ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਵਲੋਂ ਡਾ: ਹਰਕੇਸ਼ ਸਿੰਘ ਸਿੱਧੂ ਦਾ ਸਨਮਾਨ
ਕੁਲਜੀਤ ਸਿੰਘ ਜੰਜੂਆ

ਟੋਰਾਂਟੋ  – ਬੀਤੇ ਦਿਨੀਂ ਪੰਜਾਬ ਕੇਡਰ ਦੇ ਆਈ.ਏ.ਐਸ. ਅਫ਼ਸਰ ਡਾ: ਹਰਕੇਸ਼ ਸਿੰਘ ਸਿੱਧੂ ਆਪਣੇ ਸੰਖੇਪ ਦੌਰੇ ਦੌਰਾਨ ਟੋਰਾਂਟੋ ਪਧਾਰੇ। ਟੋਰਾਂਟੋ ਪਹੁੰਚਣ ਤੇ ਉਨ੍ਹਾਂ ਦਾ ਵੱਖੋ ਵੱਖ ਅਦਾਰਿਆਂ ਵਲੋਂ ਨਿੱਘਾ ਸਵਾਗਤ ਕੀਤਾ ਗਿਆ। ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਵਲੋਂ ਖਾਸ ਤੌਰ ਤੇ ਉਨ੍ਹਾਂ ਦੇ ਮਾਣ ਸਨਮਾਨ ‘ਚ ਵਿਲੇਜ਼ ਆਫ਼ ਇੰਡੀਆ ਬੈਂਕੁਅਟ ਹਾਲ ਵਿਖੇ ਸਮਾਰੋਹ ਦਾ ਆਯੋਜ਼ਨ ਕੀਤਾ ਗਿਆ। ਡਾ: ਸਿੱਧੂ ਦੇ ਸ਼ੁੱਭਚਿੰਤਕ ਅਤੇ ਪਾਠਕ ਭਾਰੀ ਗਿਣਤੀ ਚ‘ ਇਸ ਪ੍ਰੋਗਰਾਮ ‘ਚ ਸ਼ਿਰਕਤ ਕਰਨ ਲਈ ਪਹੁੰਚੇ ਹੋਏ ਸਨ। ਜਿਉਂ ਹੀ ਡਾ: ਸਿੱਧੂ ਹਾਲ ‘ਚ ਦਾਖਿਲ ਹੋਏ, ਚੇਅਰਮੈਨ ਅਜੈਬ ਸਿੰਘ ਚੱਠਾ ਨੇ ਤਾੜੀਆਂ ਦੀ ਗੂੰਜ ਚ‘ ਡਾ: ਸਿੱਧੂ ਦੇ ਗਲ ਹਾਰ ਪਾ ਕੇ ਉਨ੍ਹਾਂ ਦਾ ਸੁਆਗਤ ਕੀਤਾ। ਚਾਹ-ਪਾਣੀ ਪੀਣ ਉਪਰੰਤ ਪ੍ਰੋਗਰਾਮ ਦੀ ਸ਼ੁਰੂਆਤ ਹੋਈ। ਪਿਆਰਾ ਸਿੰਘ ਕੁੱਦੋਵਾਲ ਨੇ ਮੰਚ ਦੀ ਜੁੰਮੇਵਾਰੀ ਸੰਭਾਲਿਦਿਆਂ ਆਏ ਹੋਏ ਸਭ ਮਹਿਮਾਨਾਂ ਨੂੰ ਜੀ ਆਇਆਂ ਕਿਹਾ ਅਤੇ ਡਾ: ਹਰਕੇਸ਼ ਸਿੰਘ ਸਿੱਧੂ, ਦਲਬੀਰ ਸਿੰਘ ਕਥੂਰੀਆ ਅਤੇ ਗਿਆਨ ਸਿੰਘ ਕੰਗ ਨੂੰ ਪ੍ਰਧਾਨਗੀ ਮੰਡਲ ਵਿੱਚ ਸ਼ੁਸ਼ੋਬਤ ਹੋਣ ਲਈ ਸੱਦਾ ਦਿੱਤਾ।

ਫੇਰ ਲੜੀ ਸ਼ੁਰੂ ਹੋਈ ਵੱਖੋ-ਵੱਖ ਬੁਲਾਰਿਆਂ ਦੀ। ਪਿਆਰਾ ਸਿੰਘ ਕੁੱਦੋਵਾਲ ਨੇ ਵਾਰੋ ਵਾਰੀ ਹਾਜ਼ਿਰ ਬੁਲਾਰਿਆਂ ਨੂੰ ਮੰਚ ਤੇ ਸੱਦਿਆ। ਇੰਦਰਜੀਤ ਸਿੰਘ ਬੱਲ ਜੋ ਕਿ ਡਾ: ਸਿੱਧੂ ਦੇ ਪਰਮ ਮਿੱਤਰ ਹਨ ਨੇ ਉਨ੍ਹਾਂ ਬਾਰੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਅਕਸਰ ਤੁਸੀਂ ਸਰਕਾਰੀ ਸੇਵਾਵਾਂ ਤੋਂ ਰਿਟਾਇਰ ਹੋ ਕੇ ਸਰਪੰਚੀ ਕਰਦੇ ਤਾਂ ਬਹੁਤ ਲੋਕ ਦੇਖੇ ਹੋਣਗੇ ਪਰ ਸਰਪੰਚੀ ਤੋ ਲੈ ਕੇ ਸਰਕਾਰੀ ਵਕੀਲ, ਐਸ. ਡੀ. ਐਮ., ਡੀ. ਸੀ. ਅਤੇ ਐਡੀਸ਼ਨਲ ਡਾਇਰੈਕਟਰ ਦੇ ਅਹੁਦੇ ਤੱਕ ਪਹੁੰਚਣ ਵਾਲਾ ਵਿਅਕਤੀ ਕਦੀ ਨਹੀਂ ਵੇਖਿਆ ਜਾਂ ਸੁਣਿਆ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਡਾ: ਸਿੱਧੂ ਅਜਿਹੇ ਪਹਿਲੇ ਵਿਅਕਤੀ ਹਨ ਜੋ ਕਿ ਨਿਹਾਇਤ ਸ਼ਰੀਫ਼ ਅਤੇ ਸਾਦਾ ਜਿੰਦਗੀ ਜੀਉਣ ਵਾਲੇ ਇਕ ਇਮਾਨਦਾਰ ਅਫ਼ਸਰ ਅਤੇ ਬੇਬਾਕ ਲਿਖਾਰੀ ਹਨ ਜੋ ਕਿ ਸਮਾਜਿਕ ਬੁਰਾਈਆਂ ਅਤੇ ਉਨ੍ਹਾਂ ਤੋਂ ਛੁਟਕਾਰਾ ਪਾਉਣ ਲਈ ਕੁਝ ਨਾ ਕੁਝ ਲਿਖਦੇ ਰਹਿੰਦੇ ਹਨ। ਸਰਕਾਰੀ ਉੱਚ ਅਹੁਦੇ ਤੇ ਰਹਿੰਦਿਆਂ ਇਹ ਸਭ ਕੁਝ ਸਿਰਫ਼ ਮੁਮਕਿਨ ਹੀ ਨਹੀ ਪਰ ਮੁਸ਼ਕਿਲ ਵੀ ਹੈ ਪਰ ਡਾ: ਸਿੱਧੂ ਵਰਗੇ ਇਮਾਨਦਾਰ ਅਤੇ ਬੇਬਾਕ ਅਫ਼ਸਰ ਹੀ ਖੁੱਲ੍ਹ ਕੇ ਸਮਾਜਿਕ ਬੁਰਾਈਅਂ ਅਤੇ ਸਰਕਾਰੀ ਧੱਕੇਸ਼ਾਹੀ ਵਿਰੁੱਧ ਲਿਖ ਸਕਦੇ ਹਨ ਅਤੇ ਸਮਾਜ ਨੂੰ ਕੋਈ ਸੇਧ ਦੇ ਸਕਦੇ ਹਨ। ਸ: ਬੱਲ ਨੇ ਦੱਸਿਆ ਕਿ ਇੱਕ ਸਾਲ ਵਿੱਚ ਦੋ-ਦੋ ਜਮਾਤਾਂ ਪਾਸ ਕਰਨਾ ਅਤੇ ਕਾਲਿਜਾਂ ਦੀ ਸਹੁਲਤਾਂ ਤੋਂ ਰਹਿਤ ਪ੍ਰਾਈਵੇਟ ਤੌਰ ‘ਤੇ ਬੀ.ਏ. ਕਰਨ ਵਾਲੇ ਸ: ਸਿੱਧੂ, ਜਿੰਦਗੀ ਵਿੱਚ ਕੁੱਝ ਕਰਨ ਦੀ ਸੋਚ ਰੱਖਣ ਵਾਲੇ ਨੌਜੁਆਨਾਂ ਲਈ ਇੱਕ ਰੋਲ ਮਾਡਲ ਵੱਜੋਂ ਉਭਰੇ ਹਨ। ਬਤੌਰ ਲੇਖਕ ਡਾ: ਸਿੱਧੂ ਨੇ “ਸਾਚ ਕਹੂੰ", “ਮੱਸਿਆ ਦੀ ਖੀਰ” ਅਤੇ “ਪਿੰਡਾਂ ਵਿੱਚੋਂ ਪਿੰਡ ਸੁਣੀਦਾ” ਪਾਠਕਾਂ ਦੀ ਝੋਲੀ ਪਾਈਆਂ ਹਨ ਜੋ ਉਨ੍ਹਾਂ ਦੀ ਬੇਬਾਕ ਲੇਖਣੀ ਦੀ ਤਰਜ਼ਮਾਨੀ ਕਰਦੀਆਂ ਹਨ।

ਇਸ ਮਾਣਮੱਤੇ ਸਨਮਾਨ ਸਮਾਰੋਹ ਦੌਰਾਨ ਬਰੈਂਪਟਨ-ਸਪਰਿੰਗਡੇਲ ਲਿਬਰਲ ਰਾਈਡਿੰਗ ਐਸੋਸ਼ੀਏਸ਼ਨ ਦੇ ਪ੍ਰਧਾਨ ਸੁਖਦੇਵ ਸਿੰਘ ਲਿੱਧੜ, ਅਕਾਲੀ ਦਲ ਕੈਨੇਡਾ ਈਸਟ ਇਕਾਈ ਦੇ ਪ੍ਰਧਾਨ ਬੇਅੰਤ ਸਿੰਘ ਧਾਲੀਵਾਲ, ਐਨ.ਡੀ.ਪੀ.ਦੇ ਲੀਡਰ ਅਤੇ ਐਸੋਸ਼ੀਏਸ਼ਨ ਦੇ ਡਾਇਰੈਕਟਰ ਦਲਬੀਰ ਸਿੰਘ ਕਥੂਰੀਆ, ਅਹਿਮਦੀਆ ਜਮਾਤ ਤੋਂ ਚੌਧਰੀ ਇਫ਼ਤਿਖਾਰ, ਕਲ਼ਮ ਫਾਊਂਡੇਸ਼ਨ ਦੇ ਪ੍ਰਧਾਨ ਕੁਲਜੀਤ ਸਿੰਘ ਜੰਜੂਆ, ਪੰਜਾਬੀ ਡੇਲੀ ਤੋਂ ਡਾ: ਸੋਲੋਮਨ ਨਾਜ਼, ਬਰੈਂਪਟਨ ਵੈਸਟ ਤੋਂ ਪੀ.ਸੀ. ਪਾਰਟੀ ਦੇ ਨੁਮਾਇੰਦੇ ਰਣਦੀਪ ਸਿੰਘ ਸੰਧੂ, ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਦੇ ਸੰਤੋਖ ਸਿੰਘ ਸੰਧੂ, ਜਤਿੰਦਰ ਸਿੰਘ ਜਸਵਾਲ, ਗਿਆਨ ਸਿੰਘ ਕੰਗ, ਅਤੇ ਅਜੈਬ ਸਿੰਘ ਚੱਠਾ ਤੋਂ ਇਲਾਵਾ ਇੰਜੀਨਅਰ ਹਰਜੀਤ ਸਿੰਘ ਗਿੱਲ, ਸਤਵੰਤ ਸਿੰਘ ਬੋਪਾਰਾਏ, ਮਨਜੀਤ ਸਿੰਘ ਸੰਧੂ, ਗੁਰਮੀਤ ਸਿੰਘ, ਨਰਿੰਦਰ ਸਿੰਘ ਕਾਲੇਕਾ ਅਤੇ ਜੋਗਿੰਦਰ ਸੰਘੇੜਾ ਨੇ ਵੀ ਸੰਬੋਧਨ ਕੀਤਾ। ਐਸੋਸ਼ੀਏਸ਼ਨ ਦੇ ਪ੍ਰਧਾਨ ਲਖਵੀਰ ਸਿੰਘ ਗਰੇਵਾਲ ਅਤੇ ਖਜ਼ਾਨਚੀ ਜਗਜੀਤ ਸਿੰਘ ਸਾਚਾ, ਜੋ ਕਿ ਇਸ ਮੌਕੇ ਟੋਰਾਂਟੋ ਵਿੱਚ ਨਹੀ ਸਨ, ਨੇ ਖਾਸ ਤੌਰ ਤੇ ਫੋਨ ਕਰਕੇ ਪ੍ਰੋਗਰਾਮ ਲਈ ਸੁਭਇਛਾਵਾਂ ਦਿੱਤੀਆਂ ਅਤੇ ਡਾ: ਸਿੱਧੂ ਨੂੰ ਕੈਨੇਡਾ ‘ਚ ਜੀ ਆਇਆਂ ਕਿਹਾ। ਸਮੂਹ ਬੁਲਾਰਿਆਂ ਵਲੋਂ ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਵਲੋਂ ਡਾ: ਸਿੱਧੂ ਵਰਗੇ ਬੇਦਾਗ਼ ਅਫ਼ਸਰ ਦਾ ਸਨਮਾਨ ਕਰਨ ਲਈ ਐਸੋਸ਼ੀਏਸ਼ਨ ਦੇ ਨੁਮਾਂਇੰਦਿਆਂ ਨੂੰ ਵਧਾਈ ਦਿਤੀ।

ਅਖੀਰ ਵਿੱਚ ਡਾ: ਸਿੱਧੂ ਨੇ ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਦੇ ਅਹੁਦੇਦਾਰਾਂ ਨੂੰ ਕਮਿਉਨਿਟੀ ਦੇ ਬਿਜ਼ਨਸ ਅਦਾਰਿਆਂ ਨੂੰ ਇਕ ਬੈਨਰ ਥੱਲ੍ਹੇ ਇਕੱਠੇ ਕਰਕੇ ਉਨ੍ਹਾਂ ਨੂੰ ਆਉਂਦੀਆਂ ਦਰਪੇਸ਼ ਮੁਸ਼ਕਿਲਾਂ ਨੂੰ ਹੱਲ ਕਰਨ ਦੇ ਲਈ ਚੁੱਕੇ ਕਦਮਾਂ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਉਹ ਐਸੋਸ਼ੀਏਸ਼ਨ ਦੀ ਲੰਬੀ ਉਮਰ, ਸਿਹਤਯਾਬੀ ਅਤੇ ਕੰਮ-ਕਾਜ਼ ‘ਚ ਨਿਖਾਰ ਲਿਆਉਣ ਲਈ ਹਰ ਸੰਭਵ ਮੱਦਦ ਕਰਨਗੇ। ਪੰਜਾਬੀ ਬਿਜ਼ਨਸ ਪ੍ਰੋਫ਼ੈਸ਼ਨਲ ਐਸੋਸ਼ੀਏਸ਼ਨ ਕੈਨੇਡਾ ਵਲੋਂ ਡਾ: ਸਿੱਧੂ ਨੂੰ ਯਾਦਗਾਰੀ ਚਿੰਨ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਡਾ: ਸਿੱਧੂ ਨੇ ਇੰਜੀਨਅਰ ਹਰਜੀਤ ਸਿੰਘ ਗਿੱਲ ਦੁਆਰਾ ਲਿਖੀ ਕਿਤਾਬ “ਗਾਡੀ ਰਾਹ” ਵੀ ਰਿਲੀਜ਼ ਕੀਤੀ। ਸਨਮਾਨ ਸਮਾਰੋਹ ਤੋਂ ਬਾਅਦ ਆਏ ਹੋਏ ਮਹਿਮਾਨਾਂ ਨੇ ਵਿਲੇਜ਼ ਆਫ਼ ਇੰਡੀਆ ਦੇ ਲਜ਼ੀਜ਼ ਅਤੇ ਸੁਆਦਲੇ ਖਾਣੇ ਦਾ ਅਨੰਦ ਮਾਣਿਆ।

01/09/12