ਚੰਡੀਗੜ, ਦਸੰਬਰ, 17 : 'ਸਰਵ ਸਿੱਖਿਆ ਸੁਧਾਰ ਸਮਿਤੀ ਚੰਡੀਗੜ' ਵਲੋਂ ਸੰਸਥਾ ਦੇ ਚੇਅਰਮੈਨ  ਪ੍ਰਿੰਸੀਪਲ ਬਹਾਦਰ ਸਿੰਘ ਗੋਸਲ ਨੂੰ 'ਪੁਆਧੀ ਸੱਥ ਮੁਹਾਲੀ' ਵਲੋਂ 'ਮਾਸਟਰ ਸਕਰੁੱਲਾਂਪੁਰ ਐਵਾਰਡ' ਨਾਲ ਸਨਮਾਨਿਤ ਕਰਨ ਅਤੇ ਉਨਾਂ ਦੀ ਨਵੀਂ ਪੁਸਤਕ 'ਕੱਚੀਆਂ ਕੰਧਾਂ' ਲੋਕ-ਅਰਪਨ ਕਰਨ ਤੇ ਵਧਾਈ ਸਮਾਰੋਹ ਆਯੋਜਿਤ ਕੀਤਾ ਗਿਆ। ਇਸ ਐਵਾਰਡ ਲਈ ਉਨਾਂ ਨੂੰ ਨਕਦ ਰਾਸ਼ੀ, ਸ਼ਾਲ, ਮੋਮੈਂਟੋ ਅਤੇ ਕਿਤਾਬਾਂ ਦਾ ਸੈੱਟ ਭੇਟ ਕੀਤਾ ਗਿਆ। ਪ੍ਰਿੰਸੀਪਲ ਗੋਸਲ ਨੂੰ ਸਨਮਾਨ ਪ੍ਰਦਾਨ ਕਰਨ ਵਾਲੀਆਂ ਪ੍ਰਮੁੱਖ ਸ਼ਖਸ਼ੀਅਤਾਂ ਵਿੱਚ ਡਾ. ਨਿਰਮਲ ਸਿੰਘ ਸੰਸਥਾਪਕ ਪੰਜਾਬੀ ਸੱਥ, ਸ੍ਰ. ਮਨਮੋਹਨ ਸਿੰਘ ਦਾਊਂ ਪ੍ਰਧਾਨ ਪੁਆਧੀ ਪੰਜਾਬੀ ਸੱਥ, ਮੁੱਖ ਮਹਿਮਾਨ ਸ. ਗੁਲਜ਼ਾਰ ਸਿੰਘ ਸੰਧੂ, ਡਾ. ਗੁਰਨਾਇਕ ਸਿੰਘ, ਡਾ. ਜਸਪਾਲ ਕੌਰ ਕਾਂਗ ਅਤੇ ਡਾ. ਗੁਰਪਾਲ ਸਿੰਘ ਸੰਧੂ ਸ਼ਾਮਲ ਸਨ। ਪ੍ਰੋ. ਰਵਿੰਦਰ ਸਿੰਘ ਨੇ ਗੋਸਲ ਜੀ ਦੇ ਸਨਮਾਨ ਵਿੱਚ ਸਨਮਾਨ-ਪੱਤਰ ਪੜਿਆ ਅਤੇ ਡਾ. ਬਲਜੀਤ ਸਿੰਘ ਨੇ ਉਨਾਂ ਦੀ ਨਵੀਂ ਪੁਸਤਕ 'ਕੱਚੀਆਂ ਕੰਧਾਂ' ਬਾਰੇ ਵਿਸਥਾਰ ਵਿੱਚ ਜਾਣਕਾਰੀ ਪ੍ਰਦਾਨ ਕੀਤੀ। ਸਮਿਤੀ ਦੇ ਕਾਰਜਕਾਰੀ ਪ੍ਰਧਾਨ ਸ੍ਰੀ ਜਗਤਾਰ ਸਿੰਘ ਜੋਗ ਨੇ ਦੱਸਿਆ ਕਿ ਸਮਿਤੀ ਦੇ ਚੇਅਰਮੈਨ ਪ੍ਰਿੰਸੀਪਲ ਬਹਾਦਰ ਸਿੰਘ ਗੋਸਲ ਨੂੰ ਇਸ ਵਿਲੱਖਣ ਐਵਾਰਡ ਨਾਲ ਸਨਮਾਨਿਤ ਕੀਤਾ ਜਾਣਾ, ਸਮਿਤੀ ਦੇ ਸਮੂਹ ਮੈਂਬਰਾਂ ਲਈ ਬਹੁਤ ਹੀ ਮਾਣ ਦੀ ਗੱਲ ਹੈ।

ਸ੍ਰੀ ਗੋਸਲ ਨੇ ਆਪਣੀ ਨਵੀਂ ਪੁਸਤਕ 'ਕੱਚੀਆਂ ਕੰਧਾਂ' ਬਾਰੇ ਬੋਲਦਿਆਂ ਦੱਸਿਆ ਕਿ ਇਹ ਪੁਸਤਕ 65 ਮਿੰਨੀ ਕਹਾਣੀਆਂ ਦਾ ਇੱਕ ਸੰਗ੍ਰਹਿ ਹੈ ਜਿਸਨੂੰ ਲੋਕ ਅਰਪਨ ਕਰਨ ਸਮੇਂ ਡਾ. ਬਲਜੀਤ ਸਿੰਘ ਵੱਲੋਂ ਇਸਨੂੰ ਬਹੁਤ ਹੀ ਰੌਚਿਕ ਅਤੇ ਅਜੋਕੀਆਂ ਸਮਾਜਿਕ ਘਟਨਾਵਾਂ ਅਤੇ ਸਮਾਜਿਕ ਕਦਰਾਂ ਕੀਮਤਾਂ ਨੂੰ ਸਿੱਖਿਆ ਦੇ ਰੂਪ ਵਿੱਚ ਪ੍ਰਦਰਸ਼ਿਤ ਕੀਤਾ ਗਿਆ, ਦੱਸਿਆ ਹੈ। ਸਨਮਾਨ ਸਮਾਰੋਹ ਵਿੱਚ ਉਘੀਆਂ ਸ਼ਖਸ਼ੀਅਤਾਂ ਵਿੱਚ ਸ. ਪ੍ਰੀਤਮ ਸਿੰਘ ਭੋਪਾਲ, ਸਾਬਕਾ ਡੀ. ਪੀ. ਆਈ. ਪੰਜਾਬ, ਸ੍ਰੀ ਬੀ. ਆਰ. ਰੰਗਾੜਾ ਪ੍ਰਧਾਨ ਕਵੀ ਮੰਚ ਮੁਹਾਲੀ, ਸ੍ਰੀ ਸੇਵੀ ਰਾਇਤ ਪ੍ਰਧਾਨ ਵਿਗਿਆਨ ਸਾਹਿਤ ਕੇਂਦਰ ਅਤੇ ਸ. ਗੁਰਦਰਸ਼ਨ ਸਿੰਘ ਮਾਵੀ, ਸ੍ਰੀਮਤੀ ਦਲਜੀਤ ਕੌਰ ਦਾਊਂ ਅਤੇ ਹੋਰ ਪਤਵੰਤੇ ਹਾਜ਼ਰ ਸਨ।