰ, ਮਲਕੀਤ ਕੌਰ ਸਰਪੰਚ, ਸੁਰਿੰਦਰ ਕੁਮਾਰ ਮੁੰਜਾਲ ਸੁਪਰਡੈਂਟ ਸਿੱਖਿਆ ਵਿਭਾਗ, ਇਕਬਾਲ ਸਿੰਘ ਮੰਘੇੜਾ ਸੁਪਰਡੈਂਟ, ਪਰਮਜੀਤ ਕੌਰ ਲੈਕਚਰਰ, ਬਲਜੀਤ ਕੌਰ ਤੱਗੜ ਲੈਕਚਰਰ, ਰਾਜਿੰਦਰ ਕੌਰ ਬਾਜਵਾ, ਪਰਮਜੀਤ ਕੌਰ ਪੰਜਾਬੀ ਅਧਿਆਪਕਾ, ਹਰਦੀਪ ਸਿੰਘ ਮੰਘੇੜਾ, ਪਵਨ ਕੁਮਾਰ, ਨਵਦੀਪ ਕੱਕੜ, ਜਗਸੀਰ ਸਿੰਘ, ਉਦੇ ਰੰਦੇਵ ਸਮੇਤ ਸਮਾਜਕ ਸੁਰੱਖਿਆ ਇਸਤਰੀ ਅਤੇ ਬਲਾਕ ਵਿਕਾਸ ਵਿਭਾਗ ਬਲਾਕ ਕੋਟਕਪੂਰਾ ਦੇ ਸਮੂਹ ਕਰਮਚਾਰੀ ਅਤੇ ਸਕੂਲੀ ਵਿਦਿਆਰਥੀ ਸ਼ਾਮਲ ਹੋਏ। ‘ਜੀ ਆਇਆਂ’ ਕਹਿਣ ਦੀ ਰਸਮ ਸੀ. ਡੀ. ਪੀ. ਓ. ਅਮਰਜੀਤ ਕੌਰ ਨੇ ਨਿਭਾਈ ਅਤੇ ਧਨਵਾਦ ਅਮਰਜੀਤ ਸਿੰਘ ਖੋਖਰ ਉਪ ਮੰਡਲ ਸਿੱਖਿਆ ਅਫ਼ਸਰ ਵੱਲੋਂ ਕੀਤਾ ਗਿਆ। ਪ੍ਰੋਫ਼ੈਸਰ ਅਜਮੇਰ ਔਲਖ ਦਾ ਲਿਖਿਆ ਅਤੇ ਭਰੂਣ ਹੱਤਿਆ ਦੇ ਵਿਰੁੱਧ ਚੇਤਨਾ ਪੈਦਾ ਕਰਦਾ ਭਾਵਪੂਰਤ ਨਾਟਕ ਕੁਲਦੀਪ ਨਿਆਮੀਆਂ, ਜੌਹਨ ਮਸੀਹ, ਸਿਮਰਨ ਅਤੇ ਸਾਥੀਆਂ ਵੱਲੋਂ ਬਾਖ਼ੂਬੀ ਪੇਸ਼ ਕੀਤਾ ਗਿਆ ਅਤੇ ਵਿਦਿਆਰਥਣਾਂ ਨੇ ਗੀਤ ਅਤੇ ਨਾਚ ਵੰਨਗੀਆਂ ਪੇਸ਼ ਕੀਤੀਆਂ।

ਤਸਵੀਰ : ਕੋਟਕਪੂਰੇ ਦੇ ਕੁੜੀਆਂ ਵਾਲ਼ੇ ਸਕੂਲ ਵਿਚ ਪ੍ਰੋਫ਼ੈਸਰ ਅਜਮੇਰ ਔਲਖ ਦੁਆਰਾ ਲਿਖ਼ਿਤ ਨਾਟਕ ਦੀ ਪੇਸ਼ਕਾਰੀ ਦੀ ਝਲਕ ਅਤੇ ਸਰੋਤਿਆਂ ਵਿਚ ਬੈਠੇ ਹਨ ਮੁੱਖ ਮਹਿਮਾਨ ਮਨਤਾਰ ਸਿੰਘ ਬਰਾੜ ਮੁੱਖ ਪਾਰਲੀਮਾਨੀ ਸਕੱਤਰ, ਪਰਮਜੀਤ ਕੌਰ ਢਿੱਲੋਂ ਪ੍ਰਧਾਨ ਨਗਰ ਕੌਂਸਲ, ਅਮਰਜੀਤ ਸਿੰਘ ਖੋਖਰ ਉਪ ਮੰਡਲ ਸਿੱਖਿਆ ਅਫ਼ਸਰ ਅਤੇ ਹੋਰ ਪਤਵੰਤੇ।

11/08/12