ਲੰਡਨ: ਪਿਛਲੇ ਦਿਨੀ ਪੰਜਾਬੀ ਸਾਹਿਤ ਕਲਾ ਕੇਂਦਰ ਯੂ ਕੇ ਦਾ ਸਾਲਾਨਾ ਸਮਾਗਮ ਸਾਊਥਾਲ ਦੇ ‘ਮਿਲਨ ਪੈਲੇਸ’ ਵਿਚ ਨਿਹਾਇਤ ਸਫਲਤਾ ਸਹਿਤ ਸੰਪਨ ਹੋਇਆ। ਸਭਾ ਦੇ ਕਨਵੀਨਰ ਗੁਰਨਾਮ ਸਿੰਘ ਗਰੇਵਾਲ ਨੇ ਅੱਜ ਦੇ ਪਰੋਗਰਾਮ ਦੀ ਰੂਪ ਰੇਖਾ ਉਲੀਕ ਕੇ ਅੱਜ ਦੇ ਕਾਰਜ ਦਾ ਆਗਾਜ਼ ਕੀਤਾ। ਸਭਾ ਦੇ ਖ਼ਜ਼ਾਨਚੀ ਮਨਪ੍ਰੀਤ ਸਿੰਘ ਬੱਧਨੀਕਲਾਂ ਨੇ ਸਭਾ ਦੀਆਂ ਪਿਛਲੇ ਸਾਲ ਦੀਆਂ ਕਾਰਗ਼ੁਜ਼ਾਰੀਆਂ ਦਾ ਜਿ਼ਕਰੇ ਖ਼ੈਰ ਕੀਤਾ। ਉਪਰੰਤ ਸਭਾ ਦੇ ਪਰਧਾਨ ਡਾ.ਸਾਥੀ ਲੁਧਿਆਣਵੀ ਨੇ ‘ਬਰਤਾਨਵੀ ਸਕੂਲਾਂ, ਲਾਇਬਰੇਰੀਆਂ, ਪ੍ਰਿੰਟ ਅਤੇ ਪ੍ਰਸਾਰਣ ਮੀਡੀਆ ਵਿਚ ਪੰਜਾਬੀ ਭਾਸ਼ਾ ਦਾ ਭਵਿੱਖ’ ਦੇ ਵਿਸ਼ੇ ਉਤੇ ਡਿਸਕਸ਼ਨ ਪੇਪਰ ਪੜ੍ਹਿਆ ਜਿਸ ੳਤੇ ਇੰਗਲੈਂਡ ਭਰ ਤੋਂ ਆਏ ਵਿਦਵਾਨਾਂ ਨੇ ਭਰਪੂਰ ਬਹਿਸ ਕੀਤੀ। ਕੁੱਲ ਮਿਲਾ ਕੇ ਦੋ ਦਰਜਨ ਵਿਦਵਾਨਾਂ ਨੇ ਇਸ ਵਿਸ਼ੇ ਵਾਰੇ ਕਈ ਨਵੇਂ ਸੁਝਾਅ ਦਿੱਤੇ। ਇਸ ਪੇਪਰ ਵਿਚ ਪੱਲਿਓਂ ਪੈਸੇ ਦੇ ਕੇ ਕਿਤਾਬਾਂ ਛਪਵਾਉਣ, ਅਗ਼ਰੇਜ਼ੀ ਨਾਵਾਂ ਦਾ ਰੇਡੀਓ, ਟੀ.ਵੀ ਅਤੇ ਪ੍ਰਿੰਟ ਮੀਡੀਆ ਵਿਚ ਗ਼ਲਤ ਉਚਾਰਣ, ਹਿੰਦੀ ਫਿਲਮਾਂ ਵਿਚ ਪੰਜਾਬੀ ਨੂੰ ਗਲਤ ਢੰਗ ਨਾਲ ਪੇਸ਼ ਕਰਨ, ਯੂ ਕੇ ਵਿਚ ਜੰਮੇ ਪਲੇ ਬੱਚਿਆਂ ਨੂੰ ਸਹੀ ਢੰਗ ਨਾਲ ਪੰਜਾਬੀ ਦੀ ਸਿੱਖਿਆ ਦੇਣ ਵੱਲ ਕੋਸ਼ਸ਼ ਕਰਨੀ, ਇਥੋਂ ਦੇ ਪੰਜਾਬੀ ਦੇ ਸਿਲੇਬਸ ਵਿਚ ਸਹੀ ਪਾਠ ਪੁਸਤਕਾਂ ਦੀ ਨਿਯੁਕਤੀ ਅਤੇ ਲਾਇਬਰੇਰੀਆਂ ਵਿਚ ਪਈਆਂ ਪੰਜਾਬੀ ਪੁਸਤਕਾਂ ਨੂੰ ਨਾ ਇਸ਼ੂ ਕਰਾਉਣ ਦੀ ਸਮੱਸਿਆ ਆਦਿ ਵਾਰੇ ਨੁਕਤੇ ਉਠਾਏ ਗਏ ਸਨ।

ਨਾ ਸਿਰਫ ਹਾਜ਼ਰ ਦਾਨਿਸ਼ਵਰਾਂ ਨੇ ਹੀ ਆਪਣੇ ਵਿਚਾਰ ਪੇਸ਼ ਕੀਤੇ ਸਗੋਂ ਕਈਆਂ ਨੇ ਨਾ ਆ ਸਕਣ ਦੀ ਮਜਬੂਰੀ ਕਰਕੇ ਈ ਮੇਲਾਂ ਅਤੇ ਖਤਾਂ ਰਾਹੀਂ ਵੀ ਆਪਣੇ ਵਿਚਾਰ ਪ੍ਰਗਟ ਕੀਤੇ ਅਤੇ ਪੇਪਰ ਦੇ ਵਿਸ਼ੇ ਨੂੰ ਮਹੱਤਵਪੂਰਣ ਦਸਿਆ। ਇਸ ਸੈਸ਼ਨ ਦੇ ਪ੍ਰਧਾਨਗੀ ਮੰਡਲ ਵਿਚ ਕੌਂਸਲਰ ਰਣਜੀਤ ਧੀਰ, ਮੋਹਿੰਦਰਪਾਲ ਸਿੰਘ ਧਾਲੀਵਾਲ ਸਲੋਹ,  ਮਨਮੋਹਨ ਸਿੰਘ ਵੁਲਵਰਹੈਂਪਟਨ, ਕੌਂਸਲਰ ਮੋਤਾ ਸਿੰਘ ਲਮਿੰਗਟਨ ਸਪਾ ਅਤੇ ਮਨਜੀਤ ਕੌਰ ਪੱਡਾ ਸਸ਼ੋਭਤ ਸਨ। ਇਸ ਸੈਸ਼ਨ ਦੀ ਸਟੇਜ ਦੀ ਸੇਵਾ ਕੁਲਵੰਤ ਕੌਰ ਢਿਲੋਂ ਨੇ ਕੀਤੀ। ਚਾਹ ਪਾਣੀ ਦੀ ਬਰੇਕ ਪਿੱਛੋਂ ਦੂਜਾ ਸੈਸ਼ਨ ਸ਼ਰੂ ਕੀਤਾ ਗਿਆ। ਇਸ ਦੇ ਪਰਧਾਨਗੀ ਮੰਡਲ ਵਿਚ ਸੰਤੋਖ਼ ਧਾਲੀਵਾਲ ਨੌਟਿੰਘਮ, ਡਾਕਟਰ ਸੁਰਿੰਦਰ ਕੌਰ ਨਰੂਲਾ ਕਾਰਡਿਫ, ਦਲਵੀਰ ਕੌਰ ਵੁਲਵਰਹੈਂਪਟਨ ਤੇ ਕਿਰਪਾਲ ਸਿੰਘ ਪੂਨੀ ਕਵੈਂਟਰੀ ਅਤੇ ਸਾਥੀ ਲੁਧਿਆਣਵੀ ਸ਼ਾਮਲ ਸਨ।

ਸਭ ਤੋਂ ਪਹਿਲਾਂ ਬ੍ਰਿਟਨ ਦੀਆਂ ਦੋ ਪਰਮੁੱਖ ਸ਼ਖ਼ਸੀਅਤਾਂ ਨੂੰ ਸਨਮਾਨਤ ਕੀਤਾ ਗਿਆ। ਪ੍ਰੁਿਸੱਧ ਬਹੁ-ਪਰਤੀ ਕਵੀ ਵੀਰੇਂਦਰ ਪਰਹਿਾਰ ਵਾਰੇ ਅਜ਼ੀਮ ਸ਼ੇਖ਼ਰ ਨੇ ਜਾਣਕਾਰੀ ਦਿਤੀ ਅਤੇ ਚਿੱਤਰਕਾਰ ਕੰਵਲ ਧਾਲੀਵਾਲ ਵਾਰੇ ਸੰਤੋਖ਼ ਧਾਲੀਵਾਲ ਜੀ ਨੇ ਕੁਝ ਸ਼ਬਦ ਕਹੇ। ਉਪਰੰਤ ਉਨ੍ਹਾਂ ਦੋਹਾਂ ਨੂੰ ਇਕ ਪ੍ਰਮਾਣ ਪੱਤਰਾਂ ਨਾਲ ਸਨਮਾਨਤ ਕੀਤਾ ਗਿਆ ਤੇ ਉਨ੍ਹਾਂ ਦੀ ਦੇਣ ਨੂੰ ਸਲਾਹਿਆ ਗਿਆ। ਪਰਕਾਸ਼ ਸੋਹਲ ਦੀ ਕਾਵਿ ਪੁਸਤਕ ‘ਉਫਕ ਦੇ ਪਾਰ’ ਰੀਲੀਜ਼ ਕੀਤੀ ਗਈ। ਸੋਹਲ ਜੀ ਵਾਰੇ ਮਨਜੀਤ ਕੌਰ ਪੱਡਾ ਨੇ ਜਾਣਕਾਰੀ ਦਿਤੀ। ਦੇਵਿੰਦਰ ਨੌਰਾ ਦੀ ਕਾਵਿ-ਪੁਸਤਕ ‘ਟਾਵੇਂ ਟਾਵੇਂ ਤਾਰੇ’ ਵਾਰੇ ਸਾਥੀ ਲੁਧਿਆਣਵੀ ਨੇ ਕੁਝ ਸ਼ਬਦ ਬੋਲੇ। ਉਪਰੰਤ ਇਸ ਕਿਤਾਬ ਨੂੰ ਰੀਲੀਜ਼ ਕੀਤਾ ਗਿਆ। ਉਪਰੰਤ ਗੀਤਾਂ, ਗ਼ਜ਼ਲਾਂ ਅਤੇ ਕਵਿਤਾਵਾਂ ਦਾ ਨਿਹਾਇਤ ਦਿਲਚਸਪ ਪ੍ਰੋਗਰਾਮ ਹੋਇਆ ਜਿਸ ਦੀ ਕਾਰਵਾਈ ਅਜ਼ੀਮ ਸ਼ੇਖ਼ਰ ਨੇ ਨਿਭਾਈ। ਵੀਰੇਂਦਰ ਸ਼ਰਮਾ ਐਮ ਪੀ ਸਮੇਤ ਸਾਰੇ ਆਏ ਮਹਿਮਾਨਾਂ ਨੇ ਇਸ ਸੈਮੀਨਾਰ ਨੂੰ ਇਤਿਹਾਸਕ ਦੱਸਿਆ। ਅੰਤ ਵਿਚ ਸਭਾ ਦੇ ਪ੍ਰਧਾਨ ਡਾ.ਸਾਥੀ ਲੁਧਿਆਣਵੀ ਨੇ ਪੰਜਾਬੀ ਦੇ ਉਨ੍ਹਾਂ ਹਿਤੈਸ਼ੀਆਂ ਦਾ ਧੰਨਵਾਦ ਕੀਤਾ ਜਿਨ੍ਹਾਂ ਨੇ ਹਮੇਸ਼ਾ ਪੰਜਾਬੀ ਦੇ ਕਲਮੀ ਯੋਧਿਆਂ ਦਾ ਸਾਥ ਦਿਤਾ। ਆਪ ਨੇ ਆਪਣੇ ਸਾਥੀਆਂ ਮਨਪ੍ਰੀਤ ਸਿੰਘ ਬਧਨੀਕਲਾਂ, ਮਨਜੀਤ ਕੌਰ ਪੱਡਾ, ਗੁਰਨਾਮ ਸਿੰਘ ਗਰੇਵਾਲ ਅਤੇ ਕੁਲਵੰਤ ਕੌਰ ਢਿੱਲੋਂ ਵਲ੍ਹੋਂ ਦਿਤੇ ਸਹਿਯੋਗ ਦਾ ਵੀ ਧੰਨਬਾਦ ਕੀਤਾ। ਆਪ ਨੇ ‘ਮਿਲਨ ਪੈਲੇਸ’ ਦੀ ਮੈੇਨੇਜਮੈਂਟ ਦਾ ਖ਼ਾਸ ਤੌਰ ‘ਤੇ ਧੰਨਬਾਦ ਕੀਤਾ ਗਿਆ ਜਿਨ੍ਹਾ ਨੇ ਸਭਾ ਨੂੰ ਹਰ ਕਿਸਮ ਦੀ ਸਹੂਲਤ ਦੇਣ ਵਿਚ ਕੋਈ ਕਸਰ ਨਹੀਂ ਛੱਡੀ ਤੇ ਇੰਝ ਪੰਜਾਬੀ ਭਾਸ਼ਾ ਅਤੇ ਸਾਹਿਤ ਨਾਲ ਆਪਣਾ ਲਗਾਵ ਜ਼ਾਹਰ ਕੀਤਾ। ਲਜ਼ੀਜ਼ ਖਾਣਾ ਖਾ ਕੇ ਸਾਰਿਆਂ ਨੇ ਖ਼ੁਸ਼ੀ ਖ਼ੁਸ਼ੀ ਅਲਵਿਦਾ ਆਖੀ।

ਰੀਪੋਰਟ:ਅਜ਼ੀਮ ਸ਼ੇਖ਼ਰ-ਸਕੱਤਰ

11/05/17