ਐਤਵਾਰ 10 ਸਤੰਬਰ 2017 ਨੂੰ ਦੋ ਸੌ ਤੋਂ ਉੱਪਰ ਖਚਾ ਖਚਾ ਭਰੇ ਨੌਟਿੰਘਮ ਦੇ ਸ਼ਾਨਦਾਰ ਇੰਡੀਅਨ ਕਮੀਊਨਿਟੀ ਸੈਂਟਰ ਦੇ ਹਾਲ ’ਚ ਸੰਤੋਖ ਧਾਲੀਵਾਲ ਦਾ ਨਾਵਲ “ਸੁਲਘਦੇ ਸੁਪਨੇ” ਤੇ ਰਾਜਿੰਦਰਜੀਤ ਦੀਆਂ ਗਜ਼ਲਾਂ ਦੀ ਕਿਤਾਬ “ਸਾਵੇ ਅਕਸ” ਦਾ ਦੂਜਾ ਐਡੀਸ਼ਨ ਇੱਕ ਬਹੁ-ਭਾਸ਼ੀ ਕਵੀ ਦਰਬਾਰ ਦੌਰਾਨ ਰੀਲੀਜ਼ ਕੀਤੀਆਂ ਗਈਆਂ। ਪਰਧਾਨਗੀ ਦੀ ਕੁਰਸੀ ਲਈ ਝੜਪਾਂ ਤੋਂ ਬਚਣ ਲਈ ਇਸ ਬਾਰ ਨੌਟਿੰਘਮ ’ਚ ਪਰਧਾਨਗੀ ਮੰਡਲ ’ਚ ਕੇਵਲ ਦੋ ਕੁਰਸੀਆਂ ਹੀ ਲਾਈਆਂ ਗਈਆਂ ਸਨ ਜਿਨ੍ਹਾਂ ਤੇ 50+ ਅਸੋਸੀਏਸ਼ਨ ਦੇ ਪਰਧਾਨ ਹਰਭਜਨ ਸਿੰਘ ਬਾਂਸਲ ਤੇ ਇੰਡੀਅਨ ਸੈਂਟਰ ਦੇ ਪਰਧਾਨ ਵਿਕਟਰ ਮਾਹਲ ਹੀ ਬਿਰਾਜਮਾਨ ਸਨ। ਮੰਗਤ ਰਾਮ ਭਾਰਦਵਾਜ ਨੇ ਬਹੁਤ ਹੀ ਪਰਭਾਵਸ਼ਾਲੀ ਸਲਾਈਡਾਂ ਵਿਖਾ ਕੇ “ਸੁਲਘਦੇ ਸੁਪਨੇ” ਨਾਵਲ ਦਾ ਤੁਆਰਫ ਕਰਾਇਆ ਤੇ ਪੰਜਾਬੀ ਨਾਵਲਾਂ ਵਿਚਲੀਆਂ ਚੰਗੀਆਂ ਤੇ ਮਾੜੀਆਂ ਪਿਰਤਾਂ ਨੂੰ ਵਿਸਥਾਰ ਨਾਲ ਬਿਆਨਿਆ। ਆਪ ਨੇ ਸੰਤੋਖ ਧਾਲੀਵਾਲ ਦੇ ਇਸ ਨਾਵਲ ਦੀਆਂ ਖੂਬੀਆਂ ਤੇ ਕਮਜ਼ੋਰੀਆਂ ਦੀ ਵੀ ਨਿਠ ਕੇ ਵਿਆਖਿਆ ਕੀਤੀ। ਇਹ ਇੱਕ ਨਵਾਂ ਤਜੁਰਬਾ ਸੀ ਜਿਸਨੂੰ ਸਰੋਤਿਆਂ ਨੇ ਬਹੁਤ ਹੀ ਧਿਆਨ ਨਾਲ ਸੁਣਿਆ ਤੇ ਵੇਖਿਆ। ਲੰਮੇ ਬੋਰਿੰਗ ਪਰਚਿਆਂ ਤੋਂ ਪਾਸੇ ਹਟਵੀ ਇਸ ਨਵੀਂ ਵਿਧਾ ਨਾਲ ਸਰੋਤੇ ਪੂਰਾ ਸਮਾਂ ਜੁੜੇ ਰਹੇ 'ਤੇ ਸਾਥੀ ਲੁਧਿਆਣਵੀ, ਡਾ. ਕਰਨੈਲ, ਰਾਜਿੰਦਰਜੀਤ ਤੇ ਹੋਰਾਂ ਸਾਹਿਤਕਾਰਾਂ ਨੇ ‘ਸਾਵੇ ਅਕਸ’ ਨਾਵਲ ਰੀਲੀਜ਼ ਕੀਤਾ।

ਪ੍ਰੋਗਰਾਮ ਦੇ ਸ਼ੁਰੂ ’ਚ “ਆਤਮਕ ਸਾਇੰਸ (ਰੁਹਾਨੀਅਤ) ਤੇ ਬੋਲਦਿਆਂ ਸੁਖਦੇਵ ਬਾਂਸਲ ਨੇ ਕਈ ਨਵੇਂ ਤੱਥ ਪੇਸ਼ ਕੀਤੇ ਤੇ ਲੋਕਾਂ ਦੇ ਸਵਾਲਾਂ ਦੇ ਜਵਾਬ ਵੀ ਦਿੱਤੇ।

ਰਾਜਿੰਦਰਜੀਤ ਦੀ ਕਿਤਾਬ “ਸਾਵੇ ਅਕਸ” ਦਾ ਤੁਆਰਫ ਕਰਾਉਂਦਿਆਂ ਸੰਤੋਖ ਧਾਲੀਵਾਲ ਨੇ ਕਿਹਾ, “ਰਾਜਿੰਦਰਜੀਤ ਦੀ ਗਜ਼ਲ ਨੂੰ ਸਮਝਣ ਤੇ ਮਾਨਣ ਲਈ ਗੰਭੀਰ ਸੋਝੀ ਤੇ ਪੰਜਾਬੀ ਭਾਸ਼ਾ ਤੇ ਪਕੜ ਹੋਣੀ ਬਹੁਤ ਜ਼ਰੂਰੀ ਹੈ। ਰਾਜਿੰਦਰਜੀਤ ਪੰਜਾਬੋਂ ਬਾਹਰ ਬੈਠੇ ਗਜ਼ਲਗੋਆਂ ’ਚੋਂ ਉਂਗਲੀ ਤੇ ਗਿਣੇ ਜਾਣ ਵਾਲਿਆਂ ’ਚੋਂ ਇੱਕ ਹੈ ਜਿਸਨੇ ਪੰਜਾਬੀ ਗਜ਼ਲ ਦੇ ਵਿਹੜੇ ਨੂੰ ਸ਼ੰਗਾਰਿਆ ਹੈ। ਉਸਦੀ ਗਜ਼ਲ ’ਚ ਅੱਗੇ-ਪਿੱਛੇ ਕੀਤੇ ਸ਼ਬਦਾਂ ਦੀ ਬੀੜ ਸ਼ਬਦਾਂ ਦੇ ਮੈਅਨੇ ਬਦਲ ਦਿੰਦੀ ਹੈ। ਉਹ ਸ਼ਬਦਾਂ ਨੂੰ ਅਰਥਾਂ ਦੇ ਨਵੇਂ ਬਸਤਰ ਪਹਿਨਾ ਕੇ ਨਵੇਂ ਢੰਗ ਨਾਲ ਸਜਾਉਂਣ ਦੀ ਸੋਝੀ ਰੱਖਦਾ ਹੈ। ਉਸਦੀ ਗਜ਼ਲ ਦੇ ਇੱਕ ਸ਼ੇਅਰ ਤੋਂ ਦੂਜੇ ਸ਼ੇਅਰ ਤੱਕ ਜਿਹੜਾ ਵਕਫਾ ਹੁੰਦਾ ਹੈ ਉਹ ਪਾਠਕ ਦੇ ਕਈਆਂ ਪਲਾਂ ’ਚ ਲਟਕ ਜਾਂਦਾ ਹੈ। ਇਸਤੋਂ ਬਾਅਦ ਸਾਵੇ "ਅਕਸ ਰੀਲੀਜ਼" ਕੀਤੀ ਗਈ ਤੇ ਰਾਜਿੰਦਰਜੀਤ ਤੋਂ 10 ਮਿੰਟਾਂ ਲਈ ਉਸਦੀਆਂ ਗਜ਼ਲਾਂ ਸੁਣ ਕੇ ਸਰੋਤਿਆਂ ਨੇ ਰਸ ਮਾਣਿਆ।

‘ਫਿਫਟੀ ਪਲਸ ਸੰਸਥਾ’ ਨੇ ਸੰਤੋਖ ਧਾਲੀਵਾਲ ਨੂੰ ਉਨ੍ਹਾਂ ਦੀਆਂ ਵਿਲਖਣ ਸਾਹਿਤਕ ਅਤੇ ਦੂਜੀਆਂ ਪ੍ਰਾਪਤੀਆਂ ਲਈ ‘ਲਾਈਫ ਟਾਈਮ ਅਚੀਵਮੈਂਟ ਐਵਾਰਡ’ ਨਾਲ ਸਨਮਾਨਤ ਕੀਤਾ।

ਪਿਛਲੇ ਸਾਲਾਂ ਵਾਂਗ ਇਸ ਸਾਲ ਵੀ ਕਾਲਵਿੰਦਰਜੀਤ ਧਾਲੀਵਾਲ ਅਵਾਰਡ ਇੰਡੀਅਨ ਸੈਂਟਰ ’ਚ ਪੂਰੀ ਰੂਹ ਲਾ ਕੇ ਕੰਮ ਕਰਦੀ ਤੇ ਸੈਂਟਰ ਦੀ ਪ੍ਰਸਿੱਧੀ ਨੂੰ ਟੀਸੀਆਂ ਤੇ ਲੈ ਜਾਣ ਵਾਲੀ ਕੁੜੀ ਗੀਤਾ ਪਾਰਿਖ ਨੂੰ ਦਿੱਤਾ ਗਿਆ ਜਿਸਦਾ ਤੁਆਰਫ 50+ ਦੇ ਵਾਈਸ ਚੇਅਰਮੈਨ ਅਰੁਨ ਰਾਡੀਆ ਨੇ ਕਰਾਇਆ।

ਇਸ ਤੋਂ ਉਪਰੰਤ ਇੱਕ ਯਾਦਗਾਰੀ ਕਵੀ ਦਰਬਾਰ ਹੋਇਆ ਅਤੇ ਸਰੋਤਿਆਂ ਨਾਲ ਭਰੇ ਹਾਲ ਨੇ ਇਸਦਾ ਪੂਰਾ ਲੁਤਫ ਲਿਆ। ਇਹ ਨੌਟਿੰਘਮ ’ਚ ਪੱਚੀਵਾਂ ਸਾਲਾਨਾ ਕਵੀ ਦਰਬਾਰ ਸੀ। ਇਨ੍ਹਾਂ ਪੱਚੀ ਸਾਲਾਂ ’ਚ ਇੱਕ ਦੋਂ ਮਿੱਤਰਾਂ ਨੇ ਕਦੇ ਮਿਸ ਨਹੀਂ ਕੀਤਾ। ਮੈਂ ਖਾਸ ਕਰਕੇ ਸਾਥੀ ਲੁਧਿਅਣਾਵੀ ਦਾ ਤਹਿ ਦਿਲੋਂ ਧੰਨਵਾਦੀ ਹਾਂ ਜਿਸਨੇ ਹਮੇਸ਼ਾ ਮੇਰੇ ਸੱਦੇ ਤੇ ਆਂਣ ਕੇ ਆਂਪਣੀ ਹਾਜ਼ਰੀ ਲੁਆਈ ਹੈ। ਅੱਜ ਦੇ ਕਵੀ ਦਰਬਾਰ ’ਚ ਡਾ. ਦੇਵਿੰਦਰ ਕੌਰ, ਸਾਥੀ ਲੁਧਿਆਣਵੀ, ਕੌਂਸਲਰ ਮੋਤਾ ਸਿੰਘ, ਹਿੰਦੀ ਕਵਿਤ੍ਰੀ ਜੈਅ ਵਰਮਾ, ਸੁਰਿੰਦਰ ਸੀਹਰਾ, ਜਸਵਿੰਦਰ ਮਾਨ, ਅਜ਼ੀਮ ਸ਼ੇਖਰ, ਕੁਲਵੰਤ ਢਿੱਲੋਂ, ਡਾ. ਸਰਲਾ ਚੌਧਰੀ, ਸਤਿਪਾਲ ਡੁਲਕੂ, ਡਾ. ਕਰਨੈਲ, ਮੁਹਿੰਦਰਪਾਲ ਧਾਲੀਵਾਲ, ਹਰਮਿੰਦਰ ਨਾਗੀ, ਸੁਰਿੰਦਰ ਰਾਏ, ਸੰਤੋਖ ਹੇਅਰ, ਸੁਰਿੰਦਰਪਾਲ ਸਿੰਘ, ਕੁਲਵੰਤ ਸਿੰਘ ਢੇਸੀ, ਹਰਦੇਸ਼ ਬਸਰਾ ਨੇ ਆਪੋ-ਆਪਣੇ ਤਰੋ-ਤਾਜ਼ਾ ਕਲਾਮ ਪੜ੍ਹ ਕੇ ਸਮਾ ਬੰਨ੍ਹੀ ਰਖਿਆ।

ਕਵੀ ਦਰਬਾਰ ਦਾ ਸੰਚਾਲਨ ਗਜ਼ਲਗੋ ਰਾਜਿੰਦਰਜੀਤ ਨੇ ਕੀਤਾ।

15/09/17