10 ਅਗਸਤ, 17 : ਸੰਤ ਰਾਜਿੰਦਰ ਸਿੰਘ ਮਹਾਂਰਾਜ ਜੀ ਦੇ 71-ਵੇ ਜਨਮ ਦਿਨ ਦੇ ਸਬੰਧ ਵਿਚ ਨਿਸ਼ਕਾਮ ਸੇਵਾ ਕਮੇਟੀ, ਹੀਰਾ ਬਾਗ, ਗਲੀ ਨੰਬਰ- ਇਕ, ਕੱਚਾ ਮਲਿਕ ਰੋਡ, ਜਗਰਾਓਂ ਵਲੋਂ ਕਿਰਪਾਲ ਆਸ਼ਰਮ ਦੀ ਮੈਨੇਜਮੈਟ ਕਮੇਟੀ ਦੇ ਸਹਿਯੋਗ ਨਾਲ, 'ਤੀਆਂ ਤੀਜ ਦੀਆਂ' ਦਾ ਤਿਓਹਾਰ ਬੜੇ ਉਤਸ਼ਾਹ, ਜੋਸ਼-ਖਰੋਸ਼ ਅਤੇ ਧੂਮ-ਧੜੱਕੇ ਨਾਲ ਮਨਾਇਆ ਗਿਆ।

ਇਸ ਅਵਸਰ ਤੇ ਸਟੇਜ-ਸੰਚਾਲਕਾ ਦੀ ਕਾਰਵਾਈ, ਸਟੇਜਾਂ ਦੀ ਧਨੀ, ਬੀਬੀ ਸੰਦੀਪ ਕੌਰ ਧੰਜਲ (ਅਰਸ਼) ਐਂਕਰ, ਦੂਰ-ਦਰਸ਼ਨ ਜਲੰਧਰ ਦੇ ਹੱਥ ਵਿਚ ਸੀ। ਕਿਆ ਕਹਿਣੇ ਸਨ, ਉਸ ਦੀ ਸਟੇਜ-ਸੰਚਾਲਕੀ ਦੇ ! ਸਾਵਣ ਅਤੇ ਤੀਆਂ ਤੀਜ ਦੀਆਂ ਨਾਲ ਸਬੰਧਤ ਟੋਟਕਿਆਂ ਨਾਲ ਮੱਲੋ-ਮੱਲੀ ਜਾਨ ਭਰੀ ਜਾ ਰਹੀ ਸੀ, ਉਹ ਆਪਣੀ ਭੂਮਿਕਾ ਨਿਭਾਉਦੇ ਹੋਏ। ਦੂਰੋਂ-ਨੇੜਿਓਂ ਕੱਠੀਆਂ ਹੋਈਆਂ, ਸਜ-ਧਜਕੇ ਆਈਆਂ ਮੁਟਿਆਰਾਂ ਨੇ ਗਿੱਧੇ ਵਿਚ ਖੂਬ ਭੰਬੀਰੀਆਂ ਉਡਾਈਆਂ ਅਤੇ ਪੀਘਾਂ ਝੂਟਕੇ ਆਪਣਾ ਦਿਲ ਬਹਿਲਾਇਆ। ਸਮਾਗਮ ਦੌਰਾਨ ਸਰੋਤਿਆਂ ਦੇ ਮੰਨਰੰਜਨ ਲਈ ਗਾਇਕੀ ਖੇਤਰ ਦੀ ਜਾਣੀ-ਪਛਾਣੀ ਸੁਰੀਲੀ ਅਤੇ ਦਮਦਾਰ, ਬੁਲੰਦ ਅਵਾਜ, ਬੀਬੀ ਪਰਮਜੀਤ ਧੰਜਲ ਵੀ ਵਿਸ਼ੇਸ਼ ਤੌਰ ਤੇ ਹਾਜਰ ਸਨ, ਜਿਸ ਨੇ ਲੋਕ-ਗੀਤਾਂ ਅਤੇ ਬੋਲੀਆਂ ਦੀ ਲਗਾਤਾਰ ਛਹਿਬਰ ਲਾ ਕੇ ਸਮਾਗਮ ਨੂੰ ਮੰਨਰੰਜਨ ਦੀਆਂ ਹੋਰ ਵੀ ਸ਼ਿਖਰਾਂ ਉਤੇ ਪਹੁੰਚਾ ਦਿੱਤਾ।

ਨਿਸ਼ਕਾਮ ਸੇਵਾ ਕਮੇਟੀ ਦੀ ਪ੍ਰਧਾਨ ਬੀਬੀ ਸੁਰਿੰਦਰ ਕੌਰ ਬਰਾੜ ਜੀ ਦੀ ਸੁਚੱਜੀ ਅਗਵਾਈ ਹੇਠ ਸਮੂਹ ਕਮੇਟੀ-ਮੈਬਰਾਂ ਅਤੇ 'ਧਾਲੀਵਾਲ-ਪਰਿਵਾਰ' ਵਲੋਂ ਸਮਾਗਮ ਨੂੰ ਹਰ ਪੱਖ ਤੋਂ ਸਫਲਤਾ ਪੂਰਵਕ ਨੇਪਰੇ ਚਾੜਨ ਵਿਚ ਵਿਸ਼ੇਸ਼ ਯੋਗਦਾਨ ਪਾਇਆ ਗਿਆ। ਅੰਤ ਵਿਚ, ਇਸ ਅਵਸਰ ਤੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨ ਵਾਲੀ ਸ਼ਖਸ਼ੀਅਤ, ਬੀਬੀ ਸਰਬਜੀਤ ਕੌਰ ਅਪਾਰ ਸਿੰਘ ਮਿਉਨਿਸਪਲ ਕਮਿਸ਼ਨਰ ਜਗਰਾਓਂ ਅਤੇ ਬੀਬੀ ਪਰਮਿੰਦਰ ਕੌਰ ਨੇ ਗਿੱਧੇ ਦੀ ਟੀਮ ਨੂੰ ਯਾਦਗਾਰੀ ਚਿੰਨਾਂ ਨਾਲ ਸਨਮਾਨਿਤ ਕੀਤਾ। ਉਪਰੰਤ, ਨਿਸ਼ਕਾਮ ਸੇਵਾ ਕਮੇਟੀ ਦੁਆਰਾ ਇਨਾਂ ਦੋਵਾ ਹਸਤੀਆਂ ਨੂੰ ਵੀ ਫੁਲਕਾਰੀਆਂ ਅਤੇ ਸਨਮਾਨ-ਚਿੰਨ ਦੇ ਕੇ ਕਮੇਟੀ ਵਲੋਂ ਉੁਂਨਾਂ ਪ੍ਰਤੀ ਆਪਣੇ ਪਿਆਰ ਤੇ ਸਤਿਕਾਰ ਭਰੀਆਂ ਭਾਵਨਾਵਾਂ ਦਾ ਪ੍ਰਗਟਾਵਾ ਕੀਤਾ ਗਿਆ।

10/08/17