ਲੰਡਨ ਇਲਾਕੇ ਦੇ ਸਾਹਿਤਕ, ਸੰਗੀਤਕ ਖੇਤਰ ਨਾਲ ਜੁੜੀਆਂ ਹਸਤੀਆਂ ਅਤੇ ਸ਼ੁਭਚਿੰਤਕਾਂ ਵਲੋਂ ਮਹੀਨੇਵਾਰ ਇਕੱਤਰਤਾ ਤਹਿਤ ਪਿੰਕ ਸਿਟੀ ਹੇਜ ਵਿਖੇ ਸਾਹਿਤਕ ਮਹਿਫਲ ਦਾ ਪ੍ਰਬੰਧ ਕੀਤਾ ਗਿਆ।

ਇਸ ਮੌਕੇ ਪਰਮਜੀਤ ਪੰਮੀ, ਗਾਇਕ ਰਾਜ ਸੇਖੋਂ, ਗਾਇਕ ਪਾਲੀ ਜੀ, ਸ਼ਾਇਰ ਤੇ ਪੇਸ਼ਕਾਰ ਬਿੱਟੂ ਖੰਘੂੜਾ, ਨਾਵਲਕਾਰ ਰੂਪ ਢਿੱਲੋਂ, ਗੀਤਕਾਰ ਜਿੰਦ ਇਕਬਾਲ, ਬਲਬੀਰ ਢਿੱਲੋਂ, ਪਰਮ, ਗੁਰੀ ਧਾਲੀਵਾਲ, ਅਜੀਮ ਸ਼ੇਖਰ, ਫਿਲਮ ਤੇ ਰੰਗਮੰਚ ਕਲਾਕਾਰ ਚਰਨਜੀਤ ਸੰਧੂ, ਦੀਪ ਦੇਸੀ, ਜੈਸ, ਸੱਜਣ ਮਾਨ, ਕੁਲਦੀਪ ਧਾਲੀਵਾਲ, ਮਨਜਿੰਦਰ ਸਿੰਘ ਚਾਹਲ, ਗੁਰਮੀਤ ਸਿੱਧੂ, ਸਮਸ਼ੇਰ ਸਿੰਘ, ਜਗਜੀਤ ਸਿੰਘ, ਸਤਨਾਮ ਸਿੰਘ ਆਦਿ ਵਲੋਂ ਆਪੋ-ਆਪਣੀਆਂ ਸਾਹਿਤਕ ਰਚਨਾਵਾਂ ਰਾਹੀਂ ਲੜੀ ਨਾਲ ਲੜੀ ਜੋੜੀ ਰੱਖੀ। ਇਸ ਸਮਾਗਮ ਦੀ ਵਿਸ਼ੇਸ਼ਤਾ ਇਹ ਹੈ ਕਿ ਜਿੱਥੇ ਵਿਦੇਸ਼ੀ ਜ਼ਿੰਦਗੀ 'ਚ ਯਾਰਾਂ-ਦੋਸਤਾਂ ਦੀ ਢਾਣੀ 'ਚ ਮਿਲ-ਬੈਠਣ ਦੇ ਉਦਰੇਵੇਂ ਨੂੰ ਦੂਰ ਕੀਤਾ ਜਾਂਦਾ ਹੈ, ਉੱਥੇ ਹਰ ਵਾਰ ਕਿਸੇ ਨਾ ਕਿਸੇ ਅਜ਼ੀਮ ਸਖਸ਼ੀਅਤ ਨੂੰ ਮਾਨ ਸਨਮਾਨ ਵੀ ਦਿੱਤਾ ਜਾਂਦਾ ਹੈ। ਇਸ ਵਾਰ ਬਰਤਾਨਵੀ ਜੰਮਪਲ ਪੰਜਾਬੀ ਨਾਵਲਕਾਰ ਰੂਪ ਢਿੱਲੋਂ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਗਿਆ।

ਇਸ ਸਮੇਂ ਬਿੱਟੂ ਖੰਗੂੜਾ ਨੇ ਕਿਹਾ ਕਿ ਜਿੱਥੇ ਪੰਜਾਬੀ ਮਾਂ ਬੋਲੀ ਦੀ ਬੇਕਦਰੀ ਦੀਆਂ ਦੁਹਾਈਆਂ ਅਕਸਰ ਹੀ ਪਾਈਆਂ ਜਾਂਦੀਆਂ ਹਨ। ਅਜਿਹੇ ਦੌਰ 'ਚ ਰੂਪ ਢਿੱਲੋਂ ਇੱਕ ਚਾਨਣ ਮੁਨਾਰੇ ਵਾਂਗ ਹੈ, ਜਿਸਨੇ ਬਰਤਾਨਵੀ ਧਰਤੀ 'ਤੇ ਜਨਮ ਲੈ ਕੇ ਸਿਰਫ ਪੰਜਾਬੀ ਭਾਸ਼ਾ ਦਾ ਗਿਆਨ ਹੀ ਹਾਸਲ ਨਹੀਂ ਕੀਤਾ, ਸਗੋਂ ਆਪਣੇ ਲਿਖਣ ਦੇ ਹੁਨਰ ਨੂੰ ਵੀ ਪੰਜਾਬੀ 'ਚ ਪ੍ਰਵਾਨ ਚੜ੍ਹਾਉਣ ਦਾ ਤਹੱਈਆ ਕੀਤਾ ਹੈ। ਰਾਜ ਸੇਖੋਂ ਨੇ ਕਿਹਾ ਕਿ ਰੂਪ ਢਿੱਲੋਂ ਪੰਜਾਬ ਅਤੇ ਬਰਤਾਨਵੀ ਸਾਹਿਤ 'ਚ ਇੱਕ ਪੁਲ ਵਾਂਗ ਕੰਮ ਕਰ ਰਿਹਾ ਹੈ।

11/05/17